Usyi Rehoboamu wakali Solomoni, ooyo iwakalela mu Israyeli myaka iili 40. (1Bam. 11:42) Solomoni wakafwa mu 997 B.C.E. Mpoonya Rehoboamu wakaunka ku Sekemu kulubazu lwakunyika lwa Jerusalemu kutegwa akananikwe kuba mwami. (2Mak. 10:1) Ikuti naa mweezyeezya, sena Rehoboamu wakaliyoowede kujatikizya kutobela mikondo ya Solomoni, ooyo iwakaba ampuwo akaambo kabusongo bwakwe bulibedelede? Mbuti Rehoboamu mbwaakali kunga wabona kuti busongo bwakwe bwakubamba twaambo tukatazyide bwakali afwaafwi kusunkwa?

Kweelede kuti Rehoboamu wakakatazyigwa kapati azyakali kucitika mu Israyeli. Mukuya kwaciindi, baiminizi babantu bakaboola kulinguwe akumwaambila cacigaminina nzyobakali kuyanda kuti acite, bakati: “Uso wakapa kuti joko lyesu lituminye. Pele ikuti naa yebo uubye-ubye mukuli wauso mulemu alimwi akutulemununa kujoko lyakwe lilema ndyaakatubikka, tulakubelekela.”—2Mak. 10:3, 4.

Kweelede kuti Rehoboamu cakamukatazya kusala. Kuti naakasala kucita zintu nzyobakali kuyanda bantu, nkokuti walo, mukwasyi wakwe, alimwi abasinkuta bakwe nibakaleka kupona buumi bwakulikondelezya alimwi akulangila kucitilwa zintu zinji kubantu. Kulubazu lumwi, ikuti naakakaka, bantu nobakamuzangila. Ino wakeelede kucita nzi? Mwami mupya ooyu wakasaanguna kubuzya bapati ibakali basikupa lulayo ba Solomoni. Pele alimwi, Rehoboamu wakabuzya-buzya balombe, bamuselanyina. Kwiinda mukutobela lulayo lwabalombenyina, Rehoboamu wakasala kubeendelezya calunya bantu. Wakaingula kuti: “Mebo ndilapa kuti joko lyanu liindile kumulemena alimwi ndilamuyungizizya atala aajoko eelyo. Taata wakamuumya miluso, pele mebo ndiyoomuumya miluso yamamvwa.”—2Mak. 10:6-14.

Sena kuli ncotukonzya kwiiya kuliceeci? Kwaamba masimpe, kutobela lulayo lwabapati, nkokuti aabo basimide kumuuya, lyoonse kulagwasya. Akaambo kakuti balaaluzyibo lunji, balakonzya kubona icikonzya kucitika akaambo kakusala nkotukonzya kucita, aboobo inga batupa lulayo lugwasya.—Job. 12:12.

Kweelana abuzangi bwakacitika, Rehoboamu wakabunganya mpi yakwe. Pele Jehova wakatuma musinsimi Semaya kuyoobaambila kuti: “Mutaunki kuyoolwana banabokwanu bana Israyeli pe. Umwi aumwi wanu weelede kupiluka kuŋanda yakwe, nkaambo ndime ndapa kuti cicitike boobu.”—1Bam. 12:21-24. *

Kutasola buya kulwana? Mulakonzya kweezyeezya mbwaakakatazyigwa mumoyo Rehoboamu! Ino bantu bakali kuyoomuyeeyela buti mwami ooyo iwakakongede bantu bakwe kuti uyoobasubula ‘amiluso yamamvwa’ pele lino waile kubuleka buyo buzangi oobu bugambya? (Amweezyanisye 2 Makani 13:7.) Nokuba boobo, mwami alimwi ampi zyakwe “bakaswiilila jwi lya Jehova akupiluka kumaanda aabo, kweelana ambwaakabaambila Jehova.”

Ino ncinzi ncotwiiya? Ncamaano kumuswiilila Leza nokuba kuti kucita boobo kulakonzya kupa kuti tusampaulwe. Kumvwida Leza kupa kuti tukkomaninwe alimwi akulongezyegwa anguwe.—Dt. 28:2.

Ino ncinzi ncaakacita Rehoboamu? Wakamvwida akwaaleka makanze aakwe ngaakajisi aakulwana cisi cipya, akubikkila maano kukuyaka minzi muzilawo zyamisyobo ya Juda a Benjamini yalo njaakacili kweendelezya. Alimwi “wakiiyumya kapati” minzi minji. (2Mak. 11:5-12) Kwiinda zyoonse, kwaciindi cili mbocibede wakakakatila kumilawo ya Jehova. Ciindi bwami bwamisyobo iili kkumi bwa Israyeli kabuli aansi abweendelezi bwa Jeroboamu nobwakatalika kukomba mituni, banji ‘bakaba kulubazu lwa Rehoboamu’ kwiinda mukuunka ku Jerusalemu kuyakwiiminina bukombi bwakasimpe. (2Mak. 11:16, 17) Aboobo, kumvwida kwa Rehoboamu kwakapa kuti bwami bwakwe buyume.

