Sena Lusyomo Lweelede Kuyaama Kubusongo?

Mupati umwi wacikombelo waku United States wakati: “Kuli bantu banji bazikombelo balo bakkutila abukombi bwabo ikutegwa kabatacibelesyi limbi kuyeeya kwabo.” Alimwi wakayungizya kuti: “Balazuminizya zyoonse zijatikizya lusyomo kakunyina akuvwuntauzya.”

IKAAMBO nkakuti, ibantu banji ibalyaamba kuti balaalusyomo mucikombelo, tababikkili maano akuzyiba cibapa kuti kabasyoma alimwi akuti naa kuli kaambo keni ayeeme lusyomo lwabo. Nkakaambo kaako banji cilabalezyaanya kwaamba zyintu kujatikizya cikombelo.

Inzya, eeco cilengwa cakubelesya mituni muzikombelo alimwi akupaila mipailo yakwiinduluka-induluka, cipa kuti bantu kabatayeeyi kabotu. Micito iili boobu kubikkilizya abuyake bubotu, kubota kwamagilazi aali mumpulungwido alimwi akubota kwanyimbo, nzyezyintu zijanika muzikombelo zyabantu ibali tuulunzuma ituli mbotubede. Nikuba kuti zikombelo zimwi zyaamba kuti, lusyomo lwanzizyo luyeeme a Bbaibbele, alimwi amulumbe wabo wakuti ‘syoma muli Jesu eelyo uya kufwutuka’ cibapa kuti kabatasinizyi kwiiya Bbaibbele. Bamwi batalika kwiisya mulumbe uutali wakasimpe naa mulumbe uujatikizya zyamapolitikisi. Ino ncinzi cacitika akaambo kaceeci?

Ikujatikizya bukkale oobu ku North America, umwi mulembi wacikombelo wakati: “Bunakristo . . . mbwaatala-tala buyo [alimwi] abasikubutobela tabayiisyidwe kabotu pe.” Mwaalumi umwi sikuvwuntauzya twaambo wakaamba kuti, mucisi ca United States “bantu banji batajisi luzibo lwa Bbaibbele.” Ikutegwa tucite bweelede, ooku kuvwuntauzya akwalo kulakonzya kuba kwamasimpe amumasi aambi aayo aayitwa kuti nga Bunakristo. Ibunji bwazikombelo zitali zya Bunakristo azyalo mbweena zilabatyompya bantu, muciindi caboobo zikankaizya kapati kwiinduluka-induluka mabala, mipailo alimwi anzila zimwi zinji nzyobabelesya kuzinzibala kuyeeya zyalo zibikkilizya kulangaula Leza munzila iilubide muciindi cakuti kabayeeya munzila iikonzya kubagwasya.

Aboobo, mubuumi bwabo bwabuzuba abuzuba, bantu mbweena aaba batabikkili maano kubwini naa kumasimpe aajatikizya nzyobasyoma mucikombelo cabo, babikkila buyo maano kuli zimbi. Sena eeci tacikonzyi kumubeda ceenzu ikuyeeya muntu uuvwuntauzya kapati kutegwa awule mootokala—walo uuya kufwa akusowelwa kucimbotela—uukonzya kwaamba zyacikombelo mwajanwa kuti, ‘Ikuti naa bazyali bangu bakali kucikkomanina cikombelo eeci, sena andime ndeelede kucikkomanina’?

Ikuti naa muli masimpe muyanda kukkomanisya Leza, sena inga takuyandiki kwaalanga-langa makani aaya kabotu-kabotu akubona zyeezyo nzyotusyoma kujatikizya nguwe? Imwaapostolo Paulo wakali kwaamba bantu bacikombelo cimwi bamumazuba aakwe bakajisi “busungu kumakani aa-Leza, pele busungu mbuba[ka]jisi teensi bwaluzubo.” (Ba-Roma 10:2) Ibali boobo, balakonzya kukozyanyisyigwa amuntu uubeleka canguzu wakaitwa kuti azikupente ŋanda, pele  uubelesya musyobo uutayandiki akaambo kakuti tabikkili maano kumalailile ngamwaambila uulaaŋanda. Sikupenta ooyu inga kati ucita buyo kabotu mumulimo wakwe, pele sena uulaaŋanda ngoocizumina eeco?

Ino mbukombi bwakasimpe buli buti Leza mbwatambula? Ibbaibbele lilaingula kuti: “Eci ncibotu akutambulika kuli-Leza Mufutuli wesu, uuyandisya kuti bantu boonse bafutulwe akuboola kuluzibo lwakuziba lusinizyo.” (1 Timoteo 2:3, 4) Bamwi baamba kuti eeco ncintu ciyumu ikujana luzibo luli boobo akati kazikombelo zinjaanji ziliko mazuba aano. Pele amuyeeye—ikuti naa ooku nkuyanda kwa Leza kuti bantu babe aluzibo lwini-lwini, sena inga caba camaano kubasisa kutegwa batabi aandulo? Oobo tabusyi mbolyaamba Bbaibbele, lyalo lyaamba kuti: “Na ulamuyandaula, [Leza] ulamujana.”—1 Makani 28:9.

Ino mbuti Leza mbwalitondezya kulibaabo bamulangaula camoyo omwe? Cibalo ciccilila cilijisi mbwiinguzi.