1919—Myaka Iili 100 Yainda
KUZIKUSIKA mu 1919, Nkondo Mpati (kumbele iyakaitwa kuti Nkondo Yakusaanguna Yanyika Yoonse), eeyo iyakatola myaka yone, yakalimanide. Kumamanino aamwaka wa 1918, zisi zyakaleka kulwana, aboobo mu January 18, 1919, muswaangano iwakali kwiitwa kuti Paris Peace Conference wakatalika. Cimwi cazintu icakazwidilila kumuswaangano ooyu, nkupanga Cizuminano caku Versailles, eeco icakamanizya nkondo akati kacisi ca Germany alimwi azisi nzyobakali kulwana limwi. Cizuminano eeco cakasainwa mu June 28, 1919.
Kuyungizya waawo, cizuminano eeco cakatalisya mbunga mpya iitwa kuti League of Nations (Ciinga Calukamantano Lwazisi). Makanze aambunga eeyi akali “aakusumpula lukamantano, luumuno alimwi alukwabililo akati kazisi.” Zikombelo zinji zya Bunakristo Bwanyika zyakaba kulubazu lwambunga eeyi. Iba Mbungano ya Zikombelo zya Kristo ku America bakaambilizya kuti ciinga Calukamantano lwazisi “cinooiminina Bwami bwa Leza anyika.” Iba Mbungano eezyi bakatondezya kuti bakali kulubazu lwambunga eeyi kwiinda mukutuma bantu ku Paris Peace Conference. Umwi akati kabaabo ibakatumwa wakaamba kuti, muswaangano ooyu “akali matalikilo aabukkale bupya munyika yoonse.”
Bukkale bupya bwakatalika, pele tiibwakatalisyigwa abantu aabo ibakali kumuswaangano ooyo iwakubamba luumuno. Mu 1919, bukkale bupya mumulimo wakukambauka bwakatalika ciindi Jehova naakayumya bantu bakwe kuti bakambauke canguzu kwiinda mbobakali kucita kaindi. Pele kacitanacitika eeci, kuli cintu cipati icakeelede kucinca kujatikizya Basikwiiya Bbaibbele.
KUSALA IKUKATAZYA KAPATI
Joseph F. Rutherford
Kusala beendelezi ba Watch Tower Bible and Tract Society ikwakali kucitwa mwaka amwaka kwakali kuyoocitwa mu Mujibelo, January 4, 1919. Aciindi eeco, ba Joseph F. Rutherford, ibakali kusololela bantu ba Jehova, bakali muntolongo ku Atlanta, Georgia, U.S.A., antoomwe abakwesu bambi ibali ciloba. Aboobo bakwesu bakeelede kusala naa beendelezi ibakali muntolongo inga bazumanana kuba beendelezi naa kusala bambi.
Evander J. Coward
Kali muntolongo, Mukwesu Rutherford wakalibilika kujatikizya mboyakali kuyooba mbunga kumbele. Wakalizyi kuti bakwesu bamwi bakali kulimvwa kuti inga cainda kubota kuti kwasalwa muntu uumbi kuba mweendelezi wambunga. Akaambo kaceeci, wakalemba lugwalo kulibaabo ibakabungene, kulumbaizya ba Evander J. Coward kuba mweendelezi wambunga. Ba Rutherford bakaamba kuti ba Coward “mbabombe,” “balicenjede,” alimwi “balasyomeka ku Mwami.” Nokuba boobo, bakwesu banji bakajisi muzeezo uumbi, wakuti babusumpye buzuba oobo bwakusala mweendelezi kwamyezi iili cisambomwe. Basimilawo ibakali kwiiminina bakwesu ibakaangidwe bakazumina. Ciindi nobakali kubandika kujatikizya ncobakeelede kucita, bakwesu bamwi bakanyema.
Richard H. Barber
Mpoonya kwakacitika cintu cimwi calo ba Richard H. Barber ncobakaamba kuti ncecakakosola makani aakakatazyide. Mukwesu umwi iwakaliko mumuswaangano ooyo wakaamba kuti: “Tandizyi kabotu mulawo mboubeleka, pele ndilizyi ncocaamba kusyomeka. Kusyomeka ncecintu Leza ncayanda. Nzila iinda kubota mbotukonzya kutondezya kusyomeka kwesu kuli Leza nkumusala alimwi Mukwesu Rutherford kuba mweendelezi wambunga.”—Int. 18:25.
