Ikupakamana Kulayandika Kapati Mazubaano!
Ikupakamana Kulayandika Kapati Mazubaano!
“Tutanooni mbuli bantu bamwi, atukalinde, tube bapakamani.”—1 BA-TESALONIKA 5:6.
1, 2. (a) Ino munzi wa Pompeii alimwi awa Herculaneum yakajisi mpuwo iili buti? (b) Ino nkucenjezya kuli buti ibantu bamumunzi wa Pompeii alimwi awa Herculaneum nkobatakabikkila maano, eelyo ino ncinzi cakacitika?
MUMWAANDA wamyaka wakusaanguna wamu Ciindi Cesu, munzi iwa Pompeii alimwi awa Herculaneum yakali sumpukide kapati yalo yakali mu Roma munsi lya Mulundu uutegwa Vesuvius. Ibana Roma bakakupukide, ooku nkokubusena nkobakali kuunka kuyoolyookezya. Imayake aabo aakucitila zisobano akali kukonzya kukkwana bantu bainda kucuulu, alimwi mumunzi wa Pompeii mwakali bbuwa lyakusobanina zisobano lyakali kukonzya kukkwana bantu banji cakunga kwakali kucaala buyo asyoonto kuti boonse bakkwane aabo bakali kukkala mumunzi ooyo. Basikusya mumatongo mumunzi wa Pompeii nobakabala mweelwe wamaanda aakunywida bukoko akali kukkwana ku 118, alimwi kakuli maanda aamwi akali aakweendela nsolo naa kuumina njuka antela aakubbejela naa aakucitila bumambi. Ikutalilemeka alimwi akuyandisya lubono lwakumubili zyakalidumide kapati kweelana ambozitondezya zifwanikiso zyakazekawidwe kubwaanda alimwi amitunta yabantu yakajanwa.
2 Mu August 24, 79 C.E., Mulundu wa Vesuvius wakatalika kuzwa mulilo munyika. Basikwiiya zyamulilo uuzwa munyika (Volcanologists) bayeeya kuti mulilo ooyu nowakazwa muciindi cakusaanguna weelede kuti wakapa bantu bakali kukkala muminzi eeyi kuti balonge. Masimpe, kuboneka kuti bunji bwabo bakalonga. Nokuba boobo, aabo ibatakabikkila maano kuntenda eeyi naa ibakaunduluzya kukucenjezyegwa ooku tiibakalonga pe. Eelyo akaandabwe kamasiku, kwakazwa mulilo munyika uupya kapati wakajisi meenda aamabwe aakeenzemuka, alimwi meenda aayo amulota zyakapaya mbuli meenda mumunzi wa Herculaneum akubanyonyoona boonse ibakacaala mumunzi ooyu. Mbubwenya buyo, kubucedo kwabusiku oobo, mulilo uuli mbuli yooyu wakajaya bantu boonse ibakali mumunzi wa Pompeii. Elo kaka cakabija eeci cakacitika akaambo kakutaswiilila kukucenjezyegwa!
Imamanino Abweende Bwazintu Bwaba Juda
3. Ino nkukozyanya kuli buti kwalunyonyooko lwakacitikila Jerusalemu alimwi amunzi wa Pompeii awa Herculaneum?
3 Ikunyonyoonwa kwamunzi wa Pompeii alimwi awa Herculaneum takusiki akunyonyoonwa kwakacitikila Jerusalemu kakwiindide myaka buyo iili fwuka, nokuba kuti mapenzi aayo aakacitwa abantu balya maila. Akapandululwa kuti “nkokusaala kwiinda kusaala kwakacitikide aanyika,” nkaambo kuluulwa kuti kwakajayigwa iba Juda bainda kukaulunzuma. Nokuba boobo, mbubwenya mbuli ntenda yakacitikila munzi wa Pompeii alimwi awa Herculaneum, ikunyonyoonwa kwa Jerusalemu kunyina nokwakacitika kakunyina kubacenjezya pe.
