1. Ino bakali mubukkale buli buti Banakristo mumwaanda wamyaka wakusaanguna?

ACIINDI cimwi mumyaka iili aakati ka 62 alimwi a 64 C.E., mwaapostolo Petro wakalembela ‘beenzu batakkalilili ibakamwaikide mu Ponto, Galatiya, Kapadokiya, Asiya alimwi amu Bituniya.’ (1Pet. 1:1) Mbungano eezyi izyakajisi bantu bazwa mubukkale bwiindene-indene mu Asia Minor zyakali kuyandika kukulwaizyigwa alimwi abusolozi. Zyakali kukazyigwa alimwi akusampaulwa. Zyakajisi “mapenzi aali mbuli mulilo.” Alimwi bantu bakali kupona muciindi cikatazya. Petro wakalemba kuti, “mamanino aazintu zyoonse aswena afwaafwi.” Masimpe, mamanino aayoosya aabweende bwazintu bwaci Juda akali kuyooboola mumyaka iitasiki kukkumi. Ino ncinzi cakali kuyoobagwasya Banakristo kumasena oonse kuliyumya muziindi zikatazya eezyo?—1Pet. 4:4, 7, 12.

2, 3. Ino nkaambo nzi Petro ncaakakulwaizya basyominyina kusamausyanya? (Amubone cifwanikiso icili kumatalikilo aacibalo.)

² Akati kazintu zimbi alimwi, Petro wakakulwaizya banabokwabo kuti: “Amusamausyanye.” (1Pet. 4:9) Mu Chigiriki, ibbala lyakuti “kusamausya” lyaamba “kuyandisisya, naa luzyalo kubantu mbotutazyi.” Nokuba boobo, amubone kuti Petro wakakulwaizya Banakristonyina  kusamausya umwi amweenzinyina, nkokuti aabo mbobakazyi kale alimwi mbobakali kuyanzana limwi. Ino mbuti mbocakali kuyoobagwasya kusamausyanya?

³ Cakali kuyoobakamantanya. Amulange-lange cakamucitikila nywebo lwanu kumugama. Sena kuli nocakamukkomanisya kutambwa kuŋanda yamuntu umwi? Sena eeco tiicakamupa kunoociyeeya lyoonse cintu cibotu eeco cakacitika? Ciindi nomwakasamausya bamwi mumbungano yanu, sena cilongwe canu ambabo tiicakayuma? Kwiinda mukutondezya kusamausya, tulabazyiba kabotu bakwesu abacizyi munzila zigaminide kwiinda mbotukonzya kubazyiba mubukkale bumbi. Kuciindi Petro ncaakali kupona, Banakristo bakali kuyandika kuzumanana kukamantana ciindi bukkale nobwakali kuyaabwiindila kubija. Mbobeelede kucita a Banakristo bakasimpe “kumazuba aamamanino” aaya.—2Tim. 3:1.

4. Ino mibuzyo nzi njotutiilange-lange mucibalo eeci?

⁴ Ino ninzila nzi nzyotujisi mbotukonzya kusamausyanya? Ino mbuti mbotukonzya kuzunda zintu zikonzya kutusinkilizya kusamausya? Ino ncinzi cikonzya kutugwasya kuba beenzu bali kabotu?

5. Ino mbuti mbotukonzya kuba basikusamausya kumiswaangano yesu ya Bunakristo?

⁵ Kumiswaangano: Tulabatambula boonse ibajanika kumiswaangano yesu ya Bunakristo kabali beenzu antoomwe andiswe kucakulya cakumuuya. Jehova alimwi ambunga yakwe mbambabo batutamba. (Rom. 15:7) Ciindi bapya nobajanika, andiswe inga tuba basikubatamba. Sena inga tiimwabatambula bapya, tacikwe makani ambobakonzya kusama naa kulibamba? (Jak. 2:1-4) Ikuti mweenzu kunyina wamulanganya kale, sena inga tiimwamutamba kutegwa mukkale limwi? Ulakonzya kulumba kumugwasyilizya kutobelezya pulogilamu alimwi ambweni akujana magwalo aali mukubalwa. Eeyi ilakonzya kuba nzila mbotu ‘yakuba acilengwa cakusamausya beenzu.’—Rom. 12:13.

