Iciindi Zyisyomezyo Noziyoozuzikizyigwa

IKUZWA kaindi, izyisyomezyo kunyina nozyali kuzuzikizyigwa pe. Lyoonse masi kunyina naali kuzuzikizya zyisyomezyo nokuba kuti alasaina zizuminano. Aboobo eeci cali kupa bantu kuba munkondo iilunzya kasuko. Napoleon cimwi ciindi wakati: “Imfwulumende zyisyomezya buyo eelyo nozyasinikizyigwa kucita boobo, antela noziyanda kujana mpindu.”

Ino mbuti kujatikizya zyisyomezyo zyamuntu umwi aumwi? Elo kaka cilatyompya ikuti muntu katazuzikizyi cintu ncaasyomezya! Cilatyompya ikapati ikuti muntu katumuzyi naa katumusyoma. Camasimpe, bantu balakonzya kuti kabatakonzyi naa kabatayandi buya kuzuzikizya zyisyomezyo zyabo.

Elo kaka kuli lwiindano kuzyisyomezyo zyabantu alimwi azyisyomezyo zya Leza! Izyisyomezyo zya Leza zilasyomeka kapati. Cili coonse Jehova Leza ncaasyomezya, cilacitika ncobeni. Camasimpe cilazuzikizyigwa. Kalyaamba ijwi lya Leza litakonzyi kuwida ansi, ibbuku lya Isaya 55:11 lyaamba kuti: “Mbubonya obo mbuliyooba ijwi lyangu lizwa kumulomo wangu. Talikooyooboola kulindime cabuyo pe, liyoozuzikizya makanze aangu akucita kabotu makani ngendalitumina.”

Aboobo, ino mbuti mbotweelede kuzilanga izyisyomezyo zya Leza izilembedwe mu Bbaibbele? Camasimpe tulakonzya kuzyisyoma. Mucikozyanyo, imwaapostolo Johane wakalemba kuti: “Amubone, bukalo bwa-Leza mpobuli akati kabantu, uzookala akati kabo. Bazooba bantu bakwe, alakwe Leza mwini uzookala kulimbabo, azoobe Leza wabo. Nkabela uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.” (Ciyubunuzyo 21:3, 4) Mulakonzya kuba aazilongezyo eezyi ikuti mwatobela majwi aa Jesu akuti: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.”—Johane 17:3.