Bubotu Alimwi Ampindu Yamakani Mabotu

“Jehova wandinanika kuti nkambaukile bacete makani mabotu, wandituma kuzooanga batyokede mumyoyo, . . . [a]kuumbulizya boonse balila.”—ISAYA 61:1, 2.

1, 2. (a) Ino Jesu wakaliyubununa kuti nguni, alimwi muunzila nzi? (b) Ino nzilongezyo nzi makani mabotu akali kwaambilizyigwaa Jesu nzyaakali kukonzya kuleta?

BUZUBA bumwi mu Sabata kumatalikilo kwamulimo wakwe, Jesu wakali mucikombelo ku Nazareta. Kweelanaa makani aalembedwe, “wakatambikwa bbuku lyamusinsimi Isaya. Naakalivununa wakajana ukwakalembedwe kuti, muuya wa-Jehova uli alindime, nkaambo wandinanika kuti ndikambau[ke] . . . makani mabotu.” Jesu wakazumanana kubala cibalo cijisi makani aabusinsimi. Mpoonya wakakkala ansi akwaamba kuti: “Sunu kwazuzigwa lugwalo olu mumatwi aanu.”—Luka 4:16-21.

² Kwiinda munzila eeyi, Jesu wakaliyubununa kuti wakali ngomukambausi wakasinsimidwe, imwaambilizi wamakani mabotu alimwi uumbulizya. (Matayo 4:23) Elo kaka aaya akali makani mabotu ncobeni Jesu ngaakali kuyanda kwaamba! Baswiilizi bakwe wakabazyibya kuti: “Ndime mumuni w[a]nyika, uundicilila takooyooenda mumudima, pele uyooba amumuni wabuumi.” (Johane 8:12) Alimwi wakaamba kuti: “Mwajatisya majwi aangu, ncobeni mwaba basikwiiya bangu, alimwi muyooziba bwini, abwalo bwini buyoomunununa.” (Johane 8:31, 32) Inzya, Jesu wakalijisi “majwi aabuumi ubutamani.” (Johane 6:68, 69) Mumuni, buumi alimwi alwaanguluko—masimpe nzilongezyo ziyandika kubikkila maano!

3. Ino makani nzi mabotu basikwiiya ba Jesu ngobakakambauka?

 ³ Nobwakainda buzuba bwa Pentekoste mu 33 C.E., basikwiiya ba Jesu bakazumanana amulimo wa Jesu wakukambauka. Bakakambauka “Makani Mabotu aa-Bwami” kubana Israyeli alimwi akubantu bamisyobo iimbi. (Matayo 24:14; Incito 15:7; Ba-Roma 1:16) Aabo bakazumina bakamuzyiba Jehova Leza. Bakaanguluka kuzwa kubuzike bwabukombi akuba bacibeela camusyobo mupya wakumuuya, “ba-Israyeli ba-Leza” balo bajisi bulangizi bwakulela kukabe kutamani kujulu a Mwami wabo Jesu Kristo. (Ba-Galatiya 5:1; 6:16; Ba-Efeso 3:5-7; Ba-Kolose 1:4, 5; Ciyubunuzyo 22:5) Elo kaka eezyo zyakali zilongezyo ncobeni!

