Amuyandaule Bubotu Mubantu Boonse
Amuyandaule Bubotu Mubantu Boonse
“Kondiyeeya O Leza wangu. Kondicitila bubotu.”—NEHEMIYA 13:31.
1. Ino mbuti Jehova mbwabacitila bubotu bantu boonse?
AMANA mazuba aajisi makumbi alimwi amudima, mumuni wazuba upa kuti kucince. Ibantu balalimvwa kabotu alimwi balakkomana. Mbubwenya buyo, ciindi cilamfwu cakubala kwazuba lyuumpa alimwi akuca kakuyumide, ikususumuna kwamvwula, ambweni inji buya kulapa kutontodwa. Mulengi wesu siluyando Jehova wakabamba nyika acipego cibotu cakuca kwiindene-indene kwabuzuba bumwi abumwi. Jesu wakabikkila maano kubwaabi bwa Leza naakayiisya kuti: “Amuyande basinkondonyoko, amubakombele bamupenzya, kuti mube bana bakwe Usowanu uuli kujulu, nkaambo ulapasuzya izuba lyakwe kubabi akubabotu, ulawisizya boonse imvula yakwe, baluleme abataluleme.” (Matayo 5:43-45) Inzya, Jehova ulabacitila bubotu bantu boonse. Ibabelesi bakwe beelede kusolekesya kumwiiya kwiinda mukuyandaula bubotu mubantu.
2 . (a) Ino ncinzi cipa kuti Jehova kacita zintu mububotu? (b) Ino Jehova utulangilila kwiinda munzi kweelana ambotucita kububotu bwakwe?
2 Ino ncinzi cipa kuti Jehova kacita zintu mububotu? Kuzwa ciindi Adamu naakabisya, Jehova kunyina naakaleka kuyandaula bubotu mubantu. (Intembauzyo 130:3, 4) Imakanze aakwe ngakupilusya bantu bamuswiilila mu Paradaiso. (Ba-Efeso 1:9, 10) Iluzyalo lwakwe lwakatupa bulangizi bwakulubulwa kuzwa kucibi alimwi akukutalondoka kwiinda mu Mbuto yakasyomezyegwa. (Matalikilo 3:15; Ba-Roma 5:12, 15) Ikuzumina bubambe bwacinunuzyo kujaluda nzila iikonzya kusololela kukulondoka alimwi. Akati kazintu zimwi Jehova nzyalangilila, uli mukulangilila umwi aumwi ikutegwa azibe ikuti naa tucita buti kubuuya bwakwe. (1 Johane 3:16) Ulalangilila kufwumbwa cintu ncotucita ikutondezya kulumba akaambo kabubotu bwakwe. Mwaapostolo Paulo wakalemba kuti: “Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe.”—Ba-Hebrayo 6:10.
3. Ino mibuzyo iili njotuyandika kulanga-langa?
3 Aboobo, ino mbuti mbotukonzya kwiiya Jehova kwiinda mukuyandaula bubotu mubantu? Atulange-lange ibwiinguzi kumibuzyo eeyi mumbazu zyone zyabuumi: (1) imulimo wa Bunakristo, (2) imukwasyi, (3) imbungano, eelyo (4) ambotukkala abantu.
Mukukambauka Amukugwasya Bantu Kuba Basikwiiya
4. Ino mbuti ikutola lubazu mumulimo wa Bunakristo mbokutondezya kuti nkuyandaula ibubotu mubantu?
4 Jesu wakapandulula naakali kwiingula mibuzyo yabasikwiiya bakwe iijatikizya bupanduluzi bwacikozyanyo camaila alimwi ansaku kuti, “muunda ninyika.” Mbotuli basikwiiya ba Kristo bamazubaano, tulibuzyi ibwini oobu notuunka mumulimo. (Matayo 13:36-38; 28:19, 20) Imulimo wesu wamumuunda ulabikkilizya akwaambilizya lusyomo lwesu caantangalala. Ikuzyibwa kwa Bakamboni ba Jehova akaambo kamulimo wabo wakuŋanda aŋanda alimwi amumigwagwa, ncisinizyo cakuti tuli basungu mukuyandaula baabo boonse ibeelede mulumbe wa Bwami. Inzya, Jesu wakalailila kuti: “Nimunjila mumunzi umwi aumwi, nimuba mukanzi kamwi akamwi, amuyandaule muntu umwi wamumo uuelede.”—Matayo 10:11; Incito 17:17; 20:20.
