Ibakubusi Bakkomanisya Moyo Wa Jehova

Iziiyo eezi zyakabambilwa ikapati bakubusi ibali akati ka Bakamboni ba Jehova. Aboobo twamukulwaizya nobana-bana kuti mwaayiye kabotu makani aaya alimwi akuti mukatole lubazu kapati mukwiingula zyaakuyiigwa mu Ciiyo ca Ngazi Yamulindizi kumbungano.

“Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.”—TUSIMPI 27:11.

1, 2. (a) Amupandulule naa kulombozya zintu zyamunyika caamba kuti tamweeleli kuba Banakristo. (Ba-Roma 7:21) (b) Ino ncinzi ncomwiiya kuzwa kucikozyanyo ca Asafu? (Amubone kabbokesi apeeji 7.)

AMWEEZYEEZYE ikuti muyandaula zisani zyakuula. Mbomuyaabulangaula, mwabona cimwi cainda kumukonda. Imusyobo wancico alimwi ambocisumidwe zyainda kweendelana ancomuyandaula alimwi awalo muulo nkujana pampawo buya. Pele nomwacisalangunya kapati, mwagambwa kujana kuti cisani eeci cilifwide mumoombe alimwi iwakali kusuma nkujana tanaakacisuma kabotu pe. Sena inga mwasowa mali aanu kuula cisani eeci citasumidwe kabotu?

² Amwaakozyanyisye makani aaya abukkale bukonzya kumusikila Nobanakristo bakubusi. Ikuzilanga caalamfwu-lamfwu zintu zyamunyika, ziboneka mbuli cisani eeci ncitwaamba. Ziboneka kuti nzibotu kapati. Mucikozyanyo, basicikolonyoko balakonzya kuti kabakkomana kwiinda mukuunka kutupobwe, kubelesya misamu iikola, kunywa bukoko, kusyabana alimwi akoonana kabatana kwatana. Sena ziindi zimwi buumi buli boobu mulabulombozya? Sena mulombozya kulabila ceeco ncobaamba kuti lwaanguluko? Ikuti naa mboobo, mutaindi kwaamba kuti muli basimucita zibi pe, akuyeeya kuti tamweeleli kuba Munakristo. Kayi Bbaibbele lilazuminizya kuti inyika iloongelezya kapati cakunga naba muntu uuyandisya kukkomanisya Leza uloongelezyegwa.—2 Timoteo 4:10.

3. (a) Ino nkaambo nzi ncocitagwasyi kuyandaula zintu zyamunyika? (b) Ino mbuti Munakristo umwi mbwakupandulula kutagwasya kwanyika?

³ Lino amulangisye kapati mbubonya mbomukonzya kulangisya cisani ncomuyanda kuti muule. Amulibuzye kuti, ‘Ino mbubotu nzi bujanika muzisani eezi alimwi abusume bwazyo?’ Ibbaibbele lyaamba kuti “nyika ilamana, azisusi zyayo.” (1 Johane 2:17) Kufwumbwa lukkomano lujanika munyika eeyi lubote buti, ndwaciindi buyo cisyoonto. Kunze lyaboobo, ikulilemeka ikutali kwabuna Leza kuletela mapenzi kapati. Takugwasyi pe. Munakristo umwi uuliyumya mumapenzi akaboola akaambo “kakutaibelesya kabotu myaka yabukubusi” waamba kuti: “Inyika ilakonzya kulibonya mbuli cintu cibotu alimwi cikwelelezya. Iyanda kuti usyome kuti ulakonzya kukkomana munzila iili yoonse kakunyina macise. Pele zintu tazili boobo pe.  Inyika ilakonzya kukubelesya, yamanizya ilakusowa.” * Nkaambo nzi ncomukonzya kunyonyoona myaka yanu yabukubusi munzila iili boobo?

Kukwabililwa ‘Kumubi’

4, 5. (a) Kakuceede ciindi cisyoonto buyo kuti afwe, ino ncinzi Jesu ncaakalomba mumupailo kuli Jehova? (b) Ino nkaambo nzi ikulomba ooku ncokwakali kuyandika?

⁴ Ibana ibali akati ka Bakamboni ba Jehova nobabona kuti kunyina cintu ciya komoonga ibweende oobu bwazintu ncobukonzya kupa, balasoleka kutabamba cilongwe anyika. (Jakobo 4:4) Sena muli umwi wabakubusi aaba basyomeka? Ikuti naa muli umwi wabaabo, mulalumbaizyigwa kapati. Masimpe tacili cuuba-uba kukaka kuyungwa abeenzinyoko akulitondezya caantangala kuti muliindene ambabo, pele nkwali uukonzya kumugwasya.

