1. Ncinzi Jehova ncaakamucitila?

MBUTI mbomwakaba umwi Bakamboni ba Jehova? Ambweni mwakasaanguna kumvwa “makani mabotu” kuzwa kubazyali banu, kumubelesinyoko naa sicikolonyoko, naa ambweni kwiinda mumulimo wakukambauka wakuŋanda aŋanda. (Mk. 13:10) Mpoonya, kamboni umwi wakabelesya ciindi cinji alimwi anguzu kumuyiisya Bbaibbele. Nomwakali kwiiya, mwakatalika kumuyanda Jehova alimwi mwakaiya kuti awalo ulamuyanda. Jehova wakamukwela kukasimpe, aboobo lino mbwaanga muli sikwiiya wa Jesu Kristo mulijisi bulangizi bwakuyoopona buumi butamani. (Joh. 6:44) Cakutadooneka, mulamulumba kapati Jehova akaambo kakuti wakakulwaizya Kamboni umwi ikumuyiisya kasimpe alimwi akuti wakamutambula kuba mubelesi wakwe.

2. Ncinzi ncotutiibandike mucibalo eeci?

² Mbwaanga lino tulikazyi kasimpe, tulijisi coolwe cakugwasya bamwi kutusangana munzila iitola kubuumi. Ambweni cilakonzya kutuubila kukambauka kuŋanda aŋanda, pele ambweni cilakonzya kutuyumina kutalisya alimwi akusololela ziiyo zya Bbaibbele. Sena mbomulimvwa oobo? Ikuti naa kacili boobo, ambweni mulajana nzila zigwasya mucibalo eeci. Tulabandika citukulwaizya kugwasya bamwi kuba basikwiiya. Alimwi tulalanga-langa mbotukonzya kuzunda buyumuyumu ibutupa kuti katuwayawaya kusololela ciiyo ca Bbaibbele. Cakusaanguna, atulange-lange kaambo katupa kuba bamayi bamakani mabotu ikutali buyo bakambausi.

3. Nkaambo nzi ncotukambaukila?

³ Ciindi Jesu naakali anyika wakapa basikumutobela mulimo uuli muzibeela zyobilo. Cakusaanguna, wakabaambila kukambauka makani mabotu aa Bwami akubatondezya mbobakeelede kucita oobo. (Mt. 10:7; Lk. 8:1) Mucikozyanyo, Jesu wakabaambila basikwiiya bakwe ncobakeelede kucita ciindi bantu nobakali kuuswiilila mulumbe wa Bwami alimwi aciindi nobatakali kuuswiilila. (Lk. 9:2-5) Alimwi wakasinsima mbowakali kuyoosakana mulimo wakukambauka, akubaambila kuti bakali kuyoopa “bumboni kumasi oonse.” (Mt. 24:14; Mil. 1:8) Tacikwe makani ambobakali kuutambula bantu mulumbe, basikwiiya bakeelede kwaambila bantu kujatikizya Bwami bwa Leza alimwi ancobuyoocita.

4. Kweelana alugwalo lwa Matayo 28:18-20, ncinzi acimbi ncotweelede kucita kunze buyo lyakukambauka Bwami?

⁴ Ncintu nzi cabili Jesu ncaakalailila basikwiiya bakwe kuti kabacita? Wakabaambila kuyiisya bantu kutobela zintu zyoonse nzyaakalailila. Pele sena mulimo ooyu wakukambuka akuyiisya wakeelede kucitwa buyo mumwaanda wamyaka wakusaanguna kweelana ambobaamba bamwi? Peepe, Jesu wakaamba kuti mulimo ooyu uuyandika kapati wakali kuyoozumanana “mane kusikila kumamanino aabweende bwazintu.” (Amubale Matayo 28:18-20.) Kweelede kuti Jesu wakapa malailile aaya ciindi naakalibonya kuli basikwiiya bakwe bainda ku 500. (1Kor. 15:6) Alimwi muciyubunuzyo ncaakapa Johane, cakusalazya Jesu wakatondezya kuti basikwiiya bakwe boonse bakeelede kugwasya bantu kwiiya kujatikizya Jehova.—Ciy. 22:17.