Ibukambausi Sunu

4. Ino mmuunzila nzi mulimo wakukambauka makani mabotu mbouli mukuzuzikizyigwa sunu?

⁴ Sunu, Banakristo bananike kabagwasyilizyigwa aba “nkamu mpati” ya “mbelele zimwi,” bazumanana kuzuzikizya mulimo wakasinsimwa walo wakapedwe kuli Jesu kumatalikilo. (Ciyubunuzyo 7:9; Johane 10:16) Akaambo kaceeci, makani mabotu ali mukukambaukwa kwiinda mbuli mbwaakakambaukwa musyule oomu. Mumasi alimwi amuzilawo zili 235, Bakamboni ba Jehova balaunka kuya “[kukambaukila] bacete makani mabotu . . . ku[y]ooanga batyokede mumyoyo, kuzooletela bazike mulao wabulubusi akujalwida baange intolongo, kukambauka makani aamwaka uutambulika wa-Jehova abuzuba bwakuliya inkoto bwa-Leza wesu, kuumbulizya boonse balila.” (Isaya 61:1, 2) Aboobo, mulimo wa Bunakristo wakukambauka wazumanana kuleta zilongezyo kubantu banji alimwi akuumbulizya “baabo bali mumapenzi naali buti oonse.”—2 Bakolinti 1:3, 4, Ci.

5. Caboola kumakani aakukambauka makani mabotu, ino Bakamboni ba Jehova baindenyi buti azikombelo zya Kristendomu?

⁵ Mmasimpe kuti zikombelo zya Kristendomu zilagwasyilizya mumulimo wakukambauka munzila imwi. Banji balatuma bamamisyinali kutegwa bakasandule bantu mumanyika aambi. Mucikozyanyo, imagazini iitegwa The Orthodox Christian Mission Center Magazine yakaluula mboweendakujatikizya mulimo wabamamisyinali bacikombelo ca Orthodox mucisi ca Madagascar, Afulika nkoili kumusanza, ku Tanzania alimwi aku Zimbabwe. Nokuba boobo, Cikombelo ca Orthodox mbubwenya buyo mbuli zikombelo zimwi zya Kristendomu, bunji bwabantu ibali muzikombelo eezi lwabo beni tabatoli lubazu mumulimo uuli boobo. Kwiindana ambabo, boonse Bakamboni ba Jehova balyaabide balasola kutola lubazu mukukambauka. Balizyi kuti kwaambilizya makani mabotu ncitondezyo cisinizya lusyomo lwabo. Paulo wakaamba kuti: “Kumoyo kulasyomwa kuti kube bululami, akumulomo kulazuminwa kuti kube lufutuko.” Ilusyomo lutakulwaizyi muntu umwi kuti abweze ntaamo, masimpe lulifwide.—Ba-Roma 10:10; Jakobo 2:17.

Makani Mabotu Aaleta Zilongezyo Zitamani

6. Ino mmakani nzi mabotu aali mukukambaukwa sunu?

⁶ Bakamboni ba Jehova bakambauka makani ainda kubota. Balajalula ma Bbaibbele aabo akutondezya baabo ibazumina kuti Jesu wakaaba buumi bwakwe kutegwa ape bantu nzila yakukonzya kusikila Leza, kulekelelwa zibi alimwi abulangizi bwabuumi butamani. (Johane 3:16; 2 Ba-Korinto 5:18, 19) Balaambilizya kuti Bwami bwa Leza bwakakkazikizyigwa kujulu, Jesu Kristo wakananikwa kali ngo Mwami alimwi akuti ino-ino buyoogusya bubi boonse ibuli anyika akubona kuti Paradaiso yapilusigwa alimwi. (Ciyubunuzyo 11:15; 21:3, 4) Ikuzuzikizya businsimi bwa Isaya, balabazyibya basimukobonyina kuti uuno “[ngu]mwaka uutambulika wa-Jehova” ibantu nobacikonzya kuzumina makani mabotu. Alimwi balabazyibya kuti “buzuba bwakuliya inkoto bwa-Leza wesu” bulaafwaafwi, ciindi Jehova nayoonyonyoona basizibi bateempwi.—Intembauzyo 37:9-11.