5, 6. Ino nkaambo nzi ncotukakatila kuswaya cakwiinduluka-induluka mumaanda aabantu?
5 Ciindi notuswaya bantu kakunyina kupangana, tulabona mbuli mbobacita kumulumbe wesu. Ziindi zimwi tujana kuti omwe buyo mumukwasyi ooyu nguutuswiilila, kakuli umbi muŋanda njimunya waamba buyo kuti “Tatuyandi kuswiilila,” eelyo tulazwa aawo. Elo kaka tulausa akaambo kakuti ikukaka naa ikutayanda kuswiilila kwaumwi kulakonzya kunyonganya uumbi! Aboobo, ino ncinzi ncotukonzya kucita kutegwa tuliyumye mukuyandaula bubotu mubantu boonse?
6 Ikuswaya kutobela kuŋanda njimunya eeyo twaakukambaukila kubusena oobo, kulakonzya kutupa ciindi cakuti tumukambaukile ooyo wakapa kuti tutaciti oobo mulweendo lwamana. Ikuyeeya cakacitika mulweendo lutaanzi, kulakonzya kutugwasya kutegwa tulibambile. Ambweni kuli kaambo kakubwene kakapa kuti sikukazya acite boobo, kazyi kabotu kuti weelede kulesya ngotwaambila kuswiilila mulumbe wa Bwami. Ambweni mizeezo yakwe izwide makani aakubeja aamakanze eesu. Pele eeco taceelede kutulesya kukakatila kukambauka makani mabotu aa Bwami aŋanda eeyo, katusola kupandulula zintu mbozibede ncobeni munzila iimvwika. Tuyandisya kugwasya bantu boonse kuti babe aluzibo lwini-lwini lwa Leza. Ambweni Jehova ulakonzya kumukwela muntu ooyu kulinguwe.—Johane 6:44; 1 Timoteo 2:4.
7. Ino ncinzi cikonzya kutugwasya kutegwa tube amizeezo mibotu notusikila bantu?
7 Imalailile aa Jesu kuli basikwiiya bakwe akali kubikkilizya akukazyigwa abamumukwasyi. Sena tanaakaamba kuti: “Ndeza kukazyanisya mwana awisi, alakwe mwana musimbi abanyina, alakwe mukamwana abanyinazyala.” Alimwi wakayungizya kuti: “Basiŋanda bamuntu mwini mbibazooba basinkondonyina.” (Matayo 10:35, 36) Pele, ibukkale alimwi aziimo zyabantu zilacinca. Ikuciswa kutayeeyelwi, kufwidwa wamumukowa, manyongwe, kunyongana mumizeezo alimwi atwaambo tumwi tunji zilakonzya kupa kuti muntu abikkile maano kubukambausi bwesu. Ikuti naa katujisi mizeezo mibyaabi yakuti ibantu mbotukambaukila kunyina nobayoozumina, sena tuli mukuyandaula bubotu mulimbabo? Sena tatukonzyi kubaswaya kuŋanda ziindi zimbi? Tulakonzya kujana kuti bali muciimo cimbi. Ziindi zimwi taali buyo makani ngotwaamba aabapa kuti baingule munzila imwi pe, pele munzila mbotwaamba. Ikupaila cakusinizya kuli Jehova katutana talika kukambauka, masimpe kuyootugwasya kubaa mizeezo mibotu alimwi akwaamba mulumbe wa Bwami munzila iili kabotu kubantu boonse.—Ba-Kolose 4:6; 1 Ba-Tesalonika 5:17.
8. Ino ncinzi cikonzya kucitika ikuti naa Banakristo kabayandaula bubotu mubasazinyina batasyomi?
8 Mumbungano zimwi, ibunji bwabaabo ibali mumukwasyi balamubelekela Jehova. Ikuliyumya akukkala kabotu mumukwasyi amulukwatano kwamusazinyina umwi uucembeede cakapa kuti bana bamwi bamulombozye akumulemeka. Eeci cakapa kuti ibana aaba bacince mizeezo yabo. Akaambo kakutobela lulayo lwamwaapostolo Petro, Banakristo banji bagwasya balumi babo kusanduka “kakunyina akubelesya majwi.”—1 Pita 3:1, 2, Ci.
Mumukwasyi
9, 10. Ino mbuti Jakobo alimwi Josefa mbobakayandaula bubotu mumukwasyi wabo?