Alexander H. Macmillan
Mwaangenyina A. H. Macmillan kumbele wakaamba cakacitika buzuba bwakatobela ciindi Mukwesu Rutherford naakakonkomona oomo mwaakaangidwe akumupa lugwalo bakwesu ndobakamutumina Mukwesu Rutherford ilujatikizya kusala beendelezi. Ba Macmillan bakabona mabala aakalembedwe mubufwaafwi alimwi mbobakaabonena buyo bakazyiba ncaakali kwaamba. Mabala aayo akalembedwe kuti: “RUTHERFORD WISE VAN BARBER ANDERSON BULLY ALIMWI ABA SPILL BAKUSAANGUNA BOTATWE MBEENDELEZI TULAMUYANDA NYOONSE.” Eeci caamba kuti ba Joseph Rutherford aba William Van Amburgh bazumanana kabali beendelezi. Mpoonya Mukwesu Rutherford wazumanana kuba mweendelezi wambunga.
BAANGUNUNWA!
Ciindi bakwesu aaba ibali lusele nobakali muntolongo, Basikwiiya Bbaibbele bakalomba bantu kusaina pepa lyakulomba mfwulumende kuti bakwesu aaba baangununwe. Bakwesu abacizyi aaba basicamba bakajana bantu ibainda ku 700,000 ibakasaina. Muli Bwatatu, March 26, 1919, pepa eeli kalitanapegwa kumfwulumende, Mukwesu Rutherford antoomwe abakwesu bamwi ibakajisi mikuli bakaangununwa.
Mumajwi ngaakaambila baabo ibakamutambula, Mukwesu Rutherford wakati: “Ndilisinizyide kuti eeci icakatucitikila toonse catugwasya buyo kulibambila ziindi zikatazya iziboola kumbele. . . . Nkondo njomwakalwana tiiyakali buyo yakugwisya basyominyoko muntolongo. Aako takali nkakaambo kapati kamulimo woonse ooyu. . . . Makanze aankondo njomwakalwana, akapa bumboni kujatikizya Kasimpe alimwi aabo ibakatola lubazu balongezyegwa kapati.”
Twaambo twakajatikizyidwe mukwaangununwa kwabakwesu aaba twakatondezya kuti Jehova ngowakali kweendelezya zintu. Mu May 14, 1919, nkuta iyakainduluka mulandu wabo yakakosola kuti: “Beendelezi aaba mumakani aaya kunyina . . . nobakabetekwa cabululami kweelana alwaanguluko ndobajisi mumulawo. Aboobo mbwaakakosolwa makani mulubeta lwakusaanguna kwakakakwa.” Bakwesu aaba bakatamikizyigwa milandu mipati alimwi nobakazumanana kuba aampuwo yamilandu eeyi ikuti naa nobakaile kulekelelwa buyo alimwi akuti nobakaangwa buyo kwaciindi cisyoonto. Kunyina milandu iimbi njobakapegwa. Aboobo Mubetesi Rutherford wakazumanana azyeelelo zyakwe ikwiiminina bantu ba Jehova mu Nkuta Mpati yaku United States, imulimo ngwaakabeleka ziindi zinji kuzwa naakaangununwa.
BAKAKANZIDE KUKAMBAUKA
Mukwesu Macmillan wakaamba kuti: “Tiitwakakkede buyo katwiile kulindila kuti Mwami atutole kujulu. Twakabona kuti twakeelede kucita cintu cimwi kutegwa tuzyibe cini ncaakali kuyanda Mwami.”
Pele tiicakali cuubauba kubakwesu ibakali kumaofesi mapati ikwiile kuutalika alimwi mulimo ngobakali kucita kwamyaka minji. Nkaambo nzi? Nkaambo kakuti ciindi nobakaangidwe, zibeela zimwi zya mincini yoonse njobakali kubelesya kupulinta mabbuku yakanyonyoonwa. Eeci cakali kutyompya kapati alimwi bakwesu bamwi bakayeeya kuti aaya ngaakali mamanino aamulimo wakukambauka.
Sena kuli bakacili kuukkomanina mulumbe wa Bwami ngobakali kukambauka Basikwiiya Bbaibbele? Kutegwa mubuzyo ooyu wiingulwe, Mukwesu Rutherford wakayeeya kuti ape makani. Aboobo bantu boonse bakatambwa. Mukwesu Macmillan wakaamba kuti: “Ikuti bantu nobatakaboola kumuswaangano ooyu, notwakazyiba kuti mulimo wakukambauka wakamana.”
