Ikubelekelaamwi Amulindizi

“O Mwami, ndiliimvwi acilangilo cangu lyoonse ciindi casikati, amasiku oonse ndalindila angazi yangu.”—ISAYA 21:8.

1. Nkuuzilongezyo nzi zipati nkwacitila bumboni Jehova?

JEHOVA ngu Simakanze Mupati. Imungelo sikuzanga iwakaba Saatani Diabolosi kunyina ncanga wacita ikuti anyonyoone makanze aa Leza aakusalazya zina lyakwe mwini alimwi aakutalisya bweendelezi bwa Bwami bwakwe bwabulemu anyika yaparadaiso. (Matayo 6:9, 10) Mubweendelezi obo, ibantu bayoolongezyegwa munzila zyoonse. Leza ‘uyoolumenenena lufu mane kukabe kutamani. Mwami Jehova uyoosindula misozi kumasyu oonse.’ Ibantu bakkomene ibakamantene bayooba muluumuno abuvwubi mane kukabe kutamani. (Isaya 25:8; 65:17-25) Jehova mwini ngokamboni kuzisyomezyo ezi zitalikomeneni!

2. Mbaakamboni nzi bantunsi mbajisi Jehova?

² Pele alimwi Mulengi Mupati ulijisi bakamboni ibantunsi. Kuciindi kabutana Bunakristo, “makamu makamu . . . aabakamboni” kutalikila kuli Abelo bakatijaana mulubilo lwakuliyumya, kanjikanji mumapenzi mapati aaindene-indene. Izikozyanyo zyabo zibotu zilabakulwaizya Banakristo basyomeka sunu. Kristo Jesu ncikozyanyo ciinda kubota cakamboni sicamba. (Ba-Hebrayo 11:1–12:2) Mucikozyanyo, amuyeeye bumboni bwakwe bwamamanino mbwaakabandika kuli Ponto Pilato. Jesu wakati: “Ncendakazyalilwa, ncendakasikila ansi ano, kuti nkalungulule bwini.” (Johane 18:37) Kuzwa mu 33 C.E. kuzikusikila mumwaka uno wa 2000 C.E., Banakristo basungu bacitobela cikozyanyo ca Jesu alimwi bazumanana kupa bumboni akwaambilizya “milimo mipati ya-Leza” cabusungu.—Incito 2:11.

Ikuzanduka kwa Babuloni

3. Ino Saatani wabukazya buti bumboni ibwapegwa kujatikizya Jehova akuyanda kwakwe?

³ Kwazyuulu zyamyaka, Sinkondo mupati Saatani Diabolosi wayaambele calunya ikunyansya bumboni bwabakamboni ba Leza. Mbwaanga “ngowisi wababeja,” oyu “Simwaaba mupati . . . , muzoka waciindi, . . . nguuena bantu boonse baansi.” Wazumanana munkondo yakwe yakulwisya baabo “babamba milazyo ya-Leza,” ikapati mumazubaano aamamanino.—Johane 8:44; Ciyubunuzyo 12:9, 17.

4. Ino Babuloni Mupati wakatalika buti?

⁴ Kakwiindide myaka iitandila ku 4,000 kuzwa ciindi lyakacitika Zambangulwe lyakumazubaa Nowa, Saatani wakabusya Nimrodi “muvwimi singuzu kumeso aa-Jehova.” (Matalikilo 10:9, 10) Imunzi wa Nimrodi imupati kapati iwa Babuloni (Babele), wakaba mbobusena kwakali kucitilwa bukombi bwamadaimona boonse. Jehova naakanyonganya  mwaambo wabaabo ibakali kuyaka ngazi ya Babele, ibantu bakamwaikizyanya kuya mumasena aambi nyika yoonse mbwiizulwa alimwi bakatolelezya abukombi bwabo bwakubeja. Aboobo Babuloni wakaba munzi ikwakatalikila bulelo bwanyika yoonse bwabukombi bwakubeja, bwalo mubbuku lya Ciyubunuzyo ibwiitwa kuti Babuloni Mupati. Ibbuku elyo lisinsima lunyonyooko lwabweende bwabukombi obu bwansiku.—Ciyubunuzyo 17:5; 18:21.