9 Ikukamantana kwabanamukwasyi kulapa lubazu alumwi mbotukonzya kuyandaula bubotu mubantu. Amulange-lange ciiyo cijatikizya mbuli Jakobo mbwaakacitila bana bakwe basankwa. Ibbuku lya Matalikilo caandaano 37 kapango 3 a 4, Ibbaibbele litondezya kuti Jakobo ikapati wakali kuyandisya Josefa. Basazinyina Josefa bakabaa munyono cakuti bakatalika kulivwiya kuti bajaye munyina. Nokuba boobo, amulange ciimo ca Jakobo alimwi a Josefa kumbele mubuumi bwabo. Boonse bakali kuyandaula bubotu mumukwasyi wabo.
10 Josefa naakali kubeleka kali mweendelezi mupati wazyakulya mu Egepita nokwakali nzala, wakabatambula ibanyina. Nokuba kuti tanaakaliyubununa, wakacita bubambe akubona kuti bakalanganizyigwa kabotu akupegwa zyakulya kuti batolele bawisi bakacembeede. Inzya, nokuba kuti bakali musulide kapati, Josefa wakabagwasya kapati. (Matalikilo 41:53–42:8; 45:23) Alimwi naakali afwaafwi kufwa, Jakobo wakaamba zilongezyo zyabusinsimi kubana bakwe boonse. Nokuba kuti micito yabo yakapa kuti batapegwi zyoolwe zimwi, kunyina watakatambula cikono munyika. (Matalikilo 49:3-28) Elo kaka Jakobo wakatondezya kuti wakalijisi luyando luzumanana!
11, 12. (a) Ino ncikozyanyo nzi cabusinsimi cikankaizya mbokuyandika kuyandaula bubotu mumukwasyi? (b) Ino nciiyo nzi ncotwiiya kuzwa kucikozyanyo ca Jesu cijatikizya bawisi mwana mutaka?
11 Ikukkazika moyo kwa Jehova ciindi naakali kweendelezya musyobo wabana Israyeli uutasyomeki, kulazumanana kutondezya mbuli mbwayandaula bubotu mubantu bakwe. Kwiinda mukubelesya bukkale bwakali mumukwasyi wamusinsimi Hosea, Jehova ulatondezya luyando lwakwe luzumanana. Goma mukaintu wa Hosea wakacita bumambi cakwiinduluka-induluka. Pele, Jehova wakalailila Hosea kuti: “Koya alimwi, ukayande oyu mwanakazi sibuvuule uuyandwa kusimamambe wakwe. Mbuboobu Jehova mbwayanda bana ba-Israyeli, nekuba kuti bali mukutobela mizimu imbi akuyanda mitunge yamasaansa.” (Hosea 3:1) Ino nkaambo nzi ncaakamupeda malailile aaya? Jehova wakalizyi kuti kuzwa akati kamusyobo wakaleya munzila zyakwe, ibamwi bayookabona kaambo kwiinda mukukkazika moyo kwakwe. Hosea wakaamba kuti: “Musule lyayaaya bana ba-Israyeli bayooboola akuyandaula Leza wabo a-Davida mwami wabo. Bayooyoowa Leza abubotu bwakwe mumazuba aaciza.” (Hosea 3:5) Masimpe eeci ncitondezyo cibotu ciyandika kuyeeya notwasikilwa mapenzi mumukwasyi. Ikuzumanana kuyandaula bubotu kuli umwi wamumukwasyi, kupa cikozyanyo cibotu cakukkazika moyo.
12 Cikozyanyo ca Jesu camwana mutaka acalo cilagwasya ikutondezya mbuli mbotukonzya kuyandaula bubotu mumukwasyi wesu. Imwana musyoonto wakajokela kumunzi naakamana kunyonyoona lubono. Bawisi bakamufwida luse. Ino mbuti mbobakamwiingula bawisi imwana musankwa mupati iwatakasiya mukwasyi wakwe? Bawisi bakaambila mwana musankwa mupati kuti: “Mwanaangu, tuli ayebo ciindi coonse, zyoonse zyangu nzizyako.” Ooku tiikwakali kwaamba cakuvwenyuka buya pe, pele kwakali kutondezya mbuli luyando ndobakajisi bawisi. Bakazumanana kuti: “Twaleelede kusekekela akubotelwa, nkaambo oyu mwanikaako wakalifwide, sunu wapona, wakalisweekede, sunu wabonwa.” Andiswe tulakonzya kuyandaula bubotu munzila iili boobo.—Luka 15:11-32.
