BUNJI bwazinyama izikkala mumaanzi aatontola zilijisi mafwuta manji kucikanda kutegwa kazimvwa kukasaalilwa lyoonse. Pele kanyama kategwa sea otter kalo kajisi cintu cimbi cikagwasya—boya bulemu-lemu.

Amulange-lange: Boya bwakanyama aaka mbulemu-lemu kwiinda bwazinyama zimbi, bulisinsinkene kapati cakuti kabeela kasyoonto buyo kamubili kasika ku 1 square sentimita kalijisi boya bubalilwa ku 155,000. Ciindi nokayamba mumaanzi, boya bwankako bulakwela muya kumubili wankako. Muya ooyu ulakakwabilila kuti maanzi aatontola kaatasiki cacigaminina kucikanda cankako kutegwa katamvwi mpeyo.

Basayaansi basyoma kuti kuli ciiyo cikonzya kuyiigwa kuzwa kuboya bwakanyama aaka. Bakasola kupanga zijansi ziindene-indene zijisi boya, zimwi zijisi boya bulamfwu naa bufwaafwi, businsinkene naa butanteene. Basikuvwuntauzya bakajana kuti “ikuti boya kabuli bulemu-lemu alimwi akuti kabuli bulamfwu, bulamuka kuteta naa bupa kuti maanzi atanjili.” Munzila imwi, tunyama ootu tulalisumpula akaambo kaboya mbotujisi ibutugwasya kapati.

Basikuvwuntauzya bajisi bulangizi bwakuti ibuvwuntauzi bwabo buyoopa kuti kube kuyaambele mukupanga zisani zitakonzyi kunjilwa maanzi. Eeci cilakonzya kupa bamwi kuyeeya kuti basikuyamba mumaanzi aatontola inga cabota kuti kabasama zisani zijisi boya businsinkene—oobo bukonzyenye abwakanyama kategwa sea otter!

Ino muyeeya buti? Sena boya bwakanyama kategwa sea otter ibukagwasya kuti kakakasaalilwa bwakasanduka buya naa bwakalengwa buya?