Icisi ca Bakamboni

5. Mbantu nzi mbaakabunganya Jehova kuti babe bakamboni bakwe, pele ino nkaambo nzi ncaakabazumizya kuti batolwe buzike?

⁵ Nokwakainda myaka iitandila ku 500 kuzwa ciindi ca Nimrodi, Jehova wakabunganya baluzubo lwa Abrahamu musyomesi kuti babe cisi ca Israyeli ikutegwa kababeleka kabali bakamboni bakwe anyika. (Isaya 43:10, 12) Ibunji bwabantu aabo bamucisi eco bakabelekela Jehova cakusyomeka. Pele nokwakainda myaanda yamyaka, injiisyo zyakubeja zyamasi aakeengelede zyakasofwaazya cisi ca Israyeli, elyo bantu ba Jehova bacizuminano bakazanduka kuzwa kulinguwe akutalika kukomba baleza bakubeja. Aboobo mu 607 B.C.E., impi zyabasikalumamba bana Babuloni, izyakali kusololelwaa Mwami Nebukadinezara zyakanyonyoona Jerusalemu atempele lyawo akutola ibunji bwaba Juda mubuzike ku Babuloni.

6. Ino mulindizi wa Jehova wabusinsimi wakaambilizya makani mabotu nzi, alimwi ino akazuzikizigwa lili?

⁶ Takulikomeneni kaka kuzwidilila kwabukombi bwakubeja! Pele ikusumpuka kwa Babuloni kwakali kwakaindi kasyoonto buyo. Kakucisyeede myaka iitandila ku 200 kuti eco cicitike, Jehova wakalailila kuti: “Koya ukabike mulindizi, lino kufumbwa ncabona acaambe.” Ino mulindizi oyo wakajisi makani nzi aakwaambilizya? “Wawa! Wawa Babuloni! Zikozyanyo zyoonse zyamizimu yawo zyapwayigwa ansi.” (Isaya 21:6, 9) Aboobo cakacitika mbubwenya obo, mu 539 B.C.E. kwakazuzikizigwa kwaambilizya kwabusinsimi obu. Babuloni Singuzu wakawa elyo bantu ba Leza bacizuminano bakapilukila kumunzi wabo ndilyonya.

7. (a) Ncinzi ncobakaiya ba Juda nobakasubulwaa Jehova? (b) Muutooye tulibuti mobakacegwa ba Juda bansiku, alimwi ino ncinzi cakacitika?

⁷ Iba Juda basikupiluka bakasubuka cakuti bakalekela limwi kukomba mituni akujatikizigwa mubukombi bwamizimu. Pele mukuya kwamyaka, bakacegwa mutooye tumbi. Ibamwi bakacegwaa busongo bwaba Giliki. Ibamwi bakasumpula zilengwa zyabantu kwiinda Jwi lya Leza. Alimwi ibambi bakeenwa kwiinda mukusumpula zilengwa zyacisi cabo. (Marko 7:13; Incito 5:37) Kuzikusika kuciindi Jesu nakazyalwa, icisi cakali bufwutatilide alimwi ibukombi busalala. Nokuba kuti iba Juda bamwi bakaakkomanina makani mabotu aakakananwaa Jesu, icisi coonse mbocizulwa cakamukaka, aboobo awalo Leza wakacikaka. (Johane 1:9-12; Incito 2:36) Ibana Israyeli tiibakacili bakamboni ba Leza elyo mumwaka wa 70 C.E., Jerusalemu atempele lyakwe zyakanyonyoonwa lwabili ampi yaba Roma.—Matayo 21:43.

8. Mbaani ibakaba bakamboni ba Jehova, alimwi nkaambo nzi kucenjezya kwa Paulo kubumboni obu ncokwakali kwaaciindi ceelede?

⁸ Aciindi eco, “ba-Israyeli ba-Leza” Banakristo bakalizyedwe kale, elyo aba ono mbabakabeleka kabali bakamboni ba Leza kuli bamasi. (Ba-Galatiya 6:16) Ndilyonya Saatani wakakanza kusofwaazya cisi eci cipya cakumuuya. Kuzikusika kumamanino aamwaanda wamyaka wakusaanguna, imuuya wakuzanduka wakalibonya mumbungano. (Ciyubunuzyo 2:6, 14, 20) Ikucenjezya kwa Paulo kwakali kwaaciindi ceelede ikwakuti: “Amucenjele kuti kutabi muntu naba omwe uumuyunga kukusongwaalasongwaala akukwaamba makani aatawo aazwa kutunsiyansiya twabantu, aazwa kuzilenge zitaanzi zyaansi, aatazwi kuli-Kristo pe.”—Ba-Kolose 2:8.

