1-2. Mbaani bakonzya kugwasya sikwiiya Bbaibbele kuti ayelele kubbapatizyigwa?

MUCIZYI Amy uukkala ku Fiji wakaamba kuti: “Ndakali kuzikkomanina nzyobakali kundiyiisya kuzwa mu Bbaibbele. Ndakalizyi kuti nkasimpe, pele nindakatalika kuyanzana abakwesu abacizyi cakandigwasya kucinca alimwi akuti ndeelele kubbapatizyigwa.” Cakuluula camucizyi Amy cituyiisya kaambo aaka kayandika kapati: Sikwiiya Bbaibbele ulakonzya kuyaambele akweelela kubbapatizyigwa ciindi nagwasyigwa abamwi mumbungano.

² Sikumwaya aumwi ulakonzya kugwasya bapya kuba cibeela cambungano. (Ef. 4:16) Leilani, mupainiya uukkala ku Vanuatu, wakaamba kuti: “Kuli kaambyo kakuti, mulonga uvwula bunkumunkumu. Ndasyoma eeci cilikozyenye akugwasya bantu kuba basikwiiya. Boonse mumbungano balakonzya kugwasya muntu kwiiya kasimpe.” Banamukwasyi, balongwe alimwi abamayi boonse beelede kugwasyilizya mwana kuti akomene. Balacita oobo kwiinda mukumukulwaizya mwana alimwi akumuyiisya ziiyo ziyandika. Mbubwenya buyo, kutegwa sikwiiya Bbaibbele ayelele kubbapatizyigwa, bakwesu abacizyi balakonzya kumupa lulayo, kumukulwaizya alimwi akuba cikozyanyo cibotu.—Tus. 15:22.

3. Ncinzi ncomwiiya kuli nzyobakaamba ba Ana, ba Dorin alimwi aba Leilani?

³ Nkaambo nzi sikumwaya uusololela ciiyo ca Bbaibbele ncayelede kukkomana ciindi basikumwaya bambi nobamugwasya sikwiiya wakwe? Amubone ncaakaamba mucizyi Ana mupainiya waalubazu ku Moldova naakati: “Cilakatazya kapati kumuntu  omwe kugwasyilizya sikwiiya Bbaibbele muzintu zyoonse nzyayandika, kutegwa ayaambele kumuuya.” Mukwesu Dorin, mupainiya waalubazu uubelekela mucisi ncomunya wakaamba kuti: “Kanji-kanji, basikumwaya bamwi balaamba twaambo tukonzya kumusika amoyo sikwiiya, cintu nconditaningayeeyede.” Mucizyi Leilani wakaamba akaambo kambi, “Ciindi sikwiiya nabona mbobamuyanda alimwi akumulanganya bakwesu abacizyi, cilamugwasya ikuzyiba kuti mbantu ba Jehova.”—Joh. 13:35.

4. Ncinzi ncotutiibandike mucibalo eeci?

⁴ Nokuba boobo, mulakonzya kulibuzya kuti, ‘Mbuti mbondikonzya kugwasya sikwiiya Bbaibbele kuyaambele kakuli tandili ndime ndisololela ciiyo?’ Atulange-lange ncotukonzya kucita ciindi umwi naatutamba kuti tumusangane kusololela ciiyo ca Bbaibbele alimwi ancotukonzya kucita ciindi sikwiiya Bbaibbele naatalika kuswaangana. Alimwi tulabona baalu mbobakonzya kugwasya basikwiiya Bbaibbele kutegwa beelele kubbapatizyigwa.

5. Ncinzi ncomweelede kucita ikuti muntu umwi wamutamba kuti mumusangane nasololela ciiyo ca Bbaibbele?

⁵ Lyaciiyo ca Bbaibbele, mwiiyi nguujisi mukuli wakugwasya sikwiiya kulimvwisya Jwi lya Leza. Aboobo ikuti mwiiyi wamutamba kuti mumusangane ciindi nasololela ciiyo, mweelede kumugwasyilizya. (Muk. 4:9, 10) Pele ino ncinzi ncomweelede kucita kutegwa mube mugwasyi mubotu?

