Bamakaintu Banakristo Basyomeka—Mbakombi ba Leza Bayandika Kapati
Bamakaintu Banakristo Basyomeka—Mbakombi ba Leza Bayandika Kapati
“Zilisakatizyo zilacenga, bubotu bulamana, pele mukaintu uulemeka Leza uleelede kulumbaizigwa.”—TUSIMPI 31:30, BT.
1. Ino mbwakubona Jehova kubota kwiindene buti ambobakubona bantu bamunyika?
BANTU bamunyika babikkila kapati maano kumuntu mbwalibonya atala, ikapati kuli bamakaintu. Nokuba boobo, Jehova walo kusaanguna uyandisya kapati muntu mbwabede mumoyo, mwalo mwakonzya kubota kapati mbwayaabucembala. (Tusimpi 16:31) Aboobo, Ibbaibbele lilailila bamakaintu kuti: “Kulisakatizya kwanu kutabi kwaatala, kwakupesa masusu akusama ingolida akusamisya masini, akube kwamukati kamoyo, nkokuti lulisakatizyo lwamoyo mubombe mutontozi, uuyandika loko mumeso aa-Leza.”—1 Petro 3:3, 4.
2, 3. Ino mbuti bamakaintu mbobakagwasya kutola ambele makani mabotu mumwaanda wamyaka wakusaanguna, alimwi ino mbuti eeci mbocakasinsimidwe?
2 Imuuya ooyu mubotu kapati wakatondezyegwa abamakaintu banji ibaambwa mu Bbaibbele. Mumwaanda wamyaka wakusaanguna, ibamwi bambabo bakalijisi coolwe cakukutaukila Jesu abaapostolo bakwe. (Luka 8:1-3) Kumbele, bamakaintu Banakristo bakaba bakambausi basungu; bamwi bakali kubakulwaizya kapati baalumi Banakristo ibakali kusololela kubikkilizya amwaapostolo Paulo. Alimwi bamwi bakali kusamausya kapati, mane bamwi bakaaba maandaabo kuti kakucitilwa miswaangano yambungano.
3 Ikutondezya kuti Jehova wakali kuzoobelesya bamakaintu munzila mpati mukuzuzikizya makanze aakwe kwakasinsimwa mu Magwalo. Mucikozyanyo, bbuku lya Joeli 2:28, 29 lyakasinsima kuti, baalumi abamakaintu, bana abacembeede bayootambula muuya uusalala akutola lubazu mukumwaya makani mabotu aa Bwami. Ibusinsimi oobo bwakatalika kuzuzikizyigwa ilya Pentekoste 33 C.E. (Incito 2:1-4, 16-18) Bamakaintu bamwi bakananikwa amuuya bakapegwa zipego zyakucita maleele mbuli cipego cakusinsima. (Incito 21:8, 9) Kwiinda mubusungu bwabo mumulimo, eeyi nkamu mpati yabacizi basyomeka ibasimide kumuuya yakagwasyilizya mukutola ambele Bunakristo cakufwambaana mumwaanda wamyaka wakusaanguna. Mumyaka yakuma 60 C.E., imwaapostolo Paulo wakalemba kuti makani mabotu “akakambaukilwa bantu boonse baansi ano.”—Ba-Kolose 1:23.
Bakalumbaizyigwa Akaambo Kabusicamba, Busungu Akusamausya
4. Ino nkaambo nzi Paulo ncaakajisi kaambo kapati kakutembauda bamakaintu ibanji bamumbungano ya Banakristo yamumwaanda wamyaka wakusaanguna?
4 Mucikozyanyo, mwaapostolo Paