Amulisyome Jwi lya Leza Lyabusinsimi!
Amulisyome Jwi lya Leza Lyabusinsimi!
“Twakasimpikizigwa lusinizyo lwamajwi aabasinsimi.”—2 PETRO 1:19.
1, 2. Mbusinsimi nzi bwakasaangunwa kulembwa, alimwi ino mmubuzyo nzi iwakabuka?
KULI Jehova mwini Nkukwakazwide businsimi bwakasaanguna kulembwa. Ba Adamu a Eva nobakabisya, Leza wakaambila nzoka kuti: “Njoobusya inkondo akati kanduwe amwanakazi, akati kalunyungu lwako alunyungu lwakwe. Walo uyookuuma amutwe, ayebo uyoomuluma kukasinde.” (Matalikilo 3:1-7, 14, 15) Kwakali kuzyooinda myaanda yamyaka imajwi aayo aabusinsimi kaatana kuteelelwa kabotu.
2 Obo businsimi bwakusaanguna bwakajisi bulangizi bwini-bwini kubantu basizibi. Kumbele Magwalo akazikutondezya kuti Saatani Diabolosi ngo “muzoka waciindi.” (Ciyubunuzyo 12:9) Pele ino nguni wakali kuzyooba Lunyungu lwa Leza lwakasyomezyegwa?
Ikuyandaula Lunyungu
3. Ino Abelo wakabusyoma buti businsimi bwakusaanguna?
3 Mukwiimpanaa wisi, Abelo munaleza wakabusyoma businsimi bwakusaanguna. Kulangilwa kuti Abelo wakalizyi kuti kwakali kuyandika kuti kutilwe bulowa kutegwa zibi zilekelelwe. Aboobo ndusyomo lwakamukulwaizya kutuula cituuzyo camunyama ncaakakkomanina Leza. (Matalikilo 4:2-4) Pele, Lunyungu lwakasyomezyegwa akali maseseke kwaciindi cili mbocibede.
4. Ncisyomezyo nzi Leza ncaakapa Abrahamu, alimwi ino cakali kwaamba nzi kujatikizya Lunyungu lwakasyomezegwa?
4 Kakwiindide myaka iitandila ku 2,000 kuzwa kuciindi ca Abelo, Jehova wakapa syaanene Abrahamu icisyomezyo eci cabusinsimi: “Ncobeni ncookupa coolwe loko, akuvuzya njoovuzya lunyungu lwako mbuli inyenyeezi zyakujulu . . . Mulunyungu lwako zisi zyoonse zyaansi moziyoojana coolwe.” (Matalikilo 22:17, 18) Imajwi aayo akatondezya kuti Abrahamu kuli mbwaswaangene akuzuzikizigwa kwabusinsimi bwakusaanguna. Akatondezya kuti Lunyungu oolo lwakali kuzoonyonyoona milimo ya Saatani lwakali kuzoolibonya muzyalani lya Abrahamu. (1 Johane 3:8) “[Abrahamu] teewakadooneka kucisyomezyo ca-Leza kukutasyoma pe,” alimwi nobaba bakamboni ba Jehova bakaliko kabutana Bunakristo kunyina nobakazungaana aabo ‘ibatakajana icakasyomezegwa.’ (Ba-Roma 4:20, 21; Ba-Hebrayo 11:39) Muciindi caboobo, bakazumanana kusyoma jwi lya Leza lyabusinsimi.
5. Ino muulini cisyomezyo ca Leza ca Lunyungu mocakazuzikizigwa, alimwi ino nkaambo nzi ncomwiingula boobo?
5 Imwaapostolo Paulo wakaluzibya Lunyungu lwa Leza lwakasyomezyegwa naakalemba kuti: “Zisyomezyo zyakaambilwa Abrahamu ambuto yakwe. Tacaambwi kuti imbuto zyako, nkukuti zinji, caambwa kuti ‘imbuto yako,’ nkukuti yomwe, nkukuti Kristo.” (Ba-Galatiya 3:16) Imbuto oomo izisi mozyakali kuyoojana coolwe tiiyakali kujatikizya lunyungu lwa Abrahamu loonse. Ibaluzubo lwamwanaakwe Ismayeli alimwi ababana bakwe kuli Ketura kunyina nobakabelesegwa pe kulongezya bantu. Lunyungu lwacilongezyo lwakainda mumwanaakwe Izaka amumuzyukulu wakwe Jakobo. (Matalikilo 21:12; 25:23, 31-34; 27:18-29, 37; 28:14) Jakobo wakatondezya kuti “misyobo yabantu” yakali kuyoomumvwida Silo wamusyobo wa Juda, pele kumbele Lunyungu lwakazikwiinzyigwa buyo muzyalani lya Davida. (Matalikilo 49:10; 2 Samuele 7:12-16) Iba Juda bamumwaanda wamyaka wakusaanguna bakali kulangila kuti muntu omwe wakali kuzoosika kali Mesiya naa Kristo. (Johane 7:41, 42) Alimwi ibusinsimi bwa Leza ibwaamba Lunyungu bwakazuzikizigwa mu Mwanaakwe, Jesu Kristo.
