Amube Amizeezo Ya Kristo
Amube Amizeezo Ya Kristo
“Leza wabukakatilo abukombelezyo amupe bujatano bwacinkaminwe mbuli Kristo Jesu.”—BA-ROMA 15:5.
1. Mbuti buumi bwamuntu mbobunga bwanyonganizigwaa mizeezo yakwe mwini?
IMIZEEZO njotujisi kujatikizya zintu ilabujatikizya kapati buumi. Ikuzyuubya-ubya naa kuzibikkila maanu, ciimo cakukazyanya naa cakubelekelaamwi, ikutongooka naa ikulumba kulakonzya kweendelezya muntu kujatikizya mbwalanganya zintu alimwi ambobamubona bantu bambi. Ikuti muntu kazilanga kabotu zintu, ulakonzya kakkomene nomuba mubukkale bukatazya kapati. Kumuntu uuzilanga bubi zintu, kunyina cintu ciluleme kulinguwe neliba leelyo nobuli kabotu buumi ikuti naa bwalangwa munzila iigwasya.
2. Ino mbuti muntu mbwaiya kubaa mizeezo njajisi?
2 Imizeezo, ibe mibi naa mibotu ilakonzya kuyiigwa. Mubwini yeelede kuyiigwa buya. Kalyaamba mwana uucili muvwanda, ibbuku litegwa Collier’s Encyclopedia lyaamba kuti: “Imizeezo mwana muvwanda njabaanjiyo mukuya kwaciindi weelede kwiijana naa kwiiyiya mbubwenya buyo mbwayelede kwiiya mwaambo naa mulimo umwi.” Ino mizeezo twiiyiya buti? Nokuba kuti nzinji zintu zijatikizidwe, busena nkotukkede alimwi abalongwe besu zijisi nguzu kwiinda. Ibbuku lya encyclopedia ndyotwazubulula musule lyaamba kuti: “Tulaiya naa kunjizya zintu mumizeezo mbubwenya butonje mbobusyuunta maanzi, imizeezo yabaabo mbotuyanzana limwi lyoonse.” Izyuulu-zyuulu zyamyaka yainda, Ibbaibbele lyakaamba cintu cikozyenye aceeci kuti: “Uuenda abasongo ulasongwaala, pele muzwalani wabafubafuba ulabisizigwa.”—Tusimpi 13:20; 1 Ba-Korinto 15:33.
Cikozyanyo Cakuyeeya Kweelede
3. Nguni wakatondezya cikozyanyo cibotu kapati kujatikizya mizeezo, alimwi ino inga twamwiiya buti?
3 Mbubwenya buyo mbuli mumbazu zimbi zyoonse, amumakani aajatikizya mizeezo Jesu Kristo wakasiya cikozyanyo cibotu kapati. Wakati: “Ndamupa citondezyo, kuti anywebo mucite mbuli mbwendamucitila.” (Johane 13:15) Ikutegwa tube mbuli Jesu, cakusaanguna tweelede kwiiya mbwabede. * Twiiya bukkale bwa Jesu katujisi makanze mwaapostolo Petro ngaakakulwaizya aakuti: “Eco ncimwakaitilwa, nkaambo Kristo alakwe wakamucisilwa, wakamusiila cibonesyo, kuti mukatobele mumikondo yakwe.” (1 Petro 2:21) Imbaakani yesu njakuti tusoleke mpotugolela kuba mbuli Jesu. Eco cibikkilizya kubaa mizeezo njaakajisi walo.
4, 5. Ndubazu nzi lwamizeezo yakajisi Jesu ilwaambwa ku Ba-Roma 15:1-3, alimwi ino Banakristo inga bamwiiya buti?
