“Ciindi Casika”!
“Ciindi Casika”!
“Ciindi cakwe casika kuti azwe munyika eyi aye kuli-Wisi.”—JOHANE 13:1.
1. Mboliyaabuswena afwaafwi Pobwe lya Pasika lyamu 33 C.E., mmakani nzi aazwide mu Jerusalemu, alimwi nkaambo nzi?
AALUBBAPATIZYO lwakwe mu 29 C.E., Jesu wakatalika bukkale bwakali kuyoosololela ku “ciindi” calufwu lwakwe, bubuke alimwi akulemezegwa. Ono nkuumatalikilo kwamupeyo wamu 33 C.E. Kwainda buyo nsondo zisyoonto kuzwa ciindi Nkuta Mpati yaba Juda noyakatalika makanze aakuti Jesu ajaigwe. Naamvwa muzeezo oyo kuli Nikodemo umwi wabaabo bamu Nkuta Mpati iwakali mulongwe wakwe, Jesu wazwa mu Jerusalemu akuunka muminzi mutala lya Mulonga wa Jordano. Iciindi ca Pobwe lya Pasika mbociyaabuswena afwaafwi, ibantu banji bazwa muminzi baya ku Jerusalemu, alimwi dolopo eli lyazula mpuwo iijatikizya Jesu. Ibantu balabuzyanya ategwa: “Ino mweezeezya buti? Sena takoozoosika kupobwe?” Ibapaizi bapati aba Farisi bayungizya kukkomana kwabantu kwiinda mukulailila kuti kufwumbwa uutiimubone Jesu weelede kubaambila nkwabede.—Johane 11:47-57.
2. Ncinzi Mariya ncaacita icaleta kutamvwana, alimwi ino kwiingula kwa Jesu kwakuti wakacita kabotu kutondezya nzi kujatikizya mbwaakacibwene “ciindi cakwe”?
2 Mu Nisani 8, kakuceede imazuba aali cisambomwi kacitanasika ciindi ca Pasika, Jesu walibonya mu Jerusalemu. Wasika ku Betaniya—ikwakali kukkala balongwe bakwe bayandwa ba Marta, Mariya alimwi a Lazaro—ibusena bulampa makkilomita aatandila kuli otatwe kunze aamunzi wa Jerusalemu. Ono muuli Bwasanu mangolezya, aboobo Jesu wacitila nkuko Sabata. Imangolezya aakatobela eelyo Mariya naakamunanika mafwuta aanunkilila kabotu alimwi aadula, basikwiiya batongooka. Jesu waingula kuti: “Amumuleke, alibambile buzuba bwakuzikwa kwangu. Nkaambo bacete muli abalo lyoonse, pele mebo pe, tamuli amebo lyoonse.” (Johane 12:1-8; Matayo 26:6-13) Jesu ulizyi kuti ‘ciindi cakwe casika cakuti azwe munyika eyi akuya kuli Wisi.’ (Johane 13:1) Kusyeede buyo mazuba osanwe ‘ulaaba buumi bwakwe kuti cibe cinunuzyo cakununuzya banji.’ (Marko 10:45) Kuzwa ciindi eco, Jesu wajata bubi muzintu zyoonse nzyacita anzyayiisya. Elo kaka ncikozyanyo cibotu kapati eci kulindiswe mbotulindila mamanino aabweende obu bwazintu! Amulange-lange cacitikila Jesu mubuzuba butobela.
Buzuba Bwakunjila kwa Jesu Cakuzunda
3. (a) Mbuti Jesu mbwaanjila mu Jerusalemu mu Nsondo mu Nisani 9, alimwi ino mbuti banamunji ibamucinga mbobalimvwa? (b) Mbwiinguzi nzi Jesu mbwaapa ba Farisi ibatongooka kujatikizya makamu-makamu aabantu?
3 Mu Nsondo, mu Nisani 9, Jesu waunka ku Jerusalemu cakusekelela kuzunda. Mbwaaswenena afwaafwi amunzi—katantide aamwanaa mbongolo mukuzuzikizya bbuku lya Zekariya 9:9—ibunji bwabantu ibaunka kuyoomucinga bayala zyakusama zyabo mumugwagwa, kakuli ibamwi batema matewo aazisamu akwaayala munzila yakwe. Boompolola balaamba: “Uli acoolwe uuboola muzina lya-Jehova”! Iba Farisi bamwi munkamu bayanda kuti Jesu abakasye kwaambaula basikwiiya bakwe. Pele Jesu waingula kuti: “Ncobeni ndamwaambila kuti na balaumuna aba, mabwe aloompolola.”—Luka 19:38-40; Matayo 21:6-9.
