Ikuyaka Mukwasyi Muyumu Munzila Yakumuuya
Ikuyaka Mukwasyi Muyumu Munzila Yakumuuya
“Amubalele mulwiiyo lwa-Mwami amumilazyo yakwe.”—BA-EFESO 6:4.
1. Ino Leza wakajisi makanze nzi kujatikizya mukwasyi, pele ino ncinzi cakacitika muciindi caboobo?
“AMUZYALISYE, muvule, muzuzye nyika akwiibombya.” (Matalikilo 1:28) Mumajwi aayo ngaakaambila ba Adamu a Eva, Jehova Leza wakatalisya mukwasyi. (Ba-Efeso 3:14, 15) Kabalanga zyakumbele, aabo banabukwetene bakusaanguna, mumizeezo yabo bakali kubona nyika iizwide lunyungu lwabo—imukwasyi mupati wabantu balondokede ibakkala antoomwe calukkomano anyika yaparadaiso alimwi ibakamantene mukukomba Mulengi wabo Mupati. Pele ba Adamu a Eva bakabisya, aboobo inyika kunyina noyakabombesyegwaa bantu baluleme alimwi ibayoowa Leza. (Ba-Roma 5:12) Muciindi caboobo, cakufwambaana ibuumi bwamumukwasyi bwakabija alimwi kusulaikana, kulwana alimwi ‘abusikancimwa’ zyaduma ikapati lino “kumazuba aakumamanino.”—2 Timoteo 3:1-5; Matalikilo 4:8, 23; 6:5, 11, 12.
2. Ino nzinzi nzyobakali kunga bacita bana ba Adamu, pele ino ncinzi cakali kuyandika ikutegwa bayake mukwasyi muyumu munzila yakumuuya?
2 Ba Adamu a Eva bakalengwa mucinkozya ca Leza. Nokuba kuti lino wakali mubisyi, Jehova wakamuzumizya Adamu kuzyala bana. (Matalikilo 1:27; 5:1-4) Mbubwenya mbuli usyi, ibana ba Adamu bakali kukonzya kubaa bukkale buli kabotu akwiiya kwiimpanya cintu cibotu acibi. Bakali kukonzya kuyiisyigwa mbwayelede kukombwa Mulengi wabo alimwi ambociyandika kapati kumuyanda amoyo wabo woonse, buumi, mizeezo alimwi anguzu. (Marko 12:30; Johane 4:24; Jakobo 1:27) Kunze lyaboobo, bakali kukonzya kuyiisyigwa “kucita bululami akuyanda luzyalo akweenda cakulibombya a-Leza.” (Mika 6:8) Pele akaambo kakuti bakali babisyi, bakeelede kubikkila maanu kapati kutegwa bayake mukwasyi muyumu munzila yakumuuya.
Amujane Ciindi
3. Mbuti bazyali mbobanga ‘bajana ciindi’ cakukomezya bana Ibanakristo?
3 Mumazubaano amapenzi alimwi aakatazya, kuyandika kusolekesya ikutegwa bana babe bantu ‘bayandisya Jehova’ alimwi ‘ibabusulide ncobeni bubi.’ (Intembauzyo 97:10) Ibazyali basimaanu ‘bayoojana ciindi’ cakubelesya kuzuzikizya mulimo oyu muyumu. (Ba-Efeso 5:15-17) Ikuti kamuli bazyali, ino eci inga mwacicita buti? Kusaanguna, amube aazintu nzyomweelede kusaanguna kucita, mubikkile maanu ‘kuzintu ziinda kubota,’ kubikkilizyaa kuyiisya bana banu. (Ba-Filipi 1:10, 11) Cabili, amubuubye-ubye bukkale bwanu. Inga cabota kuti mwazibikka ambali izintu zitayandiki kapati. Antela inga mwayandika kugusya mpasya izimumanina ciindi kulanganya. Mbomuli bazyali Banakristo, tamukausi pe kuti mwakamanina ciindi alimwi anguzu zyanu kukomezya bana bayoowa Leza.—Tusimpi 29:15, 17.