Nyuzi pepa iyakali kwaambilizya makani aa Mukwesu Rutherford aakuti “The Hope for Distressed Humanity” (Bulangizi Kuli Baabo Ibatyompedwe) ku Los Angeles, California, mu 1919
Aboobo mu Nsondo, May 4, 1919, nokuba kuti wakalicisidwe kapati, Mukwesu Rutherford wakapa makani aakajisi mutwe wakuti, “The Hope for Distressed Humanity” (Bulangizi Kuli Baabo Ibatyompedwe) ku Los Angeles, California. Bantu basika ku 3,500 bakajanika kumakani aaya alimwi bantu banji bakasika, pele tiibakacikonzya kunjila akaambo kakuti busena bwakaceya. Mpoonya buzuba bwakatobela, bantu abambi ibasika ku 1,500 bakajanika. Aboobo bakwesu bakabujana bwiinguzi, bantu bakacili kuukkomanina mulumbe!
Kuzwa waawo, ncobakacita bakwesu aaba, cakajatikizya mbobaucita mulimo wabo wakukambauka Bakamboni ba Jehova kusikila lino.
BAKALILIBAMBILEDE KUJATIKIZYA KUYAAMBELE IKWAKALI KUYOOCITIKA KUMBELE
Ngazi Yamulindizi yamu August 1, 1919, yakaambilizya kuti kumatalikilo aamwezi wa September, muswaangano mupati wakali kuyoocitwa ku Cedar Point, Ohio. Ba Clarence B. Beaty, ibakali Basikwiiya Bbaibbele ibakacili bana-bana ibakali kuzwa ku Missouri, bakaamba kuti “Bantu boonse bakali kulimvwa kuti beelede kuyoojanika kumuswaangano.” Bakwesu alimwi abacizyi ibainda ku 6,000 bakajanika kumuswaangano, bantu bakali banji kapati kwiinda mbobakali kuyeeyela. Cintu cimwi icakapa kuti muswaangano ooyu ukkomanisye kapati ncakuti bantu ibainda ku 200 bakabbapatizyigwa muzyiba lya Erie ilyakali aafwaafwi abusena bwamuswaangano.
Civwumbyo camagazini yakusaanguna ya The Golden Age, yamu October 1, 1919
Mu September 5, 1919, buzuba bwasanu bwamuswaangano, mumakani aakwe aakuti, “Address to Co-laborers” (Makani Kuli Basimilimoma) Mukwesu Rutherford wakaambilizya kumwaigwa kwamagazini mpya, yakuti The Golden Age. * Wakaamba kuti: “Magazini eeyo inoojisi mulumbe uuyandika kapati kujatikizya zintu izicitika munyika, kupa bupanduluzi bwamu Magwalo kujatikizya kaambo zintu eezyo zipati-pati ncozyakali kucitikila.”
Basikwiiya Bbaibbele boonse bakakulwaizyigwa kukambauka cabusicamba kwiinda mukubelesya magazini eeyi mpya. Lugwalo ilwakali kutondezya mbowakali kweelede kucitwa mulimo ooyu lwakalembedwe kuti: “Muntu uuli woonse uulyaabide [uubbapatizyidwe] weelede kuyeeya kuti ncoolwe cipati kubeleka mulimo wakukambauka alimwi weelede kuucita kusikila mpagolela.” Bantu banji bakaukkomanina mulimo ooyu! Kuzikusika mu December, basikumwaya ba Bwami basungu bakajana bantu ibainda ku 50,000 ibakalilembya kuti kabatambula magazini eeyi mpya.
Bakwesu ku Brooklyn, New York, amoota iijisi magazini ya The Golden Age
Kumamanino amwaka wa 1919, bantu ba Jehova bakakamantana alimwi akuyumizyigwa. Kuyungizya waawo, businsimi bunji ibuyandika kapati ibujatikizya mazuba aamamanino bwakazuzikizyigwa. Kusunkwa alimwi akusalazyigwa kwabantu ba Jehova, ikwakasinsimwa kulugwalo lwa Malaki 3:1-4, kwakamana. Bantu ba Jehova bakaangununwa kuzwa mubuzike bwacikozyanyo kuli “Babuloni Mupati” alimwi Jesu wakasala “muzike uusyomeka alimwi uucenjede.” * (Ciy. 18:2, 4; Mt. 24:45) Lino Basikwiiya Bbaibbele bakalilibambilide kuubeleka mulimo Jehova ngwaakali kuyanda kuti bacite.
^ munc. 22 Mu 1937 magazini yakuti The Golden Age yakatalika kwiitwa kuti Consolation mpoonya mu 1946 yakatalika kwiitwa kuti Sinsimuka!