6. Ciindi nomwatambwa kuti musangane muntu umwi kuciiyo ca Bbaibbele, mbuti mbomukonzya kwiibelesya njiisyo iili ku Tusimpi 20:18?

⁶ Amulibambile ciiyo. Cakusaanguna, amumulombe mwiiyi kuti amwaambile asyoonto buyo kujatikizya sikwiiya. (Amubale Tusimpi 20:18.) Mulakonzya kubuzya kuti: “Ino ncinzi ncomuzyi kujatikizya sikwiiya Bbaibbele? Mweendela muciiyo nzi? Ncinzi ncomuyanda kuti sikwiiya aiye muciiyo eeci? Sena kuli cintu ncondeelede kwaamba, kutaamba naa kucita lyaciiyo? Mbuti mbondikonzya kumukulwaizya sikwiiya kuyaambele?” Masimpe kuti mwiiyi takonzyi kumwaambila makani aamaseseke kujatikizya sikwiiya, pele nzyakonzya kumwaambila zilakonzya kumugwasya. Mucizyi Joy, misyinali ulabaambila makani aaya aabo ibamusangana nasololela ciiyo ca Bbaibbele. “Makani aaya alamugwasya ooyo ngotubeleka limwi kuba aluyandisisyo lwakugwasya sikwiiya alimwi akuzyiba ncayakwaamba lyaciiyo.”

7. Nkaambo nzi ncomweelede kulibambila ikuti muntu umwi wamutamba kuti mumusangane kuciiyo?

⁷ Ikuti mwatambwa kusangana muntu umwi kuciiyo, inga cabota kuti mwalibambila ciiyo ciyooyiigwa. (Ezr. 7:10) Mukwesu Dorin, iwaambwa kumatalikilo wakati: “Ndilakkomana kapati ciindi ngotubeleka limwi naalibambila ciiyo. Eeci inga capa kuti kaamba twaambo tugwasya.” Kuyungizya waawo, sikwiiya  uyoobona kuti nyoonse mwakalibambila kabotu alimwi muyoomupa cikozyanyo cibotu. Nokuba kuti ambweni inga tiimwacikonzya kulibambila cakusitikila, pele amujane ciindi cakulanga-langa twaambo tupati-pati ituli muciiyo.

8. Ncinzi cikonzya kumugwasya kwaamba twaambo tugaminide mumupailo lyaciiyo ca Bbaibbele?

⁸ Mupailo ncintu ciyandika kapati lyaciiyo ca Bbaibbele, aboobo amulibambilile limwi nzyomweelede kwaamba ikuti naa mwalombwa kuti mupaile. Kucita boobo kuyoomugwasya kwaamba twaambo tuyoomusika amoyo sikwiiya. (Int. 141:2) Mucizyi Hanae uukkala ku Japan, ulauyeeya mupailo ngwaakapaila mucizyi iwakaboolede asikumuyiisya Bbaibbele. Mucizyi Hanae wakaamba kuti: “Ndakabona kuti wakali acilongwe ciyumu a Jehova, aboobo ndakali kuyanda kuba mbuli nguwe. Alimwi ndakalimvwa kuyandwa iciindi naakalyaamba zina lyangu mumupailo.”

9. Kweelana alugwalo lwa Jakobo 1:19, ncinzi ncomukonzya kucita kutegwa mube mugwasyi mubotu lyaciiyo ca Bbaibbele?

⁹ Amumugwasyilizye mwiiyi nasololela ciiyo. Mucizyi Omamuyovbi, mupainiya waalubazu ku Nigeria wakaamba kuti: “Sikugwasyilizya mubotu ulatobelezya lyaciiyo. Sikugwasyilizya ulaamba twaambo tugwasya, pesi tavwuzyi zyakwaamba nkaambo ulizyi kuti mwiiyi nguujisi mukuli wakuyiisya.” Ikuti naa kuli ncomuyanda kwaamba, ndiilili nomweelede kucaamba alimwi ino inga mwacaamba buti? (Tus. 25:11) Amuswiilile cakubikkila maano ciindi mwiiyi alimwi asikwiiya nobaambaula. (Amubale Jakobo 1:19.) Kuti mwacita oobo, munoolibambilide kugwasya aciindi ceelede. Pele mweelede kubelesya bupampu. Mucikozyanyo, tamweelede kwaamba zinji, kumunjila mukanwa sikwiiya naa kwaamba buyo makani aamwi aateendelani ancomwiiya. Pele kwiinda mukupa bupanduluzi bufwaafwi, cikozyanyo naa mubuzyo, mulakonzya kukasalazya kaambo kabandikwa. Zimwi ziindi, mulakonzya kulimvwa kuti tamujisi zinji zyakwaamba kumakani aabandikwa. Pele kuti mwamulumbaizya sikwiiya alimwi akutondezya kuti mulamubikkila maano, muyoomugwasya kapati kuyaambele.

