1-2. (a) Ino ncinzi beendelezi bamunyika ncobayakwaambilizya ino-ino? (b) Mibuzyo nzi njotweelede kuzyiba bwiinguzi?

AMWEEZYEEZYE kuti beendelezi bamunyika baambilizya kujatikizya businsimi bwakuti “luumuno akuliiba.” Balakonzya kulisumpula akwaamba kuti munyika muli luumuno lunji kapati. Bayoopa kuti tutalike kuyeeya kuti balakonzya kwaamana mapenzi woonse aali munyika. Pele tabajisi nguzu naaceya zyakulesya cintu ciyoocitika icitobela! Nkaambo nzi? Kweelana abusinsimi bwamu Bbaibbele, “cakutayeeyela lunyonyooko luyoobasikila cakufwambaana . . . eelyo tabakafwutuki abuniini pe.”—1Tes. 5:3.

² Njeeyi mibuzyo iiyandika kapati njotweelede kuzyiba bwiinguzi: Ino ncinzi ciyoocitika ‘lyamapenzi mapati’? Ncinzi Jehova ncayoolangila kuti tucite kuciindi eeco? Alimwi ino mbuti mbotukonzya kulibambila lino kutegwa tukazumanane kusyomeka lyamapenzi mapati?—Mt. 24:21.

3. Kweelana alugwalo lwa Ciyubunuzyo 17:5, 15-18, ino Leza uyoomunyonyoona buti “Babuloni Mupati”?

³ Amubale Ciyubunuzyo 17:5, 15-18. “Babuloni Mupati” uyoonyonyoonwa! Kweelana ambokwaambwa kale, beendelezi bamunyika tabanoojisi nguzu zyakulesya ceeco iciyoocitika aciindi eeco. Nkaambo nzi? Nkaambo kakuti “Leza [uyoocibikka] mumyoyo yabo kuti bazwidilizye muzeezo wakwe.” Ino muzeezo  nzi ooyo? Muzeezo wakunyonyoona bulelo bwanyika yoonse bwabukombi bwakubeja, kubikkilizya a Bunakristo Bwanyika. * Leza uyoobikka muzeezo wakwe mumyoyo ‘yameja aali kkumi’ “aamunyama uusalala pyu.” Meja aali kkumi aiminina mfwulumende zyoonse izigwasyilizya “munyama,” nkokuti United Nations (Lukamantano Lwazisi). (Ciy. 17:3, 11-13; 18:8) Ciindi mfwulumende eezyo zyaakulwana bukombi bwakubeja, ciyooba citondezyo cakuti mapenzi mapati atalika. Eeco ciyoocitika cakutayeeyela alimwi cinooli cintu ciyoosya kapati iciyoojatikizya bantu boonse anyika.

4. (a) Ntwaambo nzi itulangilwa kuti ntobanoojisi beendelezi bamunyika ituyoobapa kuti babunyonyoone bukombi bwakubeja? (b) Ncinzi ncobalangilwa kuyoocita aabo ibakali kuzulilwa kuzikombelo eezyo?

⁴ Tatutuzyi twaambo ntobanoojisi beendelezi bamunyika ituyoobapa kuti bamunyonyoone Babuloni Mupati. Ambweni bayakwaamba kuti zikombelo zyamunyika zisinkilila luumuno akuti lyoonse zilanjilila mutwaambo twamapolitikisi. Naa ambweni bayakwaamba kuti mbunga zyabukombi eezyo zyajana lubono lunji kapati akuba azintu zinji. (Ciy. 18:3, 7) Ciindi beendelezi bamunyika baakubulwana bukombi bwakubeja, kulibonya kuti tabakanyonyooni muntu uuli woonse uuzulilwa kuzikombelo eezyi. Muciindi caboobo, kulibonya kuti bayoonyonyoona mbunga zyabukombi. Zyaakumana buyo kunyonyoonwa mbunga eezyo, aabo ibakali kuzulilwa kumbunga eezyi bayoobona kuti basololi babo babukombi baalilwa kubacitila nzyobakabasyomezya. Aboobo bayakulyaandaanya kulinzizyo.