5. Ncikozyanyo nzi Paulo ncaakabelesya kulugwalo lwa 1 Bakorinto 3:6-9, ikutondezya kweendelana kuliko akati kakukambauka alimwi akuyiisya?

⁵ Mwaapostolo Paulo wakakozyanisya mulimo wakugwasya bantu kuba basikwiiya kukusyanga zisyango, ikutondezya kuti nzinji nzyotweelede kucita kunze buyo lyakusyanga mbuto. Wakayeezya Banakorinto kuti: “Mebo ndakasyanga, Apolo wakatilila . . . Nywebo nobantu muli muunda wa Leza uulimwa.” (Amubale 1 Bakorinto 3:6-9.) Mbotuli babelesi “mumuunda wa Leza,” tatusyangi buyo mbuto, pele tulazitilila alimwi akuzilingula ikubona mbozikomena. (Joh. 4:35) Aciindi ncimunya tulizyi kuti, Leza nguukomezya zisyango.

6. Mbotuli bamayi, ino mulimo wesu ubikkilizya nzi?

⁶ Tuyandaula baabo ‘ibalibambilide kutambula buumi butamani.’ (Mil. 13:48) Kutegwa bantu aaba babe basikwiiya, tweelede kubagwasya (1) kuzimvwisya, (2) kuzisyoma, alimwi (3) akuzibelesya zintu nzyobaiya kuzwa mu Bbaibbele. (Joh. 17:3; Kol. 2:6, 7; 1Tes. 2:13) Boonse mumbungano, balakonzya kugwasyilizya basikwiiya Bbaibbele kwiinda mukubatondezya luyando alimwi akubapa kulimvwa kwaanguluka ciindi nobajanika kumiswaangano. (Joh. 13:35) Alimwi ooyo uusololela ciiyo ca Bbaibbele weelede kubelesya ciindi cinji alimwi anguzu kugwasya sikwiiya kuleka njiisyo zyakubeja naa zilengwa “ziyumu nta.” (2Kor. 10:4, 5) Cilakonzya kutola myezi minji kugwasya muntu kucinca bukkale bwakwe kutegwa mukuya kwaciindi akeelele kubbapatizyigwa. Pele kucinca ooko kulagwasya kapati.

7. Ncinzi citukulwaizya kucita mulimo wakukambauka alimwi akugwasya bantu kuba basikwiiya?

⁷ Nkaambo nzi ncotucita mulimo wakukambauka akugwasya bantu kuba basikwiiya? Kakusaanguna, akaambo kakuti tulamuyanda Jehova. Ciindi notusolekesya kutobela mulawo wakukambauka alimwi akugwasya bantu kuba basikwiiya, tutondezya luyando ndotujisi kuli Leza. (1Joh. 5:3) Amuyeeye kaambo aaka:  Luyando ndomujisi kuli Jehova lwakamupa kale kukambauka kuŋanda aŋanda. Sena cakali cuuba-uba kuutobela mulawo ooyu? Peepe. Nomwakaunka mumulimo wamumuunda ciindi cakusaanguna, sena mwakaliyoowede? Cakutadooneka, mwakaliyoowede! Pele mwakalizyi kuti, ooyu ngomulimo Jesu ngwayanda kuti mucite, aboobo mwakautobela mulawo ooyu. Kweelede kuti, mukuya kwaciindi cakatalika kumuubila kuunka mumulimo wakukambauka. Pele ino mulimvwa buti kujatikizya kusololela ciiyo ca Bbaibbele? Sena mulayoowa? Ambweni. Nokuba boobo, kuti mwamulomba Jehova kuzunda buyoofwu alimwi akuba abusicamba bwakutalisya ciiyo ca Bbaibbele, uyoomugwasya kuyumya makanze aanu kutegwa mugwasye bantu kuba basikwiiya.

