1. Ino lugwalo lwa Intembauzyo caandaano 15:​1-5 inga lwatugwasya buti?

 MUCIBALO cainda, twakaiya kuti babelesi ba Jehova balyaabide balakonzya kuba beenzu mutente lyakwe lyamaambilambali kwiinda mukuba acilongwe ciyumu anguwe. Pele ino ncinzi ncotweelede kucita kutegwa tube beenzu bakwe? Intembauzyo caandaano 15 ilaamba makani manji kujatikizya kaambo aaka. (Amubale Intembauzyo 15:​1-5.) Intembauzyo eeyi ilatondezya ncotweelede kucita kutegwa tube acilongwe ciyumu a Leza.

2. Ino ncinzi cilangilwa kuti ncecakapa kuti Davida aambe kujatikizya tente lya Jehova?

² Intembauzyo caandaano 15 ilatalika amibuzyo yakuti: “O Jehova, ino nguni uukonzya kuba mweenzu mutente lyako? Ino nguni uukonzya kukkala mucilundu cako cisalala?” (Int. 15:1) Ciindi sintembauzyo Davida naakali kwaamba “tente” lya Jehova, kweelede kuti wakali kuyeeya tente lyakukombela ilyakali ku Gibeoni kwaciindi cili mbocibede. Davida alimwi wakaamba ‘cilundu ca Leza cisalala,’ ambweni aawa wakali kwaamba tente lyakali acilundu ca Zioni mu Jerusalemu. Makkilomita aali mbwaabede kumusanza a Gibeoni, Davida wakapanga tente akubikka bbokesi lyacizuminano mulindilyo kusikila ciindi tempele nolyakayakwa.—2Sam. 6:17.

3. Nkaambo nzi ncotweelede kwiibikkila maano Intembauzyo caandaano 15? (Amubone acifwanikiso.)

³ Bunji bwabana Israyeli tiibakali kubelekela atente lyakukombela alimwi mbasyoonto ibakali kunjila mutente imwakabikkidwe bbokesi lyacizuminano. Pele babelesi ba Jehova boonse basyomeka, bakali kukonzya kuba beenzu mutente lyakwe lyamaambilambali kwiinda mukuzumanana kuba balongwe bakwe. Eeci toonse ncotuyanda kucita. Intembauzyo caandaano  15 itwaambila zintu nzyotweelede kucita kutegwa tuzumanane kuba balongwe ba Jehova.

AMWEENDE KAMUNYINA KAMPENDA ALIMWI KAMUCITA ZINTU ZILULEME

4. Tuzyi buti kuti kubbapatizyigwa tacili ncecintu cilikke Jehova ncayanda kulindiswe? (Isaya 48:1)

⁴ Ku Intembauzyo 15:​2, mulongwe wa Leza upandululwa kuti “nguyooyo weenda kanyina kampenda, uucita zintu ziluleme.” Ibbala lyakuti “weenda” alimwi alyakuti “uucita,” oonse obilo apandulula kucita cintu cimwi munzila iizumanana. Pele sena masimpe kuti tulakonzya ‘kweenda katunyina kampenda’? Inzya. Nokuba kuti kunyina muntu uulondokede, Jehova uyootubona kuti ‘tuleenda katunyina kampenda’ ikuti katusolekesya kusikila mpotugolela kumumvwida. Ciindi notwakalyaaba kuli Leza alimwi akubbapatizyigwa, akali matalikilo buyo aakweenda a Leza. Mucikozyanyo, kaindi ikuba buyo muna Israyeli tiicakali kwaamba kuti muntu wakali kweelela kuba mweenzu wa Jehova. Bamwi bakali kumwiita, pele ikutali “munzila yakasimpe ayabululami.” (Amubale Isaya 48:1.) Kutegwa batondezye kuti bakaliyandide ncobeni kuba beenzu ba Jehova, bana Israyeli bakeelede kwiiya zyeelelo zya Jehova alimwi akuzitobela. Mbubwenya buyo, kutegwa tutambulike kuli Leza mazuba aano, zinji nzyotweelede kucita kunze buyo lyakubbapatizyigwa alimwi akuyanzana ambungano ya Bunakristo. Tweelede kuzumanana ‘kucita zintu ziluleme.’ Ino inga twacita buti oobo?