Mumbungano ya Bunakristo
13, 14. Ino ninzila nzi yomwe motukonzya kutobela luyando lwamwami mumbungano ya Bunakristo?
13 Mbotuli Banakristo, imbaakani yesu njakutobela luyando lwa Mwami. (Jakobo 2:1-9) Masimpe, ambweni tulabayanda ibali mumbungano yesu ibajisi zintu zyakumubili ziindene azyesu. Pele, sena tuli “mutukamo-kamo” itwamubala, zilengwa naa aabo ibakatalika kaindi kukomba? Ikuti naa tulacita oobo, ino mbuti mbotukonzya kutobela lulayo lwa Jakobo?
14 Ikutambula boonse aabo ibajanika kumiswaangano ya Bunakristo ncisinizyo cakuti tuli basibuuya. Notutalika kwaambauzya ibapya ibaboola ku Ŋanda ya Bwami, ikutalimvwa kabotu kwabo akaambo kakuti mbeenzu, kulamana. Inzya, ibamwi ibakajanika kumiswaangano ya Bunakristo ciindi cakusaanguna bakaamba kuti: “Boonse bakalijisi muuya wabulongwe. Cakali kulibonya mbuli kuti boonse bakalindizi kale. Ndakaanguluka.”
15. Ino mbuti bana-bana mumbungano mbobakonzya kugwasyigwa ikutondezya luyando kubapati?
15 Mumbungano zimwi, wamana muswaangano ibakubusi bamwi balalibunga-bunga mu Ŋanda ya Bwami naa aanze kabatayandi kuyanzana abapati-pati. Ino ninzila nzi iikonzya kugwasya kumana penzi eeli? Intaamu yakusaanguna, ibazyali beelede kuyiisya bana babo kuŋanda akubagwasya kulibambila zyakumiswaangano. (Tusimpi 22:6) Balakonzya kupegwa mulimo wakubikka mabbuku aayandika antoomwe ikutegwa boonse bajane mabbuku aayelede kutoleelwa kumiswaangano. Alimwi ibazyali mbabeelede kukulwaizya bana babo kuti kabaamba twaambo tugwasya kubapati akuli baabo bakompeme ku Ŋanda ya Bwami. Ikuti kabajisi makani aagwasya aakwaamba, ibana balakonzya kukkalwa moyo.
16, 17. Ino mbuti ibapati mbobakonzya kuyandaula bubotu kubana-bana mumbungano?
16 Ibakwesu bapati alimwi abacizi beelede kubayandisya bana-bana ibali mumbungano. (Ba-Filipi 2:4) Beelede kutalika kwaambaula abana-bana munzila iikulwaizya. Ziindi zinji twaambo tugwasya kapati tulakonzya kwaambwa mumiswaangano. Ibana-bana balakonzya kubuzyigwa naa baukomanina muswaangano alimwi akuti naa kuli twaambo twabakonda kapati ntobayanda kuti bakatubelesye. Mbwaanga balayandika kapati mumbungano, ibakubusi beelede kulemekwa akaambo kakuswiilila kwabo alimwi akubalumbaizya kubwiinguzi boonse mbubapa ciindi camuswaangano naa kutola lubazu luli loonse muzibeela zyapulogilamu. Ibakubusi mbobayanzana abapati mumbungano alimwi ambobacita milimo imwi kuŋanda, kuyootondezya kuti balakonzya kuyoonyamuna kabotu mikuli mipati kumbele.—Luka 16:10.
17 Kwiinda mukuzumina mikuli, ibakubusi bamwi bayaambele kusikila aciimo ibube bwabo bwakumuuya mpobukonzya kubapa kuti bapegwe mikuli mipati. Alimwi ikujana cakucita kulakonzya kubapa kuti baleke kucita zintu zyabufwubafwuba. (2 Timoteo 2:22) Imikuli iili boobo ilakonzya kupa kuti bakwesu ‘balangililwe’ naa balakonzya kubeleka kabali bakutausi. (1 Timoteo 3:10) Ikutola lubazu mumiswaangano alimwi abusungu bwabo mumulimo kubikkilizya akuyandisya boonse ibali mumbungano, kulakonzya kugwasya baalu ikubona naa baleelela nobabalanga-langa kuti babape milimo aimbi.