4 Ncinzi cijatikizidwe mukubaa mizeezo njaakajisi Kristo Jesu? Caandaano 15 calugwalo lwa Paulo ndwaakalembela ba Roma cilatugwasya kwiingula mubuzyo oyu. Mutupango tusyoonto twakusaanguna twacaandaano eci, Paulo waamba bube bulibedelede mbwaakajisi Jesu naamba kuti: “Lino swebo tubayumu tuleelede kuyumuna matenda aabaabo batali bayumu, tatweelede kulikondezya tubeni pe. Umwi aumwi akati kesu akondezye mweenzinyina kukumucitila cibotu cakuyakana. Nkaambo Kristo alakwe teewakalikondezya mwini, pele mbuli mbukulembedwe kuti, Insyolauko zyabaabo bakasyolauka nduwe zyakandiwida mebo.”—Ba-Roma 15:1-3.
5 Ikutegwa baiye mbwaakabede Jesu, Banakristo bakulwaizigwa kulibambila kugwasya bamwi cakulicesya muciindi cakulikondezya buyo beni. Ncobeni, ikulisungula kuli boobo kwakuyanda kugwasya bamwi ncizibyo citondezya baabo “bayumu.” Kalyaamba lwakwe mwini, Jesu iwakali muyumu munzila yakumuuya kwiinda muntunsi uuli woonse wakaponede wakati: “Mwana a-Muntu tazide kuti abelekelwe, wakeza kuti abeleke, alimwi akwaaba buumi bwakwe, bube cinunuzyo cabanji.” (Matayo 20:28) Mbotuli Banakristo, aswebo tulayanda kusoleka kugwasya bamwi, kubikkilizyaa “baabo batali bayumu.”
6. Muunzila nzi motunga twamwiiya Jesu kujatikizya mbwaakalimvwa naakakazigwa akusampaulwa?
6 Ibube bumbi bubotu Jesu mbwaakatondezya mbwakuti wakali kuyeeya alimwi akucita zintu munzila iikulwaizya lyoonse. Kunyina naakalekela mizeezo yabamwi iityompya kunyonganya kulanga kwakwe kujatikizya kubelekela Leza; aswebo tatweelede kulilekelezya pe. Naakasampaulwa akupenzyegwa akaambo kakubelekela Leza cakusyomeka, cakukkazika moyo Jesu wakaliyumya kakunyina kutongooka. Wakalizi kuti kukazigwaa bantu batakali kusyoma alimwi ibataswiilili kwakali kulangilwa kuli baabo ibasola kukkomanisya beenzinyina “kuku[ba]citila cibotu cakuyakana.”
7. Mbuti Jesu mbwaakatondezya kukkazika moyo, alimwi nkaambo nzi andiswe ncotweelede kucita boobo?
7 Jesu alimwi wakatondezya mizeezo yeelede munzila zimbi. Kunyina naakamwiintilila Jehova pele cakukkazika moyo wakalindila kuti makanze Aakwe azwidilile. (Intembauzyo 110:1; Matayo 24:36; Incito 2:32-36; Ba-Hebrayo 10:12, 13) Kunze lyaboobo, Jesu tanaakaintila mukweendelezya basikumutobela. Wakabaambila kuti: “Mwiiye kwangu”; elyo mbwaanga wakali ‘mubombe,’ imalailile aakwe akali kuyaka alimwi akukatalusya. Alimwi akaambo kakuti wakali “mutete moyo,” kunyina naakalitukumuna naa kulipa kamikami. (Matayo 11:29) Paulo utukulwaizya kwiiya mbazu ezi zyamizeezo ya Jesu naamba kuti: “Amube amoyo oyo nguwena iwakali muli-Kristo Jesu. Walo wakali aciimo ca-Leza, nekubaboobo teewakayeeya kuti ncivuumuko kweelana a-Leza, pe. Wakalilonzya, wakalisalila ciimo cabuzike akuba mbubonya mbuli bantu balya maila.”—Ba-Filipi 2:5-7.
8, 9. (a) Nkaambo nzi ncotweelede kubeleka canguzu kutegwa tube aamizeezo yakutalisumpula? (b) Nkaambo nzi ncotuteelede kutyompwa ikuti naa twakakilwa kucitobela cabulondo cikozyanyo ncaakasiya Jesu, alimwi ino Paulo wakali cikozyanyo cibotu buti mumakani aya?
