1. Ncinzi citupa kusinizya kuti tupona “kumazuba aamamanino”?

SENA mwakazyalwa nowakainda mwaka wa 1914? Ikuti naa mboobo, nkokuti buumi bwanu boonse mwali kupona “kumazuba aamamanino” aabweende bwazintu obuno. (2Tim. 3:1) Toonse twakamvwa kujatikizya zintu Jesu nzyaakasinsima kuti ziyoocitika kuciindi ecino. Eezyi zibikkilizya nkondo, nzala, mizuzumo yanyika, malwazi, kuvwula kwabubi alimwi akupenzyegwa kwabantu ba Jehova. (Mt. 24:3, 7-9, 12; Lk. 21:10-12) Alimwi twalibonena bantu kabapona kweelana ambwaakasinsima mwaapostolo Paulo. (Amubone kabbokesi kakuti “ Mbobabede Bantu Mazuba Aano.”) Mbotuli bakombi ba Jehova, tulisinizyide kuti tupona “kumamanino aamazuba aayo.”—Mik. 4:1.

2. Mibuzyo nzi njotuyandika kuti tuzyibe bwiinguzi?

² Akaambo kakuti kwainda ciindi cilamfwu kuzwa mu 1914, kweelede kuti lino tupona kumamanino ‘aamazuba aamamanino.’ Mbwaanga mamanino aabweende bwazintu alaafwaafwi kapati, tweelede kuzyiba bwiinguzi kumibuzyo eeyi iiyandika kapati: Nzintu nzi iziyoocitika kumamanino ‘aamazuba aamamanino’? Alimwi ino ncinzi Jehova ncayanda kuti tucite ciindi notulindila zintu eezyo kuti zicitike?

3. Kweelana abusinsimi ibuli kulugwalo lwa 1 Batesalonika 5:1-3, ino nkwaambilizya kuli buti nkoziyoocita zisi?

³ Amubale 1 Batesalonika 5:1-3. Paulo waamba kujatikizya “buzuba bwa Jehova.” Mulugwalo oolu, buzuba bwa Jehova caamba ciindi iciyootalika aakulwanwa “Babuloni Mupati,” ibulelo  bwanyika yoonse bwabukombi bwakubeja alimwi ciyoozumanana mane kumamanino aankondo ya Amagedoni. (Ciy. 16:14, 16; 17:5) Kabutanatalika “buzuba” oobo, zisi ziyakwaambilizya kuti “Luumuno akuliiba!” Zimwi ziindi beendelezi bamunyika babelesya mabala aakozyenye ayaaya ciindi nobaamba kujatikizya kubambulula zilongwe izili akati kazisi. * Nokuba boobo, kwaambilizya kwakuti “luumuno akuliiba” nkolyaamba Bbaibbele kunooyindene akooku. Nkaambo nzi? Caakucitika eeci, bantu banji bayooyeeya kuti beendelezi bamunyika bacikonzya kuleta luumuno munyika. Pele mubwini, “mapenzi mapati” ayootalika mpoonya “cakutayeeyela lunyonyooko” luyoobasikila.—Mt. 24:21.

4. (a) Nzintu nzi nzyotutazyi kujatikizya kwaambilizya kwakuti “luumuno akuliiba”? (b) Ino ncinzi ncotuzyi kujatikizya kwaambilizya ooku?

⁴ Kuli zintu zimwi nzyotuzyi kujatikizya kwaambilizya kwakuti “luumuno akuliiba.” Pele kuli zintu zimwi nzyotutazyi. Mucikozyanyo, tatuzyi iciyoopa kuti beendelezi bape cakwaambilizya eeci alimwi tatuzyi cakwaambilizya eeci mbociyoopegwa. Kuyungizya waawo, tatuzyi naa kuyoojatikizya buyo kwaambilizya komwe naa kuyakwaambilizyigwa ziindi zinji. Pele tulizyi kuti: Beendelezi bamunyika tabakonzyi kuleta luumuno munyika, aboobo kwaambilizya kwabo takweelede kutunyonganya. Muciindi caboobo, tweelede kuzyiba kuti ooku nkokwaambilizya Ibbaibbele nkolitwaambila kuti tukucenjelele. Ncitondezyo cakuti “buzuba bwa Jehova” bulaafwaafwi kutalika!

