Sena Mulijisi ‘Muuya Wakulindila’?
Sena Mulijisi ‘Muuya Wakulindila’?
“Nywebo muleelede kuba bantu bali buti kukweenda munzila iisalala amukulemeka Leza? Mucilangila akuyandisya buzuba bwakusika kwa-[Jehova].”—2 PETRO 3:11, 12.
1, 2. Ino mbuti mbotukonzya kukukozyanisya ikuba ‘amuuya wakulindila’ buzuba bwa Jehova?
AMUYEEYELE mukwasyi uulindila kulya cakulya camasyikati abeenzu. Ciindi cakusika kwabeenzu ciyaabuswena kapati. Ibakaintu bali mukucita milimo yakumamanino yacakulya eeco. Mulumaabo alimwi abana bali mukugwasya kutegwa zyoonse zibe kabotu. Boonse balikkomene. Inzya, mukwasyi woonse uli mukulindila kusika kwabeenzu alimwi balangila kulya cakulya cibotu kapati akuyanzana kubotu.
2 Mbotuli Banakristo, tuli mukulindila cintu cimwi ciyandika kapati. Ino ncinzi eeco? Toonse tuli mukulindila “buzuba bwakusika kwa-[Jehova].” Kusikila bukasike, tweelede kuba mbuli musinsimi Mika walo wakaamba kuti: “Mebo njoolangila Jehova, njoolindila Leza walufutuko lwangu.” (Mika 7:7) Sena eeci caamba kukkala buyo? Peepe. Kuli milimo minji iiyandika kucita.
3. Kweelana alugwalo lwa 2 Petro 3:11, 12, ino nciimo cili buti Banakristo ncobeelede kuba aancico?
3 Imwaapostolo Petro ulatugwasya ikuba aciimo cibotu notucili mukulindila. Waamba kuti: “Muleelede kuba bantu bali buti kukweenda munzila iisalala amukulemeka Leza? Mucilangila akuyandisya buzuba bwakusika kwa-[Jehova].” (2 Petro 3:11, 12) Amubone kuti mukaambo aaka, Petro tanaakali kubuzya mubuzyo kuti naa mweelede kuba bantu bali buti. Mumagwalo aakwe obilo aakasololelwa amuuya, wakapandulula Banakristo mbobeelede kuba. Alimwi wakabakulwaizya kuti baleelede kuzumanana “kweenda munzila iisalala amukulemeka Leza.” Nokuba kuti myaka iitandila ku 30 yakaliindide kuzwa ciindi Jesu Kristo naakapa citondezyo “cakuboola kwak[we] acamamanino aaciindi,” Banakristo tiibakeelede kucileka kupakamana pe. (Matayo 24:3) Bakaleelede ‘kulangila akuyandisya’ kusika kwabuzuba bwa Jehova.
4. Ino ncinzi cibikkilizyidwe ‘mukulangila akuyandisya buzuba bwakusika kwa Jehova?’
4 Ibbala lya Chigiliki lisanduludwe kuti “kuyandisya” aawa mubwini lyaamba “kubinzyaanya.” Pele tatukonzyi ‘kububinzyaanya’ ncobeni buzuba bwa Jehova pe, mbwaanga ‘tatuzi buzuba naa ciindi’ Jesu Kristo ncayooboola kuzyikubeteka basinkondonyina ba Bawisi. (Matayo 24:36; 25:13) Ibuvwuntauzi bumwi bupandulula kuti, ikwakazwida bbala lyakuti “kubinzyaanya” aawa lipandulula “‘kufwambaana,’ alimwi bbala eeli liliswaangene kapati ‘akuba musungu, munkutwe akubikkila maano kucintu cimwi.’” Aboobo, Petro wakali kukulwaizya basyominyina kuti babikkile maano kapati kukusika kwabuzuba bwa Jehova. Bakali kukonzya kucicita eeci kwiinda mukubuyeeya lyoonse. (2 Petro 3:12) Mbwaanga “buzuba bwa-Jehova obo bupati buyoosya” buli afwaafwi, tweelede kuba amizeezo iili mbuli yeeyo.—Joeli 2:31.
