Banabukwetene ibalemekana balazumanana kuyandana noliba leelyo nobatazuminani mucintu cimwi. Bbuku litegwa Ten Lessons to Transform Your Marriage lyaamba kuti: “Umwi aumwi wabanabukwetene bali boobu takakatili buyo kumuzeezo wakwe akukaka kuzumina muzeezo wamweenzinyina. Muciindi caboobo, balazumanana kumana mazwanga aali woonse ngobakonzya kuba angayo. Cabulemu, balamuswiilila ngobakwetene limwi ciindi naamba mbwayeeya mpoonya akusola kujana nzila iikonzya kubagwasya boonse bobilo.”

NJIISYO YAMU BBAIBBELE: “Luyando . . . talubikkili buyo maano kuzintu nzyoluyanda.”—1 Bakorinto 13:4, 5.

“Ikulemeka mukaintu wangu caamba kuti ndeelede kutondezya kuti ulayandika kapati kulindime alimwi akuti tandeelede kucita cintu cili coonse cikonzya kumunyonganya mumizeezo naa kunyonganya cikwati cesu.”—Ba Micah.

Ikuti banabukwetene kabatalemekani, mibandi yabo ilakonzya kutalika kuba yakukazyanya, kufwubaazyanya, mane buya akusampaulana. Basikuvwuntauzya baamba kuti eezyi nzitondezyo zyakusaanguna izitondezya kuti banabukwetene balalangilwa kulekana.

“Kwaamba majwi aamasendekela, kunonga naa kwaamba masesya kujatikizya mukaintu wanu kulakonzya kumupa kulimvwa kubula mpindu, inga waleka kumusyoma alimwi eeco inga canyonganya cikwati canu.”—Ba Brian.

AMULISUNKE

Amwiibikkile maano mibandi yanu amicito yanu kwansondo yomwe. Mpoonya amulibuzye kuti:

• ‘Ino nziindi zyongaye nzyondakamusampaula muntu ngotukwetene limwi, alimwi nziindi zyongaye nzyondakamulumbaizya?’

• ‘Ino muunzila nzi zigaminide mondakatondezya kuti ndilamulemeka muntu ngotukwetene limwi?’

AMUBANDIKE ANGOMUKWETENE LIMWI

• Ino micito iili buti alimwi majwi aali buti aakonzya kumupa kulimvwa kuti ngomukwetene limwi ulamulemeka?

• Ino micito iili buti alimwi majwi aali buti aamupa kulimvwa kuti ngomukwetene limwi tamulemeki?

NZILA ZIGWASYA

• Amulembe nzila zyotatwe mbomuyanda kunootondezyegwa bulemu. Awalo ngomukwetene limwi acite mbubwenya oobo. Amucincane mapepa ngomwalemba, mpoonya amusolekesye kunoomutondezya bulemu ngomukwetene limwi mumbazu nzyaalemba.

• Amulembe bube mbomukkomanina mbwajisi ngomukwetene limwi. Mpoonya amumwaambile mbomulimvwa kujatikizya bube oobo.

“Kulemeka balumi bangu caamba kuti nzyondicita zyeelede kutondezya kuti ndilabayanda alimwi ndiyanda kuti kabakkomene. Alimwi kanji-kanji tuntu tusyoonto-syoonto buyo ntondaamba alimwi akucita tulakonzya kutondezya kuti ndilabalemeka ncobeni.”—Ba Megan.

Kaambo kayandika kapati takayeeme aakuti naa nywebo mulimvwa kuti mulamulemeka ngomukwetene limwi naa pe; pele nkakuti naa ngomukwetene limwi ulimvwa kuti ulalemekwa.

NJIISYO YAMU BBAIBBLE: “Amulisamike luyando lwamoyo walubomba, luzyalo, kulicesya, kubomba moyo alimwi akukkazika moyo.”—Bakolose 3:12.