1. Kweelana alugwalo lwa Matayo 24:9, nkaambo nzi ncotuteelede kugambwa ciindi nyika noitusulaika?

JEHOVA wakatulenga munzila yakuti katucikonzya kuyanda bamwi, akuti abalo kabatuyanda. Aboobo ciindi muntu umwi naatusulaika, tulausa alimwi buya akuyoowa. Mucikozyanyo, mucizyi Georgina uukkala ku Europe wakaamba kuti: “Nindakali aamyaka iili 14, bamaama bakatalika kundisulaika akaambo kakubelekela Jehova. Ndakali kuusa akulendelelwa, alimwi ndakatalika kuyeeya kuti ambweni ndili muntu mubi.” * Mukwesu Danylo wakaamba kuti: “Ciindi basikalumamba nobakali kunduuma, kunditukila alimwi akundikonga kundijaya akaambo kakuba Kamboni wa Jehova, ndakayoowa akuusa.” Kusulaikwa kuli boobu kutupa kulimvwa bubi kapati, pele alimwi tacitugambyi. Jesu wakasinsima kuti tuyoosulaikwa.—Amubale Matayo 24:9.

2-3. Nkaambo nzi basikutobela Jesu ncobasulaikwa?

² Nyika ilabasulaika basikutobela Jesu. Nkaambo nzi? Nkaambo mbubwenya mbuli Jesu, ‘tatuli banyika.’ (Joh. 15:17-19) Nokuba kuti tulazilemeka mfwulumende zyabantu, tatutoli lubazu mumapolitikisi, kusalyuta ndembela, naa kwiimba lwiimbo lwacisi. Tukomba buyo Jehova alikke. Tulasyoma kuti Leza nguweelela kweendelezya bantu, pele Saatani “alunyungu” lwakwe balo balakazya kuti Leza nguweelela kweendelezya bantu. (Matl. 3:1-5, 15) Tulakambauka kuti Bwami bwa Leza bulikke mbobuyoomanizya mapenzi aabantu alimwi akuti lino-lino buyoobanyonyoona boonse ibabukazya. (Dan. 2:44; Ciy. 19:19-21) Ooyu mulumbe mubotu kubabombe myoyo, pele mulumbe mubi kubantu babyaabi.—Int. 37:10, 11.

 ³ Alimwi tulasulaikwa nkaambo tupona kweelana azyeelelo zya Leza ziluleme. Zyeelelo eezyi ziliindene kapati amicito iisofweede yabantu bamunyika. Mucikozyanyo, bantu banji mazuba aano nomuba mubuleya balazumizya kucita micito iisofweede iikozyenye anjobakali kucita bantu Leza mbaakanyonyoona mumunzi wa Sodoma a Gomora. (Jud. 7) Mbwaanga tulazitobela zyeelelo zyamu Bbaibbele, bantu banji balatufwubaazya akutubona kuti tulaciindizya!—1Pet. 4:3, 4.

4. Mbube nzi bukonzya kutuyumya ciindi bantu nobatusulaika?

⁴ Ncinzi cikonzya kutugwasya ciindi bantu nobatusulaika alimwi akututukila? Tweelede kuba alusyomo luyumu lwakuti Jehova uyootugwasya. Mbubwenya mbuli ntobo lusyomo lwesu lulakonzya “kuzimi mivwi yoonse iiyaka mulilo iifwuswa amubi.” (Ef. 6:16) Pele tatuyandiki buyo lusyomo lulikke. Tuyandika luyando. Nkaambo nzi? Nkaambo luyando “talunyemi-nyemi.” Pele lulajatila akuliyumya muzintu zyoonse zibyaabi. (1Kor. 13:4-7, 13) Lino atubone kuyanda Jehova, basyomima, alimwi nobaba basinkondoma mbokukonzya kutugwasya kuliyumya ciindi notusulaikwa.