4. Mbuti mukwasyi mbounga wazumanana kaukamantene?
4 Ikwiizyaa bana banu, ikapati ciindi kwiizya kwanu nokujatikizya makani aakumuuya, cilayandika kapati alimwi nenzila imwi yiinda kubota iigwasya mukwasyi kuba uukamantene lyoonse. Pele eci mutaciciti cabuyamba pe. Amubikke ciindi cimwi ncomunoobelesya mukwiizya antoomwe. Eeci tacaambi kwiile kuba buyo muŋanda yomwe aumwi kacita cintu alikke kufwumbwa ncayanda. Bana balakomena kabotu eelyo umwi aumwi wambabo nabikkilwa maanu abuzuba. Luyando alimwi akulanganya zyeelede kutondezyegwa cakutasalaula. Neliba leelyo kabatana kusala kuzyala bana, banabubili bakwetene beelede kusaanguna kukkalaansi kutegwa balange-lange mukuli ooyu uuyandika kapati. (Luka 14:28) Ikuti bacita boobo, imukuli wakukomezya bana tabakaulangi kuba mukuli uuminya kuli mbabo pe. Muciindi caboobo, bayakucibona kuba coolwe cipati.—Matalikilo 33:5; Intembauzyo 127:3.
Amuyiisye Mukwaamba Amucikozyanyo
5. (a) Ino kuyiisya bana kuyanda Jehova kutalika buti? (b) Ndulayo nzi ndobapedwe bazyali kubbuku lya Deuteronomo 6:5-7?
5 Ikuyiisya bana banu kuyanda Jehova kutalikaa luyando ndomujisi nywebo kulinguwe. Ikumuyandisya Leza kuyoomukulwaizya kutobela malailile aakwe oonse cakusyomeka. Eeci cilajatikizyaa kulela bana “mulwiiyo lwa-Mwami amumilazyo yakwe.” (Ba-Efeso 6:4) Leza ulaya bazyali kuti beelede kuba cikozyanyo cibotu kubana babo, ikukanana ambabo alimwi akubayiisya. Ibbuku lya Deuteronomo 6:5-7 lyaamba kuti: “Uleelede kuyandisya Jehova Leza wako amoyo wako woonse, amuuya wako woonse, anguzu zyako zyoonse. Nkabela aya majwi ngendamulailila buzuba obuno abe amyoyo yanu. Muleelede kwaaiyisya bana banu, akwaambaula ngawo lyoonse, ciindi cakukala muŋanda aciindi cakweenda munzila, ciindi cakoona aciindi cakubuka.” Kwiinda mukubalaya lyoonse alimwi cakwiindulula-indulula, mulakonzya kusitikizya milawo ya Leza mubana banu. Aboobo, ibana banu bayoolubona luyando ndomujisi kuli Jehova, alimwi abalo bayookulwaizyigwa kubaa cilongwe anguwe.—Tusimpi 20:7.
6. Mbuti bazyali mbobanga bakabelesya kabotu ikaambo kakuti bana balaiya kwiinda mucikozyanyo?
6 Bana balayandisisya kwiiya. Mbantu baswiililisya, ibalangisisya alimwi balafwambaana kwiiya cikozyanyo canu. Nobabona kuti tamuli bantu bayandisisya zintu zyakumubili, eci cibagwasya ikwiiya mbobeelede kutobela lulayo lwa Jesu. Mubayiisya kutalibilika azintu zyakumubili pele ‘kusaanguna kuyandaula Bwami bwa-Leza.’ (Matayo 6:25-33) Kwiinda mukubaa mibandi mibotu alimwi iikulwaizya kujatikizya kasimpe kamu Bbaibbele, mbungano ya Leza alimwi abaalu babikkidwe, muyiisya bana banu ikulemeka Jehova akuzibona kuti zilaampindu zipego zyakumuuya nzyapa. Mbwaanga bana balafwambaana kubona kuteendelana, imalailile ngomupa ayelede kweendelanaa mbomulilemeka akulanga zintu ikutondezya kuti zintu zyakumuuya zilaampindu kapati kulindinywe. Ncilongezyo cipati akaka eelyo bazyali nobabona cikozyanyo cabo cibotu kacikulwaizya bana babo kumuyanda Jehova camoyo woonse!—Tusimpi 23:24, 25.
