Sena Mulicizi Kulindila?

SENA mulakonzya kweezeezya ciindi bantu ncibasowa amwaka kabalindila? Balalindila mumulongo kuzintoolo naa mumasena munywisilwa mungwimba. Balalindila kupegwa zyakulya mumasena mozisambalilwa. Balalindila kutegwa babonane adokotela naa musilisi wamenyo. Balaalindila mabbaasi alimwi azitima. Ee, ciindi cinji kapati mubuumi bwamuntu ncakulindila zintu kuti zicitike. Kweelanaa kweezeezya kwakacitwa, bana German balikke balasowa mawoola aasika ku 4,700,000,000 amwaka kabalindila akaambo kakusinkilana kwamyootokala mumigwagwa! Umwi muntu wakajana kuti mweelwe wamawoola oyo uleelana amazuba abuumi bwabantu bali 7,000.

Kulindila kulakonzya kutyompya kapati. Mazubaano kulibonya kuti kunyina ciindi cakucita zintu zyoonse nzyotuyanda alimwi notuyeeya zintu eezyo nzyotweelede kuti katucita cilakonzya kupa kuti kulindila cituyumine. Imulembi wazina lya Alexander Rose cimwi ciindi wakaamba kuti: “Icisela camapenzi amubuumi ncakulindila.”

Haazibwene mubweendelezi bwamfwulumende muna Amelika wazina lya Benjamin Franklin wakabona kuti kulindila kulakonzya kudula kapati. Imyaka yiinda ku 250 yainda, wakaamba kuti: “Ciindi ndwija lwamubwa.” Nkakaambo kaako basimakwebo balasoleka kujana nzila zitasowi ciindi nobali mukubeleka. Ikuti zintu zinji kazibambwa muciindi cisyoonto buyo, nkokuti ayalo mpindu iijanwa inooli nji kapati. Basimakwebo babelekela buleya balasoleka kwiifwambaanya milimo yabo mbuli yakubamba cakulya, yamubbanga iikonzya kucitwa kumbali abbanga kakunyina kuzwa mumootokala alimwi amilimo imbi buyo—nkaambo balizi kuti kukkomanisya basikuula kulabikkilizyaa kucesya ciindi ncobasowa kabalindila.

Kunyonyoona Buumi Bwesu

Sikweema umwi muna Amelika wamumwaanda wamyaka wa 19 wazina lya Ralph Waldo Emerson wakatongooka kuti: “Bwavwulisya kaka buumi  bwabantu bunyonyooka akaambo kakulindila!” Lino-lino aawa, imulembi wazina lya Lance Morrow wakatongooka kujatikizya mbokucima akulemya kuboola akaambo kakulindila. Pele alimwi wakaamba “zyapenzi likatazizye kapati lyakulindila.” Ino ncecinzi eeco? “Ikuziba kuti ciindi ncintu ciyandika kapati kumuntu umwi aumwi, icibeela cimwi cabuumi bwamuntu cili mukusowekela limwi.” Cilausisya kapati, pele mbobwini. Iciindi cisoweka mukulindila cisowekela limwi.

Ee, ibuumi nobwatali bufwaafwi boobu, ikulindila nokwatali kulibilikwa kapati boobu. Pele ciindi ncifwaafwi. Izyuulu zyamyaka zyainda, sintembauzyo wamu Bbaibbele wakaamba kuti: “Myaka yabuumi bwesu ili makumi aali musanu aabili, na tuli basinguzu ambweni ilasika kumakumi aali musanu aatatu; pele bunji bwayo makatazyo buyo amapenzi, nkaambo ilafwamba kumana, nkabela tulauluka.” (Intembauzyo 90:10) Kufwumbwa naa nkuli nkotukkede alimwi naa ndiswe bani, ibuumi bwesu—mazuba, mawoola alimwi amaminiti ngotujisi kuzwa ciindi ncotwazyalwa ajisi kale magolelo. Nokuba boobo, tatukonzyi kweeleba bukkale bumwi butusinikizya kusowa ciindi cesu eco ciyandisi katulindila bantu naa zintu zimwi.