6. Ino mbaani ikapati mbotweelede kutamba mumaanda eesu?

⁶ Kutwakunywaanywa mbuli dilinki naa kucakulya: Kaindi, kusamausya kwakali kubikkilizya kutamba muntu umwi kucakulya kuŋanda. (Matl. 18:1-8; Bab. 13:15; Lk. 24:28-30) Kutamba muntu kucakulya kwakali kumutamba kuba acilongwe alimwi aluumuno anguwe. Ino mbaani ikapati mbotweelede kutamba? Mbabaabo mbotuyanzana limwi kanji-kanji mubuumi bwesu, nkokuti bakwesu abacizyi mumbungano yesu. Ciindi twaakulijana mubukkale bukatazya, sena tatukasyomi umwi amweenzinyina? Tuyandika balongwe basyomeka akuba muluumuno ambabo boonse. Cikkomanisya ncakuti, mumwaka wa 2011 Kabunga Keendelezya kakacinca ciindi mukwasyi wa Beteli ku United States noucita Ciiyo ca Ngazi Yamulindizi kuzwa ku 18:45 kuya ku 18:15. Ino nkaambo nzi ncokwakabeda kucinca? Cakwaambilizya cakaamba kuti ambweni banji inga kabayanda kusamausya bamukwasyi wa Beteli bamwi kwiinda mukubatamba naa kuzumina kutambwa ikuti muswaangano wafwambaana kumana. Kumaofesi aamitabi iimbi abalo bakatobela mbubwenya. Bubambe oobu bwabakamantanya kapati bamukwasyi wa Beteli kwiinda lyoonse.

7, 8. Ino mbuti mbotukonzya kusamausya baiminizi bambunga ya Jehova ibaswaya?

⁷ Kuswaya kwabaambi beenzu kuzwa mumbungano zimbi, balangizi bamabazu, alimwi ziindi zimwi abaiminizi kuzwa kuofesi yamutabi mucisi mweena, kutupa zyoolwe zibotu zyakusamausyanya. (Amubale 3 Johane 5-8.) Kubamba twakunywaanywa naa cakulya ninzila imwi mbotu mbotukonzya kubasamausya. Sena mulakonzya kulyaaba kucita boobo?

⁸ Mucizyi umwi ku United States wakaamba kuti: “Kwamyaka minji, mebo abalumi bangu twalijisi coolwe cakusamausya baambi banji abamakaintu babo muŋanda yesu. Ciindi cili coonse ncotwali kucita boobo cali kukkomanisya—alimwi ciinda zyoonse cali kuyumya kumuuya. Kunyina notwakalimvwa kuusa akaambo kakucita boobo.”

9, 10. (a) Ino mbaani bakonzya kuyandika kusamausyigwa kwaciindi cili mbocibede? (b) Sena nobaba baabo ibatajisi maanda mapati balakonzya kugwasya? Amupe cikozyanyo.

 ⁹ Beenzu baswaya kwaciindi cili mbocibede: Kaindi, kusamausya kanji-kanji kwakali kubikkilizya akubapa aakoona beenzu ibasyomeka. (Job. 31:32; Flm. 22) Mbubwenya buyo amazuba aano, kusamausya munzila eeyi kulayandika. Balangizi bamabazu kanji-kanji bayandika kwakoona ciindi nobaswaya mbungano. Basicikolo kuzikolo zyeendelezyegwa a Leza balakonzya kuyandika masena aakukkala, mbubwenya mbuli basikulisungula kuyaka maanda aakukombela. Ntenda zilicitikila zilakonzya kupa kuti mikwasyi iimwi icaale kaitajisi maanda calo cikonzya kupa kuti kuyandike aakoona kusikila mane basikugwasyilizya bakaabambulule maanda aabo. Tatweelede kuyeeya kuti balikke aabo ibajisi maanda mabotu mbabeelede kugwasya; ambweni bali kucita oobo kwaziindi zinji. Sena inga tiimwatola lubazu mukubapa aakukkala nokuba kuti tamujisi maanda mapati?

¹⁰ Mukwesu umwi ku South Korea ulayeeya ciindi naakapa aakukkala basicikolo ibakaboola kuzikolo zyeendelezyegwa a Leza. Wakalemba kuti: “Kumatalikilo ndakali kuwayawaya nkaambo twakazwide aakukwatana alimwi twakali kukkala muŋanda nsyoonto. Pele kukkala antoomwe abasicikolo kwakali kukkomanisya kapati. Mbuli banabukwetene bapya, twakabona mbuli mbobakonzya kukkomana banabukwetene ciindi nobabelekela Jehova akuba ambaakani zyakumuuya antoomwe.”

