Kubandika kwini-kwini kulacitika ciindi nomwaambilana abana banu kujatikizya nzyomuyeeya alimwi ambomulimvwa.

Kubandika abakubusi cilakonzya kuba cintu cikatazya. Ciindi bana banu nobakacili baniini bakali kukonzya kumwaambila zintu zyoonse. Pele lino nobaba bakubusi, tabaciyandi kubandika kapati andinywe aboobo tamuzyi nzyobayeeya alimwi ambobalimvwa. Cili mbuli kuti nywebo mwiimvwi kutala limwi lyamulonga mupati mpoonya balo bali kutala limbi lyamulonga. Nokuba kuti bana banu balibonya mbuli kuti tabayandi kubandika, pele eeci nceciindi nobayandika kapati kubandika andinywe.

Kamulibambilide kubandika amwanaanu kufwumbwa ciindi naayanda kubandika. Mweelede kubandika nokuba kuti mpaakati kamasiku.

“Mulakonzya kusunkwa kwaamba kuti, ‘Lino noyanda kubandika, kakuli twali antoomwe buzuba boonse!’ Tatweelede kutongooka ciindi bana besu nobayanda kutwaambila zili mumyoyo yabo. Sena eeci tacili ncalombozya muzyali uuli woonse?”—Ba Lisa.

“Nokuba kuti ndilayanda kufwambaana koona kakutanasiya kapati, pele zimwi ziindi ndilaakuba amibandi iikkomanisya abana bangu bakubusi mane kusikila akati kamasiku.”—Ba Herbert.

NJIISYO YAMU BBAIBBELE: “Umwi aumwi kayandisya kugwasya bamwi ikutali buyo kuligwasya lwakwe mwini.”—1 Bakorinto 10:24.

Mutalekeli zintu zimwi kumunyonganya. Usyi umwi wakaamba kuti: “Zimwi ziindi ndilaakutalika kuyeeya zintu zimbi ciindi bana bangu nobabandika andime. Alimwi inga balabona kuti ndiyeeya buyo zintu zimbi muciindi cakubaswiilila.”

Ikuti naa mulanyonganizyigwa a TV naa tuncini tumbi mbuli fooni, mweelede kwiizima naa kwiibikka ambali. Amubikkile maano kuzintu nzyaamba mwanaanu alimwi amuziswiililisye nokuba kuti zilibonya mbuli kuti taziyi koomoonga.

“Tweelede kubatondezya bana besu kuti ikuzyiba mbobalimvwa kulayandika kapati kulindiswe. Ikuti naa babona kuti tatubikkili maano kujatikizya mbobalimvwa, tabakonzyi kutwaambila naa ambweni balakonzya kwaambila buyo muntu uumbi kutegwa abagwasye.”—Ba Maranda.

“Mutaciindizyi kunyema nokuba kuti mizeezo yamwanaanu tailuzi.”—Ba Anthony.

NJIISYO YAMU BBAIBBELE: “Amubikkile maano mbomumvwa.”—Luka 8:18.

Amubandike abana banu noliba leelyo nomucita zintu zimbi buyo. Zimwi ziindi bana balaanguluka kubandika ciindi nobatalangene buya amuzyali cantongolameso.

“Tulaakubandika ciindi notuli mumootokala. Kubambana kukkala muciindi cakukkala kamulangene buya, kwatugwasya kuba amibandi iikkomanisya.”—Ba Nicole.

Ciindi cakulya acalo cipa coolwe cakulikwaya kubandika.

“Ciindi notulya cilalilo, umwi aumwi ulaamba cintu cibi alimwi acibotu icamucitikila buzuba oobo. Cilengwa eeci catugwasya kukamantana alimwi catugwasya kuzyiba kuti lyoonse kuli muntu uulibambilide kutugwasya kulwana mapenzi ngotuyaanya.”—Ba Robin.

NJIISYO YAMU BBAIBBELE: “Weelede kufwambaana kuswiilila, [a]kumuka kwaambaula.”—Jakobo 1:19.