Mesiya Walibonya!
6. (a) Ino businsimi bwamvwiki zili 70 tweelede kubuteelela buti? (b) Ndilili alimwi munzila nzi Jesu ‘mbwaakamanizya zibi’?
6 Musinsimi Daniele wakalemba businsimi bwabu Mesiya buyandika kapati. Mumwaka wakusaanguna wabweendelezi bwa Dariyo muna Medi, wakazyiba kuti myaka iili 70 yakunyonyoonwa kwa Jerusalemu yakali afwaafwi kumana. (Jeremiya 29:10; Daniele 9:1-4) Daniele naakacili kupaila, imungelo Gabriyeli wakamusikila akumuyubunwida makani aakuti ‘kwakabikkwa insondo zili makumi aali musanu aabili kubantu kuti zibi zimanisigwe.’ Mesiya wakali kuyoonyonyoonwa akati-kati kamvwiki yamamanino ya 70. ‘Mvwiki zyamyaka zili makumi aali ciloba’ zyakatalika mu 455 B.C.E. eelyo Mwami waku Persia, Aritasasta Wakusaanguna naakatuma mulomo kuti Jerusalemu ayakululwe. (Daniyeli 9:20-27; BT; Nehemiya 2:1-8) Mesiya wakali kuyoolibonya nokwakali kuzooinda mvwiki zili 7 alimwi azili 62. Eeyi imyaka iili 483 yakatalika kuzwa mu 455 B.C.E. kusikila mu 29 C.E., eelyo Jesu naakabbapatizigwa akunanikwa a Leza kuti abe Mesiya naa Kristo. (Luka 3:21, 22) Jesu ‘wakamanizya zibi’ kwiinda mukwaaba buumi bwakwe kuba cinunuzyo mu 33 C.E. (Marko 10:45) Tatuliboteli kaka twaambo otu kujatikizya ncotweelede kusyoma Jwi lya Leza lyabusinsimi! *
7. Kwiinda mukubelesya Magwalo, amwaambe makani aatondezya Jesu mbwaakazuzikizya businsimi bwabu Mesiya?
7 Ilusyomo mujwi lya Leza lyabusinsimi lutupa kuti tumuzyibe Mesiya. Akati kabusinsimi bunji bwabu Mesiya ibulembedwe mu Magwalo aa Cihebrayo, ibunji bwawo bwakalembwaa balembi ba Magwalo aa Bunakristo aa Cigiliki kabwaamba Jesu cacigaminina. Mucikozyanyo: Jesu wakazyalwa kuli nakalindu ku Betelehemu. (Isaya 7:14; Mika 5:2; Matayo 1:18-23; Luka 2:4-11) Wakaitwa kuzwa ku Egepita, alimwi ibana bavwanda bakajaigwa naakazyalwa. (Jeremiya 31:15; Hosea 11:1; Matayo 2:13-18) Jesu wakatola maciseesu. (Isaya 53:4; Matayo 8:16, 17) Mbubwenya mbokwakasinsimwa, wakanjila mumunzi wa Jerusalemu katantide amwana wambongolo. (Zekariya 9:9; Johane 12:12-15) Imajwi aasintembauzyo akazuzikizigwa Jesu naakabambulwa, eelyo basikalumamba nobakaabana zyakusama zyakwe akuwaala cisolo kujatikizya cisani cakwe camukati. (Intembauzyo 22:18; Johane 19:23, 24) Ikaambo kakuti zifwuwa zya Jesu tiizyakatyolwa alimwi akuti wakayaswa, akalo kakazuzikizya businsimi. (Intembauzyo 34:20; Zekariya 12:10; Johane 19:33-37) Eezi nzikozyanyo zisyoonto buyo zyabusinsimi bwabu Mesiya ibwakaambwaa balembi ba Bbaibbele ibakasololelwaa muuya wa Leza kuti bwakali kwaamba Jesu. *
Amutembaule Mwami Wabu Mesiya!
