Sena basayaansi balakonzya kupandulula bubumbo alimwi abuumi mbozyakatalika? Peepe. Bamwi baamba kuti basayaansi ibaiya kujatikizya bubumbo balakonzya kupandulula mbobwakatalika bubumbo. Nokuba boobo, syaazibwene mumakani aazyamujulu waku Dartmouth College Marcelo Gleiser, walo uudooneka naa Leza nkwali, wakaamba kuti: “Kunyina notwakapandulula matalikilo aabubumbo.”

Mbubwenya buyo, kujatikizya mbobwakatalika buumi, cibalo cili mumagazini ya Science News caamba kuti: “Cilakonzya kukatazya kuzyiba bwini buumi mbobwakatalika a Nyika: Bunji bwamalembe aakaindi aamba kujatikizya mazuba aakumatalikilo kwa Nyika akaloba kaindi.” Kuzwa kumajwi aaya, tulakonzya kubona kuti basayaansi tabana kuwiingula mubuzyo wakuti, Ino bubumbo alimwi abuumi zyakatalika buti?

Pele mulakonzya kulibuzya kuti, ‘Ikuti naa zintu zipona anyika zyakalengwa buya, ino nguni wakazilenga ma?’ Alimwi andiza mwakalibuzya kale mibuzyo eeyi iitobela: ‘Ikuti naa kuli Mulengi musongo alimwi siluyando, nkaambo nzi ncazumizya kuti bantu mbaakalenga kabapenga? Nkaambo nzi ncokuli zikombelo zinji boobu? Nkaambo nzi ncazumizya baabo balyaamba kuti mbakombi bakwe kucita zintu zibi?’

Basayaansi tabakonzyi kuyiingula mibuzyo eeyi. Pele eeci tacaambi kuti tamukonzyi kubujana bwiinguzi. Alimwi buya, bantu banji babujana bwiinguzi bwamibuzyo eeyi mu Bbaibbele.

Ikuti kamuyanda kuzyiba kaambo basayaansi bamwi ibakayiya Bbaibbele ncobakatalika kusyoma kuti kuli Mulengi, amuunke awebbusaiti ya jw.org. Amuyandaule mutwe wamakani wakuti “nzyobaamba bamwi kujatikizya mbobwakatalika buumi.”