Sena muyeeya kuti bantu inga baamana mapenzi aatupa kubula luumuno alimwi akutaliiba kujatikizya zintu ziboola kumbele? Kutegwa twaamane mapenzi eesu, tweelede kuzyiba cini cipa kuti kaaliko.

Mucikozyanyo, ba Tom bakaciswa mpoonya bakafwa. Ino ncinzi cakapa kuti bafwe? Dokota uubeleka kucibbadela nkobakaunka ba Tom ciindi cisyoonto buyo kabatanafwa, wakaamba kuti: “Zitondezyo zyakusaanguna izyakuti baciswa nozyakatalika kulibonya, kunyina wakasola kulanga-langa cini cakapa kuti zitondezyo eezyo zilibonye. Kuboneka kuti bamadokota ibakasaanguna kubasilika bakabapa buyo misamu iyakali kukonzya kubapa kuti balimvwe kabotu.

Sena abalo bantu basola kubelesya nzila njiyona eeyi kumana mapenzi? Mucikozyanyo, mukusola kumana bugwebenga, mfwulumende zyabikka milawo, mincini iifwotola zintu zicitika alimwi akuyungizya bakapokola. Nokuba kuti ntaamu eezyi kuli mbozigwasya, pele tazilwani cini cileta penzi eeli. Micito yabantu itondezya zintu izili mumyoyo yabo, mbobalimvwa alimwi anzyobayanda.

Ba Daniel, ibakkala mucisi cimwi caku South America calo iciyaabucetaala kapati, bakaamba kuti: “Kaindi twakali kupona kabotu. Tiitwakali kuyoowa kubbidwa azigwebenga zyeenda antobolo. Pele mazuba aano kucinyina kuliiba mumadolopo nomuba muminzi. Akaambo kakuti buumi bwayuma mucisi, tulalibonena caantangalala kuti bantu mbaasyaacivwulemwangu alimwi tababulemeki buumi bwabantu bamwi naa zintu zyabo.”

Mwaalumi umwi ngotutiite kuti Elias, wakatija manyongwe ku Middle East kumane kumbele wakaiya Bbaibbele. Wakaamba kuti: “Bakubusi banji mudolopo mondakali kukkala bakali kukulwaizyigwa abanamukwasyi alimwi abasololi babukombi busangene amapolitikisi kuti batole lubazu munkondo kutegwa babonwe kuti mbantu balemekwa. Abalo basinkondonyina bakali kwaambilwa mbubwenya oobo. Eeci cakandipa kubona kuti tacigwasyi kusyoma basololi balya maila.”

Bbaibbele lyaamba kuti:

• “Moyo wamuntu mubi kuzwa kubwana.”​—Matalikilo 8:21.

• “Moyo uleena kwiinda cintu cimbi cili coonse alimwi ulapenzya kapati. Ino nguni uukonzya kuuzyiba?”​—Jeremiya 17:9.

• “Mumoyo mulazwa mizeezo mibi, bujayi, . . . bwaamu, bubbi, bumboni bwakubeja.”​—Matayo 15:19.

Bantu tabakonzyi kutugwisya tumpenda ituli mumyoyo yabantu twalo tupa kuti kabacita zintu izipenzya bamwi. Cuusisya ncakuti, tumpenda ootu tuyaabwiindila buya kweelana amapenzi aambidwe mucibalo cainda. (2 Timoteyo 3:1-5) Eeci cili boobu nokuba kuti bantu balijisi luzyibo lunji alimwi anzila zinji zyakubandika abantu bamwi kwiinda kaindi. Pele ino nkaambo nzi ncocitwaalila kupa kuti nyika bube busena motukonzya kuliiba? Sena bantu tabakonzyi buya kupa kuti nyika bube busena bwaluumuno akuliiba? Sena cilakonzyeka ncobeni kuti nyika inga bwaba busena bantu mobakonzya kuliiba?