5. Mbuti lugwalo lwa 1 Batesalonika 5:4-6 mbolutugwasya kulibambila “buzuba bwa Jehova”?

⁵ Amubale 1 Batesalonika 5:4-6. Paulo ulatukulwaizya mbotweelede kusinizya kuti tulilibambilide kujatikizya “buzuba bwa Jehova.” Tatweelede ‘koona mbuli mbobacita bamwi.’ Pele tweelede kuzumanana ‘kupakamana.’ Mucikozyanyo, tweelede kupakamana kutegwa tutabi notutola lubazu mutwaambo twamapolitikisi. Ikuti naa twajatikizyigwa mutwaambo ootu, tulakonzya kuba “banyika.” (Joh. 15:19) Tulizyi kuti Bwami bwa Leza bulikke mbobuyooleta luumuno munyika.

6. Ino tuyanda kubagwasya kuti bacite nzi bamwi alimwi nkaambo nzi?

⁶ Kunze lyakuzumanana kupakamana tolikke, tuyandika kubagwasya bamwi kwiiya kujatikizya ncolyakasinsima Bbaibbele kuti ciyoocitika munyika. Atuyeeye kuti mapenzi mapati aakutalika, ciindi cakuti bantu bakombe Jehova cinoomanide. Nkakaambo kaako mulimo wesu wakukambauka ulibindide kapati! *

7. Ncinzi Jehova ncayanda kuti tucite lino?

⁷ Muciindi cisyoonto cisyeede kuti “buzuba” bwakwe butalike, Jehova uyanda kuti tujate bubi mumulimo wakukambauka. Tweelede  kuba masimpe kuti ‘tujisi zintu zinji zyakucita mumulimo wa Mwami.’ (1Kor. 15:58) Jesu wakasinsima kujatikizya ncotweelede kucita. Ciindi naakaamba kujatikizya zintu zyoonse zipati-pati izyakali kuyoocitika mumazuba aamamanino, Jesu wakayungizya kwaamba kuti: “Alimwi mumasi oonse, makani mabotu aleelede kukambaukwa cakusaanguna.” (Mk. 13:4, 8, 10; Mt. 24:14) Amuyeeye kuti: Lyoonse nomuunka mumulimo wakukambauka, mulagwasyilizya mukuzuzikizya businsimi bwamu Bbaibbele oobu.

8. Ino tuzyi buti kuti mulimo wakukambauka wazumanana kuyaambele?

⁸ Mbuti mulimo wakukambauka mbowazwidilila? Mwaka amwaka, mulimo ooyu uyaambele. Mucikozyanyo, amuyeeye buyo mweelwe wabasikumwaya ba Bwami mbowayungizyika nyika yoonse mboizulwa mumazuba aamamanino. Mu 1914, kwakali basikumwaya ibali 5,155 muzisi izili 43. Mazuba aano, kuli basikumwaya ibali 8.5 miliyoni muzisi izili 240! Nokuba boobo, mulimo wesu taunamana pe. Tweelede kuzumanana kubaambila bantu kuti Bwami bwa Leza bulikke mbobukonzya kumana mapenzi oonse ngobajisi bantu.—Int. 145:11-13.

9. Nkaambo nzi ncotweelede kuzumanana kwaambilizya mulumbe wa Bwami?

⁹ Mulimo wesu wakwaambilizya Bwami uyoozumanana kusikila mane Jehova akaambe kuti kwamana. Ncinji buti ciindi casyaala kuti bantu bamuzyibe Jehova Leza alimwi a Jesu Kristo? (Joh. 17:3) Tatuzyi pe. Pele ncotuzyi ncakuti kusikila mapenzi mapati akatalike, kufwumbwa ooyo ‘uulibambilide kutambula buumi butamani’ ulakonzya kuuzumina mulumbe wamakani mabotu alimwi akusala kubelekela Jehova. (Mil. 13:48) Mbuti mbotukonzya kubagwasya bantu aaba ciindi nocitanamana?

