1-2. (a) Ncinzi mfwulumende zimwi ncozyacita kubantu ba Jehova, pele ino bantu ba Jehova bacita buti? (b) Nkaambo nzi ncotukonzya kukkomana nokuba ciindi notupenzyegwa? (Amubikkilizye acifwanikiso icili aacivwumbyo.)

 CALINO, mulimo wesu ulikasyidwe naa kulesyegwa mumasi aayinda ku 30 munyika yoonse. Mumasi amwi akati kayaayo, beendelezi bakabikka bakwesu abacizyi muntolongo. Sena kuli ncobakalubizya? Taaku, Jehova kunyina ncabwene kuti bakalubizya. Balo ncobacita buyo nkubala alimwi akwiiya Bbaibbele, kwaambila bamwi nzyobasyoma, alimwi akujanika kumiswaangano abasyominyina. Alimwi bakakaka kutola lubazu mutwaambo twamapolitikisi. Nokuba kuti balakazyigwa, babelesi ba Leza aaba basyomeka tabazungaani mulusyomo, nkokuti ikutondezya kulyaaba kwabo kuli Jehova. Alimwi balikkomene kucita boobo!

² Ambweni mwakaabona mafwoto aa Bakamboni bamwi aaba basicamba alimwi mwakabona kuti balikkomene. Balikkomene nkaambo balizyi kuti Jehova ulabakkomanina akaambo kakuzumanana kusyomeka kulinguwe. (1Mak. 29:17a) Jesu wakaamba kuti: “Balikkomene aabo bapenzyegwa akaambo kabululami . . . Amukondwe akusekelela, mbwaanga bulumbu bwanu mbupati.”—Mt. 5:10-12.

3. Kweelana a Milimo 4:19, 20, ino baapostolo bakacita buti ciindi nobakali kupenzyegwa mumwaanda wamyaka wakusaanguna, alimwi ncinzi cakabapa kucita boobo?

³ Bakwesu abacizyi balapenzyegwa mbubwenya mbuli baapostolo mbobakapenzyegwa mumwaanda wamyaka wakusaanguna ciindi nobakali kukambauka kujatikizya Jesu. Cakwiinduluka-induluka,  babetesi bamunkuta mpati yaba Juda bakali “kubalailila kuti baleke kwaamba muzina lya Jesu.” (Mil. 4:18; 5:27, 28, 40) Ino baapostolo bakacita buti? (Amubale Milimo 4:19, 20.) Bakalizyi kuti muntu umwi uujisi nguzu kwiinda boonse ‘wakabalailila kukambaukila bantu akupa bumboni cakulomya’ kujatikizya Kristo. (Mil. 10:42) Aboobo baiminizi babo, Petro alimwi a Johane, cabusicamba bakaamba kuti beelede kumvwida Leza ikutali babetesi aabo, alimwi bakaamba kuti tabakooleka kwaamba kujatikizya Jesu. Munzila imwi, cakali mbuli kuti babuzya babetesi aabo kuti, ‘Sena nywebo muyeeya kuti mulijisi nguzu zinji kwiinda nzyajisi Leza?’

4. Kweelana a Milimo 5:27-29, ncikozyanyo nzi baapostolo ncobakasiya ku Banakristo bakasimpe boonse, alimwi mbuti mbotukonzya kubaiya?

⁴ Baapostolo bakasiya cikozyanyo cibotu calo Banakristo boonse ncobatobela kuzwa ciindi eeco, nkokuti “kumvwida Leza mbwali mweendelezi kutali bantu.” (Amubale Milimo 5:27-29.) Nobakamana kuumwa akaambo kakusyomeka, baapostolo bakazwa munkuta mpati yaba Juda, ‘kabakkomene nkaambo bakajanwa kuti baleelela kusampaulwa akaambo kazina lya Jesu,’ alimwi bakazumanana kukambauka!—Mil. 5:40-42.

5. Mibuzyo nzi njotweelede kwiingula?

⁵ Cikozyanyo ncobakasiya baapostolo cipa kubuzya mibuzyo imwi. Mucikozyanyo, mbuti kusala kwabo kwakumvwida Leza ikutali bantu mbokweendelana amulawo wamu Magwalo ‘wakulibombya kubeendelezi’? (Rom. 13:1) Mbuti mbotukonzya ‘kuzimvwida mfwulumende abaabo bajisi nguzu zyabweendelezi’? Kweelana ambwaakaamba mwaapostolo Paulo, mbuti mbotukonzya kuzumanana kusyomeka kuli Leza mbwali Mweendelezi wesu mupati?—Tit. 3:1.