7. Ino ncinzi cakacitika icitondezya kuti Bakamboni ba Jehova balikamantene, alimwi ino nkaambo nzi kabapa kukamantana?

⁷ Munyika eeyi iizwide ntenda amanyongwe, aaya ngamakani mabotu aakonzya kugwasya kapati. Aabo baazumina balaba bacibeela cabunyina bwa Bunakristo bwanyika yoonse bukamantenyi balo batazumizyi cisi, musyobo naa kutamvwana akaambo kamakwebo kuti kubaandaanye. Balo ‘balijisi luyandano, balizyi ikuti luyandano ncecaanzyo cabuumi bulondokede.’ (Ba-Kolose 3:14; Johane 15:12) Eeci cakalibonya  mucisi cimwi camu Afulika mwaka ooyu wamana. Buzuba bumwi mafwumofwumo, mudolopo lipati lyoonse lyakali kwiide kudubuka ntobolo. Ikusola kwaatula bulelo ncecakali kutola busena. Icakatobela ninkondo yakujaya musyobo umwi, eelyo mukwasyi umwi wa Bakamboni wakaambwa kuti wakasiside Bakamboninyina ibamusyobo uumbi. Imukwasyi ooyu wakavwuwa kuti: “Kuli buyo Bakamboni ba Jehova ibakkala muŋanda yesu.” Kulimbabo, kwiindana kwamusyobo tiicakali cintu cipati pe; luyando lwa Bunakristo ncicakali cintu cipati alimwi akuumbulizya bantu bayandika kucitila boobo. Imusazinyina umwi uutali Kamboni wakaamba kuti: “Basizikombelo zimwi boonse bakabaaba bakombinyina. Bakamboni ba Jehova balikke mbibatakacita oobo.” Makani manji ali boobo alaambwa muzisi muli nkondo yamucisi momunya kuti Bakamboni ba Jehova masimpe ‘balabayanda babunyina.’—1 Petro 2:17.

Makani Mabotu Alabapa Kucinca Bantu

8, 9. (a) Ino nkucinca kuli buti aabo ibatambula makani mabotu nkobacita? (b) Ino zintu nzi zyakacitika zitondezya nguzu zyamakani mabotu?

⁸ Imakani mabotu abikkilizya ceeco Paulo ncaakaita kuti ‘buumi bwasunu abwaciindi ciciza.’ (1 Timoteo 4:8) Taapi buyo bulangizi bubotu bwakumbele, pele alimwi alasumpula ‘buumi bwasunu.’ Umwi aumwi wa Bakamboni ba Jehova ulasololelwaa Jwi lya Leza Ibbaibbele kutegwa ayendelanye buumi bwakwe akuyanda kwa Leza. (Intembauzyo 119:101) Ibube bwabo kubugama bulaba bupya ciindi nobayandaula bube ibuli mbuli bululami alimwi akusyomeka.—Ba-Efeso 4:24.

⁹ Amulange-lange cikozyanyo ca Franco. Wakali muntu mukali kapati. Ikuti naa zintu zyalubila, wakali kukalala kapati cakunga wakali kupwaya zintu. Imukaintu wakwe wakaiya Bbaibbele a Bakamboni ba Jehova, aboobo cikozyanyo cabo ca Bunakristo cakagwasya Franco asyoonto-syoonto kubona kuti weelede kucinca. Wakaiya Bbaibbele ambabo mane limwi wakacikonzya kutondezya micelo yamuuya uusalala mbuli luumuno alimwi akulyeendelezya. (Ba-Galatiya 5:22, 23) Wakaba umwi wabaabo ibakabbapatizigwa mu Belgium mumwaka wa 2001 ibali 492. Alimwi amulange-lange kujatikizya Alejandro. Mukubusi ooyu wakalizibizya kubelesya misamu iikola cakunga wakasika aciimo cakukkalila kubusena busowelwa zintu kutegwa kabwezelela kufwumbwa ncakonzya kujana kutegwa acisambale akujana mali akuula misamu iikola. Naakakkwanya myaka yakuzyalwa iili 22, Bakamboni ba Jehova bakamwaambila Alejandro kujatikizya ciiyo ca Bbaibbele, eelyo wakazumina. Wakali kubala Ibbaibbele abuzuba alimwi akujanika kumiswaangano ya Banakristo. Wakabusalazya buumi bwakwe cakufwambaana cakunga mumyezi iili cisambomwi buyo, wakakonzya kutalika kutola lubazu mumulimo wakukambauka alimwi wakali umwi wabantu ibali 10,115 ibakacita boobo mwaka wamana mucisi ca Panama.

