Mulakonzya Kubaa Lusyomo Lwini-Lwini

Iciindi Sarah Jayne naakali amyaka yakuzyalwa iili 19, wakazyooziba kuti wakajisi bulwazi bwakkansa kucibeela cibambilwa mayi aabukaintu (ovary). Naakamana kwaandulwa, wakalimvwa kabotu alimwi wakabona kuti buumi bwakumbele bwakali kukonzyeka. Naakasisya myaka yakuzyalwa iili 20, wakayandanaa musankwa akutalika kulibambila zyamucado wakwe. Mumwaka nguwenya ooyu bulwazi bwakkansa bwakakomena, eelyo wakaziba kuti wakajisi buyo nsondo zili mbozibede zyakupona. Sarah Jayne wakafwa mu June mwaka wa 2000, kakusyeede buyo asyoonto kuti abaamyaka iili 21.

ICINTU cakali kugambya bantu bakali kuswaya Sarah Jayne abulo bwakwe mucibbadela lwakali lusyomo lwakwe lwakasitikide kujatikizya zyakumbele kubikkilizyaa lusyomo luyumu muli Leza alimwi amu Jwi lyakwe, Ibbaibbele. Nokuba kuti wakali mumapenzi mapati ali boobu, wakalisinizizye mubulangizi bwabubuke—ikuti uyakubabona boonse balongwe bakwe alimwi. (Johane 5:28, 29) Wakaamba kuti: “Ndiyakumubona nyoonse munyika mpya ya Leza.”

Bamwi tababikkili maanu kulusyomo luli boobo, bayeeya kuti ndwakubeja. Ludovic Kennedy ubuzya kuti, “Ino ndwaanzi lusyomo kujatikizya buumi lwainda lufwu? Sena taluli lwabaabo balikke bapengede kutegwaa balo kumamanino kukabe budodoodo alimwi akulizya myeembo, kuti kumwi buyo kubusena bwa Edeni buzwide matu mabotu bakabe aalubazu kulukkomano lwamaola manji abaabo bakafwa kabatana alimwi abamwi balangilwa kufwa balo kabafwide kale?” Kujatikizya kaambo aaka, tulakonzya kubuzya mubuzyo kutondezya kuti tatuzumini. Ncili ciinda kumvwika—kusyoma kuti “oobu mbobuumi mbotujisi buyo bulikke, aboobo cilainda kugwasya kububelesya kusikila aagolela nguzu zyesu,” kweelanaa kwaamba kwa Kennedy naa kusyoma  muli Leza alimwi acisyomezyo cakwe cabubuke? Sarah Jayne wakasala kaambo kamamanino. Ino wakalujana buti lusyomo luli boobo?

‘Amuyandaule Leza . . . Akumujana Ncobeni’

Ikutegwa mubaa lusyomo mumuntu umwi, mweelede kumuziba alimwi akwiiya kujatikizya mbwayeeya akucita zintu. Intaamu eeyi ijatikizya moyo kubikkilizyaa mizeezo. Masimpe, cilikozyenye caboola kukukomezya lusyomo lwini-lwini muli Leza. Mweelede kumuziba, kwiiya kujatikizya bube bwakwe alimwi ambwabede kutegwa muzibe mbwaali kusyomeka muzintu zyoonse nzyaakaamba alimwi akucita.—Intembauzyo 9:10; 145:1-21.

Bamwi bayeeya kuti eeci tacikonzyeki pe. Balaamba kuti Leza uli kule alimwi nciyumu kapati kumvwisya naa nkwali ncobeni. Imuntu umwi uutasyomi wakabuzya kuti: “Ikuti Leza kali mwini-mwini mbuli mbwalibonya kuba ku Banakristo mbuli Sarah Jayne, nkaambo nzi ncatalizibyi kulindiswe toonse?” Pele sena ncobeni Leza uli kule kapati cakuti takonzyi kujanika? Mumubandi abasyaabusongo ku Atene, imwaapostolo Paulo wakaamba kuti, “Leza uwakalenga nyika azintu zyoonse izili mumo” alimwi wakapa zintu zyoonse ziyandika kutegwa ‘bamuyandaule . . . akumujana ncobeni.’ Mubwini Paulo wakaamba kuti: “Tali kule kuluumwi umwi wesu.”—Incito 17:24-27.

Pele, ino mbuti mbomukonzya ‘kumuyandaula Leza akumujana ncobeni’? Bamwi bakacita oobo kwiinda mukulanga bubumbo bubazingulukide. Kubantu banji, bubumbo bulikke bubapa bumboni buzwide bwakuti kweelede kuba Mulengi. * (Intembauzyo 19:1; Isaya 40:26; Incito 14:16, 17) Balimvwa mbwaakalimvwa mwaapostolo Paulo kuti, “makani aakwe [Leza] aatabonwi alaboneka kukumvwigwa kuncito zyakwe, nkukuti inguzu zyakwe abu-Leza bwakwe zitamani.”—Ba-Roma 1:20; Intembauzyo 104:24.

