Makani Aamaseseke Naayelede Kuyubununwa

Ikutayubununa makani aamwi aamaseseke kulakonzya kupa kuti kube luumuno muciindi camazwanga. Pele, sena kuli ciindi makani aamaseseke naayelede kuyubununwa? Amubone mbuli musinsimi Amosi ncaakaamba kujatikizya Leza wakwe kuti: “Jehova taciti cintu, atana kuyubunwida balanda bakwe basinsimi maseseke aakwe.” (Amosi 3:7) Kuzwa kumajwi aaya, tulakonzya kwiiya cintu cimwi cijatikizya maseseke. Jehova ulakonzya kwaasisa makani aamwi aamaseseke kwaciindi cili mbucibede, eelyo akuzoobayubunwida bantu bamwi kumbele. Ino mbuti mbotukonzya kwiiya Jehova mumakani aaya?

Ziindi zimwi, ibeembezi basalidwe ibali mumbungano zya Banakristo bacibona kuti cilagwasya kusisa makani aamwi. (Incito 20:28) Mucikozyanyo, kabajisi muzeezo wakuyanda kuti imbungano igwasyigwe, balakonzya kusala kuti baasise makani aajatikizya bubambe bumwi naa kucinca kwamikuli yamumbungano kusikila limwi ciindi ceelede cikakkwane.

Nokuba boobo, ikuti kacili boobo kulayandika kapati kwaasalazya makani kulibaabo bajatikizyidwe ikuti kwayandika, naayooyubununwa alimwi amakani aaya mbwaayooyubununwa. Ikuzyiba ciindi makani aaya naayooyubununwa kubuleya kulakonzya kubagwasya aabo bajatikizyidwe kuzumanana kwaasisa makani aaya.—Tusimpi 25:9.