11. Ino nkaambo nzi ibapya mumbungano yanu ncobakonzya kuyandika kusamausyigwa?

¹¹ Bapya mumbungano: Bantu naa mikwasyi balakonzya kulongela kubusena nkomukkala. Bamwi balakonzya kuboola kuzoobelekela kubusena bubulide. Bapainiya balakonzya kutumwa kuti bagwasyilizye mumbungano yanu. Ooku nkucinca kupati kulimbabo. Beelede kubuzyibila busena bupya, mbungano mpya, alimwi ambweni amwaambo mupya naa bukkale. Kubatamba kutwakunywaanywa, kucakulya naa kuyakweendeenda kuyoobagwasya kujana balongwe bapya alimwi akubuzyibila bukkale bwabo bupya.

12. Ino ncakuluula nzi icitondezya kuti kusamausya takuyandiki zintu zinji?

¹² Kusamausya takuyandiki zintu zinji. (Amubale Luka 10:41, 42.) Mukwesu umwi naakali kuluula mazuba aakusaanguna mumulimo wakwe kali misyinali wakaamba kuti: “Twakacili bana, tiitwakaningazyibila, alimwi twakalikuzimbide kuŋanda. Buzuba bumwi kumazuba bakaintu bangu bakaluuside kapati akaambo kakuyeeya kuŋanda, kusoleka kwangu kuti ndibaumbulizye tiikwakagwasya pe. Mpoonya kuma 19:30, twakamvwa muntu uukonkomona kumulyango. Wakali sikwiiya Bbaibbele iwakatuletela ma orange otatwe. Wakasikide kuzootambula bamisyinali ibapya. Twakamwaambila kuti anjile muŋanda akumupa maanzi aakunywa. Mpoonya twakapanga tii alimwi accokoleti. Tiitwakacizyi ci Swahili, mpoonya awalo tanaakacizyi Chingisi. Pele bukkale oobo ngaakali matalikilo aakukkomana kapati mukupanga zilongwe abakwesu bamucilawo.”

13. Ino mbubotu nzi buboola kwiinda mukusamausya?

¹³ Sena mwali kuwayawaya kusamausya? Kuti naa mboobo, kweelede kuti mwaindwa zyoolwe zibotu zyakuyanzana alimwi akupanga zilongwe zitamani. Kusamausya ninzila imwi iili kabotu yakulwana kulendelelwa. Pele mulakonzya kulibuzya kuti, ‘Ino nkaambo nzi muntu uuli woonse ncakonzya kuwayawaya?’ Kweelede kuti kuli twaambo tunji.

14. Ino ncinzi ncotukonzya kucita ikuti kubula ciindi alimwi anguzu kazitupa kutazumina kusamausyigwa naa kusamausya bamwi?

¹⁴ Ciindi alimwi anguzu: Babelesi ba Jehova bajisi bubi kapati alimwi kanji-kanji balaba azintu zinji nzyobayandika kucita. Bamwi balakonzya kulimvwa kuti tabajisi ciindi naa nguzu kutegwa basamausye bamwi. Ikuti naa muli mubukkale buli boobo, ambweni inga mwayandika kuulanga-langa mulongo wanu wazintu zyakucita. Sena  inga mwazibambulula zintu zimwi kutegwa mucikonzye kuba aciindi alimwi anguzu zyakuzumina kusamausyigwa naa kusamausya bamwi? Magwalo akulwaizya Banakristo kusamausya bamwi. (Heb. 13:2) Tacilubide pe kujana ciindi cakucita boobo; alimwi buya, ncintu ceelela kucita. Mubwini, inga mwayandika kulisungula kucesya-cesya zintu zimwi nzyomucita.

15. Ino nkulibilika nzi bamwi nkobajisi kujatikizya kusamausya?

¹⁵ Mbomulimvwa: Sena kuli nomwakalimvwide kuti mulayanda kusamausya pele mulimvwa kuti inga tamucikonzyi? Bamwi bamvwa nsoni alimwi balalibilika kuti caboola kukubandika balalendelezya naa beenzu inga balimvwa kuti tiibasamausyigwa. Bamwi tabajisi mali manji alimwi bayeeya kuti tabakonzyi kupa kweelana anzyobapa basimbungano bamwi. Amuyeeye kuti, cintu ciyandika kapati kujatikizya ŋanda, takuli kuba azintu zidula, pele nkwiibamba kabotu, kaili yabulondo alimwi akuba busena bwaluyando.