Muyandika Bbaibbele

Nokuba boobo, ikutegwa muyake lusyomo lwini-lwini ku Mulengi, muyandika cimwi cintu ncaakapa. Ino ncinzi eeco? Ndi Bbaibbele—Ijwi lyakasololelwaa Leza mwalo mwayubunwide kuyanda kwakwe alimwi amakanzaakwe. (2 Timoteo 3:16, 17) Bamwi balakonzya kubuzya kuti, “mbuti mbomukonzya kusyoma zyoonse Ibbaibbele nzyolyaamba kakuli mubona zintu zibyaabi zicitwaa bantu balyaamba kutobela Bbaibbele?” Masimpe, Kristendomu ulaa mpuwo iikankamanisya yakuupaupaa meso, ilunya alimwi akutalilemeka kabotu. Pele kufwumbwa muntu uyeeya ulakonzya kubona kuti Kristendomu ulipeekezya buyo kutobela zyeelelo zyamu Bbaibbele.—Matayo 15:8.

Ibbaibbele kuligama lyakacenjezya kuti bantu banji bayakulitaminina kuti bakomba Leza, pele mubwini “bayootama naba Mwami wabo uwakabanununa.” Imwaapostolo Petro wakaamba kuti, “nkaambo kabaaba inzila yabwini iyoosampaulwa.” (2 Petro 2:1, 2) Jesu Kristo wakaamba kuti, ibali boobu “[mbaasi]mucita zibi” ibakali kuyoozibwa kwiinda mumicito yabo mibi. (Matayo 7:15-23) Ikukaka Jwi lya Leza akaambo kampuwo mbyaabi Kristendomu njajisi ceelene buyo akusowa lugwalo luzwa kumulongweesu uusyomeka akaambo buyo kakuti waluleta ujisi mpuwo mbyaabi.

Ikuti kakunyina Jwi lya Leza, nciyumu kuyaka lusyomo lwini-lwini. Nkwiinda mu Bbaibbele mwalo Jehova mwatondezya makanzaakwe muzintu. Ulayubununa bwiinguzi kumibuzyo iibuzigwa lyoonse mbuli ncalekelede kupenga, macise alimwi ancayoocita kujatikizya bukkale oobu. (Intembauzyo 119:105; Ba-Roma 15:4) Sarah Jayne wakazi kusyoma kuti, Ibbaibbele ndi Jwi lyakasololelwaa Leza. (I Ba-Tesalonika 2:13; 2 Petro 1:19-21) Munzila nzi? Takuli kuti wakatobela bazyali bakwe bakamwaambila kuti asyome, pele nkaambo kakuti wakajana ciindi cakulanga-langa akusinizya bumboni boonse butondezya Ibbaibbele kuba majwi aalibedelede aayubunwidwe kuzwa kuli Leza. (Ba-Roma 12:2) Mucikozyanyo, wakalanga-langa kujatikizya nguzu nzyolijisi Bbaibbele mubukkale bwabaabo batobela zyeelelo zyandilyo. Kwiinda mukugwasigwaa mabbuku mbuli The Bible—God’s Word or Man’s?, * wakalanga-langa ibupati bwabumboni buli mulindilyo businizya kuti lyakasololelwaa Leza.

‘Lusyomo Luzwa Kuzintu Zimvwugwa’

Nokuba boobo, tacigoleli buyo akwiile kubaa  Bbaibbele naa kusyoma kuti lyakasololelwaa Leza. Imwaapostolo Paulo walemba kuti, “Lusyomo lulaba mumuntu namvwa.” (Baloma 10:17, Ci) Nkuswiilila Bbaibbele coolyamba kunga kwayaka lusyomo, ikutali kubaandilyo buyo pe. Mulaswiilila eeco Leza ncayanda kwaamba kwiinda mukubala alimwi akwiiya Jwi lyakwe. Nobaba bana balakonzya kucita oobo. Paulo waamba kuti, Timoteo wakayiisigwaa “magwalo aasalala” abanyina alimwi abakaapanyina ‘kuzwa kuciindi naakacili muvwanda.’ Sena eeci caamba kuti kwakali kusinikizyigwa kumwi kwakajatikizidwe? Peepe! Timoteo kunyina naakasungilizyigwa naa kweenwa munzila iili yoonse pe. ‘Wakazizuminisya’ eezyo nzyaakamvwa alimwi akubala.—2 Timoteo 1:5; 3:14, 15.