7, 8. Ncikozyanyo nzi citondezya mpindu yakuyiisya bana kuzwa kubwana, alimwi ino nguni weelede kulumbwa akaambo kakuzwidilila kucitika?
7 Impindu yakuyiisya bana kuzwa kubwana ilakonzya kubonwa mucikozyanyo cakucisi ca Venezuela. (2 Timoteo 3:15) Cijatikizya banabukwetene bacili bana-bana ba Félix alimwi a Mayerlín. Mbabelesi bapainiya. Imwanaabo musankwa wazina lya Felito naakazyalwa, bakakanzide kubeleka canguzu kapati kumukomezya kali mukombi wini-wini wa Jehova. Icakupozya, Mayerlín wakatalika kubalila Felito kuzwa mu Ibbuku Lyangu Lyamakani aa-Bbaibbele, ilyakamwaigwaa Bakamboni ba Jehova. Kacili muvwanda, Felito wakali kulibonya kuti ulimuzyi Musa abantu bambi bazekaudwe muzifwanikiso zyamubbuku eeli.
8 Kacili mwana kapati, Felito wakatalika kukambauka cakuliyandila alikke. Wakaizuzikizya mbaakani njaakajisi yakuba sikumwaya wa Bwami alimwi kumbele wakabbapatizigwa. Mukuya kwaciindi, Felito wakaba mupainiya waciindi coonse. Bazyali bakwe baamba kuti: “Mbotulangilila kuyaambele kwamwaneesu, tulamulumba kapati Jehova kuti malailile aakwe akatugwasya.”
Amubagwasye Bana Kuyaambele Munzila Yakumuuya
9. Nkaambo nzi ncotweelede kulumba kujatikizya malailile aakumuuya ngotutambula kwiinda muciinga camuzike musyomesi uucenjede?
9 Kuli mamagazini manji, myaanda-myaanda yamabbuku alimwi azyuulu-zyuulu zyamasena aa Internet izijisi lulayo kujatikizya mbobeelede kukomezyegwa bana. Imagazini yaalubazu imwi iyaamba makani aabana iya Newsweek yaamba kuti ikanjikanji “imakani ayo aajanika alakazyanya. Alimwi cilaindila kuzyinga naa kukopa eelyo imakani ngomuyeeyela kuti alasyomeka naajanika kuti ngakubeja.” Tulalumba kapati kaka kuti Jehova watulongezya kapati kujatikizya malailile akweendelezyegwa kwamikwasyi munzila yakumuuya! Sena mulazibelesya zipego zyoonse izyaabilwa kwiinda muciinga camuzike musyomesi uucenjede?—Matayo 24:45-47.
10. Mbuti ciiyo ca Bbaibbele camukwasyi icicitwa kabotu mbocibagwasya bazyali alimwi abana?
10 Cintu cimwi ciyandika kapati nkubaa ciiyo ca Bbaibbele camukwasyi cicitwa lyoonse alimwi iceendelezyegwa kabotu cakuti boonse kabalikwayide. Ikutegwa cibe ciiyo cigwasya, cikkomanisya alimwi cikulwaizya, ikulibambila kabotu kulayandika kapati. Ibazyali balakonzya kuzyiba izili mumyoyo amizeezo yabana babo kwiinda mukubabuzya mibuzyo iipa kuti baambe mbuli mbobalimvwa. Inzila imwi mbomunga mwazyiba naa ciiyo camukwasyi cilaampindu nkwiinda mukubona naa banamukwasyi boonse balacilangila caluyandisisyo iciiyo citobela.