Kamulindila ‘Anzila Zyakulilemeka Zisalala’
5. Ino mbuti mbotukonzya kutondezya kuti tulabikkila maano kukusika kwa “buzuba bwa-Leza”?
5 Ikuti naa tulabikkila maano kukufwutuka buzuba bwa Jehova, tuyootondezya oobo kwiinda ‘munzila zyakulilemeka zisalala amukukomba Leza.’ Imajwi aakuti ‘nzila zyakulilemeka zisalala’ alakonzya kutuyeezya lulayo lwa Petro lwakuti: “Amube mbuli bana baswiilila. Ziyanza zyanu zitabi mbuli zisusi zyanu zyakalekale zyakuciindi cakutaziba kwanu, pele mbuli mbwasalala oyo uwakamwiita, anywebo nobeni amusalale mukweenda kwanu koonse, nkaambo kakuti kulilembedwe kuti, Amusalale, nkaambo ndasalala mebo.”—1 Petro 1:14-16.
6. Itegwa tusalale, ino ncinzi ncotweelede kucita?
6 Ikutegwa tusalale, tweelede kuzumanana kusalala mumizeezo, mukulilemeka alimwi akumuuya. Sena tuli mukulibambila “buzuba bwa-Leza” kwiinda mukusalala katuli bantu banyamwide zina lya Jehova? Tacili cuuba-uba kuzumanana kusalala mazubaano pe nkaambo ikulilemeka kwamunyika kuyaabumana. (1 Ba-Korinto 7:31; 2 Timoteo 3:13) Sena kuli kwiindana kapati kuzyeelelo zyesu alimwi azyakunyika? Ikuti naa kakakunyina, nkokuti tweelede kulibilika. Sena cicitika ncakuti nokuba kuti zyeelelo zyesu zilisumpukide kapati kwiinda zyakunyika, pele zili mukuyaansi? Ikuti naa mboobo, tuleelede kubweza ntaamo yakululamika zintu kutegwa tumukkomanisye Leza.
7, 8. (a) Ino mbuti mbotukonzya kuleka kubikkila maano kukuyandika kwakweenda ‘munzila zyakulilemeka zisalala’? (b) Ino nkubambulula kuli buti kukonzya kuyandika?
7 Mbwaanga a Internet kwakaboola zyakweebela zintu ziletela muzeezo wakoonana alimwi izyatakali kulibonya kaindi, ibamwi ibatakali kukonzya kuzibona zintu eezi zijisi makani aakutalilemeka sunu bali mukujana “zyoolwe zinji kapati zyakukonzya kujana makani aakoonana,” mbwaakaamba Dokotela umwi musankwa. Ikuti twatalika kuyandaula zibeela zyamakani aatasalali aa Internet, masimpe tulakonzya kuleka kubikkila maano kumulawo wamu Bbaibbele wakuti, “mutaampi cintu niciba cimwi cisofweede.” (Isaya 52:11) Sena ncobeni ooko inga kwaba “kuyandisya buzuba bwakusika kwa-[Jehova]”? Ambweni inga kwaba kubusumpya buzuba oobo, katuyeeya kuti kufwumbwa naa twasofwaazya mizeezo yesu tunoocijisi ciindi cakwiisalazya? Ikuti naa twajana penzi mumakani aali boobu, elo kaka cilayandika kufwambaana kukombelezya Jehova kuti ‘agwisye meso eesu kukulangilila zyabuyo, akutupa buumi munzila yakwe’!—Intembauzyo 119:37.