Amuyandaule Bubotu Mubantu Boonse
18. Ino nintenda nzi yeelede kweelebwa mukubeteka, alimwi nkaambo nzi?
18 Ibbuku lya Tusimpi 24:23 lyaamba kuti: “Tacili cibotu kusalaula mukubeteka makani.” Ibusongo buzwa kujulu bulailila kuti ibaalu tabeelede kusalaula ciindi nobabeteka makani mumbungano. Jakobo waamba kuti: “Busongo buzwa kujulu, lutaanzi bulasalala, alimwi mbwaluumuno, bulatontola, bulibombede, bulizwide lweetelelo amicelo mibotu, tabujisi lwaanzaano lwamoyo niluba luupaupo ameso.” (Jakobo 3:17) Kakunyina kudooneka, ibaalu nobayandaula bubotu muli bamwi beelede kubona kuti ilubeta lwabo taluyeeme acilongwe ciliko amuntu ooyo naa mbobalimvwa pe. Sintembauzyo Asafu wakalemba kuti: “Leza uliimvwi mumbungano [yakwe]. Ulabeteka akati kabaleza [ikwaamba babetesi bantunsi]. Mulaleka lili kubeteka cakutalulama, akuvundikizya basizibi?” (Intembauzyo 82:1, 2) Aboobo, baalu Banakristo tabeelede kusola kusalulula mutwaambo twabalongwe babo naa basazinyina. Kwiinda munzila eeyi, balakukwabilila kukamantana kwambungano alimwi akulekela muuya wa Jehova kuti uzumanane kweendelezya.—1 Ba-Tesalonika 5:23.
19. Ino mbuti mbotukonzya kuyandaula bubotu mubantu?
19 Notuyandaula bubotu mubakwesu abacizi, atutondezye ciimo ca Paulo ciindi naakali kwaambila mbungano ya ku Tesalonika. Wakati: “Alimwi tulasyoma ndinywe mu-Mwami, tulasyoma kuti mulacita akunooya bucita nzotwamulailila.” (2 Ba-Tesalonika 3:4) Tunoolibambilide kuzilanga buyo nzyobalubizya bamwi ikuti naa katuyandaula bubotu mulimbabo. Tuyooyandaula mbazu mbotukonzya kubalumbaizya bakwesu, kakunyina kubaa muuya wakuciindilizya muzintu. Paulo wakalemba kuti: “Kumakani aababanzi, cintu ciyandwa nceeci, kuti muntu asyomeke.” (1 Ba-Korinto 4:2) Ikusyomeka ikukonzya kupa kuti tubayande takuli buyo kwababelesi bambungano, pele nkwabakwesu abacizi mumbungano ya Bunakristo. Aboobo, tulamvwana akuyumya cilongwe cesu ca Bunakristo. Tulatobela ciimo ca Paulo ncaakajisi kubanyina bamuciindi eeco. ‘Mbaasimilimoma muli zya Bwami bwa Leza’ alimwi ‘mbabasikutuyumya-yumya.’ (Ba-Kolose 4:11) Tweelede kutondezya ciimo ca Jehova.
20. Ino nzilongezyo nzi ziyoopegwa baabo ibayandaula bubotu mubantu boonse?
20 Masimpe tulatobelezya mupailo wa Nehemiya wakuti: “Kondiyeeya O Leza wangu. Kondicitila bubotu.” (Nehemiya 13:31) Elo kaka tulalumba ikuti Jehova ulayandaula bubotu mubantu! (1 Bami 14:13) Atucite mbubwenya notuyanzana abantu. Ikucita boobo kulapa bulangizi bwakunununwa alimwi abuumi butamani munyika mpya iyaswena.—Intembauzyo 130:3-8.
Ino Inga Mwaingula Buti?
•Ino ncinzi cipa kuti Jehova kacita zintu mububotu kubantu boonse?
• Ino mbuti mbotukonzya kuyandaula bubotu mubantu bamwi
• mumulimo wesu?
• mumukwasyi?
• mumbungano yesu?
• mukuyanzana kwesu abantu?
[Mibuzyo yaciiyo]
[Cifwanikiso icili apeeji 13]
Nokuba kuti ibanyina bakali musulide kaindi, Josefa wakabayandauda bubotu
[Cifwanikiso icili apeeji 14]
Ikukazyigwa takutulesyi kusola kugwasya bantu boonse
[Cifwanikiso icili apeeji 15]
Nokuba kuti bakacita bubi, bana basankwa ba Jakobo boonse bakatambula zilongezyo zyakwe
[Cifwanikiso icili apeeji 16]
Kamubatambula boonse baboola kumiswaangano ya Bunakristo