Kwiiya Kulindila

Bunji bwesu twakatanta kale mootokala weenzegwaa namutekenya wakali kuyaabuzumanana kusola kwiinda mootokala uuli ambele lyakwe. Kanjikanji inga kunyina buyaa ncafwambaanina pe—namutekenya inga katajisi acipangano ciyandika kufwaambaanina. Nokuba boobo, takonzyi kwiile kulekela namutekenya uumbi kuti kali kumbele lyakwe. Ikutakkazika moyo kwakwe kutondezya kuti tanaakaiya kulindila pe. Ikwiiya? Ee, ikuciziba kulindila nciiyo ciyandika kwiiya buya. Kunyina wakazyalwa kacizi kale kulindila pe. Ibana bavwanda balo bayanda kulanganizigwa mpoonya-mpoonya ikuti naa bafwa nzala alimwi naa kuli cimwi cabakatazya. Pele mbobayaabukomena balatalika kuziba kuti ziindi zimwi beelede kulindila zintu nzyobayanda. Inzya, mbwaanga kulindila ncintu citakonzyi kweelebwa mubuumi bwabantu, kukkazika moyo mukulindila citondezya kuti muntu oyo ulisimide.

Nokuba boobo, kuli ziindi zimwi kulindila nokutayandiki. Iciindi mulumi uucili mwana-mwana natola mukaintu wakwe kucibbadela cakufwambaana akaambo kakuti uyanda kutumbuka, kubinda kwakwe mukucita zintu kutegwa kuli buyo kabotu. Ibaangelo ibakabinzya Loti kuti azwe mumunzi wa Sodoma tiibakalibambilide kulindila Loti naakali kuwayawaya. Lunyonyooko lwakali afwaafwi kapati, alimwi Loti amukwasyi wakwe bakali muntenda. (Matalikilo 19:15, 16) Pele kanjikanji, ibantu inga tabali muntenda pe nobasungilizigwa kulindila. Izintu nozili boobo, inga cainda kubota ikuti naa umwi aumwi waiya kukkazika moyo nokuba kuti kulindila inga kwaba akaambo kakutabaa luzibo lukkwene kuli umwi naa nkaambo kakutayanda kucita cintu eeco. Nokuba boobo, cilakonzya kuuba-uba kukkazika moyo ikuti bantu boonse nobalicizi kucibelesya munzila iigwasya ciindi ncobajisi nolindila. Ikabbokesi kali apeeji 5 kalijisi nzila zikonzya kugwasya kutegwa kulindila kutabi kwakuliyumya buyo pe, pele kulaampindu.

Tulakonzya kwaamba kuti muuya wakubinda ulakonzya kuletela muntu kulisumpula, akulimvwa kuti ngwalupati-pati, alimwi uuteelede kusowelwa ciindi kalindila. Kumuntu uli woonse uulaaciimo cili boobo, weelede kulanga-langa majwi ajanika mu Bbaibbele aakuti: “Kukazika moyo nkubotu kwiinda kulisumpula.” (Mukambausi 7:8) Ikulisumpula mbulema bupati kumuntu, alimwi kasimpi kamu Bbaibbele kaamba kuti: “Kufumbwa uulisumpula ulasesemya Jehova.” (Tusimpi 16:5) Kwiiya kukkazika moyo—akulindila kuyandika kulilingula tobeni alimwi ambotuyanzanaa bantu mbotukkede limwi.

Kukkazika Moyo Kuyoolumbulwa

Kulindila kulakonzya kuuba-uba ikuti naa tuli masimpe kuti ncotulindila cilaakaambo nkocamukila alimwi akuti katuli masimpe kuti cilaboola ncobeni. Mukaambo aaka, ncibotu kuba masimpe kuti bakombi ba Leza beni-beni boonse bali mukulindila kuzuzikizigwa kwazisyomezyo zyakwe zibotu zijanika mu Bbaibbele. Mucikozyanyo, muntembauzyo yakasololelwaa Leza twaambilwa kuti: “Balulami bayookona nyika, bayookala alinjiyo lyoonse.” Cisyomezyo eci cakaindululwaa mwaapostolo Johane naakalemba kuti: “Pele oyo uucita makanze aa-Taata ulakalilila kukabe kutamani.” (Intembauzyo 37:29; 1 Johane 2:17) Cilisalede, ikuti katuyanda kupona kukabe kutamani, kulindila takukatubedi penzi pati pe. Pele lino tatuponi buumi butamani pe. Sena ncamaanu kwaamba zyabuumi butamani?

