Mukwasyi wangu wakali kukkala ku Tellancourt, kunyika lwaajwe kwa France. Bataata bakali baku France, bamaama mbaku Italy. Nindakajisi myaka iili lusele yakuzyalwa, twakalongela kunkomponi imwi mwakali kukkala babelesi bacete, mudolopo lya Rome mu Italy. Katuli kokuya, buumi bwakatalika kukatazya. Bazyali bangu bakali kuzwangana kapati akaambo kamapenzi aakubula mali.

Ciindi nindakajisi myaka iili 15 yakuzyalwa, bamaama bakandikulwaizya kuti kandizwa aŋanda akupanga balongwe. Aboobo, ndakatalika kuzwa aŋanda kwaciindi cilamfwu. Tiilyakalampa ndakatalika kuyanzana abantu batali kabotu. Buzuba bumwi, mwaalumi umwi iwakali kulibonya mbuli kuti ulikabotu wakandisikila. Wakandipa misamu iikola, ndakaibelesya nkaambo ndakali kuyanda kulibonya kuti ndakomena lino. Tiikwakainda ciindi ndakatalika kuzulilwa mukakamu kakali kubelesya misamu iikola alimwi akucita bwaamu. Ziindi zinji ndakali kusinikizyigwa koonana. Buumi bwakanyina mpindu kulindime; tiindakali kukombelela kufwa naa kupona. Ndakali kulimvwa kulendelelwa kapati. Nondakajisi myaka iili 16 ndakasola kulijaya kwiinda mukunywa bbodela lyabukoko butegwa whiskey alimwi akusotokela mulwizi. Akaambo kaceeci ndakali kufwumba bulamfwu kwamazuba otatwe.

Ndakatalika kubona mpindu yabuumi, pele alimwi ndakatalika kuyanda nkondo abumpelenge. Ndakali kulyaaba koonana abantu ibakali kuyanda, kubapa misamu iikola mumaanda aabo, mpoonya akubabbida kufwumbwa cintu cili coonse cibotu ncobakajisi. Nkamu zipati zyabasikusambala misamu iikola zyakali kundibelesya kutola misamu iikola mumasena aaindene-indene mu Italy. Ziindi zinji bamapulisa bakali kundijata. Buumi bwangu bwakali kulibonya kubula mulimo akuti tabukonzyi kubambululwa. Nokuba boobo, ndakali kusyoma kuti kweelede kuti kuli kaambo ncondakali kuponena. Ndakapaila kuli Leza, kumulomba kuti andipe mwaka omwe buyo waluumuno alukkomano.

Nindakajisi myaka iili 24 yakuzyalwa, ndakayeeya kulongela ku England. Akaambo kakubeleka abasikusambala misamu iikola, buumi bwangu bwakali muntenda. Pele kanditanalonga, ndakaswaya bamaama alimwi ndakagambwa kujana mwaalumi uutegwa Annunziato Lugarà kabandika ambabo kujatikizya Bbaibbele. * Akaambo kakuti ndakaliizyi mpuwo yakwe yabugwebenga,  ndakayoowa alimwi ndakabuzya ncaakali kucita. Wakandaambila kujatikizya kucinca kupati nkwaakacita mubuumi bwakwe kutegwa abe Kamboni wa Jehova, alimwi wakandaambila kuti ndisyomezye kuti ndiyoobandika a Bakamboni ba Jehova ndasika ku England. Ndakazumina kucita boobo. Nokuba boobo, mbondakasikila buyo ookuya, ndakapilukila kubuumi bwangu bwakaindi.

Buzuba bumwi, ndakaswaanganya Kamboni wakali kwaabila mamagazini aa Ngazi Yamulindizi a Sinsimuka! mumugwagwa mwakali kujanika bantu banji mu London. Ndakayeeya cisyomezyo ncondakaamba kuli ba Annunziato, mpoonya ndakamulomba Kamboni kuti kandiyiisya Bbaibbele.

Makani ngondakaiya mu Bbaibbele akandigambya kapati. Mucikozyanyo, ndakakulwaizyigwa kapati amakani aajanika mulugwalo lwa 1 Johane 1:9, aamba kujatikizya Leza aakuti: “Ikuti twalyaambilila zibi zyesu, mbwaanga walo ulasyomeka alimwi uliluleme, ulakonzya kutulekelela zibi zyesu akutusalazya.” Kapango aaka kakandigwasya kapati nkaambo ndakali kulimvwa kusofwaala kapati kweelana ambondakali kupona. Mpoonya-mpoonya, ndakatalika kujanika kumiswaangano ku Ŋanda ya Bwami ya Bakamboni ba Jehova. Bakamboni bakanditambula camaanza obilo. Nindakabona mbobakali kuyandana, icintu ncondakali kuyanda kapati, ndakayanda kubasangana mumbungano yabo iili mbuli mukwasyi.

Nokuba kuti tiindakajisi buyumuyumu kucileka kubelesya misamu iikola alimwi abukkale bwakutalilemeka, cakandikatazya kubambulula bube bwangu. Ndakabona kuti ndakeelede kubalemeka bantu alimwi akubabikkila maano. Masimpe ngakuti, noliba lino ndicilwana tumpenda tumwi tubyaabi. Pele akaambo kakugwasyigwa a Jehova, ndayaambele. Mumyezi buyo iili cisambomwe kuzwa nindakatalika kwiiya Bbaibbele, ndakabbapatizyigwa akuba Kamboni wa Jehova. Oomo mwakali mu 1997.

Nondakabbapatizyigwa, ndakakwata mucizyi wazina lya Barbara, awalo iwakazwa aakuba Kamboni wa Jehova. Mweenzuma umwi naakabona mbondakacinca, awalo wakatalika kwiiya Bbaibbele. Mukuya kwaciindi wakaba Kamboni, antoomwe amucizyi wakwe. Mpoonya banabokwabo abanene bakaintu ibakajisi myaka iili 80 yakuzyalwa, bakatalika kwiiya alimwi kabatanafwa bakabbapatizyigwa.

Lino ndili mwaalu mumbungano, mebo abakaintu bangu tuli babelesi baciindi coonse, tugwasya kuyiisya bantu Bbaibbele mumwaambo waci Italian mu London. Zimwi ziindi ndilausa kapati ndayeeya mbondakali kupona kaindi, pele ba Barbara balandigwasya kapati. Lino ndipona buumi mbondakali kuyanda, buumi bwamumukwasyi buli kabotu, alimwi ndijisi Taata siluyando ngondakali kuyandaula. Ndakalomba Leza kuti andipe buyo mwaka omwe waluumuno alukkomano, pele wandipa myaka minji!