5. Ncinzi Jehova ncaakasyomezya kujatikizya mapenzi mapati alimwi nkaambo nzi?

⁵ Bbaibbele talyaambi bulamfwu bwaciindi ciyootolwa kunyonyoona Babuloni Mupati, pele tulizyi kuti tacikatoli ciindi cilamfwu. (Ciy. 18:10, 21) Jehova wakasyomezya kuti ‘uyakwaafwiinsya mazuba aayo’ aamapenzi kutegwa “basale” bakwe bakafwutuke alimwi abukombi bwakasimpe. (Mk. 13:19, 20) Pele ino ncinzi Jehova ncayoolangila kuti tucite ciindi mapenzi mapati aakutalika kusikila lyankondo ya Amagedoni?

6. Nkaambo nzi kulyaandaanya buyo kubukombi bwakubeja ncokutazulide?

⁶ Kweelana ambotwakaiya mucibalo cainda, Jehova uyanda kuti bakombi bakwe balyaandaanye kuli Babuloni Mupati. Pele kulyaandaanya buyo kolikke takuzulide pe. Tweelede kuba amakanze aakukakatila kubukombi bwakasimpe, nkokuti bukombi bwa Jehova busalala. Atulange-lange nzila zyobilo mbotukonzya kucita boobo.

7. (a) Mbuti mbotukonzya kukakatila kuzyeelelo zya Jehova zyakulilemeka? (b) Mbuti lugwalo lwa Bahebrayo 10:24, 25 mbolukankaizya mbociyandika kapati kuswaangana antoomwe, ikapati lino?

⁷ Yakusaanguna, tweelede kukakatila kuzyeelelo zya Jehova zyakulilemeka. Tatweelede kutobela micito alimwi azyeelelo zyamunyika. Mucikozyanyo, tatukuzumini kutalilemeka kwamusyobo uuli woonse mumakani aakoonana, kubikkilizya akukwatana alimwi akoonana kwabantu bajisi zizo zikozyenye. (Mt. 19:4, 5; Rom. 1:26, 27) Yabili, tweelede kuzumanana kukomba antoomwe a Banakristoma. Tulacita oobu kufwumbwa kubusena nkotukonzya, ikuti kacikonzyeka, mu Maanda eesu aa Bwami, pele kuti kacitakonzyeki, mumaanda eesu naa mumasena aamwi, nokuba kuswaangana cakusisikizya buya. Tacikwe makani acikonzya kucitika, tatukonzyi kucileka cilengwa cesu cakuswaangana antoomwe kutegwa tukombe Leza. Alimwi buya, tweelede kuswaangana antoomwe “ikapati [mbotubwene] kuti buzuba bwaswena afwaafwi.”—Amubale Bahebrayo 10:24, 25.

8. Mbuti mulumbe ngotukambauka mboulangilwa kuti uyoocinca kumbele?

⁸ Lyamapenzi mapati, kulibonya kuti mulumbe ngotwaambilizya uyoocinca. Lino tukambauka makani mabotu aa Bwami alimwi tuli mukusolekesya kugwasya bantu kuti babe basikwiiya. Pele kuciindi eeco, ambweni tunookambauka mulumbe cacigaminina. Bbaibbele likozyanisya mulumbe ooyo kucivwulamabwe cipati. (Ciy. 16:21) Ambweni tunookambauka kuti nyika ya Saatani ili afwaafwi kunyonyoonwa cakumaninina. Kumbele, tuyoozyiba bwini mbounoobede mulumbe wesu alimwi ambotuyakuwaambilizya. Sena tuyoobelesya nzila nzyoonya nzyotwali kubelesya kwamyaka minji kuzuzikizya mulimo wesu? Naa sena tuyoobelesya nzila zimbi? Tatuzyi pe. Kufwumbwa nzila njotuyoobelesya, kulibonya kuti tunoojisi coolwe cakwaambilizya mulumbe walubeta lwa Jehova cabusicamba!—Ezk. 2:3-5.

