Sena bubumbo bwaliko lyoonse?

Lugwalo lwa Matalikilo 1:1 lwaamba kuti: “Kumatalikilo, Leza wakalenga julu anyika.”

Kaitanasika myaka yakuma 1950, basayaansi banji ibalaampuwo bakali kusyoma kuti bubumbo bwaliko lyoonse. Pele akaambo kazintu zinji nzyobakajana caino-ino, basayaansi lino balazumina kuti mubwini, bubumbo bulijisi matalikilo.

Ino nyika yakali kulibonya buti kumatalikilo?

Lugwalo lwa Matalikilo 1:2, 9 lwaamba kuti ciindi nyika noyakalengwa “yakanyina cintu cili coonse alimwi yakalipilingene,” yakazwide maanzi.

Basayaansi balabuzuminizya bupanduluzi oobu. Syaazibwene mumakani aasayaansi wazina lya Patrick Shih wakaamba kuti nyika yakatalika “kaitajisi muuya wakuyoya wa oxygen . . . yoonse kailibonya yiimbi-imbi buyo.” Magazini iitegwa Astronomy yakaamba kuti: “Buvwuntauzi bupya bwaamba kuti Nyika yakaindi yakazwide buyo maanzi alimwi kunyina nyika njumu iyakali kulibonya.”

 Ino mulengalenga wesu wakacinca buti mukuya kwaciindi?

Lugwalo lwa Matalikilo 1:3-5 lutondezya kuti kumatalikilo mulengalenga wakali mulemu cakuti mumuni tiiwakali kukonzya kusika anyika. Mukuya kwaciindi, ndendilyo zuba alimwi amwezi nozyakatalika anyika.—Matalikilo 1:14-18.

Ba Smithsonian Environmental Research Center bakaamba kuti kumatalikilo mulengalenga wesu wakali kusisya buyo mumuni musyoonto kapati munyika. Alimwi bakaamba kuti: “Nyika yoonse yakazwide muya uutegwa methane calo icakali kupa kuti kakutalibonyi kabotu.” Mukuya kwaciindi, muya ooyu wakamana, mpoonya julu lyakacinca akuba bbulu.”

Ino mbuti zintu zipona mbozyakatobelana kuba anyika?

Lugwalo lwa Matalikilo 1:20-27 lwaamba kuti kwakalengwa nswi, bayuni, banyama baanyika, mpoonya kumamanino kwakalengwa bantu. Basayaansi basyoma kuti nswi zyakaba ciindi cilamfwu kakutanaba banyama bakusaanguna alimwi akuti kwakainda ciindi cilamfwu kapati kuti kulengwe bantu.

Bantu bamwi baamba kuti nzyolyaamba Bbaibbele ziliindene anzyobakajana basayaansi. Nokuba boobo, nzyobaamba kanji-kanji ziyeeme akutamvwisya cini Bbaibbele ncolyaamba.

Bbaibbele talyaambi kuti bubumbo naa nyika zyaliko kwamyaka iili 6,000 buyo. Muciindi caboobo, lyaamba buyo kuti nyika alimwi abubumbo zyakalengwa, “kumatalikilo.” (Matalikilo1:1) Bbaibbele talyaambi cacigaminina naa eeco cali ciindi cilamfwu buti.

Bbaibbele talyaambi kuti zintu zyoonse zipona anyika zyakalengwa mumazuba aali cisambomwe aajisi mawoola aali 24. Muciindi caboobo, libelesya bbala lyakuti “buzuba” kwaamba ciindi cili mbocibede. Mucikozyanyo, lyaamba kuti kulengwa kwanyika azintu zipona izili mumo, ‘mumazuba’ aali cisambomwe aakulenga aambidwe mucaandaano 1 cabbuku lya Matalikilo, zyakacitika mubulamfwu bwaciindi ciitwa kuti “mubuzuba oobo Jehova * Leza naakalenga julu anyika.” (Matalikilo 2:4) Aboobo “mazuba” aali cisambomwe aakulenga amwi aamwi iciindi Leza naakabamba nyika kuti kaikkalwa zintu zipona alimwi akuzilenga alakonzya kwaamba ciindi cilamfwu kapati.

Bbaibbele talyaambi kuti zintu zipona tazikonzyi kucinca mbozipangidwe mukuyakwaciindi. Bbuku lya Matalikilo lyaamba kuti banyama bakalengwa “kweelana amisyobo yabo.” (Matalikilo 1:24, 25) Bbala ilibelesyedwe mu Bbaibbele lyakuti “misyobo” talili bbala lyasayaansi pe, pele kulibonya kuti lyaamba zintu zyuumi ziindene-indene. Aboobo bbala lyakuti “musyobo,” lilakonzya kubikkilizya misyobo minji yiindene-indene. Kubelesya bbala eeli kupa kuti ceelele kulangila kuti ‘mumusyobo’ omwe, kulakonzya kuba kucinca mukuya kwaciindi akuzwa zilenge zipona zyamisyobo yiindene-indene zyalo izyakali kukkala mubusena bomwe.

 Muyeeya buti?

Kweelana ambotwabona atala aawa, Bbaibbele lilapandulula munzila nguba-uba alimwi iiluzi mbobwakatalika bubumbo, nyika mboyakali kulibonya kumatalikilo, alimwi abuumi mbobwakatalika. Sena Bbaibbele alimwi lilaamba munzila iiluzi Ooyo iwakalenga zintu eezyi? Bbuku litegwa Encyclopædia Britannica lyaamba kuti: “Muzeezo wakuti buumi bwakatalika akaambo kanguzu ziinda zyabantu uleendelana ancobajana basayaansi bamazuba aano.” *