Bukkale bubotu nzyeelelo muntu nzyasala kutobela mubuumi. Mucikozyanyo, sena mulasolekesya kusyomeka muzintu zyoonse? Cakutadooneka, oobo mbobukkale bubotu mbomuyanda kuyiisya bana banu.

Kuyungizya waawo, muyanda kubayiisya mbociyandika kubeleka canguzu, kubeendelezya kabotu bamwi alimwi akubabikkila maano, ibube bwalo muntu mbwayelede kwiiya ciindi nacili mwana.

NJIISYO YAMU BBAIBBELE: “Koyiisya mwana inzila njayelede kweendela; noliba leelyo aakukomena takazwi mulinjiyo pe.”—Tusimpi 22:6.

Mazuba aano sayaansi noyayaambele, kulilemeka kulayandika kapati. Muzyali mukaintu umwi wazina lya Karyn wakaamba kuti: “Zintu zibyaabi zilakonzya kujanika mufooni iili yoonse kufwumbwa ciindi. Bana besu inga kabakkede munsi-munsi andiswe pele kabeebelela zintu zitali kabotu!”

NJIISYO YAMU BBAIBBELE: “Bantu basimide . . . balaamaano aayiisyidwe kwaandaanya ciluzi acitaluzi kwiinda mukwaabelesya.”—Bahebrayo 5:14.

Bukkale bubotu bulayandika kapati. Eeci cibikkilizya kutondezya bulemu (mbuli kwaamba kuti “ndalomba” akuti “ndalumba”) alimwi akubabikkila maano bamwi, kwalo kutacicitiki-citiki mazuba aano nkaambo bantu balibonya kuti batalika kubikkila kapati maano kuzintu mbuli mafooni muciindi cakubikkila maano kubantu.

NJIISYO YAMU BBAIBBELE: “Mbubonya mbomuyanda kuti bantu bamucitile, andinywe amubacitile mbubonya.”—Luka 6:31.

Amuzyaambe zyeelelo zyanu zyakulilemeka. Mucikozyanyo, buvwuntauzi butondezya kuti bakubusi balakonzya kweeleba koonana kutali kwamumulawo ikuti bayiisyigwa cakusalazya kuti bukkale buli boobu mbubyaabi.

NZILA IIGWASYA: Amwaambe cakacitika ino-ino kutegwa mutalisye mubandi kujatikizya zyeelelo zyakulilemeka. Mucikozyanyo, ikuti kuli makani aamba zyabugwebenga, mulakonzya kwaamba kuti: “Cilatyompya kubona bantu bamwi mbobali basilunya kubantunyina. Ino uyeeya kuti ncinzi cipa kuti bantu kabali boobu?”

“Nciyumu kubana kusala akati kacintu ciluzi alimwi acitaluzi ikuti kabatazyi ciluzi naa citaluzi.”—Ba Brandon.

Amubayiisye kulilemeka kabotu. Nobaba bana ibacili baniini balakonzya kwiiya kwaamba kuti “ndalomba” akuti “ndalumba” alimwi akubabikkila maano bamwi. Bbuku litegwa Parenting Without Borders lyaamba kuti: “Ciindi bana nobabona kuti bazulilwa kunkamu yabantu, nkokuti mumukwasyi, kucikolo alimwi akuti ncibeela cabanamaleya, ndendilyo nobakonzya kucita milimo mibotu yalo iigwasya bantu boonse, kutali buyo kuligwasya lwabo beni.”

NZILA IIGWASYA: Amubape milimo yakucita bana banu kutegwa baiye bubotu bwakubelekela bamwi.

“Ikuti bana besu baiya lino kubeleka milimo yaaŋanda, tacikabayumini kumbele baakutalika kulikkalila. Banooli bakazyibila kale kulanganya zintu ziyandika mubuumi bwabo.”—Ba Tara.