9. Ino beendelezi bayoocita buti akaambo kamulumbe wesu, pele ino ndusyomo nzi ndotujisi?

⁹ Cakutadooneka, mulumbe wesu uyoobanyemya beendelezi bamunyika akupa kuti bakasole kutulesyela limwi kukambauka. Mbubwenya mbotusyoma Jehova kuti katugwasya mumulimo wesu wakukambauka lino, akuciindi eeco tuyooyandika lugwasyo lwakwe. Tulijisi lusyomo lwakuti Leza wesu uyootupa nguzu kutegwa tuzuzikizye makanze aakwe.—Mik. 3:8.

10. Kweelana ambokwakasinsimwa kulugwalo lwa Luka 21:25-28, ino bantu banji bayoolimvwa buti kujatikizya zintu iziyoocitika lyamapenzi mapati?

¹⁰ Amubale Luka 21:25-28. Lyamapenzi mapati, bantu bayoogambwa kapati baakubona kuti zintu nzyobakali kuyeeya kuti zinooliko lyoonse zyatalika kumana. Banooli ‘mumacise’ alimwi akuyoowa kuti ambweni bayoojaigwa kuciindi eeco icinookatazyide kapati mubukkale bwabantu. (Zef. 1:14, 15) Kuciindi eeco, kulangilwa kuti buumi buyooyuma kapati nokuba kubantu ba Jehova. Akaambo kakuti tulazumanana kutaba banyika, ambweni kuli buyumuyumu bumwi mbotuyakujana. Kulalangilwa kuti tatunoojisi zintu zimwi nzyotuyandika mubuumi.

11. (a) Bwaakunyonyoonwa bukombi bwakubeja, nkaambo nzi bantu alimwi abeendelezi bamunyika ncobayoobikkila buyo maano kulwana Bakamboni ba Jehova? (b) Nkaambo nzi ncotuteelede kwaayoowa mapenzi mapati?

 ¹¹ Kuciindi eeco, bantu ibakajisi zikombelo izyakanyonyoonwa ambweni bayoonyema kapati akaambo kakuti bukombi bwa Bakamboni ba Jehova bunoociliko. Cakutadooneka bayoobazyibya bamwi kujatikizya mbobanoonyemede kapati, ambweni kwiinda mukubelesya Intaneti. Beendelezi bamunyika antoomwe amweendelezi wabo Saatani, bayootusulaika kapati akaambo kakuti bukombi bwesu tiibwakanyonyoonwa. Tabakaazuzikizyi makanze aabo aakunyonyoona bukombi boonse munyika. Aboobo bayoobikkila maano kulwana buyo ndiswe. Aciindi eeco, beendelezi bamunyika bayooba Gogo waku Magogo. * Bayookamantana akulwana bantu ba Jehova anguzu zyabo zyoonse. (Ezk. 38:2, 14-16) Tulakonzya kutalika kulibilika kujatikizya ciyoocitika lyamapenzi mapati, mbokunga tatuzyi bwini mbociyooba. Nokuba boobo, tulakonzya kuba masimpe kuti tatweelede kwaayoowa mapenzi mapati. Jehova uyakutupa malailile aayakutugwasya kuti tukafwutuke. (Int. 34:19) Tuyoocikonzya ‘kwiimikila akulanga mujulu’ nkaambo tuyoozyiba kuti ‘lufwutuko lwesu lunooswenede afwaafwi.’ *

12. Mbuti “muzike uusyomeka alimwi uucenjede” mbwaali kutugwasya kulibambila kujatikizya zintu ziboola kumbele?

¹² “Muzike uusyomeka alimwi uucenjede” wali kutugwasya kulibambila kutegwa tukazumanane kusyomeka lyamapenzi mapati. (Mt. 24:45) Eeci cali kucitwa munzila zinji, pele nzila yomwe nkwiinda mumapulogilamu eesu aamuswaangano wacooko wamu 2016-2018. Kwiinda mumapulogilamu aaya, twakakulwaizyigwa kuyumya bube mbotuyandika mbobuyabuswena buzuba bwa Jehova. Atubulange-lange bube oobo mubufwaafwi.