⁵ Kakuceede ciindi cisyoonto kuti Jesu afwe, wakapaila kuli Jehova kuti ‘abavwune’ basikwiiya “kulooyo mubi.” (Johane 17:15) Kuli kaambo kakapa kuti Jesu apaile boobo. Wakalizyi kuti ikusyomeka tiicakali cintu cuuba-uba kuli basikumutobela kufwumbwa naa mbamusela nzi. Nkaambo nzi? Ikaambo kamwi nkakuti, kweelana a Jesu mbwaakazuminizya, basikwiiya bakwe bakali kuyoolwanwa asinkondonyina singuzu alimwi uutalibonyi, Diabolosi Saatani “mubi.” Ibbaibbele lyaamba kuti cilenge eeci camuuya citalibijili “[ci]leendeenda mbuli syuumbwa wabutambo akuya buyandaula ng[ocitii] lume.”—1 Petro 5:8.

6. Ino mbuti mbotuzyiba kuti Saatani tabeengeleli bakubusi?

⁶ Kuzwa kaindi, Saatani cilamukonda kuletela bantu mapenzi aakatazyide. Amuyeeya buyo mapenzi Saatani ngaakaletela Jobu amukwasyi wakwe. (Jobu 1:13-19; 2:7) Ambweni mulakonzya kuyeeya zintu zyakacitika mubuumi bwanu izitondezya muuya mubi wa Saatani. Diabolosi nabendelela kutegwa alume, kunyina nabafwida luse bakubusi pe. Mucikozyanyo, kumatalikilo kwamwaanda wamyaka wakusaanguna C.E., Heroda wakaba amuzeezo wakujaya bana basankwa mu Betelehemu, ibatakali kusotoka kumyaka yobilo. (Matayo 2:16) Cakutadooneka, Saatani nguwakayunga Heroda mukusola kujaya mwana wakali kulangilwa kuti akabe Mesiya wakasyomezyegwa a Leza kuti nguuyoobeteka Saatani. (Matalikilo 3:15) Cilasalala kuti Saatani tabeengeleli bakubusi pe. Ncayanda buyo nkunyonyoona bantu banji kapati. Oobu mbocibede ikapati mazubaano nkaambo wakalosyegwa kuzwa  kujulu, “abukali bupati, nkaambo ulizi kuti ciindi ncacijisi nciniini buyo.”—Ciyubunuzyo 12:9, 12.

7. (a) Ino mbuti Jehova mbwaindene kapati a Saatani? (b) Ino Jehova ulimvwa buti kujatikizya kukkomana kwanu mubuumi?

⁷ Jehova uliindene kapati a Saatani nkaambo walo ulijisi “moyo waluzyalo,” kakuli Saatani ujisi “bukali bupati.” (Luka 1:78) Ncecisiko caluyando. Imulengi wesu ulatondezya bube oobu bwiinda kubota cakunga Ibbaibbele lyaamba kuti: “Leza nduluyando.” (1 Johane 4:8) Elo kaka kuli lwiindano kapati akati kaleza wabweende oobu bwazintu alimwi a Leza ngomukomba! Saatani uyandaula ngwatiilume, kakuli walo Jehova “tayandi kuti bantu bafwidilile.” (2 Petro 3:9) Bantu boonse ulabayanda kapati, kubikkilizya andinywe. Jehova namulailila mu Jwi lyakwe kuti mutabi banyika, tamukasyi kukkomana mubuumi naa kunyonganya lwaanguluko ndomujisi. (Johane 15:19) Muciindi caboobo, umuvwuna kumubi. Uso wanu uuli kujulu uyanda kuti mujane cintu cimwi ciinda kubota ikutali lukkomano lwamunyika lumana buyo. Ncayanda nkuti mujane “buumi bwinibwini,” ibuumi butamani muparadaiso anyika. (1 Timoteo 6:17-19) Jehova uyanda kuti muzwidilile alimwi umukulwaizya kuti muzumanane ambaakani eeyi. (1 Timoteo 2:4) Kunze lyaboobo, Jehova ulamutamba. Kumutamba kunzi?

“Ukondezye Moyo Wangu”

8, 9. (a) Ino ncipego nzi ncomukonzya kupa Jehova? (b) Kweelana ambokutondezyedwe mumakani aa Jobu, ino mbuti Saatani mbwasampaula Jehova?