9. Ikweelana ambwaakacenjezya Paulo, nzintu nzi zyakacitika izyakapa kuti Kristendomu italike?

⁹ Mpoonya ibusongo bwaba Giliki, imizeezo yabukombi buna Babuloni alimwi “[a]busongo” bwabantu mbuli njiisyo yakusanduka alimwi akuzumbauzya Bbaibbele izyakazyooboola kumbele zyakasofwaazya bukombi bwabantu banji ibakali kulyaamba kuti Mbanakristo. Cakali buyo mbubwenya Paulo mbwaakasinsimide kuti: “Ndilizi kuti, munsi lyakwiinka kwangu, kulanjila akati kanu baumpe babutambo, tabakoobuleka butanga. Alimwi akati kanu nobeni bayoobuka bantu abaamba zintu zyakulengawida kuti balikwelele basikwiiya.” (Incito 20:29, 30) Akaambo kaluleyo olu, Kristendomu yakatalika.

10. Nzintu nzi zyakacitika izyakatondezya bumboni bwakuti tabali bantu boonse ibakajatikizidwe mubukombi busofweede ibwakali kucitwa mu Kristendomu?

¹⁰ Aabo ibakayeeme ncobeni kubukombi  busalala bakeelede ‘kulwanina lusyomo ndobakapegwa basalali lomwe lwalyoonse.’ (Juda 3) Sena cisinizyo cijatikizya bukombi busalala alimwi a Jehova cakali kuyooide kumana anyika? Peepe. Iciindi nocakaswena cakunyonyoonwa kwa Saatani sikuzanga antoomwe amilimo yakwe yoonse, cakalibonya caantangalala kuti tabali boonse bantu ibakajatikizidwe mubukombi bwaluleyo ibwakali kucitwa mu Kristendomu. Kumamanino aamwaanda wamyaka wa 19, ku Pittsburgh, Pennsylvania, ku U.S.A., ikakamu kabasikwiiya Bbaibbele basyomeka kakabambwa alimwi kakaba musemu waciinga cabakamboni ba Leza bamazubaano. Ibanakristo aba bakabikkila maanu kapati kubumboni bwamu Magwalo bwakuti imamanino aabweende obu bwazintu akali afwaafwi. Ikweelana abusinsimi bwa Bbaibbele, “mamanino” aanyika eyi akatalika mu 1914, alimwi akatalisigwaa nkondo yanyika yakusaanguna. (Matayo 24:3, 7) Kuli bumboni businizide bwakuti Saatani amakamu-makamu aakwe aamadaimona bakatandwa kuzwa kujulu mumwaka oyo. Imwaanda wamyaka wa 20 uuzwide mapenzi waisinizya caantangalala imilimo ya Saatani alimwi akuzuzikizigwa kupati kwacitondezyo cakubako kwa Jesu mubweendelezi bwa Bwami bwakujulu.—Matayo caandaano 24 alimwi a 25; Marko caandaano 13; Luka caandaano 21; Ciyubunuzyo 12:10, 12.

11. Ncinzi ncaakasoleka kucita Saatani, pele ino kusoleka kwakwe kwakakakilwa buti?

¹¹ Mu June 1918, Saatani wakasoleka calunya ikubanyonyweeda limwi basikwiiya Bbaibbele abo balo kuciindi eco ibakali kukambauka muzisi zili mbozibede. Alimwi wakasola kunyonyoona cibeela camumulawo ica Watch Tower Bible and Tract Society. Ibeendelezi iba Sosaiti bakaangwa, bakabejelezyegwa kuti bakali kuyanda kubukila mfwulumende mbubwenya mbuli bwakatamikizigwa Jesu mumwaanda wamyaka wakusaanguna. (Luka 23:2) Pele mu 1919 ibeendelezi abo bakaangununwa calo cakapa kuti bazumanane mumulimo wabo. Kumbele bakajanwa kuti bakanyina mulandu uuli woonse.