8. Ino Sinsiku nguni, alimwi ino businsimi bulembedwe kuli Daniele 7:9-14 bwakazuzikizigwa buti?
8 Mumwaka wakusaanguna wabweendelezi bwa Mwami Belisazara waku Babuloni, Jehova wakapa musinsimi wakwe Daniele ciloto azilengaano zilibedelede. Imusinsimi oyu lutaanzi wakabona zinyama zipati zyone. Imungelo wa Leza wakaamba kuti zyakali kwiiminina “bami bone,” elyo eci cakali kwaamba kuti bakali kwiiminina bami bakali kuyootobelana mubweendelezi bwanyika. (Daniele 7:1-8, 17) Mpoonya Daniele wakabona Jehova, “Sinsiku” kakkede acuuno cabwami cabulemu. Naakamana kubabeteka cabukali banyama aabo, wakabanyanzya bweendelezi akunyonyoona munyama wane. Aboobo bweendelezi butamani ‘kubantu bazisi zyoonse abamisyobo yoonse abamyaambo yoonse’ lino bwakapegwa kuli “umwi uuli mbuli mwana amuntu.” (Daniele 7:9-14) Tabuliboteli kaka businsimi obu ibujatikizya kubikkwaa cuuno cabweendelezi kwa “Mwana a-Muntu,” Jesu Kristo, kujulu mumwaka wa 1914!—Matayo 16:13.
9, 10. (a) Ino zibeela ziindene-indene zyacikozyanyo camuciloto zyakali kwaamba nzi? (b) Ino inga mwakupandulula buti kuzuzikizigwa kwabbuku lya Daniele 2:44?
9 Daniele wakalizi kuti Leza “ulagwisya bami, alimwi ulabusya bami.” (Daniele 2:21) Akaambo kalusyomo ndwaakajisi muli Jehova, “Oyo uuyubununa makani aasisidwe,” musinsimi wakayubununa ncocakali kwaamba ciloto ca Mwami wa Babuloni, Nebukadinezara eco cakali kujatikizya cikozyanyo cipati. Izibeela zyaco ziindene-indene zyakali kwaamba makani aakubuka akuwa kwabweendelezi bwanyika bwa Babuloni, Mediya a Persia, bwaba Giliki alimwi a Roma. Alimwi Leza wakabelesya Daniele kuti andandamike zintu zyakali kuyoocitika mane kuzoosika kuciindi cesu alimwi acakumbele.—Daniele 2:24-30.
10 Ibusinsimi bwakati: “Mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.” (Daniele 2:44) “Ciindi cabamasi” nocakamana mu 1914, Leza wakabikka bwami bwakujulu bweendelezegwaa Kristo. (Luka 21:24; Ciyubunuzyo 12:1-5) Kwiinda munguzu zya Leza, “ibbwe” lyabwami bwabu Mesiya lyakakolomonwa kuzwa “kucilundu” cabweendelezi bwa Leza bwakoonse-koonse. Lyankondo ya Harmagedoni ibbwe elyo liyoopwaya cikozyanyo akucipwayaula cikabe buungu. Mbwaanga buyooba mfwulumende iili mbuli dundu ilyeendelezya “nyika yoonse,” Bwami bwabu Mesiya buyooima nji kukabe kutamani.—Daniele 2:35, 45; Ciyubunuzyo 16:14, 16. *
11. Ino kusanduka kwa Jesu kwakali kutondezya nzi kujatikizya zintu zyakumbele, alimwi ino cilengaano eco cakamunjila buti Petro?
11 Kayeeya bweendelezi bwakwe mu Bwami, Jesu wakaambila basikwiiya bakwe kuti: “Mpobali bamwi baimvwi awa batakooyoomvwa lufu mane lumwi bakabone Mwana a-Muntu uuboola mu-Bwami bwakwe.” (Matayo 16:28) Nokwakainda mazuba aali cisambomwi, Jesu wakatola ba Petro a Jakobo alimwi a Johane atalaa mulundu mulamfwu ooko nkwaakaakusanduka kabalangilila. Ikkumbi limweka nolyakabavwumba baapostolo, Leza wakaamba makani aakuti: “Ngooyu mwanaangu uuyandwa ngwinkondelwa, amuswiilile nguwe.” (Matayo 17:1-9; Marko 9:1-9) Elo kaka eci cakali citondezyo caantangalala cabulemu mbwaakali kunoojisi Kristo mu Bwami bwakwe! Anu Petro ncaakacaamba alimwi eco cilengaano cigambya naakati: “Mbubonya obo mbutwakasimpikizigwa lusinizyo lwamajwi aabasinsimi.”—2 Petro 1:16-19. *