⁸ Sena kuli nomwakaulide kale cintu cakupa mweenzinyoko akubona mbwamweta-mweta akaambo kakulumba kwalo ciindi naakacitambula? Mweelede kuti mwakatola ciindi ikuyeeya cintu cikonzya kumukkomanisya muntu ooyo. Lino amubone mubuzyo ooyu: Ino ncipego nzi ncomukonzya kupa Mulengi wanu, Jehova Leza? Aaka kaambo kumatalikilo inga kalimvwisya kuti nkabufwubafwuba. Ino ncinzi Singuzuzyoonse ncakonzya kuyanda kumuntunsi buyo? Ino ncinzi ncomukonzya kumupa ncatajisi? Ibbaibbele lilaingula ku Tusimpi 27:11 kuti: “Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.”

⁹ Kweelana ambomuzyi kale kwiinda mukwiiya Bbaibbele, Diabolosi Saatani nguusampaula Jehova. Waamba kuti kufwumbwa uubelekela Leza tamubelekeli akaambo kakumuyanda pe, pele akaambo kakuyanda kujana zintu zimwi. Alimwi ulati, ikuti naa bapenga inga babuleka bukombi bwakasimpe. Mucikozyanyo, amulange-lange Saatani ncakaamba kuli Jehova kujatikizya mwaalumi uululeme Jobu ategwa: “Teewakamuyakilide kabotu, walo abaŋanda bakwe azyoonse nzyajisi? Wakamukupusya mumulimo wakwe, alimwi matanga aakwe avula munyika. Pele, kuti kotambika janza lyako akuguma ncajisi uzookusinga kubusyu bwako!”—Jobu 1:10, 11.

10. (a) Ino tuzyiba buti kuti Saatani tanaakadooneka buyo kusyomeka kwa Jobu kulikke? (b) Ino mbuti mbomujatikizyidwe mumakani aabweendelezi?

¹⁰ Kweelana ambokwaambidwe mu Bbaibbele, Saatani tanaakadooneka buyo kusyomeka kwa Jobu pe, pele akwabantu bambi babelekela Jehova, kubikkilizya akwanu. Kaamba bantu boonse, Saatani wakati kuli Jehova: “Muntu [kutali Jobu alikke, pele muntu woonse] uyakupa zyoonse kuti akabe abuumi bwakwe mwini.” (Jobu 2:4) Sena mwaubona mulimo wanu mukaambo aaka kayandika kapati? Kweelana ambokulembedwe ku Tusimpi 27:11, Jehova waamba kuti kuli cintu ncomukonzya kumupa, icikonzya kupa kuti avwiile yooyo uumusampaula, Saatani. Amuyeeye buyo, Mweendelezi Wakoonse-Koonse ulamutamba kuti mutole lubazu mukubamba makani mapati aatola ciindi. Elo kaka mulijisi mukuli acoolwe citaliboteli! Sena mulakonzya kucizuzikizya Jehova ncamulomba kucita? Jobu wakacita oobo. (Jobu 2:9, 10) Jesu awalo wakacita oobo abamwi batabaliki kuzwa kaindi, kubikkilizya abakubusi banji. (Ba-Filipi 2:8; Ciyubunuzyo 6:9) Mulakonzya kucita mbubwenya. Pele amubone kuti kuli nkomuwida mumakani aaya. Milimo yanu iyootondezya naa mugwasyilila Saatani mukusampaula  naa kugwasyilila Jehova ikwiingula. Ino ncili ncomuyoosala?

Jehova Ulamubamba!

11, 12. Sena kuli mbocimujatikizya Jehova kufwumbwa naa mwasala kumubelekela naa pe? Amupandulule.

¹¹ Sena ncomusala kuli mbocimujatikizya Jehova? Sena bantu bakazumanana kusyomeka tabali banji kale cakuti ulakonzya kumwiingula Saatani? Masimpe, imakani Diabolosi ngaakaamba aakuti kunyina uubelekela Jehova akaambo kakumuyanda, alibonya kale kuti ngakubeja. Pele, Jehova uyanda kuti mube kulubazu lwakwe mukaambo kabweendelezi, nkaambo ulamubamba nywebo kumugama. Jesu wakati: “Usowanu uuli kujulu tayandi kuti afwidilile naba umwi akati kabaniini aba.”—Matayo 18:14.

