1. Ino Banakristo babbapatizyidwe beelede kuzumanana kucita nzi?

SENA mulibbapatizyidwe? Kuti kacili boobo, ciindi nomwakabbapatizyigwa, mwakatondezya kubuleya kuti mulijisi lusyomo muli Jehova alimwi akuti mulayanda kumubelekela. * Nokuba boobo, lusyomo lwanu muli Jehova lweelede kuzumanana kuyuma. Alimwi mweelede kuzumanana kuyumya lusyomo lwanu lwakuti Jehova ubelesya mbunga yakwe mazuba aano kuzuzikizya mulimo wakwe.

2-3. Muunzila nzi Jehova mwasololela mbunga yakwe mazuba aano? Amupe zikozyanyo.

² Mazuba aano, Jehova usololela mbunga yakwe munzila iitondezya bube bwakwe, makanze alimwi azyeelelo zyakwe. Lino atulange-lange bube bwa Jehova botatwe ibulibonya mumbunga yakwe.

³ Bube bwakusaanguna, “Leza tasalululi.” (Mil. 10:34) Luyando ndolwakapa Jehova kuti ape Mwanaakwe kacili ‘cinunuzyo cabantu boonse.’ (1Tim. 2:6; Joh. 3:16) Jehova ubelesya bantu bakwe kukambauka makani mabotu kubantu boonse ibalibambilide kuswiilila. Kwiinda mukucita boobu, Jehova upa bantu boonse coolwe cakuti bagwasyigwe acinunuzyo. Bube bwabili, ‘Jehova tali Leza wamanyongwe pe, pele ngwaluumuno.’ (1Kor. 14:33, 40) Aboobo, bakombi bakwe beelede kumubelekela munzila iitali yamanyongwe alimwi acaluumuno. Bube bwatatu, Jehova ‘Mwiiyi Mupati.’ (Is. 30:20, 21) Nkakaambo kaako mbunga yakwe ilabikkila maano kuyiisya bantu Jwi lyakwe ilyakasololelwa amuuya mumbungano alimwi amumulimo wamumuunda. Mbuti bube  bwa Jehova oobu botatwe mbobwakali kulibonya mumbungano ya Bunakristo yamumwaanda wamyaka wakusaanguna? Mbuti bantu ba Jehova mazuba aano mbobabwiiya bube oobu? Alimwi mbuti muuya uusalala mboumugwasya nomubeleka ambunga ya Jehova mazuba aano?

4. Kweelana alugwalo lwa Milimo 1:8, ncinzi Jesu ncaakalailila basikumutobela kuti bacite, alimwi ndugwasyo nzi ndobakali kuyootambula?

⁴ Mumwaanda wamyaka wakusaanguna. Mulumbe ngwaakakambauka Jesu wakapa bulangizi kubantu boonse. (Lk. 4:43) Wakalailila basikumutobela kuti bazumanane kucita mulimo ngwaakatalisya, wakupa bumboni “mane kusikila kumasena aakulamfwu kapati aanyika.” (Amubale Milimo 1:8.) Nokuba boobo, mulimo ooyu nobatakaukonzya kuubeleka munguzu zyabo. Bakali kuyandika muuya uusalala, nkokuti “mugwasyi” ooyo Jesu ngwaakabasyomezyede.—Joh. 14:26; Zek. 4:6.

5-6. Muunzila nzi muuya uusalala mowakabagwasya basikwiiya ba Jesu?

⁵ Basikutobela Jesu bakatambula muuya uusalala lya Pentekoste 33 C.E. Kwiinda mukugwasyigwa amuuya ooyo, mpoonya-mpoonya bakatalika kukambauka, alimwi muciindi buyo cisyoonto, bantu banji bakaatambula makani mabotu. (Mil. 2:41; 4:4) Ciindi nobakatalika kupenzyegwa, basikwiiya kunyina nobakayoowa akucileka kukambauka. Muciindi caboobo, bakalomba Jehova kuti abagwasye. Bakapaila kuti: “Kopa bazike bako kuzumanana kukanana ijwi lyako cabusicamba.” Mpoonya bakazula muuya uusalala akuzumanana “kwaamba ijwi lya Leza cabusicamba.”—Mil. 4:18-20, 29, 31.

⁶ Basikwiiya ba Jesu bakajana buyumuyumu abumbi. Mucikozyanyo, aciindi eeco Magwalo akali masyoonto. Tiibakajisi mabbuku aapandulula Bbaibbele mbuli ngotujisi mazuba aano. Alimwi bakeelede kukambaukila bantu baambaula myaambo minji iindene-indene. Nokuba kuti kwakali buyumuyumu oobu, basikwiiya aaba basungu bakacita cintu cakali kuboneka kuti tacikonzyeki, bakakambauka makani mabotu “kuzilenge zyoonse zili ansi aajulu.”—Kol. 1:6, 23.