 Makani Mabotu—Ncilongezyo Kubantu Babombe moyo

10. Ino mbaani bazumina makani mabotu, alimwi ino mbuti mbobacinca mbobazilanga zintu?

¹⁰ Isaya wakasinsima kuti makani mabotu ayookambaukwa kubantu babombe moyo. Ino bantu aaba bategwa babombe moyo mbaani? Mbaabo ibapandululwa kubbuku lya Incito kuti: “Basalidwe buumi butamani.” (Incito 13:48) Mbantu balibombya ibajanika muciinga ibajisi zyuuno ziindene-indene kumilimo yakumubili balo bazumina mulumbe wakasimpe. Ibantu bali boobu balaiya kuti kucita kuyanda kwa Leza kuletela zilongezyo zibotu kwiinda cintu cili coonse cikonzya kujanika munyika. (1 Johane 2:15-17) Pele ino mbuti Bakamboni ba Jehova mbobakonzya kwaamba twaambo tukonzya kunjila mumyoyo yabantu mumulimo wabo wakukambauka?

11. Kweelanaa Paulo, ino mbuti makani mabotu mbwaayelede kukambaukwa?

¹¹ Lino amulange-lange cikonzyanyo camwaapostolo Paulo walo wakalembela bana Korinto kuti: “Ambebo, nubakwesu, kuciindi eco ncindakasika kulindinywe, teensi cabwaambe bwiinda na cabusongo bwiinda ncindakasika kuzoomukambaukila makani aa-Leza, pe. Nkaambo ndakakanza kutaziba cintu niciba comwe akati kanu pele Jesu Kristo luzutu, nkukuti Jesu Kristo iwakabambulwa [acisamu cakupenzyenzya].” (1 Ba-Korinto 2:1, 2) Paulo kunyina naakali kusola kukkomanisya baswiilizi bakwe kwiinda mulwiiyo lwakwe pe. Wakali kuyiisya buyo masimpe aazwa kuli Leza aayo aalembedwe mu Bbaibbele sunu. Alimwi amubone mbuli Paulo mbwaakakulwaizya mukambausinyina Timoteo ategwa: ‘Kokambauka makani lyoonse.’ (2 Timoteo 4:2) Timoteo wakeelede kukambauka “makani,” nkokuti mulumbe wa Leza. Alimwi Paulo wakalembela Timoteo kuti: “Kolisungwaazya kukonda Leza, mbuli simulimo uutakwe cintu cimuusya insoni, uupandulula makani aalusinizyo mbukweelede.”—2 Timoteo 2:15.

12. Ino mbuti Bakamboni ba Jehova sunu mbobatobela majwi alimwi acikozyanyo ca Paulo?

¹² Bakamboni ba Jehova balacitobela cikonzyanyo ca Paulo alimwi amajwi aakwe ngaakalembela kuli Timoteo. Balizyizyi nguzu zya Jwi lya Leza alimwi balalibelesya kabotu ciindi nobayandaula majwi aabulangizi alimwi aawumbulizya aakutondezya basimukobonyina. (Intembauzyo 119:52; 2 Timoteo 3:16, 17; Ba-Hebrayo 4:12) Masimpe, balaabelesya kabotu mabbuku aamba zya Bbaibbele kutegwa aabo bajisi luyandisyisyo bakonzye kujana luzibo lunji lwa Bbaibbele ciindi nobalyookezya. Pele lyoonse balayandisya kutondezya bantu majwi aali mu Magwalo. Balizyi kuti Ijwi lya Leza lyakasololelwaa muuya liyoobagwasya babombe myoyo. Alimwi nobalibelesya lwabo munzila iili boobu, lusyomo lwabo lulayumizyigwa.