6. (a) Ino “beendelezi” baambidwe ku Baroma 13:1 mbaani, alimwi mukuli nzi ngotujisi kulimbabo? (b) Nkaambo nzi kamasimpe nkotuzyi kujatikizya beendelezi bantunsi boonse?

⁶ Amubale Baroma 13:1. Mukapango aaka, bbala lyakuti “beendelezi” lyaamba  baleli bantunsi ibajisi nguzu kwiinda bamwi. Banakristo beelede kulibombya kubeendelezi aaba. Baleli aaba balabikka milawo yakubamba luumuno, balabona masimpe kuti bantu balaitobela milawo, alimwi zimwi ziindi balabakwabilila bantu ba Jehova. (Ciy. 12:16) Aboobo, tuleelede kutela mitelo, kubbadela, kuyoowa, alimwi akubapa bulemu mbobayanda. (Rom. 13:7) Nokuba boobo, beendelezi bamfwulumende aaba baleendelezya akaambo buyo kakuti Jehova wakabazumizya kucita oobo. Jesu wakaisalazya njiisyo eeyi ciindi naakali kubuzyigwa-buzyigwa a Mweendelezi muna Roma Ponto Pilato. Ciindi Pilato naakaamba kuti ulasala kuti Jesu ajaigwe naa pe, Jesu wakamwaambila kuti: “Nootalijisi nguzu zili zyoonse kulindime ikuti nootakapegwa nzizyo kuzwa kujulu.” (Joh. 19:11) Aboobo, kuli mpozigolela nguzu zyabeendelezi bantunsi boonse alimwi abasimapolitikisi mazuba aano, mbubwenya mbocakabede kuli Pilato.

7. Muubukkale buli buti motuteelede kulibombya kubeendelezi bantunsi, alimwi ncinzi ncobeelede kuzyiba?

⁷ Banakristo beelede kwiitobela milawo yamfwulumende zyabantu iitakazyanyi amilawo ya Leza. Pele tatukonzyi kumvwida bantu ciindi nobayanda kuti tucite cintu ncakasya Leza naa ciindi nobatukasya kucita cintu Leza ncayanda kuti tucite. Mucikozyanyo, balakonzya kwaambila baalumi ibacili bana-bana kunjila mulimo wabusikalumamba. * Naa balakonzya kutulesya kubelesya Bbaibbele amabbuku eesu aamba zyamu Bbaibbele akutukasya kukambauka alimwi akukomba antoomwe. Ciindi beendelezi nobatazibelesyi kabotu nguzu zyabo, ambweni kwiinda mukupenzya basikwiiya ba Kristo, bayoolyaambilila kuli Leza. Alimwi Jehova ulibabwene!—Muk. 5:8.

8. Nkwiindana nzi kuliko akati kabbala lyakuti ‘mweendelezi’ alyakuti “mupati kwiinda,” alimwi nkaambo nzi aaya ncaali makani mapati?

⁸ Ibbala lyakuti ‘mweendelezi’ lyaamba “mupati kwiinda bamwi, naa uulaanguzu.” Pele talyaambi “muntu mupati kwiinda boonse, naa uubainda nguzu boonse.” Eeci caamba bbala limbi lyakuti “mupati kwiinda.” Nokuba kuti baleli bamfwulumende baambwa kuti “beendelezi,” kuli mweendelezi uumbi uubainda boonse, nkokuti mupati kwiinda. Ziindi zyone mu Bbaibbele, Jehova Leza waambwa kuti “Mupati Kwiinda.”—Dan. 7:18, 22, 25, 27.

9. Ncinzi musinsimi Daniele ncaakabona mucilengaano?

⁹ Musinsimi Daniele wakabona cilengaano icakatondezya caantangalala kuti Jehova mupati kwiinda beendelezi boonse. Kumatalikilo Daniele wakabona banyama bapati bone ibaiminina mami aakali kweendelezya nyika yoonse kaindi, nkokuti Babuloni, Mediya a Persia, Girisi, a Roma alimwi abwami bweendelezya nyika yoonse bwa Anglo-America. (Dan. 7:1-3, 17) Mpoonya Daniele wakabona Jehova Leza kakkede acuuno cabwami munkuta yakujulu. (Dan. 7:9, 10) Lino citobela ncaakabona musinsimi ooyo uusyomeka nincenjezyo kubeendelezi bamazuba aano.

10. Kweelana a Daniele 7:13, 14, 27, ino mbaani Jehova mbayoopa nguzu zyabweendelezi bwanyika, alimwi eeco cisinizya nzi kujatikizya nguwe?