10. Mbuti cakuluula canu mbocikonzya kumugwasya sikwiiya Bbaibbele?

¹⁰ Amumwaambile cakuluula canu. Ikuti kaceelela, mulakonzya kumwaambila sikwiiya mubufwaafwi mbomwakaiya kasimpe, mbomwakacikonzya kuzunda buyumuyumu bumwi naa Jehova mbwaamugwasya mubuumi bwanu. (Int. 78:4, 7) Ambweni cakuluula canu ncecikonzya kumugwasya sikwiiya. Ambweni cilakonzya kuyumya lusyomo lwakwe naa kumukulwaizya kuzumanana kuyaambele kutegwa ayelele kubbapatizyigwa. Alimwi ambweni cilakonzya kumugwasya kuzunda sunko limwi ndyajisi. (1Pet. 5:9) Mukwesu Gabriel uukkala ku Brazil, lino imupainiya, ulayeeya mbwaakagwasyigwa  ciindi naakali kwiiya Bbaibbele. Wakaamba kuti: “Ciindi nondakamvwa zyakuluula zyabakwesu, ndakabona kuti Jehova ulaazyi mapenzi ngotujana. Alimwi kuti balo kabacikonzya kuliyumya, nkokuti andime inga ndacikonzya.”

11-12. Nkaambo nzi ncotweelede kumutambula camaanza obilo sikwiiya Bbaibbele uuswaangana?

¹¹ Kutegwa sikwiiya Bbaibbele ayelele kubbapatizyigwa, weelede kunoojanika lyoonse kumiswaangano yambungano alimwi akugwasyigwa anjiyo. (Heb. 10:24, 25) Cakutadooneka, mwiiyi ulakonzya kumutamba sikwiiya kumuswaangano. Aakutalika kujanika kumuswaangano, toonse tulakonzya kumukulwaizya kuti azumanane kunooboola ku Ŋanda ya Bwami. Mbuti mbotukonzya kucita oobo cacigaminina?

¹² Amumutambule amaanza obilo sikwiiya. (Rom. 15:7) Ikuti sikwiiya walimvwa kutambulwa kumiswaangano, ciyoomupa kuzumanana kunooboola ku Ŋanda ya Bwami. Kakunyina kumujazya nsoni, amumwaanzye calukkomano alimwi akumuzyibya kuli bamwi. Amubandike anguwe, nkaambo ambweni mwiiyi wakwe inga katanasika naa ujisi bubi amilimo imwi a Ŋanda ya Bwami. Amubikkile maano kuli nzyaamba sikwiiya alimwi akutondezya kuti mulamubikkila maano. Ino kucita boobu inga kwamugwasya buti sikwiiya? Amubone cikozyanyo caba Dmitrii, ibakabbapatizyigwa myaka misyoonto yainda pele lino mbakutausi. Nobayeeya cakacitika nobakajanika kumuswaangano ciindi cakusaanguna baamba kuti: “Mukwesu naakandibona anze aa Ŋanda ya Bwami kumwi kandiyoowede, wakandinjizya mu Ŋanda ya Bwami. Banji bakaboola kundaanzya alimwi ndakagambwa. Ndakakkomana citaambiki akulimvwa kuti kubota nsondo yoonse abuzuba katuboola kumuswaangano. Eeci kunyina nocakandicitikilide mubuumi bwangu.”