8 Ibunji bwa Bakamboni ba Jehova ibana abapati bali mukuzumanana azyeelelo zyakulilemeka zya Leza zisumpukide alimwi akukaka kucegwa akutalilemeka kwamunyika eeyi. Akaambo kakuziba ciindi mbocili afwaafwi alimwi akucenjezya kwa Petro kwakuti “buzuba bwa-Jehova bulasika mbubonya mbwasika mubbi,” balazumanana “anzila [zyakulilemeka] zisalala.” (2 Petro 3:10) Milimo yabo isinizya kuti bali ‘mukulangila akuyandisya buzuba bwakusika kwa Jehova.’ *
Ikulindila ‘Amukumukomba Leza’
9. Ino ncinzi kukomba Leza ncokweelede kutukulwaizya kucita?
9 ‘Ikumukomba Leza’ akwalo kulayandika kapati mukuyandisya kusika kwabuzuba bwa Jehova. ‘Kukomba Leza’ kulabikkilizya akumuyoowa kwalo kutupa kuti katucita zintu zimubotela. Kukakatila cakusyomeka kuli Jehova ncecintu cikonzya kutukulwaizya kumukomba Leza. Uyanda kuti “bantu boonse bafutulwe akuboola kuluzibo lwakuziba lusinizyo.” (1 Timoteo 2:4) Leza “tayandi kuti bantu bafwidilile, ulayanda kuti boonse bajane ciindi cakweempwa.” (2 Petro 3:9) Aboobo, sena kukomba Leza kwesu takweelede kutukulwizya kusolekesya kugwasya bantu kwiiya kujatikizya Jehova alimwi akumwiiya?—Ba-Efeso 5:1.
10. Ino nkaambo nzi ncotweelede kucenjela ‘kukoongelezya kwabuvwubi’?
10 Tunookomba Leza lyoonse ikuti naa tusaanguna kuyandaula Bwami bwa Leza. (Matayo 6:33) Eeci cilabikkilizya akuzilanga kabotu zintu zyakumubili. Jesu wakacenjezya kuti: “Amucenjele, amulilesye kukulikumbuzya koonse, nkaambo buumi bwamuntu tabuzwi kukuvuba kwazintu nzyajisi.” (Luka 12:15) Nokuba kuti cilakonzya kukatazya kuliyeeyela kucengwa amali, tweelede kubikkila maano ikuti “mapakasyo aaciindi ecino akongelezegwa kwabuvubi” ‘atasyaanikizyi Jwi’ lya Leza. (Matayo 13:22) Kujana zintu ziyandika cilakonzya kuba cintu cikatazya. Aboobo, mumabazu amwi aanyika, ibanji balakonzya kuyeeya kuti cilagwasya kulongela mumanyika aavwubide kapati, ambweni akusiya mukwasyi wabo kwamyaka iili mbwiibede. Nobaba bantu ba Leza balayeeya munzila iili boobu. Kwiinda mukuunka kucisi cimwi, balakonzya kujanina mukwasyi zintu ziyandika. Nokuba boobo, ino ncinzi cikonzya kucitika kumuuya kubayandwa babo ibacaala kuŋanda? Ikuti kabatajisi bweendelezi bwasilutwe buli kabotu muŋanda, sena balakonzya kujana buumi bwakumuuya bukonzya kubapa kuti bakafwutuke buzuba bwa Jehova?
11. Ino mbuti muntu umwi wakali kubelekela kucisi cimbi mbwaakatondezya kuti kukomba Leza kulayandika kapati kwiinda buvwubi?
11 Muntu umwi wakali kubelekela kucisi cimbi uuzwa ku Philippines, wakayiya kasimpe kamu Bbaibbele kuli Bakamboni ba Jehova ku Japan. Naakazyiba njiisyo yamu Magwalo zyamikuli yabusilutwe, wakabona kuti uleelede kugwasya mukwasyi wakwe kuti babe bakombi ba Jehova. (1 Ba-Korinto 11:3) Mukaintu wakwe wakali kuŋanda wakamukazya kujatikizya lusyomo lwakwe lupya kayanda kuti azumanane kunakubatumina mali muciindi cakupilukila kuzikuyiisya mukwasyi wakwe zyalusyomo lwakwe lwamu Bbaibbele. Nokuba boobo, akaambo kakukulwaizyigwa akubindaana kwaciindi alimwi akubikkila maano kubayandwa bakwe, wakapiluka kuŋanda. Ikukkazika moyo mukweendelezya mukwasyi wakwe caluyando kwakagwasya kapati. Nokwakainda ciindi cili mbocibede, mukwasyi wakwe wakakamantana mubukombi bwakasimpe alimwi mukaintu wakwe wakatalika mulimo waciindi coonse.
