Makani Mabotu aa Luka alaamba kujatikizya Jesu kuti wakajalula bbuku lyakuvwunga lya Isaya, wakabala kuzwa mulindilyo, akulivwunga alimwi. Kumamanino aa Makani Mabotu aa Johane, awalo wakaamba kujatikizya mabbuku aakuvwunga kuti tanaakali kukonzya kubikkilizya makani oonse azitondezyo nzyaakacita Jesu.—Luka 4:16-20; Johane 20:30; 21:25.

Ino mabbuku aakuvwunga akali kupangwa buti? Zintu mbuli cipaya, naa mapepa zyakali kuswaanganizyigwa akupanga comwe cilamfwu. Kumane, cipaya naa pepa eeli lyakali kukonzya kuvwungailwa kukasamu lubazu lulembedwe kaluli mukati. Malembe akali kulembwa mumilongo iimvwi. Ikuti bbuku lyakuvwunga kalili lilamfwu, lyakali kubikkwa tusamu kumamanino woonse obilo twalo sikubala ntwaakali kukonzya kubelesya nayanda kulivwungulula naa kulivwunga kusikila waajana mpayanda kubala.

Bbuku litegwa The Anchor Bible Dictionary lyakaamba kuti, “Bbuku lyakuvwunga lyakali libotu nkaambo lyakali lilamfwu [kanji-kanji mamita aali 10] cakuti lyakali kukonzya kuba abbuku lyoonse ikuti kalivwungidwe.” Mucikozyanyo, kuyeeyelwa kuti Makani Mabotu aa Luka, akali kuyandika bbuku lyakuvwunga lilampa mamita aali 9.5 mubulamfwu. Zimwi ziindi, bbuku lyakuvwunga mpolili atala alimwi aansi lyakali kubotesyegwa kubelesya bbwe lyakucumbya (pumice stone), alimwi amubala.

Kuzwa mulimo wabupaizi nowakatalika mu Israyeli, mwaalumi omwe buyo nguwakali kupegwa cuuno cakuba mupaizi mupati aciindi comwe, alimwi kumatalikilo wakali kubeleka buumi bwakwe boonse. (Myeelwe 35:25) Aroni nguwakali wakusaanguna kupegwa cuuno eeci. Kumane, coolwe eeci kanji-kanji cakali kupegwa kumwanaakwe musankwa mupati. (Kulonga 29:⁠9) Bamaalumi banji mumukowa wa Aroni bakabeleka kabali bapaizi, pele mbasyoonto bakabeleka kabali bapaizi bapati.

Cisi ca Israyeli nocakatalika kweendelezyegwa abami bamuzwakule, bami ibatakali bana Israyeli bakatalika kubikka alimwi akugwisya bapaizi bapati ibakali ba Juda kufwumbwa ciindi. Nokuba boobo, kulibonya kuti ziindi zinji aabo ibakali kusalwa bakali kuzwa mumikwasyi misyoonto buyo, kanji-kanji mumukwasyi wa Aroni. Cakutadooneka, majwi aakuti “basilutwe babapaizi” aamba balupati-pati akati kabapaizi. Basilutwe babapaizi ambweni bakali kubikkilizya abasilutwe bankamu zili 24 zyabapaizi; bapati-pati bamikwasyi yabapaizi bapati; alimwi abaabo ibakagwisyigwa acuuno cabupaizi bupati, mbuli Anasi.​—1 Makani 24:​1-​19; Matayo 2:4; Marko 8:​31; Milimo 4:⁠6.