11. (a) Nimbaakani nzi ibazyali nzyobanga bagwasya bana babo kubaanzizyo? (b) Ncinzi cakacitika eelyo musimbi umwi waku Japan naakazuzikizya mbaakani yakwe?
11 Azyalo mbaakani zyamu Magwalo zipa kuti mukwasyi uyume munzila yakumuuya alimwi ibazyali beelede kugwasya bana babo kubaa mbaakani eezi. Imbaakani ziyandika zibikkilizya kubala Bbaibbele abuzuba, ikuba sikumwaya wamakani mabotu lyoonse alimwi akuyaambele kusika kukulyaaba akubbapatizigwa. Imbaakani zimbi zilakonzya kubikkilizya zeezyo zyakubeleka mulimo waciindi coonse kabali bapainiya, ku Beteli naa kabali bamisyinali. Naakacili kucikolo capulaimali, imusimbi umwi waku Japan wazina lya Ayumi wakalibikkila mbaakani yakukambaukila boonse mbocakali kwiiya limwi mucikolo. Ikutegwa bayi bakwe alimwi ambocakali kwiiya limwi mucikolo babikkile maanu, wakalomba kuti bamuzumizye kubikka mabbuku manji-manji aapandulula Bbaibbele mulaibbulali. Akaambo kaceeci, wakatalika kweendelezya ziiyo zya Bbaibbele izili 13 mumyaka iili cisambomwi njaakali kucikolo cakupulaimali. Omwe akati kabasikwiiya Bbaibbele aabo alimwi abambi botatwe mumukwasyi wasikwiiya oyo bakaba Banakristo babbapatizidwe.
12. Mbuti bana mbobanga bagwasyigwa kapati amiswaangano ya Bunakristo?
12 Acimbi ciyandika kapati kutegwa mukwasyi kauli muyumu munzila yakumuuya nkujanika lyoonse kumiswaangano. Imwaapostolo wakalaya basyominyina ‘kutaleka kulibunga-bunga, mbuli bamwi mbubakajisi cilengwa eeco.’ Atubone kwaamba kuti tiitwabaa cilengwa eco, akaambo kakuti bakubusi alimwi abapati balagwasyigwa kapati eelyo nobajanika lyoonse kumiswaangano ya Bunakristo. (Ba-Hebrayo 10:24, 25; Deuteronomo 31:12) Bana beelede kuyiisyigwa kubikkila maanu nobaswiilila. Akwalo kulibambila miswaangano kulayandika kapati, ikutegwa muntu agwasyigwe cini-cini weelede kutola lubazu kwiinda mukwiingula. Nokuba kuti mwana muniini inga watalika kwiingula kwiinda mukubala mabala masyoonto naa kabeela kamuncali, inga cainda kugwasya ikuti bana bayiisyigwa kulijanina bwiinguzi alimwi akuvwiila mumajwi aabo beni. Sena nywebo nobazyali mupa cikozyanyo cibotu kwiinda mukwiingula lyoonse alimwi akubelesya bwiinguzi bugwasya? Alimwi cilayandika kuti umwi aumwi mumukwasyi kajisi Bbaibbele lyakwe limugeme, ibbuku lyanyimbo alimwi abbuku lili mukubelesyegwa mumubandi woonse uujatikizya Magwalo.
13, 14. (a) Nkaambo nzi bazyali ncobeelede kubelekaa bana babo mumulimo? (b) Ncinzi ciyoopa kuti mulimo wamumuunda ube uugwasya alimwi uubakkomanisya bana?
