Ciindi banabukwetene nobabelekela antoomwe, mulumi amukaintu bali mbuli sikweenzya ndeke alimwi asikumugwasyilizya kabajisi malailile aakozyenye aatondezya mboyeelede kweenda ndeke. Nomuba muziindi nokuli buyumuyumu, umwi aumwi wabanabukwetene weelede kwaamba kuti, “swebo” ikutali kuti “mebo.”

NJIISYO YAMU BBAIBBELE: “Tabacili bobilo, pele baba mubili omwe.”—Matayo 19:6.

“Cikwati tacili mbuli cintu cicitwa amuntu omwe buyo. Mulumi amukaintu beelede kubelekela antoomwe kutegwa cizwidilile.”—Ba Christopher.

Ciindi nokwaba manyongwe, mulumi alimwi amukaintu ibatabelekeli antoomwe balabukilana muciindi cakuti balwane penzi. Mapenzi masyoonto inga akomena akuba mapenzi mapati.

“Kubelekela antoomwe kulayandika kapati mucikwati. Ikuti mebo abalumi bangu notwatali kubelekela antoomwe, notwali kukkala buyo muŋanda yomwe mbuli bantu batakwetene, alimwi nocali kukatazya ciindi notuyanda kusala zintu ziyandika kapati.”—Ba Alexandra.

AMULISUNKE

• Sena mali ngondijana ndaabona kuti “oonse ngaangu”?

• Kutegwa ndilyookezye kabotu, sena ndeelede kumusiya ngondikwetene limwi?

• Sena ndilabatantamuka bacibbululu bamuntu ngondikwetene limwi, nokuba kuti walo ulamvwana ambabo?

AMUBANDIKE AMUNTU NGOMUKWETENE LIMWI

• Muumbazu nzi motucita kabotu mbuli banabukwetene?

• Muumbazu nzi motukonzya kuyaambele?

• Ino nintaamu nzi nzyotukonzya kubweza kutegwa tuyaambele mucilengwa cakubelekela antoomwe?

NZILA ZIGWASYA

• Amweezyeezye kuti muuma nsolo mpoonya nyoonse muli kulubazu lwiindene. Muciindi cakuba kulubazu lwiindene, ino nintaamu nzi zigwasya nzyomukonzya kubweza kutegwa mube kulubazu lomwe angomukwetene limwi?

• Muciindi cakuyeeya kuti, ‘Mbuti mbondikonzya kuwina?’ mweelede kuyeeya kuti ‘Mbuti mbotukonzya kuwina?’

“Mutabikkili maano kujatikizya uuluzi naa uutaluzi. Kuba muluumuno alimwi akukamantana mucikwati canu nceciyandika kapati ikutali kuzyiba uuluzi naa uutaluzi.”—Ba Ethan.

NJIISYO YAMU BBAIBBELE: “Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.”—Bafilipi 2:3, 4.