12. Nkaambo nzi ecino ncocili ciindi cilibedelede notweelede kutondezya kuti tulalisyoma jwi lya Leza lyabusinsimi?
12 ‘Jwi lyabusinsimi’ elyo kulangilwa kuti tiilyakali kubikkilizya buyo businsimi bwamu Magwalo aa Cihebrayo kujatikizya Mesiya pele akali kujatikizya akaambo nkaakaamba Jesu kakuti wakali kuyooboola “anguzu abulemu bupati.” (Matayo 24:30) Ikusanduka kwakasinizya jwi lyabusinsimi kujatikizya kuboola kwa Kristo kwabulemu mubweendelezi bwa Bwami. Lino-lino aakuboola mubulemu bwakwe uyoonyonyoona bantu batasyomi akulongezya baabo ibasyoma. (2 Ba-Tesalonika 1:6-10) Ikuzuzikizigwa kwabusinsimi bwa Bbaibbele kusinizya kuti aano “[m]mazuba aakumamanino.” (2 Timoteo 3:1-5, 16, 17; Matayo 24:3-14) Mbwali Sikunyonyoona wa Jehova Mupati, Mikayeli, Jesu Kristo ulilibambilide kale kunyonyoona bweende obu bubyaabi bwazintu lyaciindi “[ca]mapenzi mapati.” (Matayo 24:21; Daniele 12:1) Aboobo, ecino nceciindi cakutondezya kuti tulalisyoma jwi lya Leza lyabusinsimi.
Amuzumanane Kulisyoma Jwi lya Leza Lyabusinsimi
13. Ncinzi cinga catugwasya kuzumanana aluyando ndotujisi kuli Leza alimwi akuzumanana kusyoma jwi lyakwe?
13 Masimpe twakakkomana kapati notwakaiya ciindi cakusaanguna kujatikizya kuzuzikizigwa kwa jwi lya Leza lyabusinsimi. Pele sena ono lusyomo lwesu aluyando lwaceya? Tutabi mbuli Banakristo baku Efeso ‘ibakaleka luyando lwabo lwakusaanguna.’ (Ciyubunuzyo 2:1-4) Kunyina makani naa twamubelekela kwaciindi cilamfwu buti Jehova, tulakonzya kuba muciimo cili boobo, ccita kuti twazumanana ‘kusaanguna kuyandaula Bwami bwa-Leza abululami bwakwe’ ikutegwa tuliyobwede lubono kujululu. (Matayo 6:19-21, 31-33) Ikwiiya Bbaibbele cabusungu, ikujanika alimwi akutola lubazu mumiswaangano ya Bunakristo lyoonse alimwi akuba bankutwe mumulimo wakukambauka Bwami kuyootugwasya kuzumananaa luyando lwesu kuli Jehova, ku Mwanaakwe alimwi akubala Magwalo lyoonse. (Intembauzyo 119:105; Marko 13:10; Ba-Hebrayo 10:24, 25) Mpoonya ikucita boobo kuyoopa kuti lusyomo lwesu kaluli luyumu mu Jwi lya Leza.—Intembauzyo 106:12.
14. Ino Banakristo bananike balumbulwa buti akaambo kakusyoma jwi lya Jehova lyabusinsimi?
14 Akaambo kakuti jwi lya Leza lyabusinsimi lyakazuzikizigwa musule, tulakonzya kusyoma kuti zintu nzyolisinsima kuti ziyoocitika kumbele ziyoozuzikizigwa azyalo. Mucikozyanyo, ikubako kwa Kristo mubweendelezi bwa Bwami kulicitikide kale, alimwi ku Banakristo bananike ibakasyomeka kusikila kulufwu, cazuzikizigwa cisyomezyo cabusinsimi cakuti: “Oyo uuzunda njoomupa kulya kumusamu wabuumi uuli mukati ka-Paradaiso wa-Leza.” (Ciyubunuzyo 2:7, 10; 1 Ba-Tesalonika 4:14-17) Aaba bazunda, Jesu wabapa coolwe ‘cakulya musamu wabuumi’ uuli mu “Paradaiso wa-Leza” wakujulu. Mukubuka kwabo kuzwa kulufwu alimwi akwiinda muli Jesu Kristo, baba muciimo cakutafwika akubula bubozi ikupegwaa Jehova, “Mwami mupati uutamani walyoonse, uutabonwa, Leza uuiide alike.” (1 Timoteo 1:17; 1 Ba-Korinto 15:50-54; 2 Timoteo 1:10) Tabulikomeneni kaka bulumbu obo akaambo kakuti luyando lwabo kuli Leza kunyina nolwakamana nokuba kuzungaana mukusyoma kwabo kwa jwi lyakwe lyabusinsimi!