10. Ndugwasyo nzi Jehova ndwatupa kutegwa tuyiisye bantu kasimpe?

¹⁰ Kwiinda mumbunga yakwe, Jehova ulatupa zyoonse nzyotuyandika kutegwa tuyiisye bantu kasimpe. Mucikozyanyo, nsondo ansondo tulatambula lwiiyo kumuswaangano wamukati kansondo. Muswaangano ooyu ulatugwasya kuzyiba ncotweelede kwaamba munyendo zyakusaanguna alimwi amunyendo zyakupilukila. Alimwi ulatuyiisya mbokusololelwa ziiyo zya Bbaibbele. Kuyungizya waawo, mbunga ya Jehova yatupa zibelesyo izili mu Zibelesyo Nzyotubelesya Kapati Mukuyiisya. Zibelesyo eezyi zilatugwasya . . .

•   kutalisya mibandi,

• kwaamba mulumbe wesu munzila iipa bantu kuba aluyandisisyo,

• kukulwaizya bantu kuyanda kwiiya zinji,

• kuyiisya kasimpe kuziiyo zya Bbaibbele, alimwi

• akutamba baabo ibajisi luyandisisyo kuunka a webbusaiti yesu alimwi aku Maanda eesu aa Bwami.

Nokuba boobo, kuba buyo azibelesyo eezyi takuzulide pe. Tweelede kuzibelesya. * Mucikozyanyo, ikuti naa nomwamana kuba amubandi uukulwaizya amuntu uujisi luyandisisyo, mwamupa katulakiti naa magazini, ulakonzya kuzumanana kubala kusikila mukamuswaye alimwi. Mukuli wesu kutugama kujata bubi kukambauka kusikila mpotugolela mwezi amwezi.

11. Ino Ziiyo Zyamu Bbaibbele Ziyiilwa aa Intaneti zyakabambilwa nzi?

¹¹ Ziiyo Zyamu Bbaibbele Ziyiilwa aa Intaneti izili a jw.org^® * ninzila aimbi Jehova mbwagwasya bantu kwiiya kasimpe. Ino ziiyo eezyi zyakabambilwa nzi? Mwezi amwezi, bantu banji kapati nyika yoonse mboizulwa balaunka a Intaneti kuyandaula ziiyo zyamu Bbaibbele. Ziiyo izili awebbusaiti yesu zilakonzya kubagwasya bantu aaba kutalika kwiiya kasimpe ikali mu Jwi lya Leza. Bantu bamwi mbomukambaukila balakonzya kuwaya-waya kuzumina ciiyo ca Bbaibbele cibageme. Ikuti naa kacili boobo, amubatondezye cibeela eeci awebbusaiti yesu naa kubatumina liinki yuunka acibeela eeci.

12. Ino ncinzi muntu ncakonzya kwiiya kuzwa mu Ziiyo Zyamu Bbaibbele Ziyiilwa aa Intaneti?

¹² Mucibeela eeci ca Ziiyo Zyamu Bbaibbele Ziyiilwa aa Intaneti mujanika twaambo ootu: “Bbaibbele Alimwi Amulembi Wandilyo,” “Bantu baambidwe mu Bbaibbele,” alimwi akakuti “Mulumbe Wamu Bbaibbele Uupa Bulangizi.” Ciindi nalanga-langa twaambo ootu, muntu uyoozyiba:

• Ibbaibbele mbolikonzya kugwasya muntu

• Kuti ino Jehova, Jesu, alimwi abangelo mbaani

• Kaambo Leza ncaakabalengela bantu

• Kaambo ncokuli bubi alimwi akupenga

Alimwi ziiyo eezyi zilaamba kujatikizya Jehova . . .

• mbwayoogwisya kupenga alimwi alufwu,

• mbwayoobabusya bafwide, alimwi

• ambwayoogwisya mfwulumende zyabantu akubikka Bwami bwakwe.