8. Kweelana alugwalo lwa Marko 6:34, ncinzi cimbi cikonzya kutukulwaizya kuyiisya bantu?

⁸ Kabili, luyando ndotujisi kubantu lulatukulwaizya kubayiisya kasimpe. Aciindi cimwi, Jesu alimwi abasikwiiya bakwe bakalikatede kapati akaambo kakuti bakakambauka kwaciindi cilamfwu. Bakali kuyandika busena bwakulyookezyela, pele nkamu yabantu mpati yakabatobela. Akaambo kakuti wakabeetelela, Jesu wakatalika kuyiisya bantu aaba “zintu zinji.” (Amubale Marko 6:34.) Wakabeleka canguzu nokuba kuti wakalikatede. Nkaambo nzi? Nkaambo kakuti wakalibikka muciimo cabantu aabo. Wakabona mbobakapengede, mbobakali kuyandika bulangizi, aboobo wakali kuyanda kubagwasya. Ncimwi buyo amazuba aano. Bantu balijisi mapenzi alimwi bayandika bulangizi nokuba kuti balibonya kuti balikkomene alimwi akukkutila abuumi mbobapona. Bali mbuli mbelele zisweekede alimwi zitajisi mweembezi. Kujatikizya bantu aaba, mwaapostolo Paulo wakapandulula kuti banyina Leza alimwi banyina bulangizi. (Ef. 2:12) Bali ‘munzila iitola kulunyonyooko’! (Mt. 7:13) Twalanga bukkale bwakumuuya bwabantu aabo ibali mucilawo cesu, luyando alimwi alweetelelo lulatukulwaizya kubagwasya. Nzila iinda kubota mbotukonzya kubagwasya, nkubayiisya Bbaibbele.

9. Kweelana alugwalo lwa Bafilipi 2:13, mbuti Jehova mbwakonzya kumugwasya?

⁹ Ambweni mulawayawaya kutalisya ciiyo ca Bbaibbele akaambo kakuti mulizyi kuti muyooyandika ciindi cinji kulibambila alimwi akusololela ciiyo eeco. Kuti naa mbomulimvwa oobo, amumwaambile Jehova. Amumulombe kuti amugwasye kuba aluyandisisyo lwakujana ciiyo, akucisololela. (Amubale Bafilipi 2:13.) Mwaapostolo Johane utusyomezya kuti, Leza uyakwiingula mipailo iyeendelana akuyanda kwakwe. (1Joh. 5:14, 15) Aboobo mulakonzya kuba alusyomo lwakuti Jehova uyoomugwasya kuba aluyandisisyo lwakubeleka mulimo wakugwasya bantu kuba basikwiiya.

10-11. Ncinzi cikonzya kutupa kuwayawaya kusololela ciiyo ca Bbaibbele?

¹⁰ Tulaubikkila maano kapati mulimo wesu wakugwasya bantu kuba basikwiiya, nokuba kuti tulajana buyumuyumu ibukonzya kutupa kutaubeleka kusikila mpotugolela. Atulange-lange buyumuyumu mbotukonzya kujana alimwi ambotukonzya kubuzunda.

¹¹ Tulakonzya kwaalilwa kubeleka kusikila mpotugolela akaambo kabukkale. Mucikozyanyo, basikumwaya bamwi balicembeede naa balaciswa-ciswa. Sena muli mubukkale oobu? Ikuti naa mbocibede oobo, amubone ncotwakaiya kuzwa kubulwazi bwa COVID-19. Twakaiya kuti tulakonzya kusololela ziiyo zya Bbaibbele ziyaambele kwiinda mukubelesya fooni. Aboobo mulakonzya kutalisya ciiyo alimwi akucisololela kamuli kuŋanda yanu. Alimwi kuli bubotu abumbi. Bamwi balakonzya kukkomana kwiiya Bbaibbele ambweni aciindi bakwesu nobatalibambilide kukambauka. Nokuba boobo, bamwi inga balayanda kwiiya mafwumofwumo naa  masiku. Sena inga mwacikonzya kwiiya Bbaibbele amuntu aziindi zili boobu? Jesu wakamuyiisya Nikodemo masiku, iciindi Nikodemo ncaakali kuyanda.—Joh. 3:1, 2.