15. Muuli bani intalisyo ya “nyika impya” moyakayakwa, alimwi ino aabo mbociyanzana limwi mbaani?
15 Nokwakainda kaindi kasyoonto buyo kuzwa leelyo bananike nobakabusilwa ku “Paradaiso wa-Leza” wakujulu, ibasyeede anyika akati kabana Israyeli bakumuuya bakaangululwa kubuzike bwa “Babuloni Mupati,” ibulelo bwanyika yoonse bwabukombi bwakubeja. (Ciyubunuzyo 14:8; Ba-Galatiya 6:16) Intalisyo ya “nyika impya” yakayakilwa aali mbabo. (Ciyubunuzyo 21:1) Aboobo “cisi” cakazyalwa, alimwi cakayakwa kuba paradaiso wakumuuya sunu uujanika nyika yoonse mbwiibede. (Isaya 66:8) Kucisi eci kuli mukuunka makamu-makamu aabantu bali mbuli mbelele aabo ibayanzanaa bana Israyeli bakumuuya kuciindi cino ‘cakumamanino aaciindi.’—Isaya 2:2-4; Zakariya 8:23; Johane 10:16; Ciyubunuzyo 7:9.
Bukkale Bwabantu Bwakumbele Bwakasinsimwa mu Jwi lya Leza Lyabusinsimi
16. Ino bagwasilizyi babananike ibasyomeka bajisi bulangizi nzi?
16 Ino aabo ibagwasilizya bananike cakusyomeka bajisi bulangizi nzi? Abalo balalisyoma jwi lya Leza lyabusinsimi, alimwi balangila kuyoonjila mu Paradaiso yaanyika. (Luka 23:39-43) Ooko bayoonywa “[ku]mulonga wamaanzi aabuumi” alimwi bayooponesegwa a “matu aa[ma]samu” aasimpidwe mumabazu aamulonga oyo. (Ciyubunuzyo 22:1, 2) Ikuti kamujisi bulangizi obu butaliboteli, amuzumanane kutondezya kuti mulamuyanda kapati Jehova alimwi akuti mulalisyoma jwi lyakwe lyabusinsimi. Amube akati kabaabo ibajisi lukkomano lutaambiki lwakubaa buumi butamani mu Paradaiso anyika.
17. Nzilongezyo nzi ziyoojatikizigwa mubukkale bwamu Paradaiso anyika?
17 Ibantunsi batalondokede tabakonzyi kubupandulula kabotu bukkale bunooli munyika ya Paradaiso iilangilwa, pele jwi lya Leza lyabusinsimi litugwasya kuzyiba zilongezyo eezyo ziyoopegwa bantu bamumvwa ciindi eco. Eelyo Bwami bwa Leza bwaakweendelezya kakunyina kukazyigwa kuli koonse alimwi elyo kuyanda kwakwe kwaakucitwa anyika mbubwenya mbokubede kujulu, takukabi limbi bantu babyaabi—inzya, nobaba banyama “tabakooyooluma nikuba kunyonyoona.” (Isaya 11:9; Matayo 6:9, 10) Ibabombe myoyo bayookkala anyika, alimwi “bayookondwa muluumuno lunji.” (Intembauzyo 37:11) Kunoonyina makamu-makamu aabantu bafwa nzala, nkaambo ‘maila ayoovula ansi, aatala lyazilundu.’ (Intembauzyo 72:16) Kunoonyina banoosinda misozi akaambo kabuumba. Malwazi ayoomaninina, alimwi mane alufwu talukabiwo limbi. (Isaya 33:24; Ciyubunuzyo 21:4) Amuciyeeyele buyo—kunyina basilisi, misamu, zibbadela ambunga zilanganya banyongene mumizeezo alimwi kunyina madilwe. Tabuliboteli kaka bulangizi obu!
18. (a) Ino Daniele wakapegwa cisyomezyo cijatikizya nzi? (b) Ino ncinzi ciyooba busena ‘mbwabambilidwe’ Daniele?