4. Nkaambo nzi munzi wa Jerusalemu ncowanyongana mbwaanjilila buyo Jesu?
4 Imvwiki zisyoonto buyo musyule, ibanji munkamu eyi bakamubona Jesu kabusya Lazaro. Ono aaba bazumanana kwaambila bamwi kujatikizya maleele aayo. Aboobo Jesu mbwaanjilila mu Jerusalemu, imunzi woonse wanyongana. Ibantu balimukubuzya kuti: “Ino ngwani oyu?” Imakamu-makamu aabantu aile kwaamba kuti: “Nguwenya Jesu musinsimi uuzwa ku-Nazareta waku-Galilaya”! Nobabona cili mukucitika, iba Farisi balyaambauzya cakuusa ategwa: “Ede inyika yoonse yamucilila.”—Matayo 21:10, 11; Johane 12:17-19.
5. Ncinzi cicitika Jesu naasika kutempele?
5 Mbubwenya mbuli cilengwa cakwe naswaya ku Jerusalemu, Jesu Mwiiyi Mupati, waunka kutempele kuyooyiisya. Ooko iboofwu abalemene balaboola kulinguwe, elyo wabaponya. Ibapaizi basimutwe abalembi nobabona ceeci akumvwa bana mutempele kaboongolola kuti, “Hosana ku-Mwana a-Davida”! bakalala kapati. Balaamba: “Sa teewamvwa aba ncibaamba?” Jesu waingula kuti: “Ii. Sa tamubalide kuti, Kuzwa kumilomo yatwana atunyonka wakalondola lutembaulo?” Mbwayaabuzumanana kuyiisya Jesu, walangisisya cili mukucitika mutempele.—Matayo 21:15, 16; Mark 11:11.
6. Mbuti bukkale bwa Jesu mbobwaimpana lino kuli boobo bwamusyule, alimwi ino nkaambo nzi?
6 Kwaba kwiimpana kupati kaka lino mubukkale bwa Jesu kweelena aboobo mbwaakajisi myezi ili cisambomwi musyule! Eelyo wakasika ku Jerusalemu ku Pobwe Lyazilawo “kutali kuya kulidunauna pele k[a]yubaila.” (Johane 7:10) Alimwi lyoonse wakali kubweza ntaamu kutegwa aloboke eelyo naakali muntenda. Lino wanjila caantangalala mumunzi oomo mumwaikide malailile aakuti ajatwe! Alimwi tiicakali cilengwa ca Jesu kulyaambilizya kuti ngo Mesiya. (Isaya 42:2; Marko 1:40-44) Kunyina naakaalyaambilizya caantangalala naa kwaambilizya kubantu bambi makani aalubide kujatikizya nguwe. Pele lino makamu-makamu aabantu ali mukumwaamba caantangalala kuti Mmwami alimwi Mmufwutuli—Mesiya—alimwi wakaka cakusinizya kulomba kwabeendelezi bazikombelo kwakuti abakasye kwaamba boobo! Ino nkaambo nzi zintu ncozyacinca boobu? Nkaambo “Ciindi casika ncati lemezegwe Mwana a-Muntu,” mbubwenya Jesu mbwaambilizya ibuzuba butobela.—Johane 12:23.
Kubweza Ntaamu Cabusicamba—Akupa Njiisyo Zipa Buumi
7, 8. Mbuti ntaamu Jesu nzyaabweza mu Nisani 10, 33 C.E. mbozitondezya ncaakacita mutempele kuciindi ca Pasika wamu 30 C.E.?
7 Naasika kutempele mu Muhhulo mu Nisani 10, Jesu wabweza ntaamu kujatikizya ncaakabona mu Nsondo kumazuba. Watalika ‘kutanda basambazi abaabo baulana muntempele, watapaula matafule aabasikucincana mali azyuuno zyabasikuuzya inziba, alimwi taazumizya naba muntu uuyumwide cintu kwiinda muntempele pe.’ Kasinganya basimucita zibi, waamba kuti: “Sa takulembedwe kuti, Iŋanda yangu inooambwa kuti niŋanda yakukombela yamasi oonse? Anu nywebo mwiicita kuti ibe ikoba lyababbi.”—Marko 11:15-17.