16, 17. Ino ncinzi cipa kuti kakuba kulibilika kujatikizya kuba abeenzu?

¹⁶ Kuti naa mulalibilika kujatikizya kuba abeenzu, tamuli nyolikke pe. Mwaalu umwi ku Britain wakaamba kuti: “Kulakonzya kuba kulibilika kumwi ciindi nomulibambila kutambula mweenzu. Pele kufwumbwa cintu cili coonse cijatikizya kubelekela Jehova, ibubotu akukkutila kuboola nkunji kwiinda kulibilika kuli koonse. Ndilakukkomanina ikwiile kukkala antoomwe abeenzu katunywa buyo kkofi akubandika.” Amuyeeye kuti kubabikkila maano beenzu kulagwasya lyoonse. (Flp. 2:4) Bunji bwabantu balakukkomanina kwaamba zyakabacitikila mubuumi. Kuyanzana kulakonzya kuba nceciindi cilikke bamwi ncobanga bayanda kumvwa kujatikizya zyakatucitikila. Alimwi mwaalu umwi wakalemba kuti: “Kuba abalongwe bamumbungano kuŋanda yangu kulandigwasya kubamvwisya kabotu alimwi kulandipa ciindi cakubazyiba, ikapati kujatikizya mbobakaboola mukasimpe.” Kubabikkila maano caluyando bamwi kulakonzya kupa kuti bukkale buli boonse bukkomanisye.

¹⁷ Mucizyi mupainiya iwakatambula basicikolo ibakaboolede kuzikolo zyeendelezyegwa a Leza ziindene-indene wakaamba kuti: “Kumatalikilo ndakali kulibilika nkaambo maanda aangu ajisi buyo zintu ziyandika zisyoonto alimwi azyuuno zyakabelesyegwa kale. Mukaintu wamwiiyi umwi wakandikkazika moyo. Wakaamba kuti ciindi walo abalumi bakwe nobabeleka mumulimo wakweendeenda, nsondo nzyobakkomanina kapati nzyeezyo nzyobakkala amuntu uusimide kumuuya walo uutajisi zintu zyakumubili zinji pele uubikkila maano mbuli mbabo—kukubelekela Jehova akuubya-ubya buumi bwakwe. Eeci cakandiyeezya mbobakali kutwaambila bamaama katucili bana kuti: ‘Ncibotu kulya buyo cisyumani kakuli luyando.’” (Tus. 15:17) Luyando alumukulwaizye kuba basikusamausya, alimwi tamweelede kulibilika pe.

18, 19. Ino mbuti kusamausya mbokukonzya kutugwasya kutabalanga munzila iitali kabotu bamwi?

¹⁸ Mbomulimvwa kujatikizya bamwi: Sena kuli umwi mumbungano ngomutamvwani? Kumatalikilo mulakonzya kulimvwa bubi kujatikizya muntu ooyo alimwi eeco cilakonzya kuzumanana kwaciindi cilamfwu ikuti kamutaciti cili coonse kutegwa mubambulule zintu. Kutamvwana abamwi kulakonzya kumutyompya kujatikizya makanze mabotu ngomujisi aakusamausya. Naa ambweni umwi muntu ulakonzya wakamunyemya kaindi, pele camuyumunina kapati kwaaluba buyo makani.