“Mulindizi” Uupakamene

12. Mbaani sunu ibabamba ciinga ca Jehova “[ca]mulindizi,” alimwi ino nciimo nzi ncobalaaco?

¹² Aboobo nocatalika ‘ciindi cakumamanino,’ Jehova wakabaa mulindizi alimwi walo iwakali kucenjezya bantu makani aazintu izijatikizya kuzuzikizigwa kwamakanze aakwe. (Daniele 12:4; 2 Timoteo 3:1) Kuzikusika sunu, iciinga eco camulindizi—Banakristo bananike, iba Israyeli ba Leza—bali kubeleka kweelana abupanduluzi bwa Isaya bwamulindilizi wabusinsimi ibwakuti: “Uleelede kuswiililisya amatwi oonse obile. Lino wakaita mbuli mulavu, wati, O Mwami, ndiliimvwi acilangilo cangu lyoonse ciindi casikati, amasiku oonse ndalindila angazi yangu.” (Isaya 21:7, 8) Oyu mmulindizi uuwubikkilide maanu kapati kaka imulimo wakwe!

13. (a) Mmulumbe nzi ngwaambilizya mulindizi wa Jehova? (b) Nkaambo nzi ncokunga kwaambilwa kuti Babuloni Mupati wawa?

¹³ Ino ncinzi ncaakabona mulindizi oyu? Alimwi imulindizi wa Jehova, iciinga cakwe cabakamboni cakaambilizya kuti: “Wawa! Wawa Babuloni! Zikozyanyo zyoonse zyamizimu yawo zyapwayigwa ansi [a Jehova].” (Isaya 21:9) Lino kuzwa lya Nkondo Yanyika Yakusaanguna, ngu Babuloni Mupati, ibulelo bwanyika yoonse bwabukombi bwakubeja uuwisigwa kuzwa acuuno cakwe cabulemu cabweendelezi. (Jeremiya 50:1-3; Ciyubunuzyo 14:8) Anu ncocitagambyi pe ikuti Nkondo Mpati, ikweelana ambuyakali kwiitwa ciindi eco, yakatalikila mu Kristendomu mwalo ibasololi bacikombelo bazwa kumbazu zyoonse zyobile zizwangana mobakali kukulwaizya bakubusi kuti baunke kunkondo! Elo cilausisya kaka eci! Mu 1919, Babuloni Mupati taakacili kukonzya kukasya Basikwiiya Bbaibbele (ikweelana ambobakali kwiitwa Bakamboni ba Jehova ciindi eco) ikuzwa kuciimo cakubula milimo akujata bubi kumulimo wakukambauka nyika yoonse mbwiizulwa walo uucicitwa asunu. (Matayo 24:14) Eco cakatondezya kuti kuwa kwa Babuloni Mupati kwakaliswenede kale, mbubwenya buyo ikwaangululwa kwa Israyeli mumwaanda wamyaka wa 6 B.C.E. mbokwakatondezya kuti kuwa kwa Babuloni wansiku kwakali afwaafwi.

14. Nimagazini nzi yabelesyegwa kapati aciinga ca Jehova camulindizi, alimwi ino Jehova wakulongezya buti kubelesyegwa kwayo?

¹⁴ Iciinga camulindizi cali kuubeleka cabusungu mulimo waco lyoonse alimwi cali kuyandisisya kucita zintu ziluleme. Mu July 1879, Basikwiiya Bbaibbele bakatalika kumwaya magazini eyi, yalo ciindi eco iyakali kwiitwa kuti Zion’s Watch Tower and Herald of Christ’s Presence. Imagazini yomwe-yomwe ikuzwa mu 1879 kusikila mu December 15,  1938, atala yakajisi majwi aakuti “‘Mulindizi, Kwaambwanzi ano Masiku?’—Isaya 21:11.” * Cakusyomeka, kwamyaka iili 120 Ngazi Yamulindizi ili pakamene kuzintu zicitika munyika alimwi ancozyaamba kujatikizya businsimi. (2 Timoteo 3:1-5, 13) Iciinga ca Leza camulindizi antoomwe abeenzinyina iba “mbelele zimwi” baibelesya kapati magazini eyi mukwaambilizya cabusungu kubantu boonse kuti ikuzibisigwa kwabulelo bwa Jehova kwiinda mu Bwami bwa Kristo kulaafwaafwi. (Johane 10:16) Sena magazini eyi ya Ngazi Yamulindizi wailongezya Jehova? Atwaambe kuti, ikuzwa kumamagazini aakusaanguna aakasimbwa aali 6,000 mu 1879, Ngazi Yamulindizi yazumanana kumwaigwa nyika yoonse mbwiizulwa kusikila kumweelwe wiinda ku 22,000,000 mumyaambo iili 132—imyaambo iili 121 yamweelwe oyu imwailwa aciindi comwe a Cingisi. Cileelela kaka kuti imagazini yabukombi iimwaigwa kwiinda woonse munyika njiisumpula izina lya Leza wakasimpe, Jehova!