8 Ntaamu nzyaabweza Jesu zitondezya ceeco ncaakacita myaka yotatwe yainda naakaswayide kutempele ciindi ca Pasika wamu 30 C.E. Pele kusinganya lino kwayindila buya. Basambazi ibali mutempele lino baambwa kuti ‘mbabbi.’ (Luka 19:45, 46; Johane 2:13-16) Baambwa boobo akaambo kakuti babaambila mali manji kapati aabo ibayanda kuula banyama bakutuula. Bapaizi basimutwe, ibalembi alimwi abalupati-pati akati kabantu bamvwa ncali mukucita Jesu elyo alimwi bayandaula nzila zyakumujaya. Pele tabazi kabotu mbobanga bamujaya Jesu, mbwaanga ibantu boonse balilamidwe akuyiisya kwakwe alimwi bamutobela kufwumbwa nkwaaunka kutegwa bamuswiilile.—Marko 11:18; Luka 19:47, 48.
9. Nciiyo nzi Jesu ncaayiisya, alimwi mbwiite nzi mbwaambila basikumuswiilila mutempele?
9 Mbwayaabuzumanana Jesu kuyiisya mutempele, waambilizya kuti: “Ciindi casika ncati lemezegwe Mwana a-Muntu.” Inzya, ulizyi kuti ucijisi buyo mazuba masyoonto aakupona kali muntunsi. Naamanizya kuluula nseke yabulotwe mboyeelede kufwa kutegwa izyale zilyo zinji—calo icaamba kufwa kwakwe alimwi akuba nzila yakupa buumi butamani kuli bambi—Jesu watamba basikumuswiilizya, ulaamba: “Muntu uuli buti uundibelekela andicilile, eno nkwembede mebo, awalo simulimo wangu uyooba nkuko. Muntu uundibelekela awalo Taata uyoomulemeka.”—Johane 12:23-26.
10. Mbuti Jesu mbwaalimvwa kujatikizya lufwu lwakwe lucisa citaambiki ndwalangila?
10 Kayeeya lufwu lwakwe lucisa citaambiki lwalo luyandoocitika mumazuba one buyo, Jesu wazumanana ulaamba: “Eno muuya wangu ulipengede, nandilatinzi? Taata, undivune kuciindi cino.” Pele eco cimulindila Jesu kunyina mbocinga ceelebwa pe. Aboobo waamba kuti: “Nokuboobo, ncendazida kuciindi cino.” Masimpe, Jesu ulabuzuminizya bubambe boonse bwa Leza. Ukanzide kuti kuyanda kwa Leza kweendelezye micito yakwe yoonse kusikila kuciindi cakufwa lufwu lwakwe lwacituuzyo. (Johane 12:27) Taciliboteli kaka cikozyanyo ncaakatusiila—icikozyanyo cakulibombya cakumaninina kuluyando lwa Leza!
11. Ninjiisyo nzi Jesu nzyaayiisya makamu-makamu aabantu ibazwaa kumvwa jwi lyazwa kujulu?
11 Akaambo kakubikkila maanu kapati amboiyoojatikizigwa kapati mpuwo ya Wisi alufwu lwakwe, Jesu wapaila ulaamba: “Taata, lemya zina lyako.” Mpoonya icintu cagambya makamu-makamu oonse aabungene mutempele, kwamvwugwa jwi kuzwa kujulu, ilyaambilizya kuti: “Ndalilemya kale, ndiyoolilemya alimwi.” Mwiiyi Mupati wabelesya ciindi eci kuti aambile makamu-makamu aabantu kaambo ncolyamvwugwa jwi, iciyoocitika akaambo kalufwu lwakwe alimwi ancobeelede kusyoma. (Johane 12:28-36) Ee, mumazuba obile aayinda, Jesu wajisi bubi mumilimo minji kapati. Pele ibuzuba bupati kapati bucili kumbele.