12. Ino nkaambo nzi ncotweelede kubikka zintu zyakumuuya kusaanguna mubuumi bwesu?
12 Ibukkale bwesu buli mbuli bwabantu ibali muŋanda yapya mulimo. Sena inga cagwasya ikunjila muŋanda yapya iiyanda koolomoka mukusola kuyokola zintu zyakumubili? Sena kulifwutula amukwasyi wesu kubikkilizya bantu bamwi ibali muŋanda eeyo tacili ncecintu ciyandika kapati? Ibweende bwanyika eeyi bubi buyanda koolomoka kale, alimwi ibantu bali muntenda. Akaambo kakuziba makani aaya, masimpe tweelede kuyandisya zintu zyakumuuya kusaanguna alimwi akuba basungu mumulimo wakufwutula iwakukambauka Bwami.—1 Timoteo 4:16.
Tweelede ‘Kubula Kabala’
13. Ino muubukkale buli buti mbotuyanda kuyoojanika bwaakusika buzuba bwa Jehova?
13 Kakankaizya mbokuyandika kuba amuuya wakulindila, Petro waamba kuti: “Nomuyandwa, mbumulangila zintu ezi, amusungwaale kujanwa mulikede muluumuno, mutakwe kabala, mutakwe kampenda mumeso aa-Leza.” (2 Petro 3:14) Kuyungizya kunzila zyakulilemeka zisalala alimwi akukomba Leza, Petro wakankaizya mbokuyandika kapati kujanwa a Jehova katuli bantu basalazidwe abulowa buyandika kapati ibwa Jesu. (Ciyubunuzyo 7:9, 14) Eeci ciyanda kuti muntu atondezye lusyomo mucipaizyo ca Jesu alimwi akulyaaba akuba mubelesi wa Jehova uubbapatizyidwe.
14. Ino ‘kutaba aakabala’ cibikkilizya nzi?
14 Petro utukulwaizya kuti tucite mbuli mbotukonzya kutegwa tukajanike ‘katutakwe kabala.’ Sena zisani zyesu zya Bunakristo alimwi akulilemeka abube tazikwe kabala kanyika? Ikuti twabona kabala acisani cesu, cakufwambaana tulakagusya. Ikuti naa kabala kanamatila kucisani, tulabikkila maano kukukagusya. Sena mbotulimvwa oobo ikuti naa zisani zyesu zyakumuuya zyakkalwa kabala kacikozyanyo akaambo kakulezya mubube bwesu naa kulilemeka?
15. (a) Ino nkaambo nzi bana Israyeli ncobakeelede kubamba mayaayila muzyooko zyazikobela zyabo? (b) Ino nkaambo nzi babelesi ba Jehova bamazubaano ncobaindene anyika?
15 Bana Israyeli bakeelede kubamba “mayaayila muzyooko zyazikobela zyabo” alimwi bakeelede “kwaanzya mayaayila intambo yakamwe[e]mvwe.” Nkaambo nzi? Ikutegwa bakonzye kuyeeya milawo ya Jehova, kwiitobela ‘akusalala’ kuli Leza wabo. (Myeelwe 15:38-40) Mbotuli babelesi ba Jehova bamazubaano, tulatondezya kuti tuliindene anyika akaambo kakuti tulatobela milawo anjiisyo zya Leza. Mucikozyanyo, tulazumanana kusalala mukulilemeka, tulabulemeka bulowa alimwi tatukombi mituni yamisyobo yoonse. (Incito 15:28, 29) Ibanji balatulemeka akaambo kamakanze eesu aakutalisofwaazya.—Jakobo 1:27.