7. Myaka iili 100 yainda, ino babelesi ba Jehova bakazyiba buti ncaakali kuyanda Leza kulimbabo, alimwi bakacita buti?

⁷ Mazuba aano. Jehova wazumanana kubasololela bantu bakwe alimwi akubapa nguzu zyakucita kuyanda kwakwe. Ulabasololela kwiinda mukubelesya Bbaibbele, ilyakasololelwa amuuya uusalala. Mu Bbaibbele tulabala kujatikizya mulimo wa Jesu alimwi amalailile aakuti basikumutobela bazumanane kubeleka mulimo ngwaakatalisya. (Mt. 28:19, 20) Ngazi Yamulindizi yamu July 1881, yakaamba kuti: “Jehova tanaakatusala kutegwa katulemekwa abantu naa kulijanina lubono lunji, pele wakatusala kutegwa tubelesye zyoonse nzyotujisi mukukambauka makani mabotu.” Kabbuku kakuti To Whom the Work Is Entrusted, ikakamwaigwa mu 1919 kakaamba kuti: “Mulimo ulibonya kukomena kapati, pele ngwa Mwami, aboobo tuyakuubeleka munguzu zyakwe.” Mbubwenya mbuli Banakristo bamumwaanda wamyaka wakusaanguna, bakwesu aaba bakabeleka canguzu mumulimo ooyu, kabasyomede kuti muuya uusalala ulabagwasya kukambaukila bantu boonse. Andiswe tulasyoma kuti muuya uusalala unootugwasya mazuba aano.

8-9. Ninzila nzi mbunga ya Jehova nzyoyali kubelesya kusumpula mulimo wakukambauka?

⁸ Mbunga ya Jehova yali kubelesya zibelesyo zibotu iziliko kumwaya makani mabotu. Zibelesyo eezyi zyakali kubikkilizya mabbuku aasimbidwe, filimu ya “Photo-Drama of Creation,” mincini yakulizizya malekkoodi, myootokala iyakajisi zyaambawido, sikapepele, mpoonya sunu kuli amabbuku azyakulekkooda zyaa intaneti. Kuyungizya waawo, mbunga ya Leza ilasandulula makani mumyaambo minji kapati kwiinda kaindi. Nkaambo nzi? Kutegwa bantu boonse bakonzye kwaamvwa makani mabotu mumwaambo  wabo. Jehova tasalululi; wakasinsima kuti makani mabotu ayakwaambilizyigwa “kumasi oonse, kumisyobo yoonse, kumilaka yoonse alimwi akubantu bamisyobo yoonse.” (Ciy. 14:6, 7) Uyanda kuti bantu boonse baumvwe mulumbe wa Bwami.

⁹ Mbuti kujatikizya baabo mbotutakonzyi kukambaukila, ambweni akaambo kuti bakkala mumaanda aagatelwa? Kutegwa bantu aaba alimwi abamwi bakambaukilwe, mbunga ya Jehova yakasala kutalisya nzila ziindene-indene zyabukambausi bwakubuleya. Mucikozyanyo, mu 2001, Kabunga Keendelezya kakazumizya bukambausi bwakubelesya twakubikkila mabbuku twakukuba alimwi azibelesyo zimbi ku France, mpoonya kumbele, amumasi aamwi. Zibelesyo eezyi zyakagwasya kapati. Mu 2011, pulogilamu mpya yakatalisyigwa ku United States mubusena bumwi akati kamasena imwiinda bantu banji kapati mu New York City. Mumwaka wakusaanguna kuzwa noyakatalika pulogilamu eeyi, kwakamwaigwa mabbuku aali 102,129 alimwi amamagazini aali 68,911. Mpoonya bantu ibali 4,701 bakalomba kwiiya Bbaibbele! Cakutadooneka, muuya uusalala wakausololela mulimo ooyu. Aboobo Kabunga Keendelezya kakazumizya kuti bukambausi oobu kabucitwa munyika yoonse.

10. Ncinzi ncotukonzya kucita kutegwa tube bakambausi alimwi abamayi bacibwene?

¹⁰ Ncomukonzya kucita. Amubikkile maano kulwiiyo ndwapa Jehova kumiswaangano ya Bunakristo. Kamukambauka lyoonse abaabo mbomuli limwi mukabunga kamulimo wamumuunda. Bakwesu abacizyi bamukabunga kanu balakonzya kumugwasya kuba mukambausi amwiiyi uucibwene alimwi akumukulwaizya kwiinda mucikozyanyo cabo cibotu. Amuzumanane kukambauka nokuba kuti kuli buyumuyumu. Mbubwenya mbuli lugwalo aayeeme cibalo eeci mbolutondezya, tulazwidilila kucita kuyanda kwa Leza, ikutali munguzu zyesu pele munguzu zyamuuya uusalala. (Zek. 4:6) Amana buya, tucita mulimo wa Leza.