4. Ino ncitondezyo nzi cabusinsimi Jesu ncaakapa kubatobeli bakwe icakali kuyoobatondezya kuti mamanino aabweende bwazintu akali afwaafwi kapati, alimwi ino cakazuzikizyigwa buti kumatalikilo mumwaanda wamyaka wakusaanguna?
4 Jesu Kristo wakasinsima kujatikizya kunyonyoonwa kwamunzi ooyu alimwi azintu zyakeelede kutalika kucitika, izintu zinyonganya mbuli nkondo, nzala, mizuzumo yanyika alimwi akutatobela milawo kwabantu. Basinsimi babeji bakali kuzoobuka, pele makani mabotu aa Bwami bwa Leza akali kuzookambaukwa munyika yoonse. (Matayo 24:4-7, 11-14) Nokuba kuti majwi aa Jesu ali mukuzuzikizyigwa kapati mazubaano, akazuzikizyigwa buyo aasyoonto muciindi eeco. Makani aansiku atondezya kuti kwakaba nzala iilunzya kasuko mu Judaya. (Incito 11:28) Sikuluula makani aansiku imu Juda wazina lya Josephus uluula kuti, kwakacitika muzuzumo wanyika mu Jerusalemu kakuceede buyo mazuba masyoonto kuti munzi ooyu unyonyoonwe. Jerusalemu nowakalondelela kukunyonyoonwa, kwakaba kubukilana mubweendelezi kwalo kwakazumanana. Kwakali nkondo akati kankamu zyabasimapolitikisi zyaba Juda alimwi akujayana kwabantu muminzi minji mwakali kukkala bama Juda alimwi a Bamasi. Nokuba boobo, makani mabotu aa Bwami akakambaukwa “[ku]bantu boonse baansi ano.”—Ba-Kolose 1:23.
5, 6. (a) Ino mmajwi nzi aabusinsimi Jesu ngaakaamba aakazuzikizyigwa mu 66 C.E.? (b) Ino nkaambo nzi ncokwakafwa bantu banji Jerusalemu naakazundwa mu 70 C.E.?
5 Mu 66 C.E., bama Juda bakazangilalyo kubulelo bwaba Roma. Ciindi Cestius Gallus naakasololela mpi ikuti bazikunyonyoone munzi wa Jerusalemu, batobeli ba Jesu bakaayeeya majwi aa Jesu aakuti: “[M]wabona kuti Jerusalemu wazinganwa mukati kempi, amukazibe kuti kusaalwa kwawo kuli afwaafwi. Ndilyonya abo abali mu-Judaya abacijile mumalundu, abali mukati kawo abazwe, abali mumyuunda batanjili mumunzi.” (Luka 21:20, 21) Iciindi cakuzwa mu Jerusalemu cakasika, pele ino mbuti mbubakali kukonzya kuzwa? Katayeeyelwi, Gallus wakapiluka ampi yakwe, calo cakapa ciindi ku Banakristo ibakali kukkala mumunzi wa Jerusalemu alimwi amu Judaya kutobela majwi aa Jesu akuccijila mumalundu.—Matayo 24:15, 16.
6 Nokwakainda myaka iili yone, iciindi kaciyanda kusika ca Pasika, impi yaba Roma yakapiluka kayeendelezyegwa a Mupati wabasikalumamba Titus, walo wakakanzide kumanizya kuzanga kwaba Juda. Impi yakwe yakauzinga munzi wa Jerusalemu alimwi akuyaka “bwaanda” calo cakapa kuti ikuzwa mumunzi cibe cintu cikatazya. (Luka 19:43, 44) Nokuba kuti bakali kulangila kulwanwa, iba Juda boonse ibakali mu Bulelo bwaba Roma bakaguumukila ku Jerusalemu ku Pasika. Eelyo bakasinkilwa. Kweelana abwaamba Josephus, bunji bwabeenzu aaba ibakabula coolwe, mbabakanyonyoonwa mukusaala kwabasikalumba bana Roma. * Jerusalemu naakazundwa, bunji bwaba Juda ibakali mu Bulelo bwaba Roma bakafwa. Ikunyonyoonwa kwa Jerusalemu kubikkilizya atempele yawo kwakamanizya bweendelezi bwaba Juda alimwi abukombi bwabo bwakayeeme a Mulawo wa Musa. *—Marko 13:1, 2.