5. Ino luyando ndwaakajisi Jesu kuli Bausyi lwakamugwasya buti kuliyumya?

⁵ Masiku kabatanamujaya basinkondonyina, Jesu wakaambila basikumutobela basyomeka kuti: ‘Ndilamuyanda Taata, aboobo ndicita mbubonya Taata mbwaakandilailila kuti ndicite.’ (Joh. 14:31) Akaambo kakuti Jesu wakali kumuyanda Jehova, wakacikonzya kuliyumya mumasunko mapati. Luyando ndotujisi kuli Jehova andiswe lulakonzya kutugwasya.

6. Kweelana alugwalo lwa Baroma 5:3-5, mbuti babelesi ba Jehova mbobalimvwa kujatikizya kuliyumya ciindi nobasulaikwa anyika?

⁶ Kuyanda Leza lyoonse kulabagwasya babelesi bakwe kuliyumya ciindi nobapenzyegwa. Mucikozyanyo, ciindi baapostolo nobakalaililwa a Nkuta Mpati yaba Juda kuti bacileke kukambauka, kuyanda Leza kwakabapa “kumvwida Leza mbwali mweendelezi kutali bantu.” (Mil. 5:29; 1Joh. 5:3) Luyando luli boobu lulabayumya bakwesu mazuba aano, ibunji bwabo bazumanana kusyomeka ciindi nobapenzyegwa amfwulumende. Muciindi cakutyompwa, tucibona kuba coolwe kuzumanana kuliyumya notusulaikwa anyika.—Mil. 5:41; amubale Baroma 5:3-5.

7. Ncinzi ncotweelede kucita ciindi banamukwasyi nobatukazya?

⁷ Ciindi banamukwasyi nobatukazya cilakonzya kutukatazya kapati kuliyumya. Nobabona kuti tuyanda kwiiya kujatikizya Jehova, banamukwasyi bamwi balakonzya kuyeeya kuti tweenwa buya. Ibamwi inga batalika kuyeeya kuti twasondoka. (Amweezyanisye Marko 3:21.) Mane buya inga batalika kutukazya. Ikukazyigwa kuli boobu takweelede kutugambya pe. Jesu wakaamba kuti: “Basinkondo bamuntu bayooba bantu bamuŋanda yakwe mwini.” (Mt. 10:36) Nokuba boobo, kufwumbwa mbobakonzya kutubona banamukwasyi, tatukabasulaiki. Muciindi caboobo, ciindi luyando lwesu kuli Jehova noluyuma, alwalo luyando lwesu kubantu lulayuma. (Mt. 22:37-39) Pele tatweelede kuleka kutobela milawo alimwi anjiisyo zyamu Bbaibbele akaambo buyo kakuyanda kukkomanisya muntu.

8-9. Ncinzi cakagwasya mucizyi umwi kuliyumya nokuba kuti wakali kukazyigwa?

⁸ Mucizyi Georgina iwaambwa kumatalikilo, wakacikonzya kuliyumya nokuba kuti banyina bakali kumupenzya kapati. Wakaamba kuti: “Mebo abamaama twakatalika kwiiya Bbaibbele a Bakamboni ba Jehova. Pele nokwakainda myezi iili cisambomwe nondakali kuyanda kutalika kuswaangana, bamaama bakatalika kundikazya. Ndakazyiba kuti bakatalika kuyanzana  abasiluleyo, kumane bakatalika kubelesya makani aakubeja aayo kubandika andime. Bakali kunditukila, kundikwela masusu, kundisina alimwi akusowa mabbuku aangu. Nondakakkwanya myaka iili 15, ndakabbapatizyigwa. Bamaama bakasola kundikasya kubelekela Jehova kwiinda mukunditola kuyookkala abakubusi ibakali kubonwa kuti mbazangi. Ibamwi bakali kubelesya misamu iikola alimwi akucita zintu zimwi zitaluzi. Kukazyigwa kulakatazya kapati kwaambisya kuti kakuzwa kumuntu iweelede kukuyanda alimwi akukulanganya.”