5. Ino kumvwida Jehova muzintu zyoonse caamba nzi?

⁵ Kuli Jehova, ‘kweenda katunyina kampenda’ alimwi ‘akucita zintu ziluleme’ takugoleli buyo akujanika kumiswaangano ku Ŋanda ya Bwami. (1Sam. 15:22) Tweelede kusolekesya kumumvwida Leza mumbazu zyoonse zyabuumi bwesu, nociba ciindi notuli tolikke. (Tus. 3:6; Muk. 12:​13, 14) Cilayandika kapati kumumvwida Jehova nomuba muzintu zilibonya kuti taziyandiki kapati. Kucita boobo,  kutondezya kuti tulamuyanda alimwi awalo uyootuyanda kapati.—Joh. 14:23; 1Joh. 5:3.

6. Kweelana alugwalo lwa Bahebrayo 6:​10-12, ncintu nzi ciyandika kapati kwiinda milimo yakusyomeka njotwakacita musyule?

⁶ Jehova ulalumba kapati kuzintu nzyotwakamucitila musyule. Nokuba boobo, milimo mibotu njotwakacita musyule ilikke taikonzyi kupa kuti tuzumanane kuba beenzu mutente lya Jehova. Eeci cilisalazyidwe kulugwalo lwa Bahebrayo 6:​10-12. (Amubale) Jehova kunyina nakonzya kwiiluba milimo mibotu njotwakacita musyule. Pele uyanda kuti tuzumanane kumubelekela amoyo wesu woonse “kusikila kumamanino.” Unooli mulongwe wesu mane kukabe kutamani “ikuti naa tiitwatyompwa.”—Gal. 6:9.

AMWAAMBE MASIMPE MUMOYO WANU

7. Ino caamba nzi kwaamba masimpe mumoyo wesu?

⁷ Kufwumbwa uuyanda kuba mweenzu mutente lya Jehova weelede ‘kwaamba masimpe mumoyo wakwe.’ (Int. 15:2) Zinji zibikkilizyidwe mukucita boobo kunze buyo lyakubeja. Jehova uyanda kuti katusyomeka muzintu zyoonse nzyotwaamba alimwi akucita. (Heb. 13:18) Eeci cilayandika kapati, “nkaambo muntu mumpelenge ncisesemyo kuli Jehova, pele balulami mbabajisi cilongwe ciyumu anguwe.”—Tus. 3:32.

8. Mbukkale buli buti mbotweelede kweeleba?

⁸ Aabo baamba zyamasimpe mumoyo wabo tabatondezyi kuti balamumvwida Leza ciindi nobali akati kabantu, mpoonya kabatyola milawo ya Leza ciindi nobali balikke. (Is. 29:13) Tabaciti zintu cabumpelenge. Muntu mumpelenge ulakonzya kutalika kudooneka milawo ya Jehova akuyeeya kuti taibeleki. (Jak. 1:​5-8) Ulakonzya kucileka kusyoma zyeelelo zya Jehova akubona kuti taziyandiki kapati. Mpoonya, kuti naa wabona kuti kunyina cibi cacitika ciindi natyola milawo, ulakonzya kutalika kucita zintu ziinda kubija. Nokuba kuti inga kayeeya kuti ubelekela Leza, Jehova kunyina nayoobutambula bukombi bwakwe. (Muk. 8:11) Aboobo tuyanda kuti katusyomeka muzintu zyoonse.

9. Ncinzi cakacitika Jesu naakabonana a Natanayeli ciindi cakusaanguna? (Amubone acifwanikiso.)

⁹ Cilayandika kapati kuba muntu ‘waamba zyamasimpe mumoyo wakwe.’ Eeci tulacibona kuli cakacitika ciindi Filipo naakatamba mulongwe  wakwe Natanayeli kuti babonane a Jesu. Nokuba kuti eeci cakali ciindi cakusaanguna kubonana a Natanayeli, Jesu wakaamba kuti: “Amubone, muna Israyeli ncobeni uunyina lweeno.” (Joh. 1:47) Jesu wakalizyi kuti basikwiiya bakwe bambi bakali kusyomeka, pele Natanayeli ngowakali kwiinda. Nokuba kuti Natanayeli tanaakalondokede mbubwenya mbuli ndiswe, kunyina naakali sikuupaupa ameso, muciindi caboobo, wakali kusyomeka muzintu zyoonse. Eeci cakamukkomanisya kapati Jesu alimwi wakamulumbaizya Natanayeli akaambo kabube bwakwe oobu. Bwini mbwakuti, toonse tuyanda kuti Jesu kalimvwa boobu kujatikizya ndiswe

10. Nkaambo nzi ncotweelede kucenjela kujatikizya zintu nzyotwaamba? (Jakobo 1:26)

¹⁰ Bunji bwazintu zyaambidwe ku Intembauzyo caandaano 15 zijatikizya mbotubeendelezya bamwi. Intembauzyo 15:3 yaamba kuti mweenzu mutente lya Jehova “kunyina nabejelezya muntu amulaka wakwe, kunyina nacitila mweenzinyina cintu cibi, alimwi kunyina nasampaula beenzinyina.” Kuti katubejelezya bamwi, cilakonzya kubacisa kapati alimwi tulakonzya kuleka kuba beenzu mutente lya Jehova.—Amubale Jakobo 1:26.