11. Mbuti kabunga keendelezya kamumwaanda wamyaka wakusaanguna mbokakabeleka calukamantano kulesya manyongwe, akukulwaizya luumuno akati kabantu ba Leza?

¹¹ Mumwaanda wamyaka wakusaanguna. Kabunga Keendelezya ku Jerusalemu kakabeleka  calukamantano kulesya manyongwe akukulwaizya luumuno akati kabantu ba Leza. (Mil. 2:42) Mucikozyanyo, ciindi makani aajatikizya kupalulwa naakatalisyigwa mumwaka wa 49 C.E., kabunga keendelezya kwiinda mukusololelwa amuuya uusalala kakaalanga-langa makani aaya. Ikuti mbungano noyakazumanana kuzwangana kujatikizya makani aaya, mulimo wakukambauka niwakanyonganizyigwa. Nokuba kuti bakali ba Juda, baapostolo alimwi abaalu tiibakayungwa acilengwa caba Juda naa abaabo bakali kukulwaizya cilengwa eeci. Muciindi caboobo, bakalingula Jwi lya Leza alimwi akulomba busolozi bwamuuya uusalala. (Mil. 15:1, 2, 5-20, 28) Ncinzi cakazwa mpawo? Jehova wakakulongezya kusala kwabo, mbungano yakazumanana kuba aluumuno alimwi alukamantano, mpoonya mulimo wakukambauka wakazwidilila.—Mil. 15:30, 31; 16:4, 5.

12. Ncinzi citondezya kuti mumbunga ya Jehova mazuba aano kunyina manyongwe alimwi akuti kuli luumuno?

¹² Mazuba aano. Mbunga Jehova yabeleka canguzu kulesya manyongwe akukulwaizya luumuno akati kabantu ba Jehova. Kuzwa buyo mumwaka wa 1895, magazini ya Zion’s Watch Tower and Herald of Christ’s Presence yamu November 15, yakajisi cibalo icakayeeme alugwalo lwa 1 Bakorinto 14:40 cakuti “Kabotu-kabotu Alimwi Kweelana Abubambe.” Cibalo eeci cakaamba kuti: “Baapostolo bakalemba makani manji kumbungano yamumwaanda wamyaka wakusaanguna kujatikizya bubambe . . . Cilayandika kubikkila maano kwaatobela cakulomya malailile ‘aakalembwa kaindi kuti atuyiisye.’” (Rom. 15:4) Mazuba aano mbunga ya Jehova ilabeleka canguzu kulesya manyongwe akukulwaizya luumuno mumbungano zya Bunakristo mbubonya mbocakabede ku Banakristo bamumwaanda wamyaka wakusaanguna. Mucikozyanyo, ikuti mwaswaangana lya Ciiyo ca Ngazi Yamulindizi kumbungano iimbi, nokuba kucisi cimbi, munoozyi ciiyo ca Ngazi Yamulindizi mbocicitwa alimwi acibalo ciyiigwa. Mpoonya-mpoonya, muyoolimvwa kwaanguluka! Muuya uusalala wa Leza ulikke nguukonzya kupa kuti kube lukamantano luli boobu.—Zef. 3:9.

13. Ino lugwalo lwa Jakobo 3:17 lutupa kulibuzya mibuzyo nzi?

¹³ Ncomukonzya kucita. Jehova uyanda kuti bantu bakwe ‘bazumanane alukamantano lwamuuya mucaanzyo caluumuno.’ (Ef. 4:1-3) Aboobo amulibuzye kuti: ‘Sena ndilakulwaizya  lukamantano alimwi aluumuno mumbungano? Sena ndilabamvwida aabo basololela? Sena bamwi balakonzya kundisyoma, kwaambisya kuti kandijisi mikuli mumbungano? Sena ndilabamba ciindi, kugwasya bamwi, alimwi ndililyaabide kubeleka?’ (Amubale Jakobo 3:17.) Ikuti naa mwabona kuti kuli mbazu momweelede kucinca, amulombe muuya uusalala. Kuti mwalekela muuya uusalala kumweendelezya mubuumi bwanu, nkokuti bakwesu abacizyi banoomuyanda alimwi akulumba kuzintu nzyomucita mumbungano.