8 Ncuuba-uba ikwaamba kuti tuyanda kugwasya bamwi alimwi akulanganya zintu nzyobayandika kusaanguna katutanalanganya zyesu. Pele ikulingaula mizeezo yesu kulakonzya kuyubununa kuti myoyo yesu taiyeeme ncobeni kukucita boobo. Nkaambo nzi? Cakusaanguna, nkaambo twakakona tumpenda tubyaabi kuzwa kuli Adamu a Eva; icabili, nkaambo tukkede munyika iisumpula kuliyanda. (Ba-Efeso 4:17, 18) Ikutegwa tube aamizeezo yakutalisumpula kanjikanji kuyandika kubaa miyeeyo iimpene ayeeyo njotwakazyalwaanjiyo. Ikucita boobo kuyandika kuyuma alimwi akusolekesya.
9 Kutalondoka nkotujisi kwalo kwiimpene kapati acikozyanyo ncaakatusiila Jesu, zimwi ziindi kulakonzya kututyompya. Tulakonzya kudooneka mane naa inga cakonzyeka kubaa mizeezo njaakajisi Jesu. Pele amubikkile maanu kumajwi aa Paulo aakulwaizya aakuti: “Ndizi kuti mulindime (nkukuti munyama yangu) tamukali cintu niciba cimwi cibotu. Ikuti kuzumina kwalo nkukuli, pele kucita cintu cibotu nsikujene pe. Nkaambo cibotu ncinjanda nsiciciti pe, pele cibi ncintayandi ncico ncincita. Nkaambo ndakondelwa Mulao wa-Leza mukati kamoyo wangu, pele ndabona mulao umbi muzizo zyangu, uulwisya mulao wamoyo wangu, nkabela ndaba mwaange wamulao wazibi uuli muzizo zyangu.” (Ba-Roma 7:18, 19, 22, 23) Ncobeni, ikutalondoka kwa Paulo lyoonse kwakali kumukasya kucita kuyanda kwa Leza mbuli mbwaakali kuyanda, pele mizeezo yakwe—mbwaakali kuyeeya alimwi akulimvwa kujatikizya Jehova alimwi amulawo Wakwe—ncikozyanyo cibotu. Akwalo kuyeeya kwesu kulakonzya kuba boobo.
Ikululamika Mizeezo Iilubide
10. Nkuyeeya nzi Paulo nkwaakakulwaizya ba Filipi kuti babe aankuko?
10 Sena cili masimpe kuti bamwi bayandika kululamika mizeezo iilubide? Inzya. Kulibonya kuti eci cakali kuyandika ku Banakristo bamwi mumwaanda wamyaka wakusaanguna. Mulugwalo lwakwe ndwaakalembela bana Filipi, Paulo wakaamba makani aambocakali kuyandika kubaa mizeezo mibotu. Wakalemba kuti: “Teensi kwaamba kuti ndatambula kale [buumi bwakujulu kwiinda mububuke bwakusaanguna] nanka kulondokede kale, pe, pele ndabindaanina kuti nkajane cintu eco ncindakajaninwa ndemwini kujanza lya-Kristo. Bakwesu, nsiyeeyi kuti ndicijene kale, pe, pele cintu comwe ncencita nceeci. Ndaziluba zintu zili musule, ndadunamina zintu zili kunembo, aboobo nja bubindaanina kumagolelo, kuti nkajane bulumbu bwakujulu mbwatwiitila Leza muli-Kristo Jesu. Lino mbuboobo mbutweelede kuyeeya toonse notubwene twaansi.”—Ba-Filipi 3:12-15.
11, 12. Muunzila nzi Jehova mwatuyubunwida mizeezo iili kabotu?