Ibuzuba Bwakusinganya
12. Mbuti basololi bazikombelo mbobasola kumuca Jesu muli Bwabili, mu Nisani 11, pele ino ncinzi cacitika?
12 Muli Bwabili mu Nisani 11, Jesu alimwi waunka kutempele kuyooyiisya. Oko kuli abaswiilizi basinkondonyina. Kabaamba micito Jesu njaakacita mu Muhhulo, bapaizi basimutwe alimwi abapati bacisi bamubuzya kuti: “Ino mbwaminzi mbozicitya ezi? alimwi ngwani wakakupa bwami obu?” Mwiiyi Haazibwene wabaambila caantangalala mubwiinguzi bwakwe, alimwi waluula zikozyanyo zisalede zyotatwe—zyobile zijatikizya muunda wamasaansa alimwi icimwi ncapobwe lyabwiinga—zyalo zyayubununa mbobali babyaabi basikumukazya. Kabanyemede akaambo kanzyobamvwa, basololi bazikombelo bayanda kumujata. Pele bayoowa makamu-makamu aabantu aamuzyi Jesu kuti musinsimi. Aboobo bayanda kumuca kuti aambe cintu cimwi ncobayeeya kuti inga bamwaangila mpawo. Ibwiinguzi Jesu mbwaapa bwabaumuzya.—Matayo 21:23–22:46.
13. Ndulayo nzi Jesu ndwaambila baswiilizi bakwe kujatikizya balembi alimwi aba Farisi?
13 Mbwaanga balembi alimwi aba Farisi balyaamba kuti mbabacizi kuyiisya Mulawo wa Leza, Jesu lino waambila basikumuswiilila kuti: “Zintu zyoonse nzibamulailila amuzicite akuzijatisya, pele mutaciti mbuli incito zyabo, nkaambo balaamba buyo anukuti tabaciti pe.” (Matayo 23:1-3) Takulikomeneni kaka kusinganya kwaabuleya oku! Pele Jesu tanamanizya pe kubasinganya. Oobu mbobuzuba bwakwe bwamamanino kutempele, alimwi cabusungu waamba mulongo wamakani aakubayubununa bubi bwabo—wazikunununa zyoonse mbuli bupoomoka maanzi aamvwula yaguwo.
14, 15. Majwi nzi mayumu Jesu ngaasinganya balembi alimwi aba Farisi?
14 Kwaziindi zili cisambomwi Jesu waamba kuti: “Maawe inywe nubalembi aba-Farisi nubasikuupaupa ameso!” Baambwa boobo akaambo kakuti, mbubwenya mbwaapandulula, basinkila bantu ku Bwami bwakujulu, nkaambo aabo bayanda kunjila balabakasya. Aaba basikuupaupa ameso baleendeenda kulwizi amumanyika oonse kuti basandule muntu omwe, mpoonya mbwaasandukila buyo bamucita buzike kulunyonyooko lutamani. Kabatabikkili maanu ‘kumakani mapati aa-Mulawo, nkukuti lubeta aluzyalo alusyomo,’ babikkila maanu kapati kukupa cimanyakkumi. Aboobo basalazya buyo “atala akanywido ambede, pele mukati mulizwide lunyanzyo akutalyeendelezya” mukuti ikubola kwabo kwamukati kuyubide mukulemeka Leza kwabo kwakuupaupa ameso. Kunze lyaboobo, balilisungwide kuyaka zyuumbwe zyabasinsimi akuzibotya kutegwa kabaambwa kuti mbantu bajisi micito mibotu yakugwasya nokuba kuti ‘mbana babaabo ibakajaya basinsimi.’—Matayo 23:13-15, 23-31.
15 Kasinganya basinkondonyina akaambo kakubula zyeelelo kwabo munzila yakumuuya, Jesu waamba kuti: “Maawe inywe nubeenzyi boofu.” Mboofwu kujatikizya makani aabukkale akaambo kakuti babikkila maanu kapati aangolida yakutempele kwiinda mpindu yakumuuya yabusena obo bwakukombela. Jesu wazumanana amajwi aakwe aakusinganya aataliyumini. Wati: “Inywe nubazoka, nubana bacipile, mulakonzya buti kuloboka kukubetekwa kwa-Gehena”? Inzya, Jesu ubaambila kuti akaambo kakutobela bukkale bwabo bubyaabi, bayoonyonyweedwa limwi. (Matayo 23:16-22, 33) Aswebo atutondezye busicamba mukwaambilizya mulumbe wa Bwami neliba leelyo nokujatikizya kuyubununa bukombi bwakubeja.