18 Noziba zyuumbwe zyabantu zinoonyina cintu eelyo imfwu noziiyoosiila busena kukubusigwa kwabantu bafwide. Imwaalumi uululeme Jobu wakalijisi bulangizi obu. (Jobu 14:14, 15) Ncimwi buyo amusinsimi Daniele nkaambo mungelo wa Jehova wakamwaambila cisyomezyo cuumbulizya cakuti: “Pele webo koya buyo mane mamanino asike; uuyootanguna kulyokezya, elyo uyooima kubusena mbobambilidwe kumamanino aaciindi.” (Daniele 12:13) Daniele wakabelekela Leza cakusyomeka kusikila ciindi naakafwa. Ono ulalyookezya mulufwu, pele “uyooima” “kukubuka kwabaluleme” mu Bweendelezi bwa Kristo bwa Myaka iili Cuulu. (Luka 14:14) Ino mbusena nzi ‘mbwabambilidwe’ Daniele? Mukuzuzikizigwa kwa Paradasio, businsimi bwa Ezekiele butondezya kuti bantu ba Jehova boonse bayoobaa busena, alimwi bayooabanisigwa nyika munzila yabululami iilondokede. (Ezekieli 47:13–48:35) Aboobo Daniele uyoobaa busena mu Paradaso, pele busena mbwabambilidwe tabuli buyo bwakwaabilwa nyika. Buyoobikkilizya busena bwakwe mumakanze aa Jehova.
19. Ncinzi ciyandika ikutegwa tukakkale mu Paradaso anyika?
19 Ino cili buti kulindinywe abusena mbomubambilidwe? Ikuti kamulisyoma Jwi lya Leza, Ibbaibbele, cakutadooneka mulombozya kuyoopona mu Paradaiso yaanyika. Ambweni zimwi ziindi inga mweezeezya kuti muponena mumo kamukkomene azilongezyo zinji, mbuli kulanganya nyika alimwi calukkomano kamutambula bantu bakafwide. Kayi mu Paradaiso mwayelede kuba muntu woonse. Leza wakalenga banabubili bakusaanguna kuti baponene mubusena buli boobo. (Matalikilo 2:7-9) Alimwi uyanda kuti bantunsi boonse ibamumvwida bakapone kukabe kutamani mu Paradaiso. Sena mulazitobela zyaamba Magwalo ikutegwa mukabe akati kazyuulu-zyuulu zyatuulunzuma twabantu aabo kumbele ibayookkala mu Paradaiso anyika? Mulakonzya kuyoojanika ikuti kamujisi luyando lwini-lwini kuli Taateesu wakujulu Jehova, alimwi ikuti kamujisi lusyomo luzumanana mu Jwi lya Leza lyabusinsimi.
Bupanduluzi buyungizidwe
^ munc. 6 Amubone Cibalo 11 cabbuku lya Amububikkile Maanu Businsimi bwa Daniele! alimwi acibalo cakuti “Seventy Weeks” (Mvwiki Zili Makumi Aali Ciloba), mubbuku lya Insight on the Scriptures, aakamwaigwa aba Watchtower Bible and Tract Society of New York, Inc.
^ munc. 7 Amubone bbuku lyakuti “All Scripture Is Inspired of God and Beneficial,” mapeeji 343-4, ilyakamwaigwa aba Watchtower Bible and Tract Society of New York, Inc.
^ munc. 10 Amubone zyaandaano 4 alimwi a 9 zyabbuku lya Amububikkile Maanu Businsimi bwa Daniele!
^ munc. 11 Amubone cibalo camutwe wakuti “Amulibikkile Maanu Jwi lya Leza Lyabusinsimi,” cili mu Ngazi Yamulindizi yamu April 1, 2000.
Ino Inga Mwaingula Buti?
• Ino ibusinsimi bwakusaanguna mbuubuli, alimwi ino Lunyungu ilwakasyomezyegwa wakali ni?
• Mbusinsimi nzi bwabu Mesiya bumwi mbwaakazuzikizya Jesu?
• Ino bbuku lya Daniele 2:44, 45 liyoozuzikizigwa buti?
• Ino jwi lya Leza lyabusinsimi lyaamba nzi kujatikizya bukkale bwabantu ibamumvwida kumbele?
[Mibuzyo yaciiyo]
[Cifwanikiso icili apeeji 16]
Sena mulangila kuyoopona mu Paradaiso anyika?