13 Ibazyali basongo bayookulwaizya bana babo kubelekela Jehova nobacili bakubusi, ikubagwasya kubona mulimo wakukambauka kuba cintu ciyandika kapati mubuumi bwabo. (Ba-Hebrayo 13:15) Lilikke eelyo ibazyali nobabelekaa bana babo mumulimo nobakonzya kusinizya kuti bana babo banoojisi lwiiyo luyandika lukonzya kubagwasya kuba babelesi ‘batakwe cintu cibausya insoni, ibapandulula makani aalusinizyo mbukweelede.’ (2 Timoteo 2:15) Aboobo, ino mbuti kujatikizya ndinywe? Ikuti kamuli bazyali, sena mulabagwasya bana banu kulibambila kuya mumulimo wamumuunda? Ikucita boobu kuyoobapa kukkomana mumulimo wabo, uyoobabeda mulimo uugwasya alimwi uulaampindu kapati.
14 Nkaambo nzi ncocigwasya kuti bazyali abana babo kababeleka antoomwe mumuunda? Munzila eyi, ibana balakonzya kubona alimwi akwiiya cikozyanyo cabazyali babo cibotu. Alimwi, ibazyali balakonzya kubona mbobaulanga, mbobalilemeka alimwi anzyobakonzya kucita bana babo. Amubone kwaamba kuti mwabatolelezya bana banu mumbazu ziindene-indene zyamulimo. Ikuti kacikonzyeka, amubone kwaamba kuti mwana umwi aumwi ulijisi coola cakwe camubukambausi cimugeme, alimwi amumuyiisye kucilanganya kabotu kutegwa kacisumbula lyoonse. Kwiinda mukuzumanana kubayiisya lyoonse alimwi akubakulwaizya bana, bayooukkomanina kapati mulimo, alimwi kukambauka banookubona kuba nzila mobakonzya kutondezya luyando ndobajisi kuli Leza alimwi akuli basimukobonyina.—Matayo 22:37-39; 28:19, 20.
Amuzumanane Kuyuma Munzila Yakumuuya
15. Mbwaanga ikuzumanana kuyumya mukwasyi munzila yakumuuya kulayandika kapati, ino ninzila nzi zimwi zyapegwa mbocinga cacitwa eci?
15 Ikuzumanana kuyumya mukwasyi munzila yakumuuya ncintu ciyandika kapati. (Intembauzyo 119:93) Inzila imwi yakucita boobu nkubandika zintu zyakumuuya lyoonse amukwasyi wanu. Sena mulabandika ambabo lugwalo lwabuzuba lwamu Bbaibbele? Sena ncilengwa canu kubandika zyakucitika zyamumulimo wamumuunda naa twaambo tumwi kuzwa mumamagazini mapya aa Ngazi Yamulindizi alimwi Awake! “aciindi cakweenda munzila”? Sena mulayeeya kulumba Jehova buzubaa buzuba nomuli baumi akaambo kazipego zyakwe zitalivwulili “ciindi cakoona aciindi cakubuka”? (Deuteronomo 6:6-9) Eelyo bana banu nobabona luyando ndomujisi kuli Leza kalutondezyegwa muzintu zyoonse nzyomucita, eci ciyoobagwasya kucita zintu kweendelanaa kasimpe.
16. Ino cilaampindu nzi ikukulwaizya bana kulivwuntauzizya makani beni?
16 Zimwi ziindi, bana inga bayandika busolozi kujatikizya mbobanga bacita ikutegwa bazwidilile mumapenzi naa bukkale bumwi bubacitikila. Muciindi cakubaambila ncobeelede kucita lyoonse, ino kayi mulekela nzi kubatondezya mbokujanwa makani aajatikizya mbwaalanga makani ayo Leza kwiinda mukubakulwaizya kulivwuntauzizya beni? Ikuyiisya bana kuzibelesya kabotu zibelesyo zyoonse alimwi amabbuku aapegwa kwiinda ‘mumuzike musyomesi’ kuyoobagwasya kubaa cilongwe cisumbula a Jehova. (1 Samuele 2:21b) Alimwi eelyo nobaambila bamwi mumukwasyi kujatikizya buvwuntauzi bwamu Bbaibbele mbobakacita, ikuyuma kwamukwasyi munzila yakumuuya kulayungizyigwa.
