BA DON, umwi wa Bakamboni ba Jehova ku Canada, balasolekesya kubandika abantu bakkala mumigwagwa. Kujatikizya bantu ibali boobu, ba Don bakaamba kuti: “Mwaalumi umwi mukkala nzila wazina lya Peter wakali umwi wabantu ibakali kukkala mumigwagwa iwakalaatombe kapati. Wakali mukali alimwi tanaakali kubayanda bantu. Lyoonse wakali kulukaka lugwasyo ndobakali kumupa bantu.” Nokuba boobo, kwamyaka iili 14, ba Don cakukkazyika moyo bakasolekesya kuti bamugwasye mwaalumi ooyu imukkala nzila.

Bumwi buzuba, ba Peter bakabuzya ba Don kuti: “Ino mwandizumanana buti? Bantu boonse bandilanga buyo. Ino nywebo muyanda nzi?” Cabupampu ba Don bakabelesya magwalo otatwe kutegwa babasike amoyo ba Peter. Cakusaanguna, bakababuzya ba Peter kuti naa bakalizyi kuti Leza ulijisi zina limugeme akubalomba kuti balibale zina eelyo mu Bbaibbele kulugwalo lwa Intembauzyo 83:18. Mpoonya kutegwa babatondezye kaambo ncobakali kuyandila kubagwasya, ba Don bakabalomba ba Peter kuti babale lugwalo lwa Baroma 10:13, 14, ilwaamba kuti: “Muntu woonse wiita zina lya Jehova uyoofwutulwa.” Camamanino, ba Don bakabala lugwalo lwa Matayo 9:36 akwaambila ba Peter kuti abalo balibalile. Kapango aako kaamba kuti: “Lino naakabona makamu aabantu, [Jesu] wakabeetelela nkaambo bakali kupenzyegwa alimwi bakalimwaikide mbuli mbelele zitakwe mweembezi.” Mpoonya kumwi misozi kayeenda, ba Peter bakabuzya kuti: “Sena andime ndili umwi wambelele eezyi?”

Ba Peter bakatalika kucinca. Bakatalika kusamba, kugela malezu alimwi akusama zisani ziboneka kabotu nzyobakabapa ba Don. Ba Peter bakazumanana kulibamba kabotu.

Ba Peter bakajisi kabbuku mobakali kulemba zintu nzyobakali kucita buzuba abuzuba. Nzyobakalemba kumatalikilo aakabbuku aaka zyakali zibi zyalo-zyalo, pele nzyobakalemba kuzwa nobakaswaangana aba Don zyakali zibotu. Apeeji limwi bakalemba kuti: “Sunu ndaiya kujatikizya zina lya Leza. Lino naa ndayanda kupaila, ndinoopaila kuli Jehova. Ncibotu kapati kuzyiba zina lyakwe. Ba Don bakandaambila kuti Jehova inga waba Mulongwe wangu, walo uukonzya kundiswiilila kufwumbwa ciindi nondapaila akundipa kufwumbwa ncondamwaambila.”

 Majwi aamamanino ngobakalemba ba Peter, bakaalembela banabokwabo. Bakalemba kuti:

“Tandilimvwide kabotu sunu. Ndiyeeya kuti bwandiswaya bucembele. Pele nokuba kuti oobu mbobuzuba bwangu bwamamanino, ndilizyi kuti ndiyoomubona alimwi muparadaiso mulongwe wangu [Don]. Ikuti naa mubala majwi aaya nkokuti tandiciwo pe. Pele ikuti kumalila aangu mukabone mwaalumi uutalibonyi kuti uleelela kujanika waawo, mukabandike anguwe alimwi ndakomba mukabale kabbuku aaka kali mumubala wacikambwe [ikwaamba bbuku lyakali kubelesyegwa kwiiya Bbaibbele lyakuti “The Truth That Leads to Eternal Life,” eelyo ndyobakatambula myaka minji musyule]. * Bbuku eeli lyaamba kuti ndiyakumubona alimwi mulongwe wangu mu Paradaiso. Ndilaasyoma majwi aaya amoyo wangu woonse. Ndamana ndemunyoko uuyandwa, Peter.”

Nolyakamana dilwe, bacizyi baba Peter ba Ummi bakapandulula kuti: “Myaka yobilo yainda eeyi, ba Peter bakandiswaya. Kwaciindi cakusaanguna mumyaka minji, bakalibonya kukkomana. Mane buya bakali kumweta-mweta.” Ba Ummi bakaambila ba Don kuti: “Andime ndilalibala bbuku eeli nkaambo kufwumbwa majwi aakamusika amoyo mwanookwesu ayelede kuba majwi aalibedelede.” Kuyungizya waawo ba Ummi bakazumina kwiiya mubbuku lipya lyakuti Ncinzi Cini Bbaibbele Ncoliyiisya? aumwi wa Bakamboni ba Jehova.

Andiswe tulakonzya kubona muntu bwini mbwabede ikutali kulanga ciwa, tulakonzya kutondezya luyando lwini-lwini alimwi inga twacikonzya kukkazyikila moyo bantu bamisyobo yoonse. (1Tim. 2:3, 4) Twacita boobo, andiswe inga twacikonzya kubasika amoyo bantu ibali mbuli ba Peter, ibatalibonyi kabotu mumeso aabantu pele ibajisi moyo mubotu. Tulakonzya kusinizya kuti Leza, walo ‘uubona zili mumoyo,’ uyoopa kuti kasimpe kakomene mumyoyo yabantu beelela.—1Sam. 16:7; Joh. 6:44.