“Kuumbulizya Boonse Balila”

13. Mumwaka wa 2001, ino nzintu nzi zyakacitika zyakapa kuti kuyandike kuumbulizya bantu balila?

¹³ Imwaka wa 2001 wakalijisi manyongwe aali mbwaabede, aboobo bantu banji bakali kuyandika kuumbulizyigwa. Mumwezi wa September mwaka wamana kwakacitika manyongwe amwi ayoosya kapati mucisi ca United States ciindi zigwebenga nozyakanyonyoona ŋanda ya World Trade Center mu New York alimwi aŋanda ya Pentagon ilafwaafwi a Washington, D. C. Elo kaka kunyonyoona ooku kwakabausisya bantu bamucisi eeci! Nozyakacitika zintu zili boobo, Bakamboni ba Jehova bakasola kuzuzikizya mulimo ngobapedwe ‘wakuumbulizya boonse balila.’ Zintu zisyoonto buyo zibakacita zilatondezya mbuli mbobakacita boobo.

14, 15. Ino mbuti Bakamboni muziindi zyobilo ziindenyi mbobakakonzya kubelesya magwalo munzila yeelede kuumbulizya balila?

¹⁴ Mukaintu umwi Kamboni walo uli mukambausi waciindi coonse wakasikila mukaintu umwi iwakali mumbali-mbali lyamugwagwa akumubuzya mbuli mbwaakali kuyeeya kujatikizya kulwana kwazigwebenga kwakazwaa kucitika. Imukaintu ooyu wakatalika kulila. Wakaamba kuti wakabijilwa kapati cakunga naakali kukonzya naakagwasya munzila imwi. Kamboni wakamwaambila kuti Leza ulatuyanda kapati toonse, mpoonya wakabala bbuku lya Isaya 61:1, 2. Imajwi aaya aakasololelwaa muuya wa Leza akamugwasya mukaintu ooyu, walo wakaamba kuti bantu boonse bakali kulila. Wakatambula katulakiti akwaambila Kamboni kuti akamuswaye kuŋanda yakwe.

¹⁵ Balombwana bobilo Bakamboni ibakali mumulimo wakukambauka bakaswaanganya mulombwana umwi iwakali kubeleka muyobodwa mpasya. Bakamulomba kuti bamutondezye majwi aawumbulizya kuzwa mu Magwalo kweelana amanyongwe  akacitika ku World Trade Centre. Naakazumina, bakabala lugwalo lwa 2 Ba-Korinto 1:3-7, lwalo lubikkilizya amajwi aakuti: “Luumbulizyo . . . lulavula muli-Kristo.” Imulombwana ooyo wakalumba kapati kubona kuti basimukobonyina Bakamboni bali mukwaambila bantu bamwi makani aawumbulizya, mpoonya wakaamba kuti: “Leza aaleleke mulimo wanu mubotu ngomuli mukucita.”

16, 17. Ino nzintu nzi zyobilo zyakacitika zitondezya mbuli nguzu zya Bbaibbele mbozyakagwasya bantu bakaluuside akukopana mumizeezo akaambo kazintu zyakacitika?

¹⁶ Mulombwana umwi Kamboni iwakali kupilukila kubantu bakatondezya luyandisyo, wakaswaanganya mwana musankwa wabakaintu bamwi ibakatondezyede luyandisyo alimwi wakapandulula kuti wakalibikkilide maano kujatikizya basimukobonyina ncobakali kucita lyakamana kucitika manyongwe. Imulombwana wakagambwa kubona kuti Bakamboni bakajana ciindi cakuswaya bantu alimwi akubalingula. Wakaamba kuti wakali kubelekela afwaafwi a World Trade Centre alimwi wakali kulangilila nkondo eeyi niicitika. Ciindi naakabuzya ikaambo Leza ncalekelede mapenzi kuti kaacitika, Kamboni wakabala tupango kuzwa mu Bbaibbele kubikkilizya abbuku lya Intembauzyo 37:39 lyaamba kuti: “Lufutuko lwabaluleme lulazwa kuli-Jehova; ngonguwe macijilo aabo kuciindi camapenzi.” Imulombwana ooyu wakabuzya Kamboni mbwaakali kupona walo kubikkilizya amukwasyi wakwe, wakamwaambila kuti akajokele, alimwi wakalumba kapati akaambo kakuswaigwa ooku.