⁹ Ncinzi cakagwasya mucizyi Georgina kuliyumya? Wakaamba kuti: “Buzuba mbobakatalika kundipenzya bamaama mbobuzuba nondakamanizya kulibala Bbaibbele lyoonse. Kuzwa ciindi eeco, ndakasinizya kuti ndakakajana kasimpe alimwi cilongwe cangu a Jehova cakayumya. Ndakali kupaila kulinguwe lyoonse alimwi wakali kundimvwa. Nindakacili kukkala aŋanda eeyo, mucizyi umwi wakali kunditamba kuŋanda yakwe, mpoonya twakali kubala Bbaibbele antoomwe. Aciindi eeco ndakali kuyumizyigwa abakwesu abacizyi ku Ŋanda ya Bwami. Ndakaba cibeela camukwasyi wabo. Ndakalibonena kuti Jehova ulaanguzu kwiinda basikutukazya, kufwumbwa naa bali buti.”

10. Ndusyomo nzi ndotukonzya kuba andulo muli Jehova Leza wesu?

¹⁰ Mwaapostolo Paulo wakalemba kuti kunyina cikonzya “kutwaandaanya kuluyando lwa Leza luli muli Kristo Jesu Mwami wesu.” (Rom. 8:38, 39) Nokuba kuti tulakonzya kupenga kwaciindi cili mbocibede, Jehova lyoonse unooli kulubazu lwesu kutegwa atuumbulizye alimwi akutuyumya. Alimwi mbubonya mbotwabona mucakuluula camucizyi Georgina, Jehova ulakonzya kutugwasya kwiinda mukubelesya bakwesu abacizyi bamumbungano.

11. Mbuti luyando Jesu ndwaakaamba kulugwalo lwa Johane 15:12, 13 mbolwakali kunoobagwasya basikwiiya bakwe? Amupe cikozyanyo.

¹¹ Busiku katanafwa, Jesu wakayeezya basikwiiya bakwe kuyandana umwi amweenzinyina. (Amubale Johane 15:12, 13.) Wakalizyi kuti luyando lwakulyaaba lwakali kuyoobagwasya kuzumanana kukamantana alimwi akuliyumya ciindi nyika noyakali kuyoobasulaika. Atubone cikozyanyo cambungano yaku Tesalonika. Kuzwa ciindi noyakapangwa, basimbungano bakali kupenzyegwa. Nokuba boobo, bakwesu abacizyi bakaba zikozyanyo zibotu kwiinda mukusyomeka alimwi akutondezya luyando. (1Tes.  1:3, 6, 7) Paulo wakabakulwaizya kuzumanana kutondezya luyando, nokuba “kwiinda waawo.” (1Tes. 4:9, 10) Luyando lwakali kunoobakulwaizya kuumbulizya baabo bakatyompedwe alimwi akugwasya baabo batakajisi nguzu. (1Tes. 5:14) Bakaatobela malailile aa Paulo nkaambo mulugwalo lwakwe lwabili, ndwaakalemba nokwakainda mwaka omwe, wakabaambila kuti: “Luyando umwi aumwi wanu ndwajisi kumweenzinyina luyaabuvwula.” (2Tes. 1:3-5) Luyando lwakabagwasya kuliyumya kubuyumuyumu mbobakali kujana alimwi akukupenzyegwa.

