EELO kaka cilakulwaizya alimwi akuumbulizya kutondezyegwa luzyalo! Ciindi notwazyiba kuti muntu uumwi ulatubikkila maano, tulalumba kapati. Mbwaanga umwi aumwi wesu ulayanda kweendelezyegwa caluzyalo, ino mbuti mbotukonzya kuba abube oobu bubotu kapati?

Luzyalo lulabikkilizya akubikkila maano kubukkale bwabamwi, kubabikkila maano kwiinda mumajwi mabotu alimwi amumilimo. Mbwaanga luzyalo lulatondezyegwa kwiinda mumilimo, tatweelede kulutondezya cakwiinzya buyo mulawo. Luzyalo lwini-lwini lulatondezyegwa kwiinda muluyando alimwi alweetelelo. Kuyungizya waawo, luzyalo luli boobu ncibeela camucelo wamuuya uusalala wa Leza walo Banakristo ngobaambilwa kuba anguwo. (Gal. 5:22, 23) Tweelede kuba aluzyalo, aboobo atulange-lange Jehova alimwi a Mwanaakwe mbobatondezya bube oobu alimwi akubona mbotukonzya kutobela cikozyanyo cabo.

Jehova ngusiluzyalo alimwi ulababikkila maano bantu boonse, kubikkilizya ‘abatalumbi ababi.’ (Lk. 6:35) Mucikozyanyo, Jehova “ulapasuzya zuba lyakwe kubantu babi ababotu alimwi ulapa mvwula kubantu baluleme abataluleme.” (Mt. 5:45) Aboobo, nobaba baabo ibatabikkili maano Jehova kuti Mulengi wabo abalo balagwasyigwa azipego zyakwe mubuumi alimwi balakonzya kuba alukkomano luli mbolubede.

Tulijisi cikozyanyo cibotu kapati caluzyalo ndwaakatondezya Jehova kuli ba Adamu a Eva. Nokwakainda buyo ciindi cisyoonto kuzwa nobakabisya, ba Adamu a Eva “bakasuma matewo aamukuyu akulyaanga mucibuno.” Pele Jehova wakazyiba kuti bakali kuyandika zisani zyeelela kutegwa bacikonzye kupona aanze aamuunda wa Edeni, ooko lino nyika nkoyakasinganizyigwa ‘amamvwa azincenya.’ Aboobo caluzyalo Jehova wakabapa nzyobakali kuyandika kwiinda mukubapangila “zisani zilamfwu zyazikutu.”—Matl. 3:7, 17, 18, 21.

Nokuba kuti Jehova ulatondezya luzyalo “kubantu babi ababotu,” pele uyandisisya kapati kutondezya luzyalo kubabelesi bakwe basyomeka. Mucikozyanyo, mumazuba aamusinsimi Zekariya, mungelo wakatyompwa kapati akaambo kakuti bantu bakalicilekede kuyakulula tempele mu Jerusalemu. Jehova wakaswiilila kumatongoosi amungelo alimwi wakamwiingula “amajwi mabotu alimwi aaumbulizya.” (Zek. 1:12, 13) Jehova wakamulanganya munzila njoonya eeyi musinsimi Elija. Aciindi cimwi, musinsimi wakatyompwa kapati cakuti wakalomba Jehova kuti amujaye buyo. Jehova wakabikkila maano kujatikizya mbwaakali kulimvwa Elija aboobo wakatuma mungelo kuti amuyumye-yumye. Kuyungizya waawo, Leza wakasyomezya musinsimi kuti tanaakali alikke. Naakamana kutambula majwi aaluzyalo aali boobu alimwi alugwasyo ndwaakali kuyandika, wakacikonzya kuzumanana amulimo wakwe. (1Bam. 19:1-18) Akati kababelesi ba Leza, nguni wiinda  kutondezya bube bwa Jehova ibuyandika kapati bwaluzyalo?

Ciindi naakali kubeleka mulimo wakwe anyika, Jesu wakazyibidwe kuti wakali siluzyalo alimwi uubikkila maano. Tanaakali muntu silunya naa uudyaaminina. Calweetelelo wakaamba kuti: “Amuboole kulindime nyoonse nomukatede akulemenwa, eelyo ndilamukatalusya. . . . Nkaambo joko lyangu talikatazyi kunyamuna.” (Mt. 11:28-30) Akaambo kaluzyalo lwakwe, bantu bakali kumutobela Jesu kufwumbwa nkwaakali kuunka. Jesu “wakabeetelela” akubasanina, wakaponya balwazi babo abalema alimwi akubayiisya “zintu zinji.”—Mk. 6:34; Mt. 14:14; 15:32-38.

