Kanji-kanji banabukwetene balajana buyumuyumu kapati ciindi bana babo nobakomena akuzwa aŋanda. Ciindi nokutakwe bana aŋanda, cilakonzya kubapa kulimvwa mbuli kuti tabazyibene kabotu. Ba M. Gary Neuman, basyaazibwene mumakani aamukwasyi bakalemba kuti: “Ndilabagwasya bantu banji batazyi mbobakonzya kubukulusya luyando lwabo amuntu ngobakwetene limwi. Lino mbwaanga bana bakakomena akuzwa aŋanda, [bazyali] tabacijisi zintu zinji zyakubandika.” *

Sena icaambwa atala aawa ncecicitika mucikwati canu? Ikuti kacili boobo, mulakonzya kulubukulusya alimwi luyando lwanu. Pele cakusaanguna, amubone zintu zimwi zilangilwa kuti nzyezyakapa kuti luyando lwanu amuntu ngomukwetene limwi luceye.

Kwamyaka minji, bana mbobakali kubikkilwa maano kapati. Kabajisi makanze mabotu, bazyali banji babikkila maano kapati kuzintu nzyobayandika bana babo kwiinda zintu ziyandika mucikwati cabo. Akaambo kaceeci, babikkila kapati maano kumukuli wabo wakuba bazyali cakuti luyando ndobajisi akati kabo mbuli mulumi amukaintu lulamana—calo cikonzya kulibonya kwaambisya kuti bana bazwa aŋanda. Mukaintu uujisi myaka iili 59 wakaamba kuti: “Ciindi bana nobakacili aŋanda, twakali kucitila antoomwe zintu mbuli mukwasyi. Pele ciindi nobakakomena akuzwa aŋanda, twakaliindene muzintu nzyotwakali kubikkila maano kapati.” Mane bumwi buzuba mukaintu wakaambila mulumaakwe kuti, “Mebo andinywe tatucilyatani pe.”

Banabukwetene bamwi tabalibambilide kucinca kweelana abukkale oobu bupya. Bbuku litegwa Empty Nesting lyakaamba kuti: “Kubanabukwetene banji, ciindi bana bakomena akuzwa aŋanda, inga ciba mbuli kuti nobazwa akukwatana nkaambo inga kuli zintu zinji nzyobatazyi kujatikizya muntu ngobakwetene limwi.” Akaambo kakulimvwa kuti tabaceendelani muzintu, bamalumi abamakaintu banji basala kulicitila buyo aumwi nzyayanda, akuba mbuli kuti mbantu bakkala buyo muŋanda yomwe kutali banabukwetene.

Makani aakkomanisya ngakuti, mulakonzya kukeeleba kakole aaka—mane buya akujana lukkomano kapati akaambo kakucinca ooku kupya mubuumi bwanu. Bbaibbele lilakonzya kumugwasya mumakani aaya. Atubone mbolikonzya kumugwasya.

Amukuzumine kucinca kwabukkale. Kujatikizya bana bakakomena, Bbaibbele lyaamba kuti: “Mwaalumi uyoosiya bausyi abanyina.” (Matalikilo 2:24) Mbuli bazyali, mukuli wanu wakali wakuyiisya bana banu kujatikizya ciindi eeco, ikubagwasya kuba aluzyibo iluyoobagwasya baakukomena. Kwaalanga munzila iili boobu makani aaya, ncintu cikonzya kumuletela lukkomano ciindi bana banu nobazwa aŋanda.—Njiisyo yamu Bbaibbele: Marko 10:7.

Bwini mbwakuti, lyoonse munooli bazyali kubana banu. Pele lino muli mbuli basikupa lugwasyo kutali basikubeendelezya pe. Bukkale oobu bupya bumupa coolwe cakuzumanana kuba acilongwe ciyumu abana banu pele akubikkila maano kapati kumuntu ngomukwetene limwi. *—Njiisyo yamu Bbaibbele: Matayo 19:6.

Amwaambilane zintu zimupa kulibilika. Amumwaambile muntu ngomukwetene limwi kujatikizya mbomulimvwa akaambo kakucinca ooku, alimwi kamulibambilide kuswiilila mbwalimvwa awalo ngomukwetene limwi. Amumukkazikile moyo alimwi akumumvwisya. Ambweni cilakonzya kutola ciindi kuti mubukulusye luyando lwanu mbuli mulumi amukaintu, pele kucita boobo cilagwasya kapati.—Njiisyo yamu Bbaibbele: 1 Bakorinto 13:4.

Amujane zintu zipya zyakucitila antoomwe. Amubandike kujatikizya mbaakani nzyomuyanda kuzuzikizya antoomwe naa zintu nzyomuyanda kucita mbuli banabukwetene. Mbwaanga mwakakomezya bana, mulijisi luzyibo lunji lugwasya. Sena inga tiimwalubelesya kugwasya bamwi?—Njiisyo yamu Bbaibbele: Jobu 12:12.

Amubukulusye luyando lwanu. Amuyeeye bube ibwakamukwelelezya kuli umwi amweenzinyina. Mbuli banabukwetene, amuyeeye zintu zyakamucitikila mubuumi bwanu alimwi amapenzi ngomwakazunda. Kumamanino, kucinca ooku mubuumi bwanu kulakonzya kumukkomanisya kapati. Mubwini, kubelekela antoomwe lino kumupa coolwe cakuyumya cikwati canu alimwi akubukulusya luyando lwalo ilwakamupa kuti mukwatane.