7. Ino nkaambo nzi Banakristo basyomeka ncobakafwutuka lunyonyooko lwakali mu Jerusalemu?
7 Mu 70 C.E., Banakristo ba Juda nibakajayigwa naa kutolwa mubuzike antoomwe abantu bamwi ibakali mu Jerusalemu. Pele kweelana acitondezyo cijatikizya makani aansiku, bakakutobela kucenjezya Jesu nkwaakacita myaka iili 37 musule. Bakausiya munzi alimwi kunyina nobakapilukila mulinguwo pe.
Ikucenjezya Muciindi Ceelede Kwakacitwa Abaapostolo
8. Ino ncinzi ciyandika Petro ncaakabona, alimwi ino majwi nzi ngaakaamba Jesu aaboneka kuti ngaakali kuyeeya Petro?
8 Mazubaano, kuli lunyonyooko lulangilwa kuyoocitika munyika yoonse mbwiizulwa, ilunyonyooko lwalo iluyoomanizya bweende oobu bwazintu boonse bubyaabi. Kakuceede buyo myaka iili cisambomwi kuti Jerusalemu unyonyoonwe, imwaapostolo Petro wakapa lulayo lwaciindi ceelede lujatikizya bantu boonse ikapati Banakristo bamazubaano lwakuti: Amupakamane. Petro wakabona kuti cilayandika ku Banakristo ikubusya ‘kuyeeya kwabo kwini-kwini’ ikutegwa bataleki kubikkila maano ‘kumulawo wa Mwami’ Jesu Kristo. (2 Petro 3:1, 2) Naakali kukulwaizya Banakristo kuti beelede kukkala cakupakamana, Petro weelede kuti wakali kuyeeya makani ngaakamvwa kuli Jesu kaambila baapostolo Bakwe kakuceede mazuba masyoonto buyo kuti ajaiyigwe, aakuti: “Amucenjele, kamulindila akukomba, nkaambo tamuzi ciindi nociyooba.”—Marko 13:33.
9. (a) Ino muuya uuli buti mubyaabi bamwi ngobakonzya kuba anguwo? (b) Ino nkaambo nzi kuyeeya kuli boobo ncokuli kubyaabi?
9 Mazubaano bamwi calunyansyo balabuzya kuti: “Ino kuli kuboola kwakwe ukwakasyomezegwa?” (2 Petro 3:3, 4) Kulibonya kuti bantu aabo bayeeya kuti zintu kunyina nozyacinca pe, pele zili buyo mbubwenya mbuli mbozyakabede lyoonse kuzwa kumalengelo aanyika. Ncibyaabi kapati ikubaa muuya uuli boobo. Ikudooneka kulakonzya kutupa kuti tuleke kububikkila maano buzuba oobo alimwi akutupa kutalika kucita kufwumbwa zintu nzyotulombozya. (Luka 21:34) Kunze lyaboobo, kweelana ambuli Petro mbwaamba, ibantu aaba bafwubaazya boobu balaluba Zambangulwe lyakacitika kumazuba aa Nowa, kwalo kwakanyonyoona bweende bubyaabi boonse bwanyika. Masimpe, inyika yakacinca aciindi eeco nciconya.—Matalikilo 6:13, 17; 2 Petro 3:5-6.