Amumusyomesye Jehova Lyoonse
17. Nkaambo nzi bazyali bakomezya bana kabali balikke ncobateelede kutyompwa caboola kukukomezya bana babo kabali Banakristo?
17 Ino mbuti balo bazyali bali balikke mbobanga babaa mukwasyi muyumu munzila yakumuuya? Aaba bajisi buyumuyumu bwiindilide caboola kukukomezya bana. Nokuba boobo, nobazyali nomuli molikke tamweelede kutyompwa pe! Mulakonzya kuzwidilila, mbubwenya mbokutondezyegwaa zikozyanyo zyabazyali bali balikke banji balo ibasyoma muli Leza, ibalutobela lulayo lwakwe cakumaninina, aabo bacikonzya kukomezya bana babotu alimwi ibayumu munzila yakumuuya. (Tusimpi 22:6) Camasimpe, ibazyali Banakristo bali balikke beelede kumusyoma kapati Jehova. Beelede kubaa lusyomo lwakuti uyoobagwasya.—Intembauzyo 121:1-3.
18. Nzintu zili buti zyamumizeezo alimwi azyakumubili nzyobayandika bana zyalo nzyobeelede kubikkila maanu bazyali, pele ino nzintu nzi zyeelede kubikkwa mubusena butaanzi?
18 Ibazyali basongo balizyi kuti ‘kuli ciindi cakuseka aciindi cakuzyana.’ (Mukambausi 3:1, 4) Izintu ziyandika mukweendelezya kabotu mizeezo amubili wamwana nkulyookezya alimwi akusobana ikuli kabotu. Inyimbo ziyumya alimwi ikapati ikwiimba nyimbo zyakutembaula Leza kuyoogwasya mwana ikubaa kulanga kubotu kwalo ikuyandika kapati mukuyumya cilongwe cakwe a Jehova. (Ba-Kolose 3:16) Alimwi ciindi cabukubusi nceciindi cakulibambila kuba muntu uunooyoowa Leza kubupati, ikutegwa buumi buli kabotu bukazumanane kukabe kutamani anyika yaparadaiso.—Matalikilo 6:8.
19. Nkaambo nzi bazyali ncobanga basyoma kuti Jehova uyoobalongezya mukusoleka nkobacita mukukomezya bana babo?
19 Jehova uyanda kuti mikwasyi ya Bunakristo yoonse izwidilile kaili miyumu munzila yakumuuya alimwi kaikamantene. Ikuti katumuyanda ncobeni Leza alimwi akusoleka munzila zyoonse kutobela Jwi lyakwe, uyookulongezya kusoleka kwesu alimwi uyootupa nguzu ziyootugwasya kutobela busolozi bwakwe bwakasololelwaa muuya. (Isaya 48:17; Ba-Filipi 4:13) Kamuyeeya kuti icoolwe ncomujisi lino cakuyiisya bana banu kuli mpocigolela alimwi tacikaindulukwi pe. Amusoleke kusikila mpomugolela ikutobela lulayo lwa Jwi lya Leza, eelyo Jehova uyookulongezya kusoleka nkomucita mukuyaka mukwasyi muyumu munzila yakumuuya.
Ino Twaiya Nzi?
• Nkaambo nzi ncokuyandika kapati ikujana ciindi cakuyiisya bana?
• Nkaambo nzi bazyali ncobayandika ikupa cikozyanyo cibotu?
• Ninzila nzi zimwi ziyandika mukugwasya bana kukomena munzila yakumuuya?
• Mbuti kuyuma kwamukwasyi munzila yakumuuya mbokunga kwazumananwa?
[Mibuzyo yaciiyo]
[Zifwanikiso izili apeeji 20, 21]
Mikwasyi miyumu munzila yakumuuya ilaiya Jwi lya Leza, ilajanika kumiswaangano ya Bunakristo alimwi ilatola lubazu mumulimo aantoomwe