11 Imajwi aa Paulo atondezya kuti muntu woonse iwaba Munakristo pele utaboni kuti cilayandika kuyaambele ujisi mizeezo mibyaabi. Muntu oyo wakakilwa kubaa mizeezo yakajisi Kristo. (Ba-Hebrayo 4:11; 2 Petro 1:10; 3:14) Sena bukkale bwamuntu uuli boobo bunyina mbobucitwa? Peepe. Leza ulakonzya kutugwasya kucinca kuyeeya kwesu ikuti katukanzide kucita boobo. Paulo wakazumanana kwaamba kuti: “Na kuli cintu niciba comwe ncimuyeeyela bumbi, Leza ulamuyubunwida makani.”—Ba-Filipi 3:15.
12 Pele ikuti katulombozya kuti Jehova atuyubunwide mizeezo yeelede, tweelede kucita lubazu lwesu. Ikwiiya Jwi lya Leza cabusungu kwiinda mukubelesya mabbuku aa Bunakristo aabilwaa “muzike musyomesi uucenjede” kuyoogwasya baabo ‘baziyeeyela bumbi zintu’ kubaa mizeezo iili kabotu. (Matayo 24:45) Baalu Banakristo, ibakabikkwaa muuya uusalala kuti ‘balele mbungano ya-Leza,’ balilibambilide kugwasya. (Incito 20:28) Tulalumba kapati kaka kuti Jehova ulakubikkila maanu kutalondoka kwesu alimwi caluyando ulatugwasya! Atuluzumine lugwasyo olo.
Ikwiiya Kuzwa Kuli Bamwi
13. Ncinzi ncotwiiya kujatikizya kuyeeya kubotu kuzwa kucibalo camu Bbaibbele caamba zya Jobu?
13 Kubbuku lya Ba-Roma caandaano 15, Paulo utondezya kuti ikuyeeya cakuzinzibala aazikozyanyo zyakaindi kulakonzya kutugwasya kucinculula kuyeeya kwesu. Ulemba kuti: “Makani [oonse] aali boobo aakalembwa kalekale, nkukwiiya kwesu nkwaakalembelwa, kuti kubukakatilo akubukombelezyo bwamalembe tujane bulangizi bwakutontozya moyo.” (Ba-Roma 15:4) Babelesi ba Jehova basyomeka bamwi kuciindi cainda bakali kuyandika kululamika mbazu zimwi mukuyeeya kwabo. Mucikozyanyo, inga twaamba kuti Jobu wakajisi mizeezo mibotu. Kunyina naakatamikizya Jehova kujatikizya bubi bwakaliko alimwi kunyina naakazumizya mapenzi ikunyonganya lusyomo ndwaakajisi muli Leza. (Jobu 1:8, 21, 22) Pele wakayeeme kapati kukulilulamika mwini. Jehova wakasololela Elihu kuti amugwasye Jobu mukululamika kuyeeya oku. Muciindi cakulimvwa kuti watukilwa, cakulibombya Jobu wakautambula muzeezo wakuti acince mizeezo yakwe alimwi mpoonya-mpoonya wakabweza ntaamo.—Jobu 42:1-6.
14. Mbuti mbotunga twaba mbuli Jobu eelyo notulaigwa kujatikizya kuyeeya kwesu?
14 Sena inga twacita mbuli mbwaakacita Jobu ikuti Munakristoma umwi caluyando watwaambila kuti kuli mbazu zimwi motutondezya kuyeeya kulubide? Mbubwenya mbuli Jobu, atubone kuti ‘tiitwabisya nikuba kumutongookela Leza.’ (Jobu 1:22) Ikuti naa twapenga munzila mbyaabi, tutatoongookeli Jehova naa kumupa mulandu kuti nguwapa kuti tube mumapenzi pe. Tutalilulamiki pe, lyoonse katuyeeya kuti kunyina makani azyoolwe zyamumulimo wa Jehova, nzyotujisi tucili “bazike buyo.”—Luka 17:10.
15. (a) Nkuyeeya nzi kulubide basikutobela Jesu bamwi nkobakatondezya? (b) Mbuti Petro mbwakatondezya kuyeeya kubotu?