Tweelede Kubula “Kampenda”
16. Ino ncinzi cibikkilizyidwe mukuzumanana kwesu ikubula “kampenda”?
16 Alimwi Petro waamba kuti tweelede kuyoojanika katunyina “kampenda.” Ino eeci inga cakonzyeka buti? Ikabala ziindi zinji kalakonzya kugusyigwa, pele kampenda kalakatazya kugusya. Ikampenda katondezya kuti cintu cimwi mukati cilinyongenyi. Mwaapostolo Paulo wakabalaya boobu Banakristonyina baku Filipi: “Zintu zyoonse nzimucita zitabi zyakutongooka nanka zyakukazyanya, kuti mube bantu batakwe mulandu, bantu benibeni, bana ba-Leza baluzi batakwe kampenda, mukati kabantu bapilingene baleede bamuzukulu uno. Akati kababa mulaba mbuli mimuni yakumunika ansi.” (Ba-Filipi 2:14, 15) Ikuti naa twalutobela lulayo oolu, tuya kucileka kutongooka akukazyanya, eelyo tuyoobelekela Leza katujisi makanze mabotu. Tuyookulwaizyigwa aluyando ndotujisi kuli Jehova akuli basimukoboma mbutuyaabukambauka “Makani Mabotu aa-Bwami.” (Matayo 22:35-40; 24:14) Kunze lyaboobo, tuyoozumanana kwaambilizya makani mabotu nokuba kuti bantu banji tabakonzyi kumvwisya ikaambo ncotwaabila ciindi cesu ikusoleka kuyiisya bantu kwiiya zya Leza alimwi a Jwi lyakwe, Ibbaibbele.
17. Notweelela kuba azyoolwe zyamulimo mumbungano ya Bunakristo, ino tweelede kuti katujisi makanze aali buti?
17 Mbwaanga tulombozya kuti tukajanike katunyina “kampenda,” inga cagwasya ikulingula makanze eesu azintu nzyotucita zyoonse. Twakacileka kucita zintu mbuli bantu bakunyika bacita zintu cakuliyanda mbuli kuyandaula buvwubi naa bweendelezi. Ikuti naa tuyaabweelela kupegwa milimo mumbungano ya Bunakristo, imakanze eesu ayelede kuti kaali mabotu alimwi lyoonse katukulwaizyigwa aluyando ndotujisi kuli Jehova akubantu. Cilakkomanisya kubona bantu bajisi luzibo lwakumuuya kabeelela “[mu]mulimo wabweendelezi” cakubotelwa kabajisi makanze aakubelekela Jehova alimwi abasyominyina. (1 Timoti 3:1, Ci; 2 Ba-Korinto 1:24) Inzya, aabo ibeelela kubeleka kabali baalu ‘baleembela butanga bwa Leza kutali cakusinikizigwa pe, pele camoyo omwe. Kutali kwakuunya lubono lwaansi, pele kwamoyo uutuba. Kutali cakamikami kuli mbobeembela, pele balaba citondezyo cakutobela.’—1 Petro 5:1-4.
Tweelede Kuba “Muluumuno”