¹⁷ Aumwi wabantu ibali zyuulu zili mbozibede wakaumbulizyigwaa Bakamboni ba Jehova mumazuba aayo akatobela zigwebenga nozyakamana kunyonyoona, wakali mukaintu umwi Bakamboni ngobakaswaanganya ciindi nobakali kuswaya basimukobonyina. Wakalikopenyi kapati mumizeezo akaambo kazintu zyakacitika alimwi wakaswiilila ciindi nobakali kubala bbuku lya Intembauzyo 72:12-14 lyaamba kuti: “Nkaambo ulavuna bacete nibakwiila, abalo bapengede abaabo babula mugwasyi. Bacete abatengwana ulabafwida luzyalo; buumi bwabacete ulabufutula. Ulanununa buumi bwabo kulupenzyo: Bulowa bwabo bulayandika mumeso aakwe.” Elo kaka majwi aayo akali kugwasya! Mukaintu ooyu wakalomba Kamboni kuti ainduluke kwaabala majwi aayo alimwi, mpoonya wakabaitila muŋanda yakwe kutegwa bazumanane amubandi. Kumamanino amubandi ooyo, ciiyo ca Bbaibbele cakatalisyigwa.

18. Ino mbuti Kamboni mbwaakagwasya basimukobonyina ciindi naakatambwa kuti abaiminine mumupailo?

¹⁸ Kamboni umwi ubelekela muŋanda mobajikila  zyakulya zyakuulisya iili mubusena bujisi bantu banji kapati, mwalo bantu aaba mobatakali kubikkila maano kapati kumakani mabotu aa Bwami musyule oomu. Zigwebenga nozyakamana kunyonyoona, bantu boonse bakkala mubusena oobo bakanyongana kapati. Muli Bwasanu mangolezya zigwebenga kazinyonyoode kale, manijala mukaintu wakaambila bantu boonse kuti baunke anze kabajisi nkandela kutegwa baumune kwakaindi ikutondezya kuusa akaambo kaceeco cakacitika kulibaabo bakajatikizyigwa. Akaambo kakulemeka mbuli mbobakali kulimvwa bantu aabo, awalo Kamboni wakaunka akuya kwiima anze. Manijala ooyu wakalizyi kuti wakali umwi wa Bakamboni ba Jehova, aboobo nocakamana ciindi cakutondezya kuusa, manijala wakalomba Kamboni kuti abaiminine boonse mumupailo. Kamboni wakazumina. Mumupailo wakwe, wakaamba kujatikizya kulila kwakali mucisi coonse, pele alimwi wakati basikulila tabeelede kuusa buyo kakunyina bulangizi pe. Wakaamba kujatikizya ciindi micito mibyabi iili boobo noitanoocitiki alimwi wakaamba kuti boonse balakonzya kuswena kuli Leza uumbulizya kwiinda muluzibo lwiini-lwini luzwa mu Bbaibbele. Naakaamba kuti “Ameni,” maninjala ooyo kubikkilizya abantu ibali 60 ibakali anze aaŋanda, bakaunka kuli Kamboni akumulumba akumukumbatila, mukaintu ooyu wakaamba kuti mupailo ooyo ngowiinda kubota kumipailo yoonse njobakamvwa kale.