10. Ino Petro wakabelesya majwi nzi ikukulwaizya baabo ibakonzya kukakilwa kukkazika moyo?
10 Petro ugwasya baabo ibabala lugwalo lwakwe kuti babe bantu bakkazika moyo kwiinda mukubayeekezya ikaambo Leza ncatatoleli ntaamo cakufwambaana. Cakusaanguna Petro waamba kuti: “Ku[li]-Jehova buzuba bomwe buli mbuli cuulu camyaaka, acalo cuulu camyaaka cili mbuli buzuba bomwe buyo.” (2 Petro 3:8) Mbwaanga Jehova unooliko kukabe kutamani, ulakonzya kutulanga-langa twaambo toonse alimwi akusala ciindi cibotu cakubweza ntaamo. Eelyo Petro ulaamba mbuli Jehova mbwayandide kuti bantu boonse beempwe. Ikukkazika moyo kwa Leza kuyoopa kuti bantu banji bakafwutuke balo ibakali munzila yakunyonyooka nikwali kuti wakabweza ntaamo cakufwambaana. (1 Timoteo 2:3, 4; 2 Petro 3:9) Nokuba boobo, ikukkazika moyo kwa Jehova tacaambi kuti kunyina nayoobweza ntaamo pe. Petro waamba kuti “buzuba bwa-Jehova [buyoosika] mbubonya mbwasika mubbi.”—2 Petro 3:10.
11. Ino ncinzi ciyootugwasya kuzumanana kupakamana munzila yakumuuya, alimwi ino mbuti eeci mbocikonzya ‘kuyoobindaanya’ buzuba bwa Jehova munzila yacikozyanyo?
11 Ikukozyanyisya nkwacita Petro kulayandika kukubikkila maano. Ibabbi balakatazya kujata, pele ikuti naa mulindizi kalanga masiku woonse ulalangilwa kumubona mubbi kwiinda muntu wiide kufwukula naa kugunka. Ino mbuti mulindizi mbwakonzya kuzumanana kupakamana? Ikweendeenda kulakonzya kumugwasya kutegwa apakamane kwiinda kwiide kukkede masiku woonse. Mbubwenya buyo, ikuba bantu banyangaana munzila yakumuuya kuyootugwasya to Banakristo ikuzumanana kupakamana. Nkakaambo kaako Petro ncatukulwaizyila kuti tuzumanane kujata bubi “mukweenda munzila iisalala amukulemeka Leza.” (2 Petro 3:11) Imulimo uuli boobo uyootugwasya kuzumanana “kuyandisya buzuba bwakusika kwa-Leza.” Ibbala lya Cigiliki libelesyedwe lyakuti “kuyandisya” lilakonzya kusandululwa kuti “kubinzyaanya.” (2 Petro 3:12) Masimpe kuti kunyina notukonzya kucinca ciindi ca Jehova. Ibuzuba bwakwe buyoosika muciindi cakwe ceelede. Pele ciindi eeco tacikooyoobonwa kumuka ikuti katujisi bubi mumulimo wakwe.—1 Ba-Korinto 15:58.
12. Ino mbuti swebo kutugama mbotukonzya kugwasyigwa akukkazika moyo kwa Jehova?
12 Aboobo, kufwumbwa aabo ibayeeya kuti buzuba bwa Jehova bwamuka bakulwaizyigwa kutobela lulayo lwa Petro lwakuti beelede kulindila cakukkazika moyo mpaka cikasike ciindi ceelede Jehova ncaya kubweza ntaamu. Ee, tulakonzya kucibelesya kabotu ciindi ciceede Leza ncacikkazikide moyo. Mucikozyanyo, tulakonzya kuzumanana kujana bube bumwi bwa Bunakristo alimwi akwaambila bantu makani mabotu balo mbotwatali kulangila kwaambila ikuti Leza naakabweza kale ntaamo. Ikuti naa twazumanana kuba bantu bapakamenyi, Jehova uyootujana ‘katukkede muluumuno, katutakwe kabala, nikaba kampenda’ kumamanino abweende oobu bwazintu bubyaabi. (2 Petro 3:14, 15) Elo kaka oobo buyooba bulumbu!