Ikutondezya mbolwakali lupati luzyalo lwakwe, Jesu wakali kubikkila maano kujatikizya mbwaakali kubeendelezya bantu. Noliba leelyo naakajisi bubi, Jesu wakabatambula “kabotu” boonse aabo ibakali kumuyandaula. (Lk. 9:10, 11) Mucikozyanyo, kunyina naakamunyemena mukaintu iwakayoowede, ooyo nokuba kuti wakalisofweede kweelana amulawo, wakaguma cisani cakwe caatala kajisi lusyomo lwakuti ulapona kubulwazi bwakalobola. (Lev. 15:25-28) Calubomba kumukaintu ooyu iwakapenga kwamyaka iili 12, Jesu wakamwaambila kuti: “Mwanaangu, lusyomo lwako lwakuponya. Koya muluumuno, alimwi utakaciswi kabili kubulwazi oobu ibwali kukupenzya.” (Mk. 5:25-34) Eelo kaka taciliboteli kapati cikozyanyo caluzyalo eeci!

Muzikozyanyo nzyotwalanga-langa atala aawa, twabona kuti luzyalo lwini-lwini lulatondezyegwa kwiinda mumilimo. Jesu wakatondezya mbociyandika kubweza ntaamu mucikozyanyo camu Samariya mubotu. Nokuba kuti ba Samariya alimwi aba Juda tiibakali kulyatana, mwaalumi muna Samariya wamucikozyanyo wakamufwida luzyalo mwaalumi mu Juda iwakabbidwa, kuumwa akucaala kanetukide munzila. Luzyalo lwakapa kuti muna Samariya abweze ntaamu. Wakazambaila zilonda zyakwe alimwi akumutola kuŋanda yabeenzu. Wakabbadela mali kuli siŋanda yabeenzu kutegwa amulanganye mwaalumi ooyu iwakajisi zilonda alimwi wakalyaaba nokuba kubbadela mali aamwi aakali kuyoobelesyegwa.—Lk. 10:29-37.

Nokuba kuti luzyalo lulatondezyegwa kwiinda mumilimo, alimwi lulakonzya kutondezyegwa kwiinda mumajwi mabotu alimwi aakulwaizya. Aboobo, nokuba kuti “zintu nzyalibilika muntu nzyezipa kuti moyo wakwe utyompwe,” Bbaibbele liyungizya kuti “jwi libotu ndelipa kuti ukkomane.” (Tus. 12:25) Ciindi notutondezya luzyalo alimwi akubacitila zintu zibotu bamwi, tuyakwaamba zintu zikulwaizya kulimbabo alimwi eeci ciyoobapa kukkomana kapati. * Majwi eesu mabotu ayootondezya kuti tulababikkila maano. Kuti twacita oobo, ciyoobaubila-ubila kuliyumya mumapenzi ngobajana.—Tus. 16:24.

Akaambo kakuti bakalengwa “mucinkozya ca Leza,” bantu boonse balakonzya kuba abube bwaluzyalo. (Matl. 1:27) Mucikozyanyo, Juliyo, sikalumamba muna Roma iwakali kulanganya mwaapostolo Paulo naakali kuunka ku Roma, wakafwida mwaapostolo “luzyalo, aboobo wakamuzumizya kuunka kuyoobona beenzinyina kutegwa bakamulanganye” mudolopo lya Sidoni. (Mil. 27:3) Aciindi cimwi, bantu baku Melita bakatondezya “luzyalo lulibedelede” kuli Paulo alimwi akuli baabo ibakali alusyomo lwakanyonyooka mbuli bwato bwaloba. Mane buya bantu ibakali kukkala munsumbu bakabakunkila mulilo bantu aaba. (Mil. 28:1, 2) Nokuba kuti ncobakacita cakali cibotu kapati, pele kutegwa tube basiluzyalo beni-beni, tweelede kulutondezya lyoonse kutali buyo muziindi zimwi.

Kutegwa tumukkomanisye Leza cakumaninina, bube bwaluzyalo bweelede kuba cibeela  cabuntu bwesu bwalyoonse alimwi abuumi bwesu. Akaambo kaceeci, Jehova utwaambila kuti ‘tulisamike’ luzyalo. (Kol. 3:12) Mubwini, talili lyoonse nocili cuuba-uba kulindiswe kuba abube oobu bwabunaleza. Ino nkaambo nzi? Tulakonzya kwaalilwa kutondezya luzyalo akaambo kakuti tulaansoni, tatulisyomi, tulakazyigwa, naa tujisi muuya wakuliyanda. Nokuba boobo, tulakonzya kubuzunda buyumuyumu buli boobu kwiinda mukusyoma muuya uusalala alimwi akwiinda mukwiiya mbwatondezya luzyalo Jehova.—1Kor. 2:12.