11. Ino kubejelezya bamwi caamba nzi? Ncinzi cikonzya kucitikila muntu uubejelezya bamwi alimwi uuteempwi?

¹¹ Sintembauzyo wakaamba cacigaminina kujatikizya makani aakubejelezya bamwi. Ino kubejelezya caamba nzi? Caamba kwaamba makani aakubeja kujatikizya muntu umwi calo cikonzya kumubisizya zina. Kuti muntu umwi kabejelezya bamwi alimwi kateempwi ulakonzya kugusyigwa mumbungano ya Bunakristo.—Jer. 17:10.

12-13. Muubukkale buli buti motukonzya kutalika kubisizya bamwi zina cakutazyiba? (Amubone acifwanikiso.)

¹² Intembauzyo 15:3 alimwi ituyeezya kuti beenzu ba Jehova tababacitili cintu cibyaabi basimukobonyina alimwi tabababejelezyi balongwe babo. Ino mbuti mbotukonzya kubejelezya balongwe besu?

 ¹³ Cakutazyiba tulakonzya kubisizya muntu umwi zina kwiinda mukumwaya makani aakubeja kujatikizya nguwe. Mucikozyanyo: (1) mucizyi naacileka kubeleka mulimo waciindi coonse, (2) banabukwetene nobacileka kubelekela a Beteli, naa (3) mukwesu natacibeleki kali mwaalu naa mukutausi. Inga cabija kutalika kwaambila bamwi kuti bakwesu abacizyi aaba kuli cintu cimwi cibi ncobakacita icakapa kuti bukkale bwabo bucince? Kulakonzya kuba twaambo ntotutazyi itwakapa kuti cibe boobo. Kuyungizya waawo, mweenzu mutente lya Jehova “kunyina nacitila mweenzinyina cintu cibi, alimwi kunyina nasampaula beenzinyina.”

AMUBALEMEKE AABO BAYOOWA JEHOVA

14. Amupandulule beenzu ba Jehova mbobamukaka “muntu uuli woonse uusesemya.”

¹⁴ Intembauzyo 15:4 yaamba kuti mulongwe wa Jehova “ulamukaka muntu uuli woonse uusesemya.” Ino inga twazyiba buti kuti muntu umwi ulasesemya? Tatukonzyi kwaamba kuti muntu umwi ulasesemya akaambo buyo kambotuyeeya. Nkaambo nzi? Akaambo kakuti tuli bantu batalondokede, tulakonzya kutalika kumvwana abantu mbotuyeeya kuti bali kabotu mpoonya akusulaika bamwi akaambo kakuti balatucima. Aboobo, tweelede kutantamuka buyo baabo Jehova mbaamba kuti ‘balasesemya.’ (1Kor. 5:11) Eeci cibikkilizya baabo ibazumanana kucita zintu zibi alimwi ibateempwi, batazilemeki nzyotusyoma naa ibayanda kunyonganya cilongwe cesu a Jehova.—Tus. 13:20.

15. Ninzila nzi imwi mbotukonzya kubalemeka “aabo ibayoowa Jehova”?

¹⁵ Kuzwa waawo, Intembauzyo 15:4 yaamba kuti tweelede kubalemeka “aabo ibayoowa Jehova.” Aboobo tulayandaula nzila zyakutondezya luzyalo alimwi abulemu kubalongwe ba Jehova. (Rom. 12:10) Mubuti? Nzila imwi, kweelana a Intembauzyo 15:​4, njakuti mweenzu mutente lya Jehova “tacinci mizeezo ikuti wasyomezya, nokuba kuti zintu tiizyamweendela kabotu.” Kuti tiitwazizuzikizya zikonke zyesu tulakonzya kubanyemya bamwi. (Mt. 5:37) Mucikozyanyo, Jehova ulangila kuti beenzu bakwe kabapona kweelana acikonke cacikwati cabo. Alimwi cilamukkomanisya kapati ciindi bazyali nobasola kuzuzikizya zintu nzyobakasyomezya bana babo. Akaambo kakuti tulamuyanda Leza alimwi abamwi, tuyoocita kufwumbwa ncotukonzya kutegwa tuzuzikizye zisyomezyo zyesu.