13. Ino majwi nzi Paulo ngaakaamba ku Banakristo baku Tesalonika aayandika kapati mazubaano?
13 Awalo Paulo mulugwalo lwakwe lwakusaanguna ndwaakalembela Banakristo baku Tesalonika wakaamba mbuli mbokuyandika kupakamana. Wakabalaya kuti: “Tutanooni mbuli bantu bamwi, atukalinde, tube bapakamani.” (1 Ba-Tesalonika 5:2, 6) Elo kaka kulayandika kupakamana mbwaanga mazubaano ikunyonyoonwa kwabweende bwazintu bubyaabi bwanyika yoonse kwalondelela! Bakombi ba Jehova bakkede munyika bantu mobatabikkili maano kumakani aakumuuya, aboobo eeci cilakonzya kubajatikizya. Akaambo kaceeci, Paulo wakalailila kuti: “Atube bapakamani, tulisamike kucamba cikwabilizyo calusyomo aluyando, alimwi olo lufutuko ndotulangila lube ingoani yesu.” (1 Ba-Tesalonika 5:8.) Ikuliyiisya Jwi lya Leza tobeni alimwi akuyanzana abakwesu kumiswaangano lyoonse kuyootugwasya kutobela lulayo lwa Paulo alimwi akuzumanana ikubikkila maano kubuzuba oobo.—Matayo 16:1-3.
Tuulunzuma Twabantu Ituli Mbotubede Tuli Pakamenyi
14. Ino myeelwe nzi iitondezya kuti ibantu banji mazubaano bali mukutobela lulayo lwa Petro lwaamba kupakamana?
14 Sena mbanji mazubaano ibaswiilila kukulwaizya kwakasololelwa amuuya kujatikizya kupakamana? Inzya buya mbanji. Mumwaka wamulimo wa 2002, imweelwe waatala wabasikumwaya uusika ku 6,304,645 wakayungizyigwa a 3.1 pasenti kwiinda amweelwe wamu 2001, batondezya kuti balipakamenyi kwiinda mukubelesya mawoola aali 1,202,381,302 ikwaambila bantu kujatikizya Bwami bwa Leza. Kubantu aaba mulimo ooyo tiiyakali nenzila yakwiide kusowela buyo ciindi pe. Ncecakali cibeela ciyandika kapati mubuumi bwabo. Imuuya ngobakajisi bunji bwabo wakatondezyegwa a Eduardo alimwi Noemi balo bakkala mucisi ca El Salvador.
15. Ino ncakuluula cili buti cizwa ku El Salvador icitondezya kuti ibanji bali mukuzumanana kupakamana munzila yakumuuya?
15 Kwamyaka iili mbwiibede yainda, Eduardo alimwi a Noemi bakaabikkila maano kapati majwi aa Paulo aakuti: ‘Ziyanza zyaansi aano zili mukucinca.’ (1 Ba-Korinto 7:31) Bakatalika kupona buumi buuba-uba, eelyo bakanjila mulimo waciindi coonse wabupainiya. Mukuya kwamazuba, bakajana mpindu munzila zinji mane bakatola lubazu mumulimo wakweendeenda mubbazu alimwi amucooko. Nokuba kuti bakasikilwa mapenzi mapati, Eduardo alimwi a Noemi balisinizyide kuti bakasala camaano ciindi nobakaleka kubikkila maano kuzintu zyakumubili akutalika mulimo waciindi coonse. Ibunji bwabasikumwaya ibali 29,269 kubikkilizya abapainiya ibali 2,454 ibali mucisi ca El Salvador, bakatondezya muuya ngomunya wakulyaaba, kalo kali nkakaambo kakapa kuti cisi eeci cibe akuyungizyika kwamweelwe wabasikumwaya uusika ku 2 pasenti mwaka wakamana.
16. Ino muuya uuli buti wakatondezyegwa amukwesu umwi mwana-mwana wakucisi ca Côte d’Ivoire?
16 Mucisi ca Côte d’Ivoire, imuuya uuli boobu wakatondezyegwa a Munakristo mukubusi walo wakalembela ofesi lyamutabi kuti: “Ndili mukutausi. Pele tandikonzyi kwaambila bakwesu kuti bacite mulimo wabupainiya kakuli mebo tandipi citondezyo cibotu kwiinda mukucita boobo. Aboobo, ndakauleka mulimo wangu ngondakali kuvwola mali manji akutalika kulibelekela ndemwini kutegwa kandijana ciindi cinji cakuya mumulimo.” Ooyu mukubusi uli akati kabapainiya ibali 983 ku Côte d’Ivoire, icisi cakajisi basikumwaya ibali 6,701 mwaka wakamana balo ibakayungizyika amweelwe wa 5 pasenti.