12. Ciindi nokwakali nkondo, mbuti bakwesu abacizyi mucisi cimwi mbobakatondezya luyando kuli umwi amweenzinyina?

¹² Amubone cakacitikila mukwesu Danylo, iwaambwa kale, alimwi amukaintu wakwe. Ciindi nokwakaba nkondo mucisi mobakali kukkala, bakazumanana kujanika kumiswaangano, kukambauka kusikila mpobakali kugolela, alimwi akwaabila bakwesu abacizyi cakulya ncobakajisi. Mpoonya bumwi buzuba, basikalumamba ibakajisi ntobolo bakasika kuŋanda yamukwesu Danylo. Mukwesu ooyu wakaamba kuti, “Bakandaambila kuti ndicileke kuba Kamboni. Nondakakaka bakanduuma akuyanda kundidubula kumutwe. Mpoonya kabatanaunka bakandikonga kuti balapiluka kuzoojata mukaintu wangu akumoona. Pele cakufwambaana bakwesu bakatutansika mucitima kuya kudolopo limbi. Tandikalulubi luyando ndobakatondezya bakwesu aaba. Notwakasika kudolopo eelyo bakwesu bakatupa zyakulya alimwi bakandigwasya kujana mulimo aŋanda. Aboobo twakacikonzya kugwasya bakwesu ibakali kutija nkondo kujana kwakukkala.” Zyakuluula zili boobu zitondezya kuti luyando lwa Bunakristo lulakonzya kutugwasya kuliyumya ciindi notusulaikwa.

13. Mbuti muuya uusalala mboutugwasya kuliyumya notubelekela Jehova nokuba kuti bantu balatusulaika?

¹³ Jesu wakaambila basikumutobela kuyanda basinkondonyina. (Mt. 5:44, 45) Sena ncuubauba kucita boobo? Naaceya! Pele cilakonzyeka kwiinda mukugwasyigwa amuuya uusalala wa Leza. Nkaambo mucelo wamuuya uusalala wa Leza ubikkilizya luyando, kukkazika moyo, kubomba moyo alimwi akulilesya. (Gal. 5:22, 23) Bube oobu bulatugwasya kuliyumya notusulaikwa. Bantu banji bakacileka kutukazya akaambo kakuti mulumi, mukaintu, mwana naa simukobonyina wakatondezya bube oobu bwabunaleza. Mane buya bamwi lino mbakwesu alimwi abacizyi. Aboobo kuti kacimukatazya kuyanda baabo bamusulaika akaambo buyo kakuti mubelekela Jehova, amupaile kulomba muuya  uusalala. (Lk. 11:13) Alimwi amusyome kuti kumvwida Leza lyoonse ncecintu ciyandika kapati.—Tus. 3:5-7.

14-15. Mbuti lugwalo lwa Baroma 12:17-21 mbolwakagwasya mucizyi Yasmeen kutondezya luyando kumulumaakwe nokuba kuti wakali kumukazya kapati?

¹⁴ Atulange-lange cikozyanyo camucizyi Yasmeen, uukkala ku Middle East. Ciindi naakaba Kamboni wa Jehova, mulumaakwe wakayeeya kuti wakeenwa, alimwi wakasola kumulesya kubelekela Leza. Wakali kumutukila, kwaambila bacibbulula, musololi wacikombelo alimwi amuŋanga ikuti balamucita cintu cibyaabi alimwi wakamutamikizya kuti wakazangila mukwasyi. Mane buya mulumaakwe wakatukila bakwesu lyamuswaangano wambungano. Mucizyi Yasmeen kanji-kanji wakali kulila akaambo kakuteendelezyegwa caluzyalo.

¹⁵ Ku Ŋanda ya Bwami, mukwasyi wakumuuya wamucizyi Yasmeen wakali kumuumbulizya alimwi akumuyumyayumya. Baalu bakamukulwaizya kutobela majwi aali kulugwalo lwa Baroma 12:17-21. (Amubale.) Mucizyi Yasmeen wakaamba kuti, “Cakali ciyumu. Pele ndakalomba Jehova kuti andigwasye alimwi ndakasolekesya kusikila mpondigolela kutobela ncolyaamba Bbaibbele. Aboobo ciindi balumi bangu nobakali kusowaila dooti muncikini, ndakali kusalazya. Ciindi nobakali kunditukila, ndakali kwiingula cabubombe. Alimwi ciindi nobakali kuciswa, ndakali kubalanganya.”

16-17. Ncinzi ncomwiiya kucikozyanyo camucizyi Yasmeen?