Ikusalazyigwa Ikucitwa Bucebuce

15. Nkusalazya nzi ikwakatalikwa kucitwa bucebuce kautanasika mwaka wa 1914?

¹⁵ Mumyaka iili 40 mane kuzoosika ciindi naakatalika kulela Kristo kujulu mu 1914, Basikwiiya Bbaibbele bakalaangulwidwe kunjiisyo zinji ziteendelani a Bbaibbele izya Kristendomu mbuli zeezyo zijatikizya kubbapatizya bavwanda, ikuzumanana kwabuumi muntu afwa, purigatoriyo, icisubulo camumulilo wahelo alimwi a Leza Wabutatu. Pele cakatola ciindi kuti mizeezo yoonse iitaluzi igwisilwe limwi. Mucikozyanyo, muma 1920 Basikwiiya Bbaibbele ibanji bakali kusama bbaaji yalubulo iyakajisi zikozyanyo zyaciingano amusyini wabwami alimwi bakali kusekelela Kkilisimasi amazuba aakunyika aakulyookezya aambi. Pele, ikutegwa bukombi kabusalala, izintu zyoonse zijatikizya bukombi bwamituni zyeelede kunyonyoonwa. Ijwi lya Leza, Bbaibbele Lisalala lyeelede kuba ngomusemu aayeeme lusyomo abukkale bwa Munakristo. (Isaya 8:19, 20; Ba-Roma 15:4) Nkulubizya kapati ikuyungizya cintu cimwi ku Jwi lya Leza naa ikugusya cintu cimwi mulindilyo.—Deuteronomo 4:2; Ciyubunuzyo 22:18, 19.

16, 17. Mmuzeezo nzi uutaluzi ngubakali kusyoma baciinga camulindizi kwamakumi aamyaka aali mbwaabede? (b) Ino mbupanduluzi nzi ibuluzi ibujatikizya “cipaililo” alimwi a “musemu” mu “Egepita”?

¹⁶ Icikozyanyo comwe cilakankaizya mboiyandika njiisyo eyi. Mu 1886, C.T. Russell naakamwaya bbuku ilyakazikwiitwa kuti The Divine Plan of the Ages, ivolyumu eli lyakajisi ccaati yakali kuswaanganya mazyalani aabantu ku Great Pyramid yaku Egepita. Kwakali kuyeeyegwa kuti eci ciibalusyo ca Farao Khufu cakali ngomusemu iwakali kwaambwa kuli Isaya 19:19, 20 kuti: “Mubuzuba obo kuyooba cipaililo ca-Jehova mukati kanyika ya-Egepita, akwalo kumugaano wayo kuyooyakilwa Jehova musemu. Ciyoobeda Jehova wamakamu citondezyo abukamboni mucisi ca-Egepita.” Ino musemu oyo inga waswaangana buti a Bbaibbele? Mucikozyanyo, ikulampa kwamyaakwe imwi yiindwa mu Great Pyramid kwakali kuyeeyelwa kuti kutondezya ciindi cakutalika kwa “mapenzi mapati” aalembedwe kuli Matayo 24:21 ikweelana ambocakali kuteelelwa ciindi eco. Basikwiiya Bbaibbele bamwi bakabikkila maanu kapati kukweeleka mbazu zisiyene-siyene zyamusemu oyo kutegwa bazibe makani aajatikizya buzuba nobakali kunooinka kujulu!

¹⁷ Oyu musemu iwakali kwiitwa kuti Bbaibbele Mubbwe wakali kulemekwa kapati kwamakumi aamyaka aali mbwaabede kuzikusikila ciindi mamagazini aa Ngazi Yamulindizi aamu November 15 a December 1, 1928 naakasalazya kuti Jehova tanaakali kuyandika musemu wabbwe iwakayakwa aaba Farao ibatakali kumukomba alimwi iwakajisi zimpangaliko zyamizimu zyakubala nyenyeenzi ikutegwa kusinizigwe bumboni ibuli mu Bbaibbele. Muciindi caboobo, ibusinsimi bwa Isaya bwakabonwa kuti  kuli ncobwakali kwiiminina munzila yakumuuya. Mbubwenya mbuli mbokwaambwa ku Ciyubunuzyo 11:8, “Egepita” yiiminina nyika ya Saatani. “Cipaililo ca-Jehova” cituyeezya zituuzyo izitambulwa a Jehova izituulwaa Banakristo bananike nobacili munyika ino kwakaindi kasyoonto buyo. (Ba-Roma 12:1; Ba-Hebrayo 13:15, 16) Imusemu “kumugaano [wa Egepita]” waamba mbungano ya Banakristo bananike, yalo iili “ngomusemu, alimwi ncecisiko calusinizyo” alimwi ipa bukamboni kucisi ca “Egepita,” inyika njobayaandoosiya.—1 Timoteo 3:15.

