“BULANGIZI . . . NCINTU CIYANDIKA KAPATI KUTEGWA TUBE ACILONGWE CIBOTU A LEZA,” kweelana ambolyaamba bbuku litegwa Hope in the Age of Anxiety. Lilazumanana kwaamba kuti: “Bulangizi musamu mubotu kwiinda, walo uugwasya kapati ciindi muntu nazyingidwe mumizeezo, nali alikke alimwi aciindi nayoowede.”

Bbaibbele lilatondezya kaambo ncotuyandika bulangizi, pele alimwi lilatucenjezya kujatikizya bulangizi bwakubeja. Lugwalo lwa Intembauzyo 146:3 lwaamba kuti: “Mutasyomi bami pe, naba mwanaamuntu uutakonzyi kuleta lufwutuko.” Muciindi cakusyoma bantu kuti batuvwune kumapenzi eesu, tweelede kusyoma Mulengi wesu, walo uujisi nguzu zyakuzuzikizya zisyomezyo zyakwe zyoonse. Ino nzisyomezyo nzi nzyaatusyomezya? Amubone twaambo ootu tutobela.

BUBI BUYOOMANA; MPOONYA BANTU BALULEME BAYOOKKALA MULUUMUNO LUTAMANI: “Kusyeede kaindi kaniini buyo, ibantu babi tabakabi limbi pe . . . Pele babombe myoyo bayookona nyika, eelyo bayoobotelwa kapati muluumuno lunji,” mbolwaamba lugwalo lwa Intembauzyo 37:10, 11. Kapango 29 kalayungizya kwaamba kuti ‘balulami bayookkala anyika mane kukabe kutamani.’

NKONDO ZIYOOMANA: “Jehova . . . ulamanizya nkondo munyika yoonse mboizulwa. Ibuta ulabutyolaula alyalo sumo ulalipwayaula; inkalaki zyankondo ulazyuumpa amulilo.”—Intembauzyo 46:8, 9.

KUCISWA, KUPENGA ALIMWI ALUFWU ZIYOOMANA: “Tente lya Leza lili aabantu . . . Uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe.”—Ciyubunuzyo 21:3, 4.

BANTU BOONSE BANOOJISI CAKULYA CINJI: “Kuyooba maila manji anyika; atala lyamalundu ayoovwula citaambiki.”—Intembauzyo 72:16.

BWEENDELEZI BULULEME BWAMFWULUMENDE YOMWE YANYIKA YOONSE—BWAMI BWA KRISTO: “[Jesu] wakapegwa bweendelezi, bulemu, alimwi abwami, kuti bantu boonse, zisi zyoonse alimwi abantu bamyaambo yoonse bamubelekele. Bweendelezi bwakwe mbweendelezi bwalyoonse alyoonse oobo ibutakamani, abwalo bwami bwakwe mbwami butakanyonyoonwi.”—Daniele 7:14.

Ino inga twasinizya buti kuti zisyomezyo eezyi ziyoozuzikizyigwa ncobeni? Naakali anyika, Jesu wakatondezya caantangala kuti wakali kweelela kuba Mwami Uusalidwe. Wakaponya baciswa, wakasanina bakafwide nzala alimwi akubusya bafwide. Pele ciyandika kapati nzintu nzyaakali kuyiisya, mbwaanga zibikkilizya njiisyo iziyoogwasya bantu kukkala antoomwe calukamantano alimwi kabali muluumuno mane kukabe kutamani. Kuyungizya waawo, Jesu wakasinsima zintu iziyoocitika kumbele, kubikkilizya azyeezyo izyakali kuyootondezya mamanino aabweende bwazintu oobu.

Jesu wakasinsima kuti kumazuba aamamanino takukabi luumuno alimwi akuliiba, pele lupyopyongano! Wakaamba kuti zitondezyo ‘zyamamanino aabweende bwazintu’ zyakali kuyoobikkilizya nkondo mumasi aayindene-indene, nzala, malwazi alimwi amizuzumo mipati. (Matayo 24:3, 7; Luka 21:10, 11; Ciyubunuzyo 6:3-8) Alimwi Jesu wakaamba kuti: “Akaambo kakuvwula kwabubi, luyando lwabantu banji luyoomana.”—Matayo 24:12.

Kumana kwaluyando ooko kulalibonya munzila zinji, kwalo sikulemba Bbaibbele uumbi nkwaakaamba cacigaminina. Kulugwalo lwa 2 Timoteyo 3:1-5 tubala kuti “kumazuba aamamanino,” bantu banji bayoobikkila kapati maano kuzintu nzyobayanda beni, bayooyandisya mali alimwi azyakulikondelezya. Banoolisumpula alimwi banooli bakali. Mikwasyi tainoojisi luyando lwakuzyalwa andulo alimwi bana tabanoomvwidi bazyali babo. Kuupaupa ameso mubukombi kunoodumide.

Bukkale oobu bukatazya kapati butondezya kuti nyika eeyi ili kumamanino ncobeni. Alimwi butondezya kuti Bwami buli afwaafwi kutalika kweendelezya aano anyika. Kuyungizya waawo, Jesu wakaamba businsimi bukkazika moyo kujatikizya mazuba aamamanino ciindi naakati: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.”—Matayo 24:14.

Makani mabotu aayo acenjezya basizibi pele apa bulangizi kubantu baluleme akubasyomezya kuti zileleko izyakasyomezyegwa ziyoozuzikizyigwa ino-ino. Sena mulayanda kuzyiba zinji kujatikizya zileleko eezyo? Ikuti naa mboobo, amujalule kupeeji lyamamanino lyamagazini eeyi.