Mulimo Mubotu Mucilawo

19. Ino ncinzi cakacitika citondezya kuti bantu bamwi balizyizyi zyeelelo zisumpukide zya Bakamboni ba Jehova?

¹⁹ Ikapati mazubaano, muzilawo muli Bakamboni ba Jehova bantu balagwasyigwa kweelanaa mbuli bantu bamwi mbobaamba. Ino mbuti bantu bayandisya luumuno, kusyomeka alimwi bajisi zyeelelo zisalala mbobatakonzyi kugwasya? Mucisi cimwi cili mu Central Asia, Bakamboni bakaswaanganya muntu umwi wakaleka mulimo wamucibeela cilanganya bukwabilizi bwacisi. Wakaamba kuti wakalipedwe mukuli wakulingula mbunga zyabukombi. Naakalingula Bakamboni ba Jehova, wakakondwa kapati kubona mbuli mbobakali kusyomeka alimwi akulilemeka kwabo kubotu. Wakalombozya mbuli lusyomo lwabo mboluli luyumu alimwi akaambo kakuti njiisyo zyabo ziyeeme mu Magwalo. Mulombwana ooyu wakazumina ciiyo ca Bbaibbele.

20. (a) Ino mulimo wakalipootwaa Bakamboni ba Jehova mwaka wamana utondezya nzi? (b) Ino ncinzi citondezya kuti mulimo uciliko, alimwi ino tucibona buti coolwe cesu cakukambauka?

²⁰ Kwiinda muzintu zyakacitika zyaluulwa mucibalo eeci, akati kazyuulu-zyuulu zyazintu zikonzya kuluulwa, cilasalala kubona kuti Bakamboni ba Jehova bakajisi maanka-maanka mumwaka ooyu wamana wa 2001. * Bakabandika atuulunzuma twabantu, bakaumbulizya bantu banji bakali kulila, eelyo mulimo wabo wakukambauka wakajana mpindu. Kwakali bantu ibasika ku 263,431 ibakatondezya kulyaaba kwabo kuli Leza kwiinda mukubbapatizyigwa. Munyika yoonse, mweelwe wabakambausi wakayungizyigwa a 1.7 pasenti. Alimwi ikubona mweelwe wakajanika ku Ciibalusyo calufwu lwa Jesu uusika ku 15,374,986 citondezya kuti mulimo uciliko. (1 Ba-Korinto 11:23-26) Lino atuzumanane kuyandaula bantu babombe myoyo balo ibazumina makani mabotu. Alimwi kufwumbwa buyo kuti mwaka uutambulika wa Jehova kuucizumanana, atuzumanane kuumbulizya “batyokede mumyoyo.” Elo kaka tulijisi mulimo uukkazika moyo! Masimpe toonse tutobela majwi aa Isaya aakuti: “Kusekelela njoosekelela muli-Jehova, amoyo wangu uyookondwa muli-Leza wangu.” (Isaya 61:10) Leza aazumanane kutubelesya mbwayaabuzuzikizya majwi aaya aabusinsimi aakuti: “Mwami Jehova uyoomeneka bululami alutembaulo kumeso aamasi oonse.”—Isaya 61:11.

Bupanduluzi buyungizidwe

Sena Mulayeeya?

• Ino mmuunzila nzi babombe myoyo mbobakagwasyigwa amakani mabotu Jesu ngaakakambauka?

• Ino nzilongezyo nzi zyakasikila baabo bakazumina mulimo wakukambauka wabasikwiiya ba Jesu bamumwaanda wamyaka wakusaanguna?

• Ino mbuti aabo bazumina sunu mbobalongezyegwa amakani mabotu?

• Ino coolwe ncotujisi cakuba bakambausi tucibona buti?

[Mibuzyo yaciiyo]

 Ccaati iili apeeji 29-32]

LIPOOTI YAMWAKA WAMULIMO WA 2001 A BAKAMBONI BA JEHOVA NYIKA YOONSE BWIIZULWA

 Amubone Bbaundi Volyumu

[Zifwanikiso izili apeeji 25]

Bakamboni ba Jehova lyoonse balauyeeya mukuli wabo wakukambauka

[Zifwanikiso izili apeeji 27]

Aabo bazumina makani mabotu balaba cibeela cabunyina bwanyika yoonse bukamantenyi