¹⁰ Amubale Daniele 7:13, 14, 27. Leza wazinyanga bweendelezi mfwulumende zyabantu akupa bamwi ibeelela alimwi ibali aanguzu kwiinda mbabo. Ino wapa bani? Wapa “umwi uuli mbuli mwanaamuntu,” Jesu Kristo, alimwi ‘abasalali ba Mupati Kwiinda,’  iba 144,000 ibayoolela “mane kukabe kutamani.” (Dan. 7:18) Cakutadooneka, Jehova ngo “Mupati Kwiinda,” mbwaanga walo alikke nguujisi nguzu zyakubweza ntaamu iili boobo.

11. Ncinzi cimbi Daniele ncaakalemba icitondezya kuti Jehova mupati kwiinda bami boonse?

¹¹ Ncaakabona Daniele mucilengaano cileendelana aceeco ncaakaamba kumatalikilo. Daniele wakaamba kuti, “Leza wakujulu, ulagusya bami akubikka bami azyuuno.” Alimwi wakalemba kuti ‘Mupatikampatila ngo Mweendelezi weendelezya mubwami bwabantu alimwi ulabupa kufwumbwa ngwayanda.’ (Dan. 2:19-21; 4:17) Sena kuli ziindi Jehova naakagusya naa kubikka bami? Inzya!

12. Amupe zikozyanyo izitondezya Jehova mbwaakagusya bami azyuuno zyabo zyabweendelezi kaindi. (Amubone cifwanikiso.)

¹² Jehova wakatondezya kale kuti ulaanguzu kwiinda “beendelezi.” Atulange-lange zikozyanyo zyotatwe. Farao muna Egepita wakabikkide bantu ba Jehova mubuzike alimwi cakwiinduluka-induluka wakakaka kubaangununa. Pele Leza wakabaangununa akunyikizya Farao mu Lwizi Lusalala. (Kul. 14:26-28; Int. 136:15) Mwami Belisazara waku Babuloni wakapanga pobwe ‘akulisumpula ku Mwami wakujulu’ alimwi ‘wakatembaula baleza bansiliva angolida’ muciindi cakutembaula Jehova. (Dan. 5:22, 23) Pele Leza wakamululamika mwaalumi ooyo iwakali kulisumpula. “Imasiku ngoonya aayo” Belisazara wakajaigwa alimwi bwami bwakwe bwakapegwa mumaanza aaba Medi aba Persia. (Dan. 5:28, 30, 31) Mwami Heroda Agripa Wakusaanguna waku Palestine wakalailila kuti mwaapostolo Jakobo ajaigwe alimwi akubikka mwaapostolo Petro muntolongo, kajisi makanze aakuti awalo akamujaye. Pele Jehova kunyina naakamuzumizya Heroda kuzumanana amakanze aakwe. “Mungelo wa Jehova wakamuuma,” eelyo wakafwa.—Mil. 12:1-5, 21-23.

13. Amupe cikozyanyo icitondezya Jehova mbwaakazizunda nkamu zyabeendelezi.

¹³ Kuyungizya waawo, Jehova wakatondezya nguzu zyakwe kunkamu zyabeendelezi. Wakabalwanina bana Israyeli akubagwasya kunyonyoona cizuminano cabami bana Kanana ibali 31 alimwi akubweza zibeela zipati zya Nyika Yakasyomezyedwe.  (Jos. 11:4-6, 20; 12:1, 7, 24) Alimwi Jehova wakabagwasya bana Israyeli kumuzunda cakumaninina Mwami Beni-hadadi alimwi abami bambi bana Siriya ibali 32.—1Bam. 20:1, 26-29.

14-15. (a) Ncinzi Mwami Nebukadinezara alimwi a Dariyo ncobakaamba kujatikizya bweendelezi bwa Jehova? (b) Ncinzi Sintembauzyo ncaamba kujatikizya Jehova alimwi acisi cakwe?

¹⁴ Cakwiinduluka-induluka, Jehova wakatondezya kuti ngo Mupati Kwiinda! Ciindi Mwami Nebukadinezara wabana Babuloni naakalisumpula kujatikizya ‘nguzu zyakwe zinji alimwi abulemu bwabweendelezi bwakwe’ muciindi cakulicesya akubona kuti Jehova ngoweelela kutembaulwa, Leza wakapa kuti asondoke. Naakapona, Nebukadinezara ‘wakatembaula Mupatikampatila’ alimwi wakazyiba kuti ‘bweendelezi bwa Jehova mbweendelezi butamani.’ Wakayungizya kuti: “Kunyina naba omwe uukonzya kumukasya.” (Dan. 4:30, 33-35) Ciindi lusyomo lwa Daniele muli Leza nolwakasunkwa alimwi aleelyo Jehova naakamuvwuna mumulindi wabasyuumbwa, Mwami Dariyo wakaamba kuti: “Bantu beelede kukankama akuyoowa Leza wa Daniele. Nkaambo walo ngu Leza muumi, ooyo uuliko lyoonse mane kukabe kutamani. Bwami bwakwe tabukanyonyoonwi pe, abwalo bweendelezi bwakwe tabukamani.”—Dan. 6:7-10, 19-22, 26, 27, bupanduluzi buyungizyidwe.