18. (a) Mbuti Jehova mbwaazumanana kusalazya twaambo kuli basikwiiya Bbaibbele ibasyomeka? (b) Ikuti naa Munakristo camuyumina kuteelela bupanduluzi bwa Magwalo bumwi, nciimo nzi ncayelede kubaancico?

¹⁸ Imyaka mboiya bukwelana, Jehova wazumanana ikutusalazyila kasimpe, kubikkilizyaa kuteelelesya jwi lyakwe lyabusinsimi. (Tusimpi 4:18) Mumyaka yalino-lino, twakulwaizigwa kubikkila maanu kapati kumakani aajatikizya izyalani litakooyoonyonyoonwa mamanino kaatanasika, icikozyanyo cambelele ampongo, cisesemyo alimwi anociyooima mubusena busalala, cizuminano cipya, ikusanduka kwa Jesu alimwi atempele lyamucilengaano cakubbuku lya Ezekieli. Zimwi ziindi inga cakatazya kuteelela bupanduluzi bucinculwidwe boobo, pele mukuya kwaciindi tulasalazigwa twaambo itupa kuti kucitwe boobo. Ikuti Munakristo tanaabuteelelesya bupanduluzi bwalugwalo lumwi, inga wacita kabotu kutobela majwi aamusinsimi Mika aakuti: “Njoolindila Leza walufutuko lwangu.”—Mika 7:7.

19. Mbuti bananike basyeede antoomwe abeenzinyina bambelele zimwi mbobatondezya busicamba buli mbuli bwamulavu mumazubaano aakumamanino?

¹⁹ Amuyeeye kuti mulindizi “wakaita mbuli mulavu, wati, O Mwami, ndiliimvwi acilangilo cangu lyoonse ciindi casikati, amasiku oonse ndalindila angazi yangu.” (Isaya 21:8) Bananike basyeede batondezya busicamba buli mbuli bwamulavu mukuyubununa bukombi bwakubeja alimwi akutondezya bantu inzila iitola kubulubusi. (Ciyubunuzyo 18:2-5) Mbobali “[m]muzike musyomesi uucenjede,” bamwaya ma Bbbaibbele, mamagazini alimwi  amabbuku aambi mumyaambo minjaanji—“zilyo . . . kuciindi ceelede.” (Matayo 24:45) Mbabali kumbele mukubungika “inkamu impati yabantu . . . bazwa kuzisi zyoonse akumikowa yoonse akumisyobo yoonse akumyaambo yoonse.” Aba abalo balasalazigwa mubulowa bwa Jesu bwacituuzyo alimwi balalitondezya kuti bajisi myoyo ili mbuli yamulavu ‘nobamanina Leza milimo isikati amasiku.’ (Ciyubunuzyo 7:9, 14, 15) Ino mmicelo nzi iyazyalwaa kakamu kasyoonto ka Bakamboni ba Jehova bananike abeenzinyina, ibankamu mpati mumwaka oyu wainda? Cibalo citobela cilatwaambila.

Bupanduluzi buyungizidwe

Sena Mulayeeya?

• Mbaakamboni nzi Jehova mbaabusya mukuya kwamyaka?

• Ino Babuloni Mupati wakatalika buti?

• Nkaambo nzi Jehova ncaakazumizya Jerusalemu, imunzi mupati wacisi cakwe cabakamboni kuti unyonyoonwe mu 607 B.C.E.? mu 70 C.E.?

• Mmuuya nzi ngocatondezya ciinga ca Jehova camulindizi abeenzinyina?

[Mibuzyo yaciiyo]

[Zifwanikiso izili apeeji 22]

Ibaciinga ca Jehova camulindizi balaubikkila maanu kapati mulimo wabo