15 Mumwaanda wamyaka wakusaanguna, ibamwi bakamuswiilila Jesu bakatondezya mizeezo mibyaabi. Cimwi ciindi Jesu wakaamba cintu cakali ciyumu kuteelela. Mukwiingula, “banjibanji babasikwiiya bakwe, nobakamvwa obo bakati, Majwi aya mayumu, nguni uuti amvwe?” Kulalibonya kuti aabo ibakaamba makani aya bakajisi mizeezo iilubide. Alimwi ikuyeeya kwabo kulubide kwakasololela kuti baleke kuswiilila Jesu. Imakani aamba kuti: “Nkaambo kaako basikwiiya bakwe banjibanji bakapiluka, tabacili kweenda limbi awalo.” Sena bakali boonse ibakajisi mizeezo iitaluzi? Peepe. Imakani alazumanana kwaamba kuti: “Jesu wakabaambila abali kumi mubabili kuti, Sena anywebo mulainka? Simoni Petro wakamuvuwa wakati, Omwami, tuye kuli?” Mpoonya Petro wakaingula mubuzyo ngwaakabuzya, ulaamba: “Nduwe oojisi majwi aabuumi ubutamani.” (Johane 6:60, 66-68) Takuliboteli kuyeeya oko kaka! Notutambula bupanduluzi naa kucinca mukuteelela Magwalo aayo ambweni aakali kutukatazya kuteelela kumatalikilo, sena tacili cibotu kutondezya kuyeeya nkwaakajisi Petro? Tacili camaanu kaka ikuleka kubelekela Jehova naa kwaambaula makani aateendelani a “majwi menimeni” akaambo kakuti aciindi eco izintu zimwi zilakatazya kuteelela!—2 Timoteo 1:13.
16. Mizeezo nzi mibyaabi yakatondezyegwaa beendelezi babukombi ba Juda kuciindi ca Jesu?
16 Beendelezi bazikombelo iba Juda bamumwaanda wamyaka wakusaanguna bakakakilwa kutondezya mizeezo njaakajisi Jesu. Imakanze aabo aagaminide aakutayanda kuswiilila Jesu akatondezyegwa eelyo naakabusya Lazaro kuzwa kubafwu. Kubantu ibajisi mizeezo iiluzi, imaleele aayo akali kunooba bumboni butakaziki bwakuti Jesu wakatumwaa Leza ncobeni. Pele tubala kuti: “Elyo bapaizi bapati aba-Farisi bakabunganya babetesi bakati, Tucite buyani? Nkaambo muntu oyu ulacita malele manji. Kuti twamuleka buyo, boonse balasyoma nguwe, abalo ba-Roma balasika bazootunyanga busena bwesu amusyobo wesu.” Inzila yabo yakulesya ceeci? “Kuzwida buzuba obo bakakanza kuyoomujaya.” Kunze lyakuyanda kumujaya Jesu, bakatalika kujana nzila yakuzimaazya bumboni busalala boonse bwakuti wakali muntu uucita maleele. “Bapaizi bapati bakakanza kujaya Lazaro awalo.” (Johane 11:47, 48, 53; 12:9-11) Tacili camaanu kaka ikubaa mizeezo iili boobo alimwi akunyonganizigwa naa kucimwa kujatikizya zintu nzyotweelede kukkomanina! Inzya ncibi kapati alimwi ciletela ntenda!
Ikutobela Mizeezo Mibotu Yakajisi Kristo
17. (a) Muubukkale buli buti Daniele mwaakatondezya busicamba? (b) Ino Jesu wakalitondezya buti kuti wakali sicamba?