16. Mbusinsimi nzi buyandika kapati Jesu mbwaapa basikwiiya bakwe nobakkede aa Cilundu ca Elaioni?
16 Lino Jesu wazwa mutempele. Mboliyabumulomba moombe zuba, walo abaapostolo bakwe batanta Cilundu ca Elaioni. Kabakkede acilundu eci, Jesu wapa businsimi bujatikizya lunyonyooko lwatemeple acizyibyo cakubako kwakwe alimwi acamamanino aabweende bwazintu. Impindu yamajwi aaya aabusinsimi yazumanana mane kusikila kuciindi cesu. Imangolezya ngoonaayo, Jesu waambila basikwiiya bakwe kuti: “Mulizi kuti, kwainda mazuba obile, kuzoosika ipobwe lya-Pasika, lino Mwana a-Muntu uzooabwa kuti abambulwe [acisamu cakupenzezya, NW.]—Matayo 24:1-14; 26:1, 2.
Jesu ‘Ulabayanda Bakwe Mane Kusikila Kumamanino’
17. (a) Nciiyo nzi Jesu ncaayiisya ibali 12 nobasekelela Pasika mu Nisani 14? (b) Nciibalusyo nzi Jesu ncaatalisya naamana kutanda Judase Iskariote?
17 Kwamazuba obile aatobela—Nisani 12 alimwi a 13—kunyina Jesu naalitondezya aantangalala pe kutempele. Basololi bazikombelo bali mukumuyandaula kutegwa bamujaye, elyo tayandi cintu cili coonse kumunyonganya kusekelela Pasika abaapostolo bakwe. Ikubbila kwazuba muli Bwane kwatalisya Nisani 14—ibuzuba bwamamanino bwabuumi bwa Jesu kali muntunsi aanyika. Imangolezyaayo, Jesu abaapostolo bakwe balibungene muŋanda imwi mu Jerusalemu ooko nkobabambilidwe kuti basekelele Pasika. Mbobalida Pasika antoomwe, wayiisya baabo ibali 12 iciiyo cibotu cakulicesya kwiinda mukusanzya matende aabo. Naamana kutanda Judase Iskariote iwazumina kwaaba Simalelaakwe amali aansiliva aali 30—imuulo wamuzike kweelana a Mulawo wa Musa—Jesu watalisya Ciibalusyo calufwu lwakwe.—Kulonga 21:32; Matayo 26:14, 15, 26-29; Johane 13:2-30.
18. Ninjiisyo nzi zimbi caluyando Jesu nzyaayiisya baapostolo bakwe basyomeka bali 11, alimwi ino wabagwasya buti kulibambila kuunka kwakwe kulaafwaafwi?
18 Kuzwa ciindi ncaatalisya Ciibalusyo, baapostolo bajatikizigwa mukuzwangana kupati kujatikizya weelede kutegwa ngomupati akati kabo. Muciindi cakubabwentela, cakukkazika moyo Jesu wabayiisya mbociyandika kubelekela bamwi. Kalumba kukakatila nkobakakatila anguwe mumasukusyo aakwe, wapangana cipangano cabwami ambabo. (Luka 22:24-30) Alimwi Jesu wabalailila kuti kabayandana mbubwenya walo mbwaabayanda. (Johane 13:34) Kacili muŋanda eyo, caluyando Jesu wabagwasya kuti balibambile kusyaala balikke mbwayandoobasiya lino-lino. Wabasyomezya kuti takooleka kubayanda, wabakulwaizya kuti kabasyoma alimwi wabasyomezya lugwasyo kwiinda mumuuya uusalala. (Johane 14:1-17; 15:15) Kabatana kuzwa muŋanda eyo, Jesu walomba Wisi kuti: “Ciindi casika. Lemya Mwanaako kuti awalo akulemye.” Ncobeni, Jesu wabagwasya baapostolo bakwe kuti balibambile kusyaala nkwaatiibasiye, alimwi ncobeni ‘ulabayanda bakwe mane kusikila kumamanino.’—Johane 13:1; 17:1.
