BA ALLEN * bakaamba kuti: “Ndakaliyoowede kulongela kokuno. Tiindakazyi kuti naa ndilakonzya kujana balongwe naa kutambulwa.” Ba Allen bayaabuzyibila mumbungano mpya iili mubusena bulampa makkilomita ainda ku 1,400 kuzwa nkobakali kukkala.

Ikuti naa mwakalongela kumbungano iimbi, ambweni andinywe mwakaliyoowede. Ino ncinzi cikonzya kumugwasya kutegwa muzyibile? Ino ncinzi ncomukonzya kucita ikuti kucinca kwamuyumina kwiinda mbomwali kukuyeeyela? Kulubazu lumwi, ikuti kamuli mumbungano mweena, ino mbuti mbomukonzya kupa kuti cibaubile-ubile bapya kucinca?

Amuyeeye cikozyanyo eeci: Ikuti cisamu cazyulwa, matewu alaneta. Ciindi cisamu nocizyulwa mubulongo, kanji-kanji miyanda yancico minji ilagonkwa kutegwa cuube-ube kucinyamuna. Lino mbocasimpilwa buyo, mpoonya-mpoonya cisamu ceelede kutalika kumena miyanda mipya. Mbubwenya buyo, ambweni kulongela kumbungano mpya kwamupa kuyaansi kumuuya. Kumbungano yanu nkomwakazwa, mwakamena “miyanda” ciindi nomwakali kubamba zilongwe zibotu alimwi akuba abubambe busitikide mbomwakazyibide bwakucita zintu zyakumuuya. Lino mweelede kumena miyanda mipya kutegwa muzwidilile mubukkale bupya. Ino ncinzi ciyoomugwasya kucita boobo? Nkutobela njiisyo zyamu Magwalo. Atulange-lange njiisyo zimwi.

Muntu uubala Jwi lya Leza lyoonse uli “mbuli cisamu cisimpidwe kumbali aatulonga twamaanzi, icisamu cizyala micelo muciindi ceelede, icijisi matuvwu aataneti. Zyoonse nzyacita ziyoozwidilila.”—Int. 1:1-3.

Mbubwenya mbuli cisamu mbociyandika maanzi lyoonse kutegwa cizumanane kukomena kabotu, Munakristo awalo uyandika kubala Jwi lya Leza lyoonse kutegwa azumanane kuyuma kumuuya. Aboobo, amuzumanane kubala Bbaibbele abuzuba akujanika kumiswaangano yambungano lyoonse. Amuzumanane kutobela bubambe bwanu bubotu bwakukomba mumukwasyi akucita ciiyo canu nobeni. Kufwumbwa zintu nzyomwakali kuyandika kumuuya nomwakali kubusena nkomwakazwa, nzyezintu nzyomuyandika amumbungano yanu mpya.

“Kufwumbwa uukatalusya bamwi alakwe uyookatalusyigwa.”—Tus. 11:25.

Muyookulwaizyigwa alimwi muyoofwambaana kuzyibila ciindi mwanootola lubazu mumulimo wakukambauka lyoonse. Ba Kevin, imwaalu Munakristo bakaamba kuti: “Icakandigwasya kapati mebo abakaintu bangu nkulembya bupaniya bwakugwasyilizya mbotwakasikila buyo mumbungano mpya. Twakafwambaana kuzyibana abakwesu, bapainiya, alimwi acilawo.” Ba Roger, ibakalongela kubusena bulampa makkilomita ainda ku 1,600 kuzwa nkobakali kukkala bakaamba kuti: “Inzila yiinda kugwasya kutegwa mufwambaane kuzyibila mumbungano yanu mpya nkuunka mumulimo wakukambauka lyoonse kuti kacikonzyeka. Alimwi amubazyibye baalu kuti mulilyaabide kugwasya mumbazu iili yoonse, ambweni mbuli kusalazya Ŋanda ya Bwami, kulisungula kupa cibeela cimwi lyamiswaangano, naa kunyamuna uumwi mumootokala ciindi nomuya kumiswaangano. Ciindi bakwesu abacizyi nobabona uumwi mupya uujisi muuya wakulyaaba, ciyakuuba-uba kulimbabo kuba mulongwe anguwe.”

“Amujalule myoyo yanu kulindiswe.”​—2Kor. 6:13.