12. Ntwaambo nzi tutupa kusyoma kuti tulakonzya kuba bamayi bacibwene?

¹² Tulakonzya kuyeeya kuti tatukonzyi kusololela ciiyo ca Bbaibbele. Ambeni tulimvwa kuti, tweelede kuba aluzyibo lunji naa mwiiyi uucibwene katutanatalika kwiiya amuntu. Kuti naa mbomulimvwa oobo, atulange-lange twaambo totatwe tukonzya kumupa kusyoma kuti inga mwacikonzya kwiiya amuntu. Kakusaanguna, Jehova ubona kuti nywebo muleelela kuyiisya bamwi. (2Kor. 3:5) Kabili, Jesu, iwakapegwa “nguzu zyoonse kujulu alimwi aanyika,” wakamuzumizya kuyiisya. (Mt. 28:18) Katatu, amusyome kuti bamwi balakonzya kumugwasya. Jesu wakasyoma zintu nzyobakamuyiisya Bausyi kuti aambe, andinywe mulakonzya kucita mbubonya oobo. (Joh. 8:28; 12:49) Kuyungizya waawo, mulakonzya kulomba mulangizi wakabunga, mupainiya, naa sikumwaya uucibwene kutegwa amugwasye kutalisya alimwi akusololela ciiyo ca Bbaibbele. Nzila imwi momukonzya kuba mwiiyi uucibwene, nkwiinda mukusangana umwi wabasikumwaya aaba ciindi nasololela ciiyo ca Bbaibbele.

13. Nkaambo nzi ncotweelede kucinca-cinca nzila nzyotubelesya kuyiisya?

¹³ Cilakonzya kutuyumina kubelesya nzila alimwi azibelesyo zipya. Nzila mbotusololela ziiyo zya Bbaibbele yakacinca. Ibbuku ndyotubelesya kapati mukuyiisya, ilyakuti Amupone Kukabe Kutamani!, liyanda kuti katulibambila ciiyo alimwi akucisololela munzila iindene ambotwakali kucita kaindi. Kuli mincali misyoonto yakubala, mpoonya zibeela zinji nzyakubandisyanya asikwiiya. Ciindi notuyiisya, tubelesya kapati mavidiyo alimwi azibelesyo mbuli JW Library^®. Kuti kamutazyi mbozibelesyegwa zibelesyo eezyi amulombe muntu umwi kuti amugwasye kwiiya mbozibelesyegwa. Bantu cilabayumina kuleka zintu nzyobakazibila. Tacili cuuba-uba kulindiswe kutalika kubelesya nzila zipya. Pele kwiinda mulugwasyo lwa Jehova alimwi abamwi cilakonzya kutuubila kucinca alimwi buya akukkomana kuyiisya bantu. Kweelana ambwaakaamba mupainiya umwi, “eeyi nzila yakuyiisya ilakkomanisya kuli sikwiiya alimwi amwiiyi.”

14. Ncinzi ncotweelede kuyeeya ciindi notubelekela mucilawo cikatazya, alimwi ino lugwalo lwa 1 Bakorinto 3:6, 7 lutukulwaizya buti?