Kamutaninga ingula, amuyeeye buyo kuti Leza  wakalenga bazyali besu bakusaanguna kabajisi bulangizi bwakupona kukabe kutamani. Pele akaambo kakuti bakabisya, bakabusowa bulangizi bwabo oobu alimwi abwabana babo kubikkilizyaa ndiswe. Nokuba boobo, mbobakabisyila buyo, ndilyonya Leza wakaambilizya makanzaakwe aakucinca zintu zyakeelede kucitika akaambo kakutamvwa kwabo. Wakasyomezya kuti kwakali kuzyooboola “lunyungu,” walo wakazikuba Jesu Kristo.—Matalikilo 3:15; Ba-Roma 5:18.

Cili kuli umwi aumwi wesu kusala naa tulayanda kuyoogwasigwaa kuzuzikizigwa kwazisyomezyo zyakwe naa pe. Kutegwa tucite obo tweelede kukkazika moyo. Kutegwa litugwasye kwiiya kukkazika moyo kuli boobu, Ibbaibbele litukulwaizya kuzinzibala kuyeeya cikozyanyo camulimi. Ulasyanga mbuto alimwi weelede kulindila cakukkazika moyo akucita mbuli mbwakonzya kutegwa akwabilile zisyango zyakwe kusikila ciindi cakutebula. Eelyo kukkazika moyo kwakwe kulalumbulwa, lino ulatebula micelo njaakalilimina. (Jakobo 5:7) Imwaapostolo Paulo wakaamba zyamusyobo umbi wakukkazika moyo. Utuyeezya baalumi abanakazi basyomeka bamumazubaa kaindi. Bakali kulindila kuzuzikizigwa kwamakanze aa Leza, pele bakeelede kulindila ciindi ncaakabikkide Leza. Paulo utukulwaizya kwiiya cikozyanyo cabo, “bayookona Leza nzyaakasyomezya kwiindila mukusyoma akukkazika moyo kwabo.”—Bahibulu 6:11, 12, Ci.

Ee, kulindila ncintu citakonzyi kweelebwa mubuumi bwamuntu. Pele taceelede kuba cintu cituletela mapenzi lyoonse pe. Kuli baabo balindila kuzuzikizyigwa kwazisyomezyo zya Leza, kulindila kulakonzya kubaletela lukkomano. Balakonzya kucibelesya ciindi cakulindila kuba cakuyumya cilongwe cabo a Leza alimwi akucita milimo itondezya lusyomo lwabo. Alimwi kwiinda mumupailo, kwiiya alimwi akuzinzibala kuyeeya, balakonzya kusinizya kuti zyoonse Leza nzyaakasyomezya ziyoocitika aciindi ncasalide mwini.

Kabbokesi/[Zifwanikiso izili apeeji 5]

AMULICESYE PENZI LYA KULINDILA!

Amulibambilile limwi! Ikuti kamuzi kuti muyooyandika kulindila, amulibambile zyakubala, kulemba, kusuma naa kucita mulimo umwi ugwasya.

Amucibelesye ciindi eeci kuzinzibala kuyeeya, cintu cimwi ciyaabukatazya munyika eeyi bantu mobacita zintu cakubindaana.

Amubikke zimwi zyakubala afwaafwi aluwaile ikuti naa ngomwali kwaambaula limwi wamwaambila kuti mulindile; mumaminiti buyo aali osanwe antela ali kkumi, mulakonzya kubala mapeeji manji.

Ikuti kamuli banji nomulindila, amucibelesye ciindi eeci kuti kakukonzyeka kutalisya mibandi abamwi akubandikilana twaambo tuyaka ambabo.

Amube abbuku lyakulembela naa lyakubala mumootokala wanu ndyomunga mwabelesya ikuti kwaba kulindila nkomwatali kuyeeyela.

Amufwunye, amupumune naa kupaila.

KUZWIDILILA KULINDILA KANJIKANJI KUYEEME MBOMUZILANGA ZINTU ALIMWI AKUZIYEEYELA LIMWI.