13. Mbuti cikozyanyo canu cibotu mbocikonzya kumugwasya sikwiiya Bbaibbele?

¹³ Amube cikozyanyo cibotu. Cikozyanyo canu cilakonzya kumugwasya sikwiiya Bbaibbele kusyoma kuti tuli Banakristo bakasimpe. (Mt. 5:16) Mukwesu Vitalii, lino imupainiya ku Moldova, wakaamba kuti: “Ndakaiya kuzwa kuli bamwi mumbungano kujatikizya mbobapona, mbobayeeya alimwi ambobacita zintu. Eeci cakandipa kusyoma kuti Bakamboni ba Jehova masimpe beenda a Leza.”

14. Mbuti cikozyanyo canu cibotu mbocikonzya kugwasya muntu kuzumanana kuyaambele kumuuya?

¹⁴ Kutegwa sikwiiya ayelele kubbapatizyigwa, weelede kuzibelesya nzyaiya pele eeci tacili cuubauba. Aboobo ciindi sikwiiya nabona mbomwagwasyigwa anjiisyo zyamu Bbaibbele, ulakonzya kukulwaizyigwa kwiiya cikozyanyo canu. (1Kor. 11:1) Amubone cikozyanyo  caba Hanae, ibaambwa kale. Bakaamba kuti: “Bakwesu abacizyi bakali kuzicita kale zintu nzyondakali kwiiya. Ndakaiya mbondakeelede kuba muntu uukulwaizya, uulekelela alimwi uutondezya luyando. Lyoonse bakali kwaamba zintu zibotu kujatikizya bamwi. Alimwi ndakaliyandide kubaiya.”

15. Mbuti lugwalo lwa Tusimpi 27:17 mbolutugwasya kubona kaambo ncotweelede kumvwana asikwiiya Bbaibbele uuswaangana?

¹⁵ Amube balongwe basikwiiya. Ciindi sikwiiya naazumanana kuswaangana, amutondezye kuti mulamubikkila maano. (Flp. 2:4) Amusoleke kumuzyiba kabotu. Mulakonzya kumwaambila mbomukkomene kubona kuyaambele nkwaacita. Mulakonzya kumubuzya kujatikizya mbwakubona kwiiya Bbaibbele, mukwasyi wakwe, alimwi amulimo ngwabeleka. Pele tamweelede kumubuzya mibuzyo iijazya nsoni. Mibandi iili boobu inga yayumya cilongwe canu asikwiiya. Kwiinda mukucita boobu, mulakonzya kumugwasyilizya sikwiiya kuti ayelele kubbapatizyigwa. (Amubale Tusimpi 27:17.) Mucizyi Hanae, lino mupainiya waciindi coonse. Kayeeya ciindi naakatalika kujanika kumiswaangano, wakaamba kuti: “Nondakaba abalongwe mumbungano, ndakali kwiikkomanina miswaangano, alimwi ndakali kuunka nociba ciindi nondakali kulimvwa kukatala. Ndakatalika kukkomana kuyanzana abalongwe bangu bapya, eeci cakandigwasya kuleka kumvwana abantu batakombi Jehova. Ndakali kuyanda kuba acilongwe ciyumu a Jehova alimwi abakwesu abacizyi. Aboobo ndakasala kubbapatizyigwa.”

16. Ncinzi cimbi ncomukonzya kucita kugwasya sikwiiya Bbaibbele kulimvwa kuti uzulilwa mumbungano?

¹⁶ Ciindi sikwiiya naazumanana kuyaambele, amumugwasye kulimvwa kuti uzulilwa mumbungano. Mulakonzya kucita oobo kwiinda mukuba bantu basamausya. (Heb. 13:2) Mukwesu Denis uukkala ku Moldova, ulayeeya ciindi naakali kwiiya Bbaibbele, ulati: “Ziindi zinji, mebo abakaintu bangu twakali kutambwa kuyanzana abakwesu. Bakatwaambila Jehova mbwaakabagwasya. Eeci cakatukulwaizya. Ziindi zili boobu zyakatugwasya kusinizya kuti twakali kuyanda kubelekela Jehova alimwi akuti twakali kuyooba abuumi bubotu kumbele.” Ciindi sikwiiya Bbaibbele naaba sikumwaya mulakonzya kumutamba kuti amusangane mumulimo wamumuunda. Mukwesu Diego uukkala ku Brazil, wakaamba kuti: “Bakwesu banji bakali kunditamba kuya mubukambausi. Eeci cakandigwasya kubazyiba kabotu. Kwiinda mukucita boobo, ndakaiya zinji alimwi cilongwe cangu a Jehova a Jesu cakayuma.”