Amujalule myoyo yanu kujatikizya makani aakutondezya luyando lwabunyina. Ba Melissa amukwasyi wabo nobakalongela kumbungano mpya, bakabikkila  maano kujana balongwe bapya. Mboobu mbobakaamba: “Kaitanatalika miswaangano alimwi anoyamana, twakali kuyanzana abantu ku Ŋanda ya Bwami. Eeci cakatupa ciindi cakubandika zinji ikutali buyo kugolela akwaanzyanya.” Alimwi eeci cakabagwasya banamukwasyi kwaazyiba mazina mapya cakufwambaana. Kuyungizya waawo, bakajalula myoyo yabo kwiinda mukusamausya bamwi, eeco calo icakapa kuti bayumye zilongwe zipya. Ba Melissa bakayungizya kuti, “Twakapana manamba aamafooni kutegwa katutuminana alimwi kabatubikkilizya mumilimo yakumuuya alimwi amilimo iimbi buyo.”

Ikuti naa cilamuyumina kubandika abantu mbomutazyi, mulakonzya kutalika asyoonto-syoonto. Mucikozyanyo, amumwetemwete—nokuba kuti kumatalikilo tamuyandi kucita boobo. Kumwetamweta kuyoobakwelelezya bamwi kulindinywe. Kayi, “kulangwa amuntu uukkomene kupa moyo kukondwa.” (Tus. 15:30, bupanduluzi buyungizyidwe) Ba Rachel, balo ibakalongela kulamfwu kapati kuzwa kubusena nkobakakomenena bakaamba kuti, “Ndilaansoni kapati. Zimwi ziindi ndilisungilizya buya kubandika abakwesu alimwi abacizyi mumbungano mpya. Ndilalanga-langa mu Ŋanda ya Bwami kutegwa ndibone muntu uunyina wakubandika limwi. Ambweni muntu ooyo ulaansoni mbuli ndime.” Sena tamukonzyi kulibikkila mbaakani yakubandika amuntu ngomutazyi kaitanatalika miswaangano naa noyamana?

Kulubazu lumwi, mulakonzya kukkomana kuzyibana abantu bapya kwansondo zisyoonto zyakumatalikilo. Pele mukuya kwaciindi, mulaleka kuba bapya. Aciindi eeci, mweelede kubeleka canguzu kutegwa muzumanane kujana balongwe bapya.

Zisamu zimwi zitola ciindi cilamfwu kwiinda zimwi kutegwa miyanda yanzizyo isime mubusena bupya. Mbubwenya buyo, takuli kuti boonse cibatolela ciindi ceelene kutegwa bazyibile mumbungano mpya. Ikuti naa kwainda ciindi cili mbocibede kuzwa nomwakalonga pesi mucijisi buyumuyumu kutegwa muzyibile, ikutobela njiisyo zyamu Bbaibbele eezyi kulakonzya kumugwasya:

“Tutaleki pe kucita zibotu, nkaambo kuciindi ceelede tuyootebula ikuti naa tiitwatyompwa.”—Gal. 6:9.

Amulipe ciindi cinji cakuzyibila kwiinda ncomwakali kuyeeyela. Mucikozyanyo, bamisyinali banji ibakanjila cikolo ca Gileadi balakkala kwamyaka iili mbwiibede kumulimo wabo wakubelekela kucisi cimbi kabatanaunka kuyooswaya kucisi cokwabo. Kucita boobo kulabagwasya kuzyibana kabotu abakwesu bamucisi eeco alimwi akuzyibila bukkale bupya.

Ba Alejandro, ibali kulonga-longa kwaziindi zinji balizyi kuti cilatola ciindi kuzyibila. Baamba kuti: “Ciindi cainda notwakalonga, bakaintu bangu bakaamba kuti, ‘Balongwe bangu boonse bali kumbungano nkotwakazwa!’” Bakabayeekezya kuti bakalaambide majwi ngeena aayo myaka yobilo yainda ciindi nobakalongede. Pele mumyaka yobilo eeyo, bakaintu baba Alejandro bakali kutondezya luyandisyo kuli bamwi alimwi bantu mbobatakazyi bakaba balongwe beni-beni.