13. Sena Ziiyo Ziyiilwa aa Intaneti zinjila mubusena bwabubambe bwaciiyo ca Bbaibbele? Amupandulule.

¹³ Ziiyo ziyiilwa aa intaneti tazinjili mubusena bwabubambe bwaciiyo ca Bbaibbele. Jesu watupa coolwe cakugwasya bantu kuba basikwiiya. Tulombozya kuti bantu ibajisi luyandisyo bakazyibale ziiyo eezyi, kuzikkomanina nzyobaiya alimwi akuyanda kwiiya zinji. Kuti naa caba boobo, ambweni bayoozumina ciiyo ca Bbaibbele. Kumamanino aciiyo cimwi acimwi, sikubala ulakulwaizyigwa kulomba muntu wakumuyiisya Bbaibbele. Buzuba abuzuba, mbunga ilatambula bantu ibalomba kwiiya Bbaibbele ibainda ku 230 munyika yoonse mboizulwa kwiinda mukubelesya webbusaiti yesu! Eelo kaka cilayandika kapati kuyiisyigwa amuntu umwi cacigaminina!

14. Kweelana amalailile aa Jesu aali mulugwalo lwa Matayo 28:19, 20, ncinzi ncotweelede kusoleka kucita kusikila mpotugolela alimwi nkaambo nzi?

¹⁴ Amubale Matayo 28:19, 20. Ciindi notusololela ziiyo zya Bbaibbele, tweelede kusoleka kusikila mpotugolela kugwasya bantu ‘kuti babe basikwiiya, . . . , kubayiisya kutobela zintu zyoonse nzyaakatulailila [Jesu].’ Tweelede kubagwasya bantu kumvwisya mbociyandika kapati kusala kubelekela Jehova alimwi akugwasyilizya Bwami bwakwe. Eeci caamba kuti tweelede kusoleka kubakulwaizya bantu kuzibelesya  nzyobaiya, kwaaba buumi bwabo kuli Jehova alimwi akubbapatizyigwa. Lilikke buyo kuti bacita oobo, ndendilyo nobayoofwutuka mubuzuba bwa Jehova.—1Pet. 3:21.

15. Nciindi nzi ncotutajisi alimwi nkaambo nzi?

¹⁵ Mbubwenya mbokwaambwa kale, kwasyaala buyo ciindi cisyoonto kuti mamanino aabweende bwazintu asike. Aboobo, tatujisi ciindi cakuzumanana kuyiisya bantu ibatacinci bukkale bwabo kutegwa batondezye kuti balayanda kuba babelesi ba Jehova. (1Kor. 9:26) Mulimo wesu ulibindide kapati! Kuli bantu banji ibaciyandika kumvwa mulumbe wa Bwami nocitanamana ciindi.

16. Kweelana alugwalo lwa Ciyubunuzyo 18:2, 4, 5, 8, ncinzi toonse ncotweelede kucita? (Amubone abupanduluzi buyungizyidwe.)

¹⁶ Amubale Ciyubunuzyo 18:2, 4, 5, 8. Tupango ootu tutondezya cintu cimwi Jehova ncayanda kubakombi bakwe. Banakristo bakasimpe boonse beelede kuba masimpe kuti kunyina mpobajatikizyidwe abukombi bwakubeja munzila iili yoonse. Katanaiya kasimpe, ambweni sikwiiya Bbaibbele wakali kuzulilwa kubukombi bwakubeja. Ambweni wakali kujanika kumiswaangano yabo akutola lubazu mumilimo iijatikizya bukombi. Naa ambweni wakali kusanga mali kumbunga eeyo. Sikwiiya Bbaibbele ooyu katanazumizyigwa kuba sikumwaya uutanabbapatizyigwa, weelede kuba masimpe kuti tacijatikizyidwe munzila iili yoonse abukombi bwakubeja. Weelede kulemba lugwalo kucikombelo nkwaakazwa naa kumbunga iili yoonse iijatikizyidwe abukombi bwakubeja kubaambila kuti tacizulilwi nkuko. *