¹² Cakutadooneka, Jehova ulabikkila maano kuli ncomusala alimwi cilamujatikizya kapati. Ibbaibbele lilacisalazya kuti Jehova kuli mbwalimvwa akaambo kazintu zibotu naa zibi zicita bantu. Mucikozyanyo, bana Israyeli nibakazanga cakwiinduluka-induluka, Jehova ‘wakakalala.’ (Intembauzyo 78:40, 41) Zambangulwe lyakumazuba aa Nowa kalitanasika, iciindi “bubi bwabantu baansi [nobwakavwula,]” Jehova “wakapenga mumoyo wakwe.” (Matalikilo 6:5, 6) Amuyeeye buyo eeci ncocaamba. Kuti mwatalika kucita zintu zibyaabi, Mulengi wanu ulabijilwa. Eeci tacaambi kuti Leza muniini moyo buya pe. Muciindi caboobo, ulamuyanda akumubamba. Ikuti mwacita cintu cibotu, Jehova ulakkomana. Takkomani buyo akaambo kakuti ulakonzya kwiingula Saatani pe, pele nkaambo ulaba Sikumupa bulumbu. Oobu mbwayanda kuti amubede. (Ba-Hebrayo 11:6) Elo kaka Wisi wanu Jehova Leza ngusiluyando!

Izilongezyo Zitalivwulili Sunu

13. Ino mbuti sunu kubelekela Jehova mbokuleta zilongezyo?

¹³ Izilongezyo ziboola akaambo kakubelekela Jehova tazikajaniki buyo kumbele pe. Kuli kaambo kabotu bakubusi banji akati ka Bakamboni ba Jehova kabapa kukkomana akukkalwa moyo sunu. Sintembauzyo wakalemba kuti: “Milao ya-Jehova ililuleme, ilatangaazya moyo.” (Intembauzyo 19:8) Jehova ulizi zintu zibotu zyotuyandika kwiinda muntu woonse. Kwiinda mumusinsimi Isaya, Jehova wakaamba kuti: “Ndime Jehova Leza wako. Ndime uukwiiyisya kuti ugwasigwe. Ndime uukweenzya munzila njoelede kutola. Nicakabota niwakaswiilila milazyo yangu! Lino luumuno lwako nilwakaba mbuli mulonga, abululami bwako  nibwakaba mbuli mayuwe aalwizi.”—Isaya 48:17, 18.

14. Ino mbuti njiisyo zyamu Bbaibbele mbozikonzya kumugwasya ikutegwa mutanjili muzikwelete zikatazya kubbadala?

¹⁴ Ikutobela njiisyo zili mu Bbaibbele kuyoomugwasya kuleka kubijilwa akuciswa moyo. Mucikozyanyo, Ibbaibbele lyaamba kuti aabo ibayandisya mali “macise manji abajaya.” (1 Timoti 6:9, 10, Ci) Sena kuli beenzinyoko ibakacitikilwa zintu zili mbuli zeezi zyaambwa mulugwalo oolu? Bakubusi bamwi balijisi zikwelete zinji kapati akaambo kakuyanda zisani zipya izidula kapati zyakasumwa abantu bacibwene kumutwe. Ikukatazyigwa akaambo kakubbadalila zintu zidula kapati nzyotwakakweleta, mbuzike bukatazya kapati.—Tusimpi 22:7.

15. Ino mbuti njiisyo zyamu Bbaibbele mbozikonzya kumukwabilila kukukatazyigwa akaambo kakutalilemeka kwiinda mukoonana?

¹⁵ Alimwi amulange-lange makani aakutalilemeka kwiinda mukoonana. Amwaka munyika yoonse, ibakubusi batabaliki ibatakwetwe balamita. Ibamwi balazyala bana mbobatayandi naa mbobatakonzyi kukomezya. Ibamwi balagusya mada, eelyo balakatazyigwa kapati amanjezeezya. Alimwi kuli bakubusi ibajana malwazi aaboola kwiinda mukoonana mbuli AIDS. Pele kuli yooyo uumuzyi Jehova, iciinda kubija ncakuti, icilongwe cakwe a Jehova cilamana. * (Ba-Galatiya 5:19-21) Nkakaambo kaako, Ibbaibbele ncolyaambila kuti: “Amucije bwaamu.”—1 Ba-Korinto 6:18.

Ikubelekela “Leza Uukondwa”

16. (a) Ino tuzyiba buti kuti Jehova uyanda kuti kamukondwa mumazuba aabukubusi? (b) Ino nkaambo nzi Jehova ncabikkila malailile ngomweelede kutobela?