“Utaambi kuti, ‘Ino nkaambo nzi mazuba aakaindi ncaakali mabotu kwiinda mazuba aano?’ nkaambo kubuzya kuli boobu takuli kwabusongo pe.”—Muk. 7:10.

Mutani kweelanyi mbungano yanu mpya kuli yeeyo nkomwakazwa. Mucikozyanyo, bakwesu mumbungano yanu mpya balakonzya kabali bantu bajisi nsoni naa baanguluka kapati kwiinda mbomuzyibide. Amubikkile maano kubube bwabo bubotu, mbubwenya mbomuyanda kuti abalo babikkile maano kubube bwanu bubotu. Ibapya bamwi bakagambwa kuti ntaamu yabo yakabapa kulibuzya kuti, ‘Sena ncobeni ndilijisi luyando “kuciinga coonse cabakwesu”’?—1Pet. 2:17.

 “Amuzumanane kulomba, eelyo muyoopegwa nzyomulomba.”—Lk. 11:9.

Amuzumanane kulomba lugwasyo. Ba David, imwaalu bakaamba kuti, “Tamweelede kusyoma nguzu zyanu nobeni ciindi nomulwana penzi eeli. Zintu zinji tulazizunda lilikke buyo kuti twagwasyigwa a Jehova. Amupaile kujatikizya penzi eeli!” Ba Rachel ibaambidwe kale abalo balazuminizya oobo. Baamba kuti, “Ikuti mebo abalumi bangu twalimvwa kuzanduka kumbungano, tulapaila cacigaminina kuli Jehova kuti, ‘Kotuzyibya ikuti naa kuli cintu cimwi ncotucita icipa kuti cibayumine bamwi kuswena kulindiswe.’ Mpoonya tulasolekesya kujana ciindi cinji cakuba abakwesu alimwi abacizyi.”

Nobazyali, ikuti bana banu kacibayumina kuzyibila, amujane ciindi cakupaila ambabo kujatikizya penzi eeli. Amubagwasye kujana balongwe bapya kwiinda mukuba abubambe bukonzya kubapa coolwe cakuyanzana ikukulwaizya.

Ino ncinzi ncomukonzya kucita kutegwa mubagwasye bapya ibakalongela mumbungano yanu? Amusolekesye kuba mulongwe wini-wini kuzwa kumatalikilo kwini. Kutegwa mucite boobo, amweezyeezye zintu nzyomunga mwayanda kuti bamwi bamucitile ikuti nomwali bapya, mpoonya akuzicita zintu eezyo. (Mt. 7:12) Sena bapya balakonzya kumusangana mukukomba kwamukwasyi naa kupulogilamu ya JW Broadcasting yamwezi amwezi? Sena tamukonzyi kubalomba kutegwa mubeleke limwi mumulimo wamumuunda? Ikuti naa mwalida antoomwe cakulya, kunyina nobaya kukuluba kusamausya kwanu. Ino ndugwasyo nzi alumwi ndomukonzya kubapa bapya?

Ba Carlos bakaamba kuti, “Ciindi notwakasika mumbungano yesu mpya, mucizyi umwi wakatupa mulongo wazintoolo imuli myuulo yazintu iili mbubo-mbubo. Eeco cakagwasya kapati.” Aabo ibakalonga kuzwa kubusena bwiindene abusena bupya mumakani aambobuca balakonzya kulumba kapati kubazyibya mbobeelede kusama ciindi nokupya, nokutontola, naa ciindi camainza. Alimwi mulakonzya kubagwasya kuti babe basungu mumulimo wabo wakukambauka kwiinda mukubalwiida buumi bwabantu bamucilawo eeco naa kubapandulwida zintu nzyobasyoma kujatikizya bukombi.

Ba Allen, ibaambwa kumatalikilo, bali mumbungano yabo mpya kwamwaka amyezi iili mbwiibede. Balayeeya ategwa: “Kumatalikilo ndakali kulisinikizya buya kutegwa tuzyibane abakwesu abacizyi. Pele lino balimvwa mbuli kuti tuli mukwasyi, alimwi ndilikkomene.” Ba Allen bakazyiba kuti kwiinda mukulonga, tiibakasweekelwa mulongwe uli woonse. Muciindi caboobo, bakajana bambi, balo ibalangilwa kuti banooli balongwe babo lyoonse.