19. Nkaambo nzi Jesu ncali mumapenzi kapati mumuunda wa Getesemane?
19 Kulangilwa kuti busiku buliindide aakaandabwe Jesu abaapostolo bakwe basyomeka ibali 11 nobasika kumuunda wa Getesemane. Wali kuunka oko lyoonse abaapostolo bakwe. (Johane 18:1, 2) Kulainda buyo mawoola masyoonto, Jesu ulafwa mbuli bujayigwa cigwebenga. Ikulibilika kwakupengana kupati eci nkocitilete alimwi ambocikonzya kusampaula Wisi kwamupenzya kapati Jesu cakuti naapaila inkasaalo yakwe yaba mbuli madosi aabulowa aawidaansi. (Luka 22:41-44) Jesu waambila baapostolo kuti: “Ciindi casika. . . . Amubone, . . . uundaaba waba afwiifwi.” Majwi kaacili mukanwa, Judase Iskariote wasika ankamu yabantu banji ibayumwide misunge amalampi alimwi azilwanyo. Bazya kuzyoojata Jesu. Tanaakaka pe. Wapandulula kuti: “Kwaba boobo, alalondolwa buti magwalo aamba kuti kweelede kuba boobu?”—Marko 14:41-43; Matayo 26:48-54.
Mwanaa Muntu Walemezyegwa!
20. (a) Mapenzi nzi aamucitikila Jesu naajatwa? (b) Nkaambo nzi Jesu ncaalilila kuti “Kulimanide” nokwasyeede ciindi cisyoonto buyo kuti afwe?
20 Nobamana kumujata, Jesu watamikizigwaa bakamboni bakubeja, wajaninwa mulandu ababetesi bampelenge, wapegwa mulandu walufwu kuli Pontiyo Pilato, waweelwaa bapaizi amakamu aabasikufwumpa alimwi wapukulwa akupenzegwa citaambiki abasikalumamba. (Marko 14:53-65; 15:1, 15; Johane 19:1-3) Kuzikusika akalangabwaaseme muli Bwasanu, Jesu wakankaminwa acisamu cakupenzezya alimwi walimvwida macise aataambiki eelyo kulema kwamubili wakwe mbokuzapaula nyama aazipulo mwiindide misomali mumaanzaakwe akuzituta. (Johane 19:17, 18) Kuzikusikaa ciindi ca 15:00 hrs, Jesu walila ulaamba: “Kulimanide”! Inzya, wamanizya zyoonse nzyaakaboolela kuzyoocita anyika. Kabikka muuya wakwe mumaanzaa Leza, wakotamika mutwe mpoonya wafwa. (Johane 19:28, 30; Matayo 27:45, 46; Luka 23:46) Mubuzuba bwatatu kuzwa leelyo, Jehova wamubusya Mwanaakwe. (Marko 16:1-6) Nokwainda mazuba aali 40 kuzwa naakabusigwa, Jesu waunka kujulu, aboobo walemezyegwa.—Johane 17:5; Incito 1:3, 9-12; Ba-Filipi 2:8-11.
21. Mbuti mbotunga twamwiiya Jesu?
21 Ino mbuti mbotunga ‘twaitobelesya mikondo ya Jesu’? (1 Petro 2:21) Mbubwenya mbuli nguwe, atulitakate kucita mulimo wakukambauka Bwami akugwasya bamwi kuba basikwiiya alimwi atube basicamba mukwaamba jwi lya Leza. (Matayo 24:14; 28:19, 20; Incito 4:2-31; Ba-Filipi 1:14) Tutalubi kubikkila maanu kujatikizya mazuba ngotupona naa kukakilwa kubusyanya-busyanya mukuyandana akucita milimo mibotu. (Marko 13:28-33; Ba-Hebrayo 10:24, 25) Izintu zyoonse nzyotucita azibe zeezyo zyeendelezyegwaa kuyanda kwa Jehova Leza alimwi lyoonse katuzyi kuti tukkede “kumamanino aaciindi.”—Daniele 12:4.
Ino Inga Mwaingula Buti?
• Iluzibo lwakajisi Jesu lwakuti lufwu lwakwe lwakali afwaafwi lwakamukulwaizya kucita nzi mumulimo wakwe wamamanino kutempele mu Jerusalemu?
• Ncinzi citondezya kuti ‘Jesu wakabayanda bakwe mane kusikila kumamanino’?
• Ncinzi zintu zyakacitika kakusyeede buyo mawoola masyoonto kuti Jesu afwe ncozitondezya kujatikizya nguwe?
• Mbuti mbotunga twamwiiya Kristo Jesu mumulimo wesu?
[Mibuzyo yaciiyo]
[Cifwanikiso icili apeeji 15]
Jesu “wakabayanda mane kusikila kumamanino”