14. Kweelana alugwalo lwa Bakolose 1:9, 10, mbuti Jehova mbwaakabayiisya bantu bakwe bamumwaanda wamyaka wakusaanguna?

¹⁴ Mumwaanda wamyaka wakusaanguna. Jehova ulayanda kuyiisya bantu bakwe. (Int. 32:8) Uyanda kuti bamuzyibe, bamuyande, alimwi akuti bakapone kukabe kutamani kabali bana bakwe. Zyoonse eezyi inga tazikonzyeki kuti kakunyina lwiiyo lwakwe. (Joh. 17:3) Jehova wakabelesya mbungano ya Bunakristo yamumwaanda wamyaka wakusaanguna kuyiisya bantu bakwe. (Amubale Bakolose 1:9, 10.) Muuya uusalala, nkokuti “mugwasyi” ooyo Jesu ngwaakasyomezyede, awalo wakabagwasya basikwiiya. (Joh. 14:16) Muuya uusalala wakabagwasya basikwiiya kulimvwisya Jwi lya Leza alimwi akuyeeya zintu zyoonse Jesu nzyaakaambide akucita, zyalo kumbele izyakali kuyoolembwa mu Mabbuku aa Makani Mabotu. Luzyibo oolu lwakayumya lusyomo lwa Banakristo bamumwaanda wamyaka wakusaanguna alimwi aluyando ndobakajisi kuli Leza, ku Mwanaakwe, alimwi akuli umwi amweenzinyina.

15. Ino ninzila nzi nzyomwabona Jehova kazuzikizya cisyomezyo cakwe ncotubala ku Isaya 2:2, 3?

¹⁵ Mazuba aano. Jehova wakasinsima kuti “kumamanino aamazuba aayo,” bantu bazwa mumasi oonse bayoowuumukila kucilundu cacikozyanyo kutegwa bakayiisyigwe nzila zyakwe. (Amubale Isaya 2:2, 3.) Tulabubona businsimi oobu kabuzuzikizyigwa. Bukombi bwakasimpe bwasumpulwa kapati kwiinda bukombi buli boonse  bwakubeja. Alimwi Jehova ulabapa babelesi bakwe makani manji aajatikizya Bbaibbele. (Is. 25:6) Jehova ubelesya “muzike uusyomeka alimwi uucenjede,” kupa babelesi bakwe makani aaya munzila zisiyene-siyene. Mucikozyanyo, tulabala zibalo, kuswiilila makani, alimwi akweebelela mavidiyo aazidooli. (Mt. 24:45) Tulimvwa mbubwenya mbwaakalimvwa mulongwe wa Jobu Elihu iwakaamba kuti: ‘Ino mwiiyi nzi uuli mbuli Leza?’—Job. 36:22.

16. Ncinzi ncomukonzya kucita kutegwa mukomene kumuuya?

¹⁶ Ncomukonzya kucita. Muuya wa Leza uyoomugwasya kubelesya makani ngomubala alimwi akwiiya mu Bbaibbele. Amupaile mbubwenya mbwaakacita sintembauzyo naakati: “Kondiyiisya nzila yako, O Jehova. Mebo ndinakweenda mukasimpe kako. Kondipa kuba amoyo omwe kutegwa kandiyoowa zina lyako.” (Int. 86:11) Aboobo amuzumanane kubala alimwi akwiiya Bbaibbele kubikkilizya amabbuku aamwi aamwaigwa ambunga ya Jehova. Nokuba boobo, mbaakani yanu taili yakuba buyo aluzyibo. Pele muyandika kukasyoma kasimpe nkomwiiya alimwi akukabelesya mubuumi bwanu. Muuya wa Jehova ulakonzya kumugwasya kucita boobo. Alimwi muyandika kubakulwaizya bakwesu abacizyi. (Heb. 10:24, 25) Nkaambo nzi? Nkaambo kakuti mbamukwasyi wanu wakumuuya. Amulombe muuya wa Leza kuti kaumugwasya kupa bwiinguzi buzwa ansi aamoyo alimwi akupa kabotu makani kumiswaangano. Kwiinda mukucita boobu, mutondezya Jehova alimwi a Mwanaakwe kuti mulaziyanda “mbelele” zyabo ziyandisi.—Joh. 21:15-17.

17. Muunzila nzi momukonzya kutondezya kuti mulaigwasyilizya mbunga ya Jehova cakusyomeka?

¹⁷ Lino-lino, anyika kuyoosyaala buyo mbunga yeendelezyegwa amuuya wa Leza. Aboobo amubelekele antoomwe ambunga ya Jehova. Amutondezye bube bwa Leza kwiinda mukwaambilizya makani mabotu kubantu boonse mbomuyaanya. Amwiiye luyando lwakwe kwiinda mukulesya manyongwe alimwi akukulwaizya luumuno mumbungano. Kuyungizya waawo, amumumvwide Mwiiyi wanu Mupati kwiinda mukubikkila maano kucakulya cakumuuya ncapa. Kuti mwacita oobo, tamukayoowi ciindi nyika ya Saatani yaakumana. Muciindi caboobo, cabusicamba muyakwiimikila antoomwe abaabo ibabelekela antoomwe ambunga ya Jehova cakusyomeka.