Sarah Jayne wakazuminisya munzila iikozyenye. Mbubwenya mbuli bana Bereya bamumwaanda wamyaka wakusaanguna, ‘wakaatambula makani kubazyali bakwe alimwi abamayi bamwi amoyo uulibambide kabotu.’ Kacili muniini, inga tatudooneki buya kuti wakali kuzisyoma kapati zintu bazyali bakwe nzyobakali kumwaambila. Ono mbwaakali kuyaabukomena, kunyina nakayile kusyoma kufwumbwa nzyaakali kuyiisigwa. Wakali ‘kulingaula Magwalo mazuba oonse, kubona kuti naa zintu ezi mbozibede.’—Incito 17:11.

Mulakonzya Kuyaka Lusyomo Lwini-Lwini

Andinywe mulakonzya kuyaka lusyomo lwini-lwini, lwalo mwaapostolo Paulo ndwaakapandulula mulugwalo lwakwe ku Banakristo bana Hebrayo. Wakaamba kuti, lusyomo luli boobo “nkutadonaika azintu nzyotulangila akusinizya kuti zintu nzyotutaboni nkozili ncobeni.” (Bahibulu 11:1, Ci) Ikuti kamujisi lusyomo luli boobo, muyooba masimpe kuti bulangizi bwanu boonse kubikkilizyaa cisyomezyo ca Leza cabubuke ziyoocitika ncobeni. Muyoosyoma kuti bulangizi buyeeme azisyomezyo zyancobeni kutali kulombozya buyo kuti bulangizi buli boobo buyoozuzikizigwa. Muyooziba kuti Jehova kunyina naakaalidwe kubamba zisyomezyo zyakwe. (Joshua 21:45; 23:14; Isaya 55:10, 11; Ba-Hebrayo 6:18) Nyika ya Leza mpya njaakasyomezya inooli iini-ini kulindinywe mbuli kuti nkoili kale. (2 Petro 3:13) Alimwi muyoobona kabotu-kabotu ameso aanu aalusyomo kuti Jehova Leza a Jesu Kristo mbantu beni-beni kubikilizyaa Bwami bwa Leza tabuli bwakulengelezya buya.

Tiimwacaala buyo kakunyina lugwasyo mukuliyakila lusyomo lwini-lwini. Jehova watupa Jwi lyakwe. Kunze lyaboobo wabika mbungano ya Bunakristo nyika yoonse iilyaabide kugwasya babombe myoyo kuyaka lusyomo muli Leza. (Johane 17:20;  Ba-Roma 10:14, 15) Amutambule lugwasyo loonse Jehova ndwapa kwiinda mumbunga eeyo. (Incito 8:30, 31) Alimwi mbwaanga lusyomo mucelo wamuuya uusalala wa Leza, amupailile muuya ooyo cakusinizya kuti umugwasye kuyaka lusyomo lwini-lwini.—Ba-Galatiya 5:22.

Mutabi nomutyompokezyegwaa abantu batasyomi balo basampaula kufwumbwa ooyo uutondezya lusyomo muli Leza alimwi a Jwi lyakwe. (1 Ba-Korinto 1:18-21; 2 Petro 3:3, 4) Mubwini, lusyomo lwini-lwini lulayandika kapati mukuyumya makanzaanu kukukazyigwa kuli boobu. (Ba-Efeso 6:16) Eeco Sarah Jayne wakacibona kuba camasimpe alimwi lyoonse wakabayumya-yumya aabo bakali kumuswaya mucibbadela kuti bayake lusyomo lwabo. Lyoonse wakali kwaamba kuti, “Amucite kasimpe kuba kanu, amwiiye Jwi lya Leza, amukakatile kumbunga ya Leza, amupaile lyoonse alimwi amube basungu mumulimo wa Jehova.”—Jakobo 2:17, 26.

Naakabona lusyomo lwakwe muli Leza alimwi amubulangizi bwabubuke, umwi nasi wakali kumulanga wakaamba kuti: “Masimpe ulacisyoma eeci, tee mbombubo.” Naakabuzigwa cakamupa kubaa bulangizi buli boobo businizizye nokuba kuti wakali mumapenzi, wakayingula kuti: “Ndusyomo muli Jehova. Mulongwaangu mwini-mwini alimwi ndilamuyanda kapati.”

Bupanduluzi buyungizidwe

[Cifwanikiso icili apeeji 6]

Timoteo wakayiisigwa “magwalo aasalala” abanyina alimwi abakaapanyina ‘kuzwa kuciindi naakali mwana’

[Cifwanikiso icili apeeji 6]

Bana Bereya bakalumbaizigwa akaambo kakulingaula Magwalo mazuba oonse

[Kulumba]

Kuzwa ku “Photo-Drama of Creation” yamu 1914

[Zifwanikiso izili apeeji 7]

Nkuswiilila alimwi akutobela Bbaibbele coolyamba kunga kwayaka lusyomo kutali kubaandilyo buyo

[Zifwanikiso izili apeeji 7]

“Ndiyakumubona nyoonse munyika ya Leza mpya”