¹⁶ Ibbaibbele Jehova limwaamba kuti, ngu “Leza uukondwa.” (1 Timoteo 1:11, NW) Uyanda kuti andinywe kamukondwa. Alimwi buya Ijwi lyakwe kuligama lyaamba kuti: “Kobotelwa omukubusi nocili mwana, kotangala mumazuba aabukubusi bwako.” (Mukambausi 11:9, BT) Pele Jehova ulabona izintu zili kumbele akuzyiba ziyootobela akaambo kakulilemeka munzila iili kabotu naa iitali kabotu. Nkakaambo kaako umucenjezya kuti: “Koyeeya Mulengi wako mumazuba aabulombe bwako, mazuba aamapenzi naatana kusika, amyaka niitana kuboneka noyooamba  kuti, Nsicibotelwi zintu ezi.”—Mukambausi 12:1.

17, 18. Ino mbuti Munakristo umwi mukubusi mbwaakatondezya lukkomano mukubelekela Jehova, alimwi ino mbuti mbomukonzya kulujana andinywe?

¹⁷ Mazubaano, bakubusi banji balakkomana kapati akaambo kakubelekela Jehova. Mucikozyanyo, Lina uujisi myaka iili 15 waamba kuti: “Ndilisinizyide alimwi ndilaabulemu. Mubili wangu uli kabotu akaambo kakuti tandifwebi naa kubelesya misamu iikola. Ndilijisi busolozi mbondipegwa kwiinda mumbungano ibundigwasya kulwana makatazyo Saatani ngaleta. Ibusyu bwangu buzula lumwemwe akaambo kakuyanzana kugwasya ku Ŋanda ya Bwami. Iciinda kubota ncakuti, ndilangila kuyoopona buumi butamani anyika.”

¹⁸ Mbubwenya mbuli Lina, bakubusi banji Banakristo bali mukuzumanana kusyomeka, eelyo eeci cibaletela lukkomano. Balizyi kuti nokuba kuti buumi buzwide makatazyo ziindi zimwi, bulijisi mpindu alimwi kumbele kuyoobota kapati. Aboobo, amuzumanane kubelekela Leza uubikkila maano kapati kubuumi bwanu. Amumukkomanisye, eelyo uyoomukkomanisya sunu kusikila kutamani.—Intembauzyo 5:11.

Bupanduluzi buyungizidwe

Sena Muciyeeyede?

• Ino nintenda nzi njomujana ‘kumubi’ Saatani?

• Ino mbuti mbomukonzya kumukkomanisya Jehova?

• Ino mbuti Ibbaibbele mbolitondezya kuti Jehova ulamubamba?

• Ino nzilongezyo nzi zimwi ziboola akaambo kakubelekela Jehova?

[Mibuzyo yaciiyo]

Kabbokesi/[Cifwanikiso icili apeeji 7]

Mwaalumi Uululeme Iwakalaatyompwe

Asafu wakali mwiimbi muna Levi wakajisi mpuwo kapati mutempele ya Jehova mu Israyeli yansiku. Mane wakaanza nyimbo izyakali kubelesyegwa mubukombi bwaabuleya. Nokuba kuti wakalijisi mulimo waalubazu, iciindi cimwi wakalombozya kulilemeka kutali kwabuna Leza kwabeenzinyina ibakali kulibonya kuti balatyola milawo ya Leza akutasubulwa. Asafu waamba kuti: “Maulu aangu akaamba kulebwa, intaamu zyangu zyakali kufwaafwi kutezeleka.” Ulazumina ategwa: “Ndakafwa ibbivwe kulibasikulisumpula, nindakabona coolwe cabasizibi.”—Intembauzyo 73:2, 3.

Kumane boobo, Asafu wakaunka kucikombelo ca Leza kuyoopailila makani aaya. Naakalangisya munzila yakumuuya, wakabona kuti Jehova ulibusulide bubi, alimwi muciindi ceelede bantu babi abaluleme bayootebula ncobasyanga. (Intembauzyo 73:17-20; Ba-Galatiya 6:7, 8) Masimpe bacita zibi bali abusena butezemuka. Kumamanino bayoojaigwa Jehova aakunyonyoona bweende oobu bwabantu batakombi Leza.—Ciyubunuzyo 21:8.

[Zifwanikiso izili apeeji 9]

Jehova ulabikkila maano kubuumi bwanu, kakuli Saatani ukanzide kumulwana

[Cifwanikiso icili apeeji 10]

Bakubusi banji balakkomana kubelekela Jehova antoomwe a Banakristonyina