¹⁹ Ikutegwa kube kumvwana kabotu abantu bamwi, nobaba basinkondoma, Ibbaibbele likulwaizya kusamausyanya. (Amubale Tusimpi 25:21, 22.) Kusamausya umwi kulakonzya kucesya kutamvwana alimwi akumupa kuti abombe moyo. Kulakonzya kubuyubununa aantangalala bube bubotu mbwajisi mweenzu wesu, bube oobo mbwaakabona Jehova ciindi naakamukwela muntu ooyo kukasimpe. (Joh. 6:44) Ikuti naa kwacitwa munzila yaluyando, ikusamausya muntu iwatali kuyeeyela kuti ulakonzya kusamausyigwa, alakonzya kuba matalikilo aacilongwe cipya. Ino mbuti mbomukonzya kuba masimpe  kuti luyando ngamakanze eeni ngomujisi? Inzila imwi nkwiinda mukutobela kukulwaizya ooku ikujanika ku Bafilipi 2:3 kwakuti: “Amucite zintu zyoonse cakulicesya akubona bamwi kuti balamwiinda.” Kujana nzila bakwesu naa bacizyi mobatwiinda—mbuli lusyomo lwabo, kuliyumya, busicamba, naa bube bumbi bwa Bunakristo—kuyootupa kuti tuzumanane kubayanda alimwi akupa kuti cuuba-ube kubasamausya.

20. Ino nkaambo nzi ncotweelede kulemeka kutambwa nkotwazumina alimwi mbuti mbotukonzya kucita boobo?

²⁰ Sintembauzyo Davida wakabuzya kuti: “O Jehova, ino nguni uukonzya kuba mweenzu mutente lyako?” (Int. 15:1) Naakamana kubuzya mubuzyo ooyo wakaamba bube bwakumuuya bwalo Leza mbwayanda mubeenzu bakwe. Bube bumwi mbwakuti tweelede kuzuzikizya ncotwaamba: “Tacinci mizeezo ikuti wasyomezya, nokuba kuti zintu tiizyamweendela kabotu.” (Int. 15:4) Ikuti naa twazumina kutambwa, tatweelede kucinca kakunyina akaambo kaya komoonga. Sikututamba ambweni wakalibambila kabotu, aboobo kusolekesya kwakwe koonse kulakonzya kuba kwabuyo ikuti twaile kucinca kakunyina kaambo. (Mt. 5:37) Bamwi ziindi zimwi balacinca maano kwiinda mukwaamba kuti tabakajaniki kukutambwa kwakusaanguna kutegwa bazumine kooko ikuboneka kuti kulasumbula. Sena kucita boobo kutondezya luyando abulemu? Muciindi caboobo, tweelede kuzumina kutambwa akulumba kuzwa ansi aamoyo tacikwe makani azintu nzyaatubambila sikututamba. (Lk. 10:7) Alimwi ikuti naa masimpe kuti taakwe ncotukonzya kucita kujatikizya ibukkale bwatupa kucinca, inga cabota kutondezya luyando akubikkila maano kuli sikututamba kwiinda mukumuzyibya cakufwambaana.

21. Ino mbuti kulemeka zilengwa zyakubusena nkotukkala mbokukonzya kupa kuti tube beenzu bali kabotu?

²¹ Alimwi cilayandika kapati kulemeka zilengwa zyakubusena nkomukkala. Mumasena aamwi, beenzu batali kulangilwa balatambulwa, mpoonya mumasena aambi, nkubazyibisyila limwi kamutanaswaya. Mumasena aamwi, basikutambula beenzu balabalemeka beenzu kwiinda mukusaanguna kupa mbabo zyakulya ziinda kubota mpoonya banamukwasyi balatobela; mumasena aambi boonse balapegwa zikozyene. Mumasena aamwi, kanji-kanji beenzu balaletelezya acintu cimwi cakupa kububambe oobo; mpoonya mumasena aambi, basikutamba balakkomana kapati ciindi beenzu babo nobaboola cinkwa maanza. Alimwi mumasena aamwi, balangila kuti beenzu cabupampu beelede kukukaka kutambwa kwakusaanguna naa kwabili; mpoonya mumasena aambi, kukaka kutondezya kutalumba. Atucite kufwumbwa ncotukonzya kutegwa basikututamba bakkomane akaambo kakututamba.

22. Ino nkaambo nzi ncociyandika kapati ‘kusamausyanya’?

²² Sunu kwiinda lyoonse, “mamanino aazintu zyoonse aswena afwaafwi.” (1Pet. 4:7) Tulangila mapenzi mapati aatanabuzuba aacitika munyika. Ciindi mapenzi naayaabuvwula, tuyooyandika luyando lwini-lwini akati kesu alimwi abakwesu abacizyi. Mazuba aano kwiinda lyoonse, lulayo oolu lwa Petro ku Banakristo lulabeleka: “Amusamausyanye.” Inzya, ncilengwa cikkomanisya alimwi iciyandika eeco citakamani.—1Pet. 4:9.