Sena inga twazyiba ncotweelede kucita kutegwa katutondezya luzyalo? Tweelede kulibuzya kuti: ‘Sena ndilaswiilila calweetelelo? Sena ndilabikkila maano kuli nzyobayandika bamwi? Ndilili nondakatondezya luzyalo kumuntu uumwi uutali munamukwasyi naa mulongwe’? Mpoonya tulakonzya kulibikkila mbaakani, mbuli kuyanda kubazyiba kabotu basimukoboma, ikwaambisya aabo ibali mumbungano ya Bunakristo. Kwiinda mukucita boobo, tuyoobuzyiba bukkale bwabo alimwi anzyobayandika. Alimwi tweelede kusoleka kutondezya luzyalo kuli bamwi munzila njiyonya njotukonzya kuyanda kuti bamwi batufwide luzyalo andiswe ikuti katuli mubukkale bwabo. (Mt. 7:12) Mpoonya Jehova uyootugwasya kuba abube bwaluzyalo kuti naa twamulomba.—Lk. 11:13.

Ciindi mwaapostolo Paulo naakaamba zintu izyakamuzyibya kuti mubelesi wa Leza, wakabikkilizya “aluzyalo.” (2Kor. 6:3-6) Bantu bakali kumuyanda Paulo akaambo kakuti wakali kubabikkila maano, eeci wakacitondezya kwiinda mumilimo alimwi amumajwi aaluzyalo. (Mil. 28:30, 31) Mbubwenya buyo, tulakonzya kupa kuti bantu bakakkomanine kasimpe kwiinda mumilimo yesu yaluzyalo. Kuti katutondezya luzyalo kubantu boonse, kubikkilizya abaabo batukazya, tulakonzya kupa kuti baleke kunyema naa kuba bakali alimwi balatalika kutweendelezya kabotu. (Rom. 12:20) Mukuya kwaciindi, ambweni buya bayakuutambula mulumbe wamu Bbaibbele.

Mu Paradaiso iboola kumbele, cakutadooneka, bantu banji kapati ibayoobusyigwa bayookkomana kutondezyegwa luzyalo lwini-lwini, ambweni kwaciindi cakusaanguna. Akaambo kalukkomano, abalo bayookulwaizyigwa kutondezya luzyalo kuli bamwi. Aboobo boonse ibayakwaalilwa kutondezya luzyalo alimwi akugwasya bamwi tabakazumanani kupona mu Paradaiso. Kulubazu lumwi, aabo mbayoozumizya Leza kupona kukabe kutamani bayakweendelezyanya caluyando alimwi acaluzyalo. (Int. 37:9-11) Eelo kaka inooli nyika iikwabilidwe alimwi yaluumuno! Nokuba boobo, kacitanasika ciindi eeco cikkomanisya kapati, mbuti mbotukonzya kugwasyigwa lino akaambo kakutondezya luzyalo?

Ibbaibbele lyaamba kuti, “muntu siluzyalo ulaliletela mpindu.” (Tus. 11:17) Bantu balakwelelezyegwa kumuntu siluzyalo alimwi abalo balatondezya luzyalo kulinguwe. Jesu wakaamba kuti: “Cipimyo ncomubelesya kupimina bamwi, ncobayoobelesya kumupimina andinywe.” (Lk. 6:38) Aboobo, muntu siluzyalo ulafwambaana kujana balongwe alimwi ulakakatila kuzilongwe zibotu.

Mwaapostolo Paulo wakakulwaizya baabo ibakali mumbungano yaku Efeso kuti, “amufwidilane luzyalo, mube amoyo mutete walubomba, akulekelelana camoyo woonse.” (Ef. 4:32) Mbungano ilagwasyigwa kapati kuti boonse kabatondezya lweetelelo aluzyalo alimwi akugwasyanya umwi amweenzinyina. Boonse tabaambi majwi mabi naa majwi aakusampaula. Muciindi cakuvwiya bamwi, balasoleka kubelesya mulaka wabo kugwasya bamwi. (Tus. 12:18) Akaambo kaceeci, mbungano ilayaambele kumuuya.

Inzya, luzyalo mbube butondezyegwa mumajwi alimwi amumilimo. Kuti katuli basiluzyalo, tutondezya bube bubotu, nkokuti bwaabi bwa Leza wesu, Jehova. (Ef. 5:1) Mpoonya, tuyooziyumya mbungano zyesu alimwi akukwela bamwi kubukombi busalala. Aboobo lyoonse atube bantu bazyibidwe kutondezya kuzyalo.