¹⁴ Ambweni tukkale mucilawo mocikatazya kutalisya ziiyo zya Bbaibbele. Bamwi bantu inga kabatauyandi naa kuukaka mulumbe wesu. Ncinzi cikonzya kutupa kusyoma kuti bantu bali boobu balakonzya kuuswiilila mulumbe wamu Bbaibbele? Amuyeeye kuti, bukkale bwabantu bulakonzya kucinca cakutayeeyela munyika eeyi yamapenzi, alimwi akupa kuti aabo ibatakali kuukkomanina mulumbe wesu batalike kuyeeya kuti bayandika kusololelwa a Leza. (Mt. 5:3) Aabo kaindi ibakali kwaakaka mabbuku eesu, kumbele bakazumina kuba aciiyo ca Bbaibbele. Alimwi tulizyi kuti Jehova ngo Simalelo wabutebuzi. (Mt. 9:38) Uyanda kuti tuzumanane kusyanga akutilila, pele Walo nguukomezya. (1Kor. 3:6, 7) Alimwi cilakulwaizya kuyeeya kuti, nokuba kuti tatusololeli ciiyo ca Bbaibbele aciindi cino, Jehova ulatulongezya akaambo kakubeleka canguzu kugwasya bantu. *

15. Ino Jehova ulimvwa buti ciindi umwi naazumina kwiiya akuzibelesya nzyaiya?

¹⁵ Jehova ulakkomana ciindi muntu naazumina kwiiya alimwi akwaambila bamwi kasimpe  aako. (Tus. 23:15, 16) Kweelede kuti Jehova ulikkomene kapati, ciindi nabona bantu bakwe kabakambauka akuyiisya cabusungu mazuba aano. Mucikozyanyo, nokuba kuti mumwaka wamulimo wa 2020 kwakali bulwazi bwanyika yoonse, kwakasololelwa ziiyo zya Bbaibbele zili, 7,705,765, calo cakagwasya bantu bali 241,994 kulyaaba kuli Jehova akubbapatizyigwa. Alimwi basikwiiya aaba bapya, abalo bayoosololela ziiyo zya Bbaibbele alimwi akugwasya bantu banji kuba basikwiiya. (Lk. 6:40) Kakunyina kudooneka, Jehova ulakkomana ciindi notutola lubazu mumulimo wakugwasya bantu kuba basikwiiya.

16. Ino mbaakani mbotu ninzi?

¹⁶ Kugwasya bantu kuba basikwiiya, mulimo uuyandika kubeleka canguzu, pele kwiinda mukugwasyigwa a Jehova tulakonzya kucita lubazu lwesu kwiinda mukuyiisya bantu kumuyanda Taateesu wakujulu. Sena inga twalibikkila mbaakani yakutalisya alimwi akusololela ciiyo ca Bbaibbele nociba comwe? Tulakonzya kugambwa kubona cikonzya kucitika, ikuti katulomba kwiiya Bbaibbele amuntu uuli woonse ngotwayaanya. Tulakonzya kusyoma kuti Jehova uyookulongezya kusolekesya kwesu.

17. Ino tuyoolimvwa buti kuti twacikonzya kusololela ciiyo ca Bbaibbele?

¹⁷ Eelo kaka ncoolwe cipati kukambauka alimwi akuyiisya bamwi kasimpe! Alimwi mulimo ooyu ulatupa kukkomana kapati. Mwaapostolo Paulo, iwakagwasya bantu banji mu Tesalonika kuba basikwiiya wakaamba boobu: “Ino bulangizi bwesu naa kukondwa kwesu naa musini wesu walukkomano kumeso aa Mwami wesu Jesu kuciindi cakubako kwakwe ninzi? Sena tamuli ndinywe? Masimpe, nywebo ndendinywe bulemu bwesu akukondwa kwesu.” (1Tes. 2:19, 20; Mil. 17:1-4) Bantu banji mazuba aano abalo mbobalimvwa oobo. Mucizyi Stéphanie abalumi bakwe, balo ibagwasya bantu banji kusika antaamu yakubbapatizyigwa baamba kuti, “Kunyina cintu cikkomanisya kapati kwiinda kugwasya bantu kulyaaba kuli Jehova.”