18. Ino mbube nzi Bakamboni ba Jehova mbobazyibidwe kabotu kuti bali bujisi?
18 Kumamamino, Petro utwaambila kuti tweelede kuyoojanika “muluumuno.” Ikutegwa tucizuzikizye eeci, tweelede kuba muluumuno a Jehova alimwi abasimukoboma. Petro wakakankaizya mbociyandika ‘kusungwaala mukuyandana’ alimwi akuba basiluumuno ku Banakristoma. (1 Petro 2:17; 3:10, 11; 4:8; 2 Petro 1:5-7) Ikutegwa tuzumanane kuba basiluumuno, tweelede kuyandana. (Johane 13:34, 35; Ba-Efeso 4:1, 2) Iluyando aluumuno ndotujisi lulalibonya kapati ciindi camiswaangano yamasi iicitwa. Kumuswaangano wacooko ku Costa Rica mu 1999, sikusambala zintu kubbuwa lyandeke wakakopwa kapati nkaambo Bakamboni bakooko bakabatambula bakali kuboola kumuswaangano kakunyina kusinkilila busena bwakali makwebo aakwe. Pele, mubuzuba bwabili wakabona mbolwakatondezyegwa luyando aluumuno cabusungu kweelana ambobakatambulwa basimuswaangano, nokuba kuti Bakamboni bakooko tiibakabazyi bantu aabo kubagama. Mubuzuba bwamamanino, musambazi ooyu awalo wakaliwaalila kutambula beenzu, eelyo wakalomba kuyiisyigwa Bbaibbele.
19. Ino nkaambo nzi ncociyandika ikubamba luumuno abasyomima?
19 Ikusinizya kwesu mukuba basiluumuno abakwesu abacizi bakumuuya, kulakonzya kugwasya kutondezya mbuli mbotulindila buzuba bwa Jehova alimwi anyika mpya njaakasyomezya. (Intembauzyo 37:11; 2 Petro 3:13) Atwaambe ikuti naa catukatazya kuba basiluumuno amusyomima umwi. Sena inga twayeeyela kuyookkala limwi caluumuno mu Paradaiso? Ikuti naa mukwesu ulijisi kaambo kulindiswe, tuleelede kufwaambana kubamba ‘luumuno anguwe.’ (Matayo 5:23, 24) Ikucita boobo cilayandika kapati ikuti katuyanda kuba muluumuno a Jehova.—Intembauzyo 35:27; 1 Johane 4:20.
20. Ino ‘muuya wakulangila’ inga watondezyegwa munzila nzi?
20 Sena lwesu kutugama ‘tulalangila akuyandisya buzuba bwakusika kwa Jehova’? Ikulombozya kwesu kubona mamanino abubi kulatondezyegwa kwiinda mukuzumanana kusalala munyika eeyi iitalilemeki. Kunze lyaboobo, ikulombozya kusika kwabuzuba bwa Jehova alimwi abuumi mu Bwami bwakwe kulalibonya aantangalala kwiinda mumilimo yesu yakukomba Leza. Alimwi ibulangizi bwakupona caluumuno munyika mpya bulatondezyegwa kwiinda mukuba basiluumuno abasyomima sunu. Kwiinda mukucita boobu, tulatondezya kuti ‘tulijisi muuya wakulangila’ alimwi ‘tulayandisya kusika kwabuzuba bwa Jehova.’
Bupanduluzi buyungizidwe
^ munc. 8 Izikozyanyo inga mwazilanga mu Nganzi Yamulindizi yamu January 1, 2000 peeji 16 alimwi a Yearbooks of Jehovah’s Witnesses peeji 51
Sena Muciyeeyede?
• Ino ncaamba nzi ‘kuyandisya kusika kwabuzuba bwa Jehova?
• Ino ‘muuya wakulindila’ utondezyegwa buti mukulilemeka kwesu?
• Ino nkaambo nzi ‘kukomba Leza’ ncokuyandika?
• Ino ncinzi ncotweelede kucita ikutegwa tukajanike a Jehova ‘katutakwe kabala naa kampenda’?
[Mibuzyo yaciiyo]
[Cifwanikiso icili apeeji 11]
‘Imuuya wakulangila’ ulatondezyegwa kwiinda mukulilemeka munzila zisalala
[Zifwanikiso izili apeeji 12]
Imulimo wakukambauka Bwami ulafwutula
[Cifwanikiso icili apeeji 14]
Mbotuyaabulindila buzuba bwa Jehova, atube basiluumuno kubantu