¹⁵ Sintembauzyo wakalemba kuti: “Jehova wajaya makanze mabi aamasi; wanyonganya makanze aabantu.” Wakayungizya kuti: “Cilikkomene cisi cijisi Jehova kuba Leza wancico, ibantu mbaasala kuba lukono lwakwe.” (Int. 33:10, 12) Eelo kaka tulijisi kaambo kabotu, ikeelede kutupa kuzumanana kusyomeka kuli Jehova!

16. Ndusyomo nzi ndotujisi kujatikizya “mapenzi mapati,” alimwi nkaambo nzi? (Amubone cifwanikiso.)

¹⁶ Twaiya Jehova nzyaakacita kaindi. Ino ncinzi ncotulangila kuti ciyoocitika ino-ino  kumbele? Tulijisi lusyomo lwakuti Jehova uyoobafwutula babelesi bakwe basyomeka ciindi ‘camapenzi mapati’ aaboola. (Mt. 24:21; Dan. 12:1) Uyoocita oobo ciindi nkamu yazisi, iitwa kuti Gogo waku Magogo, noiyakubusya nkondo, kulwana baabo ibasyomeka kuli Jehova. Nokuba kuti nkamu eeyo ibikkilizya mweelwe woonse wamasi aali 193 aamu United Nations, taakacikonzyi kulwana a Mupati Kwiinda alimwi abasikalumamba bakwe bakujulu. Jehova usyomezya kuti: “Ncobeni ndiyoopa kuti bulemu bwangu bubonwe alimwi mebo ndiyoolisalazya akupa kuti ndizyibwe mumeso aazisi zinji; eelyo bayoozyiba kuti ndime Jehova.”—Ezk. 38:14-16, 23; Int. 46:10.

17. Kweelana ancolyaamba Bbaibbele, ncinzi ciyoobacitikila bami bamunyika alimwi abaabo ibazumanana kusyomeka kuli Jehova?

¹⁷ Kulwana kwa Gogo kuyoosololela kunkondo ya Jehova yamamanino ya Amagedoni ciindi aakunyonyoona ‘bami bamunyika yoonse.’ (Ciy. 16:14, 16; 19:19-21) Mukwiimpana, “baluleme balikke mbabayookkala munyika, alimwi aabo bazumanana kusyomeka mbabayoosyaala mulinjiyo.”—Tus. 2:21, bupanduluzi buyungizyidwe.

18. Ncinzi Banakristo bakasimpe banji ncobalyaabide kucita, alimwi nkaambo nzi? (Daniele 3:28)

¹⁸ Kuzwa kaindi, Banakristo bakasimpe banji balikubikka lwaanguluko lwabo abuumi bwabo muntenda akaambo kaluyando ndobajisi kuli Jehova Mweendelezi wabo Mupati. Mbanakristo basyomeka, ibakanzide mbubwenya mbuli bana Hebrayo botatwe ibakafwutuka mubbibi lyamulilo akaambo kakuzumanana kusyomeka ku Mupati Kwiinda.—Amubale Daniele 3:28.

19. Ino Jehova uyoobabeteka buti bantu bakwe, alimwi ino ncinzi ncotweelede kucita lino?

¹⁹ Sintembauzyo Davida wakalemba kujatikizya mbociyandika kuzumanana kusyomeka naakati: “Jehova uyoobabeteka bantu. Kondibeteka O Jehova kweelana abululami bwangu alimwi akweelana akubula kampenda kwangu.” (Int. 7:8) Alimwi Davida wakalemba kuti: “Bululami akubula kampenda azindikwabilile.” (Int. 25:21) Cintu ciinda kubota nkuzumanana kusyomeka kuli Jehova, tacikwe makani acikonzya kutucitikila! Kuti twacita oobo, tuyoolimvwa mbubwenya mbwaakalimvwa sintembauzyo iwakalemba kuti: “Balikkomene aabo basyomeka . . . , ibeenda mumulawo wa Jehova.”—Int. 119:1, bupanduluzi buyungizyidwe.