16. Ninzila nzi aimbi mbotukonzya kubalemeka balongwe ba Jehova?

¹⁶ Nzila aimbi mbotukonzya kubalemeka balongwe ba Leza nkwiinda mukuba baabi akusamausya. (Rom. 12:13) Kunze buyo lyakuyanzana abakwesu alimwi abacizyi kumiswaangano amumulimo wamumuunda, kujana ciindi cimbi cakuyanzana antoomwe kuyoopa kuti cilongwe cesu a Jehova alimwi ambabo ciyume. Aboobo ciindi notusamausya bamwi twiiya Jehova.

MUTAYANDISYI MALI

17. Nkaambo nzi makani aamali ncaambidwe ku Intembauzyo caandano 15?

¹⁷ Tubala kuti mweenzu wa Jehova “kunyina napa mali aakwe kumwi kalangila cinyonamucila, alimwi kunyina natambula cisinkamulomo kuti abisizye muntu uunyina mulandu.” (Int. 15:5) Nkaambo nzi Intembauzyo eeyi ncoyaamba kujatikizya mali? Akaambo kakuti kuyandisya mali kulakonzya kupa kuti twaabikke mubusena bwakusaanguna kwiinda kuyandisya Leza alimwi abantu. (1Tim. 6:10) Kaindi bamwi tiibakali kubeendelezya kabotu banabokwabo ibakali bacete kwiinda mukupa kuti bapilusye mali ayindilide kuli yaayo ngobakeelede kupa. Kunze lyaboobo, babetesi bamwi bakali kutambula cisinka mulomo alimwi akutababeteka cabululami bantu bakanyina mulandu.  Jehova cilamucisa kapati ciindi bantu nobacita zintu zili boobu.—Ezk. 22:12.

18. Mibuzyo nzi njotweelede kulibuzya kutegwa tubone mbotulimvwa kujatikizya mali? (Bahebrayo 13:5)

¹⁸ Cilayandika kapati kulanga-langa mbotwaabona mali. Amulibuzye kuti: ‘Sena kanji-kanji ndiyeeya buyo kujatikizya mali alimwi azintu nzyondikonzya kuula? Kuti ndakolota mali, sena nditola ciindi kwaajola kandiyeeya kuti mukamwini tacaayandi? Sena kuba amali manji kundipa kulibona kuti ndilayandika kapati akupa kuti cindiyumine kwaabila bamwi? Sena ndiyeeya kuti bakwesu abacizyi ibajisi mali manji, balaayandisya mali kwiinda mbobayanda Jehova? Sena ndimvwana kapati abantu bavwubide kwiinda bacete?’ Cilayandika kapati kulibuzya mibuzyo iili boobu akaambo kakuti Jehova wakatutamba kuba beenzu bakwe. Tulakonzya kuzumanana kuba acoolwe cili boobu kwiinda mukupona buumi bwakutayandisya mali. Kuti twacita oobo, Jehova unooli aandiswe lyoonse!—Amubale Bahebrayo 13:5.

JEHOVA ULABAYANDA BALONGWE BAKWE

19. Nkaambo nzi Jehova ncayanda kuti katucita zintu zyoonse izyaambidwe ku Intembauzyo caandaano 15?

¹⁹ Intembauzyo caandaano 15 ilamana acisyomezyo cakuti: “Kufwumbwa uucita zintu eezyi takazungaanizyigwi pe.” (Int. 15:5) Aawa sintembauzyo upandulula kaambo ncotweelede kucita zintu zyoonse izyaambidwe kuntembauzyo eeyi. Jehova uyanda kuti katukkomene. Aboobo, ciindi notucita zintu Leza nzyatulomba, tulaba abuumi bubotu alimwi ulatukwabilila.—Is. 48:17.

20. Ncinzi beenzu ba Jehova ncobalangila?

²⁰ Beenzu ba Jehova balakonzya kulangila kuyoopona buumi bwiinda kubota. Bananike bayoopona kujulu, Jesu nkwaakababambila busena. (Joh. 14:2) Aabo ibajisi bulangizi bwakuyoopona anyika balangila ciindi cisyomezyo cili kulugwalo lwa Ciyubunuzyo 21:3 nociyoozuzikizyigwa. Eelo kaka ncoolwe cilibedelede kuti Jehova uyanda kuti tube beenzu mutente lyakwe mane kukabe kutamani!