¹⁶ Mucizyi Yasmeen wakalumbulwa akaambo kakutondezya luyando kumulumaakwe. Wakaamba kuti: “Balumi bangu bakatalika kundisyoma nkaambo bakalizyi kuti lyoonse ndaamba masimpe. Bakatalika kundiswiilila cabulemu ciindi nondakali kubandika makani aajatikizya bukombi, alimwi bakazumina kubamba luumuno aŋanda. Lino balandikulwaizya kuunka kumiswaangano yambungano. Lino mebo abalumi bangu tulamvwana kapati alimwi aŋanda kuli luumuno. Kulombozya kwangu nkwakuti balumi bangu bakakazumine kasimpe alimwi akundisangana mukubelekela Jehova.”

¹⁷ Cikozyanyo camucizyi Yasmeen citondezya kuti luyando “lulajatila zintu zyoonse, . . . lulalangila zintu zyoonse, lulaliyumya muzintu zyoonse.” (1Kor. 13:4, 7) Kusulaikwa kulaanguzu alimwi kulacisa, pele luyando lulaanguzu kwiinda. Ikuti twatondezya luyando kubantu balakonzya kuleka kutukazya. Alimwi kulamukkomanisya Jehova. Pele nokuba kuti basikutukazya bazumanana kutusulaika, tulakonzya kukkomana. Munzila nzi?

18. Nkaambo nzi ncotukonzya kukkomana ciindi notusulaikwa?

¹⁸ Jesu wakaamba kuti: “Mulikkomene nywebo kufwumbwa leelyo bantu nobamusula.” (Lk. 6:22) Tatulisalili buya kuti katusulaikwa. Tatukkomani kupenzyegwa akaambo kalusyomo lwesu. Aboobo nkaambo nzi ncotukonzya kukkomana ciindi notusulaikwa? Atulange-lange twaambo totatwe. Kakusaanguna, ciindi notuliyumya, tulakkomaninwa a Leza. (1Pet. 4:13, 14) Kabili, lusyomo lwesu lulayuma kapati. (1Pet. 1:7) Mpoonya katatu, tuyootambula bulumbu bulibedelede, nkokuti buumi butamani.—Rom. 2:6, 7.

19. Nkaambo nzi baapostolo ncobakakkomene nobakamana kuumwa?

¹⁹ Kakutanainda ciindi kuzwa Jesu naakabusyigwa, baapostolo bakalubona lukkomano ndwaakaamba. Nobakamana kuumwa alimwi akwaambilwa kuleka kukambauka, bakakkomana. Nkaambo nzi? ‘Nkaambo bakajanwa kuti baleelela kusampaulwa akaambo kazina lya Jesu.’ (Mil. 5:40-42) Bakali kumuyanda kapati simalelaabo cakuti kunyina nobakayoowa kusulaikwa abasinkondonyina. Alimwi bakalutondezya luyando lwabo kwiinda mukuzumanana kwaambilizya makani mabotu “cakutaleka.” Bakwesu banji mazuba aano bazumanana kumubelekela Jehova cakusyomeka nokuba kuti balajana buyumuyumu. Balizyi kuti Jehova takonzyi kuluba milimo yabo alimwi aluyando ndobatondezya kuzina lyakwe.—Heb. 6:10.

20. Ncinzi ncotuyoolanga-langa mucibalo citobela?

²⁰ Nyika iyootusulaika kufwumbwa buyo kuti bweende bwazintu oobu kabuciliko. (Joh. 15:19) Pele tatweelede kuyoowa. Kweelana ambotuyoobona mucibalo citobela, Jehova ‘uyoobayumya akubakwabilila’ aabo ibasyomeka kulinguwe. (2Tes. 3:3) Aboobo atuzumanane kumuyanda Jehova, bakwesu abacizyi, alimwi buya abasinkondoma. Ikuti twalutobela lulayo oolu, tuyoozumanana kukamantana, lusyomo lwesu luyooyuma, tuyoomulemeka Jehova alimwi tuyootondezya kuti luyando lulaanguzu kapati kwiinda kusulaikwa.