17. Mbuti baalu mbobakonzya kugwasya basikwiiya Bbaibbele?

¹⁷ Amujane ciindi cakubandika abasikwiiya. Nobaalu, ciindi nomutondezya luyando alimwi akubabikkila maano basikwiiya, muyoobagwasya  kuyaambele akweelela kubbapatizyigwa. Sena lyoonse mulabandika abasikwiiya Bbaibbele kumiswaangano? Bayoobona kuti mulababikkila maano ikuti kamwaayeeya mazina aabo, kwaambisya kuti batalika kupa bwiinguzi. Sena mulajana ciindi cakuunka asikumwaya kuyoosololela ciiyo ca Bbaibbele? Kwiinda mukucita boobo, mulakonzya kumugwasya sikwiiya kwiinda mbomwali kuyeeyela. Mucizyi Jackie, mupainiya uukkala ku Nigeria, wakaamba kuti: “Basikwiiya Bbaibbele banji balagambwa kuzyiba kuti mukwesu ngondakaunkide limwi kuciiyo mwaalu. Sikwiiya Bbaibbele umwi wakaamba kuti: ‘Musololi wakucikombelo cesu inga tasoli kucita oobo. Inga waswaya buyo bantu bavwubi alimwi ccita kuti bamubbadela!’” Sikwiiya ooyo lino ulajanika kumiswaangano.

18. Mbuti baalu mbobakonzya kubelesya majwi aali kulugwalo lwa Milimo 20:28 ciindi nobazuzikizya mukuli wabo?

¹⁸ Amubayiisye akubakulwaizya bamayi ba Bbaibbele. Nobaalu, mujisi mukuli mupati wakugwasya basikumwaya kuba bakambausi alimwi abamayi babotu. (Amubale Milimo 20:28.) Kuti umwi kali ansoni kusololela ciiyo ca Bbaibbele kamuliko, amusololele ndinywe. Mucizyi Jackie, iwaambwa kale wakati: “Lyoonse baalu balandibuzya kujatikizya ziiyo zyangu zya Bbaibbele. Ciindi nondijana buyumuyumu kusololela ciiyo ca Bbaibbele, balandigwasya. Balandipa busolozi bugwasya.” Baalu balakonzya kucita zinji kutegwa bakulwaizye bamayi ba Bbaibbele. (1Tes. 5:11) Mucizyi Jackie uyungizya kuti: “Ndilakkomana kapati ciindi baalu nobandikulwaizya alimwi akundaambila kuti balalumba akaambo kamulimo ngondibeleka canguzu. Majwi aali boobu alandikatalusya mbubwenya mbondikatalukwa ciindi nondinywa maanzi aatontola ciindi nokupya kapati. Ayungizya busungu bwangu alimwi alukkomano ndondijana mumulimo wakuyiisya bantu Bbaibbele.”—Tus. 25:25.

19. Ndukkomano nzi ndotukonzya kuba andulo toonse?

¹⁹ Nokuba kuti lino kunyina ciiyo ca Bbaibbele ncotusololela, tulakonzya kugwasyilizya umwi kukomena kumuuya. Kakunyina kwaamba zinji, tulakonzya kumugwasyilizya mwiiyi ciindi nasololela ciiyo. Tulakonzya kuba balongwe babasikwiiya Bbaibbele ciindi nobaboola ku Ŋanda ya Bwami alimwi akuba cikozyanyo cibotu kulimbabo. Baalu balakonzya kukulwaizya basikwiiya Bbaibbele kwiinda mukujana ciindi cakubandika ambabo alimwi balakonzya kubayiisya bamayi akubalumbaizya. Eelo kaka tulakkomana kapati ciindi notucita cintu cimwi nociceya buti kutegwa tugwasye muntu umwi kuyanda Jehova alimwi akumubelekela!