Nokuba boobo, ciindi bwami bwakwe nobwakakkazikizyigwa, Rehoboamu wakacita cintu cimwi catakali kuyeeyelwa. Wakasiya mulawo wa Jehova akutobela bukombi bwakubeja. Nkaambo nzi? Sena wakali kucita zyoonse eezyi akaambo kakuyungwa abanyina, balo ibakali bana Amoni? (1Bam. 14:21) Kufwumbwa naa ncinzi cakamupa kucita boobo, cisi coonse cakamutobela. Aboobo Jehova wakazumizya Mwami Sisaki wa Egepita kuzunda minzi minji yaba Juda, nokuba kuti Rehoboamu wakaliikwabilide.—1Bam. 14:22-24; 2Mak. 12:1-4.

Bukkale bwakaindila kubija ciindi Sisaki alimwi ampi yakwe nobakasika kuti balwane Jerusalemu, mwalo mwaakali kulela Rehoboamu. Aciindi aawa, Semaya imusinsimi wakaamba mulumbe wa Leza kuli Rehoboamu alimwi abasilutwe bakwe, wakuti: “Nywebo mwakandisiya, aboobo andime ndilamusiya akumwaaba mumaanza aa Sisaki.” Ino Rehoboamu wakacita buti kujatikizya mulumbe walulayo ooyu? Wakautambula! Bbaibbele lyaamba kuti: “Basilutwe bamu Israyeli amwami bakalibombya akwaamba kuti: ‘Jehova uliluleme.’” Aboobo Jehova wakamuvwuna Rehoboamu alimwi a Jerusalemu kuzwa kulunyonyooko.—2Mak. 12:5-7, 12.

Aboobo, Rehoboamu wakazumanana kweendelezya bwami bwakumusanza. Katanafwa, wakabapa zipego bana bakwe basankwa banji, boobo, Rehoboamu kutegwa batakamuzangili Abija mwanookwabo alimwi asimulyazina. (2Mak. 11:21-23) Kwiinda mukucita wakatondezya bupampu bwalo mbwaatakatondezya kumatalikilo.

Nokuba kuti Rehoboamu wakasoleka kucita zintu zimwi zibotu, wakaalilwa kumukkomanisya Leza. Mboobu Bbaibbele mbolibupandulula bweendelezi bwakwe: “Wakacita zibi.” Nkaambo nzi? Akaambo kakuti “tanaakabamba moyo wakwe kuyandaula Jehova.”—2Mak. 12:14.

Amubone ncocaamba eeci: Rehoboamu zimwi ziindi wakali kumumvwida Leza. Alimwi wakacita zintu zimwi zibotu kubantu ba Jehova. Pele wakaalilwa kubamba cilongwe cibotu a Jehova naa kutondezya kuti wakaliyandide kapati kumukkomanisya. Aboobo wakacita zintu zibi alimwi akutalika bukombi bwakubeja. Lino mulakonzya kulibuzya kuti: ‘Ciindi Rehoboamu naakali kulutobela lulayo lwa Leza, sena wakali kucita boobo akaambo buyo kabantu bamwi ikutali akaambo  kakweempwa kuzwa ansi amoyo alimwi akuyanda kukkomanisya Leza?’ (2Mak. 11:3, 4; 12:6) Mukuya kwaciindi, wakatalika alimwi kucita zintu zibyaabi. Eelo kaka wakaliindene kapati abasyaanyinakulu, Mwami Davida! Masimpe, Davida wakali kulubizya, pele ncaakatondezya kapati mubuumi bwakwe ncakuti wakali kumuyanda Jehova, wakalilyaabide kubukombi bwakasimpe alimwi wakeempwa ncobeni kuzibi zyakwe.—1Bam. 14:8; Int. 51:1, 17; 63:1.

Cakutadooneka, kuli ciiyo ncotukonzya kwiiya kuli Rehoboamu. Cilakulwaizya ciindi bantu nobaijanina nzyoiyandika mikwasyi yabo alimwi akusolekesya kuzuzikizya zintu zimwi ziyandika kapati. Pele kutegwa tukkomaninwe a Leza, tweelede kusaanguna kusumpula bukombi bwakasimpe alimwi akukakatila kulimbubo.

Eeci ciyookonzyeka kuti naa twasolekesya kuzumanana kumuyanda kapati Jehova. Mbubwenya mbotuusosela mulilo kutegwa utazimi, tweelede kuzumanana kumuyanda kapati Leza kwiinda mukwiiya Jwi lyakwe abuzuba, kuzinzibala kuyeeya nzyotubala, alimwi akuzumanana kupaila. (Int. 1:2; Rom. 12:12) Kuti twacita oobo, luyando lwesu kuli Jehova luyootukulwaizya kumukkomanisya muzintu zyoonse nzyotucita. Ciindi notwabisya, luyootukulwaizya kutondezya kweempwa kwini-kwini. Mukwiimpana a Rehoboamu, tatukazungaani mubukombi bwakasimpe.—Jud. 20, 21.