17. Mulimo nzi wakumubili Munakristo ngwayelede kutantamuka alimwi nkaambo nzi?

¹⁷ Munakristo wakasimpe weelede kuba masimpe kuti mulimo wakumubili ngwabeleka tauswaangene abukombi bwakubeja munzila iili yoonse. (2Kor. 6:14-17) Mucikozyanyo, takonzyi kunjila mulimo acikombelo. Kuyungizya waawo, Munakristo uulembedwe mulimo kukkampani iimwi takonzyi kubeleka mulimo mupati kwaciindi cilamfwu abusena bubelesyegwa abukombi bwakubeja. Ikuti kajisi kkampani yakwe, takonzyi kuyanda kubeleka mulimo naa kuzumina mulimo uuli woonse uuswaangene a Babuloni Mupati. Nkaambo nzi makani aaya ncaali mapati? Nkaambo kakuti tatuyandi kujatikizyigwa mumilimo alimwi azibi zyambunga zyabukombi izisofweede mumeso a Leza.—Is. 52:11. *

18. Mbuti mukwesu umwi mbwaakakakatila kunjiisyo zyamu Bbaibbele kujatikizya mulimo wakwe wakumubili?

 ¹⁸ Myaka iili mbwiibede yainda, mwaalu umwi uujisi kkampani yakwe wakalombwa asikulemba mulimo umwi ikuyoobeleka kalimo kamwi kucikombelo icakali mudolopo mwaakali kukkala mukwesu ooyu. Sikulemba mulimo wakalizyi kuti mukwesu ooyu lyoonse tanaakali kuzumina kubeleka mulimo kuzikombelo. Pele lweendo oolu sikulemba mulimo wakalipengede kapati kujana muntu uukonzya kuubeleka mulimo ooyo. Nokuba boobo, mukwesu ooyu wakakakatila kunjiisyo zyamu Bbaibbele akuukaka mulimo. Nsondo yakatobela, munyuzi pepa yakubusena ooko, kwakali cifwoto camubelesi iwakali kubikka ciingano aacikombelo. Ikuti mukwesu naatakakakatila kunjiisyo zyamu Bbaibbele, nokwakali cifwoto cakwe munyuzi pepa eeyo. Eelo kaka noyakanyongana mpuwo mbotu njaakajisi akati ka Banakristonyina! Kuyungizya waawo, amweezyeezye buyo mbwaakali kunga walimvwa Jehova.

19-20. (a) Ino ncinzi ncotwaiya? (b) Nzintu nzi zimwi nzyotuyandika kwiiya?

¹⁹ Ibbaibbele lyaamba kuti businsimi bupati ibutobela ibuyoozuzikizyigwa ino-ino mboobo beendelezi bamunyika mbobayakwaambilizya ibwakuti, “luumuno akuliiba.” Tulalumba kapati kuzintu nzyaatuyiisya Jehova, tulizyi kuti beendelezi tabakakonzyi kuleta luumuno lwini-lwini alimwi lutamani. Ino ncinzi ncotweelede kucita kwaambilizya ooko kakutanacitika alimwi alunyonyooko kalutanasika cakutayeeyela? Jehova uyanda kuti tuzumanane kujata bubi kukambauka mulumbe wa Bwami alimwi akusoleka kugwasya bantu kuti babe basikwiiya. Aciindi nciconya, tweelede kulyaandaanya kubukombi bwakubeja boonse. Eeci cilabikkilizya akuleka kuzulilwa kuli Babuloni Mupati alimwi akutabeleka mulimo uuswaangene a Babuloni Mupati.

²⁰ Kuli azimwi zintu iziyoocitika kumamanino ‘aamazuba aamamanino.’ Kuli azimbi zintu Jehova nzyayanda kuti tucite. Ino nzintu nzi eezyo alimwi ino mbuti mbotukonzya kulibambila kuzintu zyoonse iziboola kumbele? Tuyoozibona mucibalo citobela.