13. Mbuti mbotukonzya kuyumya kusyomeka kwesu kuli Jehova alimwi nkaambo nzi ncotweelede kucita boobo lino?

¹³ Kusyomeka: Mutwe wamuswaangano wacooko wamu 2016 wakali wakuti, “Amuzumanane Kusyomeka Kuli Jehova!” Muswaangano ooyu wakatuyiisya kuti, ikuti katujisi cilongwe ciyumu a Jehova, tuyoosyomeka kulinguwe. Twakayeezyegwa kuti, tulakonzya kuba acilongwe a Jehova kwiinda mukupaila kuzwa ansi aamoyo alimwi akwiiya Jwi lyakwe cabusungu. Kucita boobu kulakonzya kutuyumya kutegwa twaazunde naaba mapenzi mapati. Mbobuyaabuswena kumamanino bweende bwa Saatani, tulakonzya kulangila kulwanwa azintu zikatazya kapati izikonzya kusunka kusyomeka kwesu kuli Leza alimwi aku Bwami bwakwe. Kulalangilwa kuti bantu bayoozumanana kutusampaula. (2Pet. 3:3, 4) Ikaambo kamwi kapati ncocili boobo nkakuti, tatugwasyilizyi cibeela cili coonse canyika ya Saatani. Tweelede kuyumya bube bwesu bwakusyomeka lino kutegwa tukazumanane kusyomeka lyamapenzi mapati.

14. (a) Ino nkucinca nzi ikuyoocitika kubakwesu ibasololela anyika? (b) Nkaambo nzi ncotuyooyandika kutondezya kusyomeka kuciindi eeco?

¹⁴ Lyamapenzi mapati, kuyooba kucinca kujatikizya bakwesu ibasololela anyika. Aciindi cimwi, bananike boonse ibacinooli anyika bayoobunganizyigwa kujulu kutegwa batole lubazu  munkondo ya Amagedoni. (Mt. 24:31; Ciy. 2:26, 27) Eeci caamba kuti ba Kabunga Keendelezya tabanoocili aandiswe anyika. Nokuba boobo, bankamu mpati bayoozumanana kukamantana. Bakwesu beelela akati kambelele zimbi banoosololela. Aboobo tuyooyandika kutondezya kusyomeka kwesu kwiinda mukubagwasyilizya bakwesu aaba alimwi akutobela busolozi bwabo mbobayoopegwa a Leza. Kuti katuyanda kuyoofwutuka, tweelede kubutobela busolozi bwabo!

15. Mbuti mbotukonzya kuyumya bube bwesu bwakuliyumya alimwi nkaambo nzi ncociyandika kapati kucita boobo lino?

¹⁵ Kuliyumya: Mutwe wamuswaangano wacooko wamu 2017 wakali wakuti, “Amuzumanane Kuliyumya!” Muswaangano ooyu wakatugwasya kutegwa katucikonzya kuliyumya mumasunko. Twakaiya kuti kuliyumya kwesu takuyeeme akubota kwabukkale. Tulakonzya kubuyumya bube oobu kwiinda mukusyoma Jehova. (Rom. 12:12) Katuciyeeya lyoonse cisyomezyo ca Jesu cakuti: “Ooyo uuliyumya kusikila kumamanino uyoofwutulwa.” (Mt. 24:13) Cisyomezyo eeci citondezya kuti tweelede kuzumanana kusyomeka tacikwe makani abuyumuyumu buli boonse mbotujisi. Kwiinda mukuliyumya musunko lili lyoonse lino, lusyomo lwesu luyooyuma kaatanatalika mapenzi mapati.

