Mibuzyo Yabasikubala

Sena malailile aa Leza aalembedwe kubbuku lya Jeremiya 7:16 aamba kuti Banakristo tabeelede kupailila muntu wakagusyigwa mumbungano ya Banakristo akaambo kakuti ngu sizibi uuteempwi?

Jehova naakamana kwaamba mbeta zyakwe kuba Juda batasyomeki, wakati kuli Jeremiya: “Lino webo, utakombeli bantu aba, utabacitili lukwiilo na cikombyo, nikuba kubakombelezezya, nkaambo nsikooyookuswiilila pe.”—Jeremiya 7:16.

Ino nkaambo nzi Jehova ncaakamukasyila Jeremiya ikupailila bana Israyeli? Cakaba boobo akaambo kakuti bakausotoka Mulawo wakwe. Icaantangalala alimwi icakubulaa bweemya, bakali ‘kubba akujaya akucita bumambe akukonka cakubeja akutentela Baala tununkilizyo akuya butobela baleza bambi mbibatakazyi.’ Eelyo Jehova wakabaambila ba Juda batasyomeki kuti: “Nkabela njoomusoowa kuzwa kumeso aangu, mbubonya mbundakasoowa banabakwanu boonse, nkokuti lunyungu loonse lwa-Efraimu.” Masimpe, eeci nicatakeelela kuli Jeremiya naaba muntu uuli buti ikupaila kuli Jehova kuti lubeta Lwakwe ataluciti.—Jeremiya 7:9, 15.

Ikweelana akaambo aaka, imwaapostolo Johane wakalemba kujatikizya mupailo weelede kuli Leza. Lutaanzi, wakabasyomezya Banakristo kuti: “Na twakumbila kufumbwa cintu cili buti cili mbuli makanze aakwe, ulatumwa.” (1 Johane 5:14) Ikujatikizya kupailila bantu, Johane wakazumanana kati: “Na muntu wabona mweenzinyina wabisya cibi citali calufu, ulamukumbilila, elyo Leza ulamupa buumi. Nkukwaamba kuti abo batabisyi zibi zyalufu. Zimwi zibi nzyalufu, nsikwe ndaamba kuti ulakombela nzizyo.” (1 Johane 5:16) Awalo Jesu wakacaamba cibi “[ci]takonzyi kulekelelwa” nkokuti kusanka muuya uusalala.—Matayo 12:31, 32.

 Sena eeci caamba kuti boonse aabo bakagusyigwa mumbungano ya Banakristo akaambo kakubisya cakuteempwa, nkokuti bakabisya zibi ‘zyalufwu’ aboobo tabeelede kubapailila? Aaka takakonzyi kuba nkakaambo, akaambo kakuti ziindi zimwi kubisya kuli boobu takuli kwalufwu pe. Masimpe, eeci ncintu cikatazya kuzyiba ikuti naa eeci ncecibi cijaya. Cikonzyanyo cimwi cibotu nca Mwami wa Juda uutegwa Manase. Wakayaka zipaililo kuyakila baleza bakubeja, wakatuuzya banabakwe mumulilo, wakali kubelesya basibusangu alimwi akubikka zibumbwa zibezedwe mutempele lya Jehova. Masimpe, Ibbaibbele lyaamba kuti Manase alimwi abantu bakabucita “bubi kwiinda bamasi Jehova mbaakanyonywede kubusyu bwabana ba-Israyeli.” Akaambo kazintu eezyi, Jehova wakamusubula Manase kwiinda mukumutumina ku Babuloni kali muzike.—2 Bami 21:1-9; 2 Makani 33:1-11.

Nokuba kuti izibi zya Manase zyakali zipati, sena zyakali zibi zyalufwu? Takuli boobo pe, nkaambo cibalo cilazumanana kwaamba kujatikizya nguwe kuti: “Lino naakali mumapenzi, wakabika moyo wakwe kuli-Jehova Leza wakwe, walibombya loko kubusyu bwa-Leza wabamawisi. Elyo naakakomba, Leza wakakombelezegwa nguwe, waswiilila cikombyo cakwe, wamupilusya ku-Jerusalemu kubwami bwakwe. Mpawo Manase wakaziba kuti Jehova ngu-Leza.”—2 Makani 33:12, 13.

Aboobo, tatweelede pe kulonda kwaamba kuti muntu ooyu cibi cakwe ncalufwu akaambo kakuti wakagusyigwa mumbungano. Cilakonzya kutola ciindi cili mbocibede kuzyiba moyo wamuntu mboubede. Inzya, kanji-kanji kwaambwa kuti ikaambo kapati kapa kuti muntu agusyigwe nkakuti ooyo sizibi aliyeeye kutegwa ambweni inga weempwa.

Mbwaanga muntu ooyo tacili mumbungano, kucinca kuli koonse, ikusaanguna kulakonzya kubonwa abaabo mbociyanzana limwi mbuli yooyo ngobakwetene limwi naa bamumukwasyi. Aabo bamulangilila akubona kucinca nkwaacita sizibi ooyo, balakonzya kubona kuti cibi ncaakacita tacili calufwu pe. Cilakonzya kubapa kuti batalike kumupailila kuti ndiza ulakonzya kujana nguzu kuzwa ku Jwi lya Leza lyakasololelwa alimwi akuti kubetekwa kwakwe kuyakuya buyo mbuli Jehova mbwayoocita kweelana aluyando Lwakwe.—Intembauzyo 44:21; Mukambausi 12:14.

Nikuba kuti bantu banji balakonzya kubona kuti tunji twaambo tutondezya kuti sizibi weempwa, eeci tacikonzyi kuba boobo kumbungano yoonse pe. Balakonzya kulamwa, kukopana nikuba kutyompya ikuti bamvwa muntu kapaila kubuleya kupailila yooyo wakagusyigwa. Nkaambo kaako, aabo balimvwa kuti balakonzya kumupailila sizibi, beleede kucita oobo lilikke eelyo nobali balikke. Alimwi beleede kwaasiya makani woonse aalangilwa kubambwa mumaanzaa baalu bamumbungano eeyo.

[Cifwanikiso icili apeeji 30]

Manase wakalekelwa zibi zyakwe ciindi naakalibombya kuli Jehova

Nkotwakajana cifwanikiso icili apeeji 29]

Cakazwa ku Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther