KUBAKUBUSI
10: Kusyomeka
NCOCAAMBA
Bantu basyomeka balasyomwa kubazyali babo, kubalongwe alimwi akuli basikubalemba mulimo. Balaitobela milawo, balacibamba cisyomezyo cabo alimwi lyoonse baamba masimpe.
IKAAMBO NCOCIYANDIKA
Kanji-kanji, lwaanguluko ndomujisi lulaboola akaambo kakusyomeka nkomwatondezya kwaciindi cili mbocibede.
“Nzila mbotu iipa kuti bazyali banu kabamusyoma nkubatondezya kuti mulisimide mumizeezo, kutali buyo ciindi nomuli antoomwe ambabo, pele aciindi nobatako.”—Sarahi.
NJIISYO YAMU BBAIBBELE: ‘Amuzumanane kutondezya milimo iicitwa cakulibombya akaambo kabusongo.’—Jakobo 3:13.
NCOMUKONZYA KUCITA
Kufwumbwa naa muyanda kuti kabamusyoma kapati naa kuti batalike kumusyoma alimwi, nzila zitobela inga zyagwasya.
Amusyomeke. Bantu inga bafwambaana kucileka kumusyoma ikuti mwatalika kubeja. Kulubazu lumwi, ikuti kamwaamba masimpe alimwi akusyomeka, kwaambisya ciindi nomwalubizya bantu banoomusyoma.
“Ncuuba-uba kusyomeka ciindi zintu nozili kabotu. Pele kuti kamusyomeka muzintu zimwi izipa kuti mulibonye kuba bantu babi, cakutadooneka bantu bayootalika kumusyoma kapati.”—Caiman.
NJIISYO YAMU BBAIBBELE: “Tuyanda kuti katusyomeka muzintu zyoonse.”—Bahebrayo 13:18.
Amubikkile maano. Buvwuntauzi bumwi ibwakacitwa ku U.S., bwakatondezya kuti 78 pesenti yabasyaazibwene mukunjizya bantu milimo bakaamba kuti, “icintu ciyandika kapati mumakkampani nobalemba muntu mulimo, nkubikkila maano kumulimo.” Kwiiya kubikkila maano lino kuyoomugwasya kumbele mwaakukomena.
“Bazyali bangu balabona ciindi nondibikkila maano kumulimo alimwi akubeleka milimo yaaŋanda kakunyina kuyeezyegwa. Ciindi nondibeleka boobu, cipa kuti kabandisyoma kapati.”—Sarah.
NJIISYO YAMU BBAIBBELE: “Ndilaalusyomo lwakuti ulakuzumina kulomba kwangu, . . . nkaambo ndilizyi kuti nzyotiicite zilainda buya aazintu eezyi nzyondaamba.”—Filimoni 21.
Amukkazike moyo. Mukwiimpana akukomena kumubili kwalo kulibonya kuli bamwi, kanji-kanji kuyandika ciindi kutegwa bamwi babone mbotuyaabukomena mumizeezo alimwi akusima.
“Kucita cintu cibotu ciindi comwe buyo takukonzyi kupa kuti bazyali banu alimwi abantu bamwi batalike kumusyoma. Pele balakonzya kutalika kumusyoma mukuya kwaciindi ikuti mwazumanana kutondezya kuti mulabikkila maano.”—Brandon.
NJIISYO YAMU BBAIBBELE: “Amulisamike . . . kukkazika moyo.”—Bakolose 3:12.
Andiza Inga Mwaakkomanina Ayaaya
BAKUBUSI BALABUZYA
Nkaambo Nzi Ncociyandika Kusyomeka?
Sena tazibeendeli kabotu zintu bantu batasyomeki?
TUMAVIDIYO ITUTONDEZYA ZYAKUDULOWIŊA ABBOODI
Ino Inga Ndabandika Buti Abazyali Bangu?
Ino inga mwabandika buti abazyali banu ciindi nomutayandi kubandika?
BAKUBUSI BALABUZYA
Sena Ndili Muntu Uubikkila Maano Kuzintu?
Bakubusi bamwi balapegwa lwaanguluko lunji kwiinda bamwi. Ino ncinzi cipa kwiindana?