Nokuba kuti nicali kukonzyeka kutucinca tulengwa tupa bantu kucita zintu zibyaabi, bwini mbwakuti inga tiitwacikonzya kupa kuti nyika bube busena mobakonzya kuliiba  bantu boonse. Nkaambo nzi? Akaambo kakuti nguzu zyesu kuli mpozigolela.

Kaambo kamasimpe nkakuti: “Muntu . . . tapedwe nguzu zyakusololela noziba ntaamu zyakwe.” (Jeremiya 10:23) Masimpe, tiitwakalengwa katujisi nguzu zyakulyeendelezya. Tiitwakalengwa katujisi nguzu zyakweendelezya bantuma mbubwenya mbotwatakalengwa kuti katukkala mumaanzi naa mumulengalenga.

Ntootu twaambo: Sena bantu balayanda kuti bantu bamwi kababaambila mbobeelede kupona naa zyeelelo zyakulilemeka nzyobeelede kutobela? Sena balakkomana kwaambilwa mbobeelede kwiibona micito imwi mbuli kugwisya da naa mbobeelede kulaya bana babo? Zintu eezyi zili akati katwaambo itupa bantu kwaandaana. Nokuba kuti nciyumu kutuzumina twaambo ootu, ncolyaamba Bbaibbele ncamasimpe. Tatujisi nguzu zyakweendelezya bantuma. Aboobo, nkookuli nkotukonzya kujana lugwasyo?

Bwiinguzi bubotu kapati mbwakuti tweelede kulomba Mulengi wesu kuti atugwasye. Kayi ngonguwe wakatulenga! Mukwiimpana ambobayeeya bamwi, Leza tatulubide pe. Alimwi buya, ulatondezya mbwatubikkila maano kwiinda mubusongo mbotujana mu Bbaibbele. Kuti twalimvwisya bbuku eeli lilibedelede, tuyoozyiba kabotu kuti kuli mpotugolela. Alimwi cilatugwasya kuzyiba kaambo bantu ncobali kupenga kwamyaka minji. Kweelana ambwaakalemba syaazibwene umwi waku Germany, “bantu alimwi amfwulumende kunyina ncobaiya kuzwa kuzintu izyakacitika kaindi, nkaambo kunyina nobacinca bukkale bwabo.”

Bbaibbele lyaamba kuti, “busongo bulabonwa kuti buliluleme kwiinda mubana bambubo boonse,” naa mumilimo yambubo yoonse. (Luka 7:35) Cikozyanyo cimwi cabusongo oobu cilajanika kulugwalo lwa Isaya 2:22, lwalo ilwaamba kuti: “Kutegwa mulivwune, amuleke kusyoma muntu buyo.” Lulayo oolu lubotu lulakonzya kutugwasya kutalangila zintu zitakonzyi kucitika. Ba Kenneth ibakkala mudolopo limwi ku North America ibakakatazyidwe akaambo kankondo, bakaamba kuti: “Simapolitikisi umwi aumwi ulasyomezya kuti zintu ulazibamba kutegwa zibote, pele balaalilwa. Lyoonse balaalilwa kuzuzikizya zisyomezyo zyabo, aboobo eeci citondezya kuti ncolyaamba Bbaibbele ncamasimpe.”

Ba Daniel, ibaambidwe kumatalikilo bakalemba kuti: “Buzuba abuzuba bundipa kusinizya kaambo kakuti bantu tabakonzyi kuzyeendelezya kabotu zintu. . . . Ikuba amali mubbanki naa kuyobola zintu zimwi izikonzya kumugwasya mubuumi, tacaambi kuti buumi bwanu bwakumbele bunooli kabotu. Ndakalibonena kale bantu ibali mubukkale oobu kabapenga citaambiki.”

Bbaibbele talitukwabilili buyo kukusyoma zintu zitakonzyi kucitika. Pele alimwi lilatupa bulangizi, mbubwenya mbotutiibone kumbele.