17 Babelesi ba Jehova bajisi mizeezo mibotu lyoonse. Basinkondonyina Daniele cabumpelenge nobakakulwaizya kuti kubambwe mulawo wakali kuyookasya bantu kupaila kuli leza uumbi naa muntu kunze lyamwami kwamazuba aali 30, Daniele wakalizi kuti eci cakali kunoosinkilizya cilongwe cakwe a Jehova Leza. Sena wakeelede kuleka buyo kupaila kuli Leza kwamazuba aali 30? Peepe, cabusicamba wakazumanana kupaila kuli Jehova ziindi zyotatwe abuzuba, mbubwenya mbwaakali kupaila lyoonse. (Daniele 6:6-17) Awalo Jesu tanaakalekela basinkondonyina kumukonga. Mubuzuba bumwi bwa Sabata wakaswaanganya mwaalumi wakalaa kwaanza kunyanide. Jesu wakalizi kuti iba Juda banji ibakaliko awo cakali kunoobabijila ikuti wakaponya muntu mu Sabata. Wakababuzya cabulemu kuti baambe mbobalimvwa kujatikizya makani ayo. Nobakakaka, Jesu wakazumanana elyo wakamuponya mwaalumi oyo. (Marko 3:1-6) Kunyina Jesu naakapiluka munsi kukuzuzikizya mulimo wakwe nocakaluleme kucita boobo.
18. Nkaambo nzi bamwi ncobatukazya, pele ino tweelede kulimvwa buti akuyeeya kwabo kutaluzi?
18 Bakamboni ba Jehova sunu balizi kuti abalo tabeelede kukongwaa mizeezo iilangilwa kutondezyegwaa bantu basikukazya. Ibuyo-buyo, tabanootondezyi mizeezo njaakajisi Jesu. Mbanji bantu bakazya Bakamboni ba Jehova, ibamwi akaambo kakuti banyina luzibo lwini-lwini alimwi ibamwi nkaambo tababayandi buya Bakamboni naa kutayanda imulumbe wabo. Pele tutalekeli kuyeeya kwabo kutaluleme ikunyonganya kuyeeya kwesu kubotu. Tatweelede kuzumizya bamwi ikutweendelezya mbotweelede kukomba.
19. Mbuti mbotunga twatondezya mizeezo mbuli yeeyo njaakajisi Jesu Kristo?
19 Lyoonse, neliba leelyo zintu nozyakali kukatazya, Jesu wakali kutondezya mizeezo mibotu kuli basikumutobela alimwi akububambe bwa Leza. (Matayo 23:2, 3) Tweelede kucitobela cikozyanyo cakwe. Ee, bakwesu tabalondokede, pele andiswe tatulondokede pe. Alimwi ino nkuukuli nkotunga twajana balongwe babotu alimwi ibasyomeka kunze lyamubunyina bwesu bwanyika yoonse mbwiibede? Jehova tana kutupa kuteelela kumaninide kujatikizya Jwi lyakwe lilembedwe, pele ino nimbunga nzi yabukombi iiteelela kwiinda? Lyoonse katujisi mizeezo mibotu, imizeezo yakajisi Jesu Kristo. Kunze lyazintu zimbi, eci cibikkilizya kuziba mbotweelede kulindila Jehova, mbubwenya mbotutiibandike mucibalo citobela.
Bupanduluzi buyungizidwe
^ munc. 3 Ibbuku lyakuti Muntu Mupati Kwiinda Iwakaponede, ilyakamwaigwa aba Watchtower Bible and Tract Society of New York, Inc., lilijisi makani abukkale alimwi amulimo wa Jesu.
Sena Inga Mwapandulula?
• Mbuti bukkale bwesu mbobweendelezegwaa mizeezo njotujisi?
• Amupandulule mizeezo njaakajisi Jesu Kristo.
• Ncinzi ncotukonzya kwiiya kujatikizya mizeezo njaakajisi Jobu?
• Nkuyeeya nzi kuli kabotu nkotweelede kubaankuko notukazigwa?
[Mibuzyo yaciiyo]
[Zifwanikiso izili apeeji 18]
Imunakristo uujisi mizeezo iili kabotu ulasoleka kugwasya bamwi
[Cifwanikiso icili apeeji 20]
Ikwiiya Jwi lya Leza cabusungu kulagwasya mukubaa mizeezo njaakajisi Kristo