16. Ncinzi citupa kuba basicamba alimwi ino mbuti mbotukonzya kubuyumya busicamba bwesu lino?

¹⁶ Busicamba: Mutwe wamuswaangano wacooko wamu 2018 wakali wakuti, “Amube Basicamba!” Muswaangano ooyu wakatugwasya kuzyiba kuti tatukonzyi kuba basicamba akaambo kazintu nzyotukonzya kucita. Mbubwenya mbuli bube bwakuliyumya, tweelede kusyoma Jehova kutegwa tube abusicamba bwini-bwini. Mbuti mbotukonzya kumusyoma Jehova cakumaninina? Kwiinda mukubala Jwi lyakwe abuzuba alimwi akuzinzibala kuyeeya kujatikizya Jehova mbwaakabafwutula bantu bakwe kaindi. (Int. 68:20; 2Pet. 2:9) Ciindi beendelezi bamunyika baakutulwana lyamapenzi mapati, tuyooyandika kuba abusicamba kapati alimwi akumusyoma Jehova kwiinda lyoonse. (Int. 112:7, 8; Heb. 13:6) Ikuti twamusyoma Jehova lino, tuyooba abusicamba mbotuyandika ciindi aakutulwana Gogo. *

17. Nkaambo nzi ncotuteelede kwiiyoowa nkondo ya Amagedoni? (Amubone cifwanikiso icili aacivwumbyo.)

¹⁷ Kweelana ambotwakaiya mucibalo cainda, bunji bwesu twapona buumi bwesu boonse mumazuba aamamanino. Pele alimwi tulijisi bulangizi bwakuyoofwutuka kumapenzi mapati. Nkondo ya Amagedoni njiiyoomanizya bweende bwazintu oobu. Nokuba boobo, tatweelede kwiiyoowa pe. Nkaambo nzi? Nkaambo kakuti nkondo eeyi njiya Leza. (Tus. 1:33; Ezk. 38:18-20; Zek. 14:3) Ciindi Jehova aakumwaambila, Jesu Kristo uyoosololela mpi ya Leza munkondo. Unooli antoomwe abananike ibayoobusyigwa alimwi azyuulu-zyuulu zyabangelo. Antoomwe, bayoolwana Saatani, madaimona aakwe alimwi ampi zyakwe zyaanyika.—Dan. 12:1; Ciy. 6:2; 17:14.

18. (a) Ino ncisyomezyo nzi ncaakatupa Jehova? (b) Mbuti lugwalo lwa Ciyubunuzyo 7:9, 13-17 mbolumupa kuba alusyomo kujatikizya bulangizi bwanu bwakumbele?

¹⁸ Jehova wakasyomezya kuti: “Kunyina cilwanyo cipangilwa kulwana nduwe iciyoozwidilila.” (Is. 54:17) “Nkamu mpati” yabakombi ba Jehova ibasyomeka ‘bayoozwa mumapenzi mapati’ kabali baumi! Mpoonya bayoozumanana kumubelekela mulimo uusetekene. (Amubale Ciyubunuzyo 7:9, 13-17.) Eelo kaka Bbaibbele lilatupa twaambo tunji itutupa kuba alusyomo lwakuti tuyoofwutulwa! Tulizyi kuti “Jehova ulabakwabilila bantu basyomeka.” (Int. 31:23) Boonse ibamuyanda alimwi akumutembaula Jehova, bayookkomana kubona mbwayoolisalazya zina lyakwe lisalala.—Ezk. 38:23.

19. Ino mbulangizi nzi ibukkomanisya kapati mbotulangila ino-ino?

¹⁹ Amuyeeye buyo mbwaakonzya kwaambwa majwi aali kulugwalo lwa 2 Timoteyo 3:2-5 ikuti naali kupandulula mbobanoobede bantu munyika mpya iitani kweendelezyegwi a Saatani. (Amubone kabbokesi kakuti “ Mbobanoobede Bantu Kuciindi Eeco.”) Mukwesu George Gangas, * iwakabeleka mu Kabunga Keendelezya, wakapandulula boobu kujatikizya nyika: “Eelo kaka inooli nyika mbotu kapati ciindi bantu boonse baakuba babunyina! Ino-ino muyooba acoolwe cakupona mubweende bwazintu bupya. Kufwumbwa buyo kuti Jehova kapona, andinywe munoopona. Tuyoopona mane kukabe kutamani.” Eelo kaka bulakkomanisya kapati bulangizi oobu!