17. Ino mbuti Kamboni umwi mukubusi ku Belgium mbwaakatondezya kuti taluyoowi lusalululo?
17 Ikuteengelela alimwi akubaa lusalululo zyazumanana kuleta mapenzi kuli basikumwaya ba Bwami ibali 24,961 mucisi ca Belgium. Nokuba boobo, bacili basungu alimwi banyina bukandu pe. Ciindi Kamboni umwi uulaamyaka yakuzyalwa iili 16 naakamvwa kuti Bakamboni ba Jehova baambwa kuti nkakamu kamaseseke kabyaabi ciindi nobakali kwiiya mucikolo, wakalomba kuti aambe bwini bantu aaba mbobabede. Wakapandulula ibwini mbobabede Bakamboni kwiinda mukubelesya vidiyo yakuti: Jehovah’s Witnesses—The Organization Behind the Name alimwi abroshuwa yakuti: Jehovah’s Witnesses—Who Are They? Imakani akatambulwa amaanza obile, alimwi imvwiki yakatobela basicikolo bakasunkwa, imibuzyo yoonse yakali kujatikizya cikombelo ca Banakristo ca Bakamboni ba Jehova.
18. Ino mbumboni nzi butondezya kuti buyumu-yumu bwakujana mali kunyina nobwakanyonganya basikumwaya baku Argentina alimwi aku Mozambique mukubelekela Jehova?
18 Ibunji bwa Banakristo basikilwa mapenzi aataambiki mumazuba aano aakumamanino. Pele balasoleka kapati kutegwa batanyonganyizyigwi. Nokuba kuti cisi ca Argentina cilijisi mapenzi kapati mumakani aamali, cakaba amweelwe mupya wa Bakamboni uusika ku 126,709 mwaka wamana. Muli bucete butaambiki mucisi ca Mozambique. Pele bantu ibali 37,563 bakapa malipooti aamumulimo wabukambausi, ooku kwakali kuyungizyika a 4 pasenti. Ibuumi mbuyumu kapati mucisi ca Albania, pele cisi eeci cakapa lipooti mbotu kapati yakuyungizyika iisika ku 12 pasenti, akuba amweelwe wabasikumwaya uusika ku 2,708. Cakutadooneka, muuya wa Jehova kunyina nousinkilwa abuyumu-yumu buli boonse ciindi babelesi bakwe nobabikka zintu zya Bwami kumbele.—Matayo 6:33.
19. (a) Ino ncinzi citondezya kuti kucili bantu ibali mbuli mbelele ibaciyanda kasimpe kamu Bbaibbele? (b) Ino makani nzi aambi aali mulipooti yamwaka aatondezya kuti babelesi ba Jehova balipakamenyi munzila yakumuuya? (Amubone ccaati iili aapeeji 22 kusikila ku 25.)
19 Imweelwe waakati-kati waziiyo zya Bbaibbele zili 5,309,289 zyakalipootwa munyika yoonse mwaka wamana zitondezya kuti kucili bantu banji ibali mbuli mbelele ibaciyandisya kasimpe kamu Bbaibbele. Imweelwe waatala mupya wabaabo ibakajanika kuciibalusyo uusika ku 15,597,746, ibunji bwabo tabali babelesi ba Jehova basungu pe. Abazumanane kujana luzibo alimwi akuba aluyando kuli Jehova alimwi akubanyina. Cilakondelezya ikubona “inkamu impati” ya “mbelele zimwi” kiizumanana kuzyala micelo, mukubelekela Mulengi “isikati amasiku mutempele yakwe,” kabayanzene abanyina ibananike.—Ciyubunuzyo 7:9, 15; Johane 10:16.
Ikwiiya Kuzwa Kuli Loti
20. Ino ncinzi ncotwiiya kuzwa kucikozyanyo ca Loti alimwi amukaintu wakwe?
20 Mmasimpe ngakuti nobaba babelesi ba Leza basyomeka balakonzya kwaalilwa kwaciindi cili mbocibede kubikkila maano kubuzuba oobo. Amuyeeye Loti mwana amunyina wa Abrahamu. Wakaambilwa abangelo bobilo bakamuswaide kuti Leza wakali kuyanda kunyonyoona munzi wa Sodoma a Gomora. Imakani aali boobu kunyina naakeelede kumugambya Loti pe, nkaambo walo wakali “kukataazigwa akweenda kwabasizibi muzisusi zyabo zibi.” (2 Petro 2:7) Pele, ciindi bangelo nobakayanda kuti bamusindikile kuti azwe mumunzi wa Sodoma, wakacili “kuzyozyo[o]ka.” Ibangelo bakacita kumukwela buya amukwasyi wakwe kuti bazwe mumunzi. Kumane boobo, imukaintu wa Loti tanaakatobela malailile akaamba bangelo aakuti tabeelede kucebuka pe. Ikutabikkila maano kwakwe kwakapa kuti afwe. (Matalikilo 19:14-17, 26) Jesu wakacenjezya kuti: “Amuyeeye muka-Lot[i].”—Luka 17:32.
21. Ino nkaambo nzi ikupakamana ncokuyandika kapati mazubaano?
21 Imanyongwe aakasikila munzi wa Pompeii awa Herculaneum alimwi azyakacitika Jerusalemu naakali afwaafwi ikunyonyoonwa, kubikkilizya azikozyanyo zya Zambangulwe lyakumazuba aa Nowa alimwi azyakacitika kuciindi ca Loti, zyoonse zitondezya mbociyandika ikapati kuswiilila kucenjezyegwa. Mbotuli Bakamboni ba Jehova, tulizyi citondezyo caciindi camamanino. (Matayo 24:3) Twakazwa mubukombi bwakubeja. (Ciyubunuzyo 18:4) Mbubwenya mbuli bwakali Banakristo bamumwaanda wamyaka wakusaanguna, tuleelede ‘kukuyeeya kapati kusika kwabuzuba bwa Jehova.’ (2 Petro 3:12) Inzya, ikupakamana kulayandika kapati mazubaano. Ino nintaamo nzi nzyotweelede kubweza, alimwi ino mbube nzi mbotweelede kuba ambubo ikutegwa tube bantu bapakamenyi? Icibalo citobela cilaalanga-langa makani aayo.
Bupanduluzi buyungizidwe
^ munc. 6 Kuboneka kuti ibantu bakali kukkala mu Jerusalemu mumwaanda wamyaka wakusaanguna tiibakali kwiinda ku 120,000. Eusebius wakabala mweelwe wabantu ibakali kukkala mucooko ca Judaya, aboobo mbaakajana bakali kusika ku 300,000 alimwi aaba mbabantu bakaunkide ku Jerusalemu ku Pobwe lya Pasika mu 70 C.E. Aaba bambi bakanyonyoonwa beelede kuti bakazwida muzibeela zimwi izyakali kulelwa abulelo oobo.
^ munc. 6 Pele kweelana ambwazibwene zintu Jehova, Mulawo wa Musa wakalidwa busena acizuminano cipya mu 33 C.E.—Ba-Efeso 2:15.
Ino Inga Mwaingula Buti?
• Ino nzintu nzi zyakacitika zyakapa kuti Banakristo bazwe mukunyonyoonwa kwa Jerusalemu?
• Ino mbuti lulayo lwakalembwa amwaapostolo Petro alimwi a Paulo mbolutugwasya kutegwa tuzumanane kupakamana?
• Ino mbaani mazubaano batondezya kuti balipakamenyi?
• Ino nciiyo nzi ncotwiiya kuzwa kucibalo cijatikizya Loti alimwi amukaintu wakwe?
[Mibuzyo yaciiyo]
Ccaati iili apeeji 22-25]
2002 LIPOOTI YAMWAKA WAMULIMO WA 2002 YA BA KAMBONI BA JEHOVA NYIKA YOONSE MBWIIZULWA
Amubone Bbaundi Volyumu
[Zifwanikiso izili apeeji 26]
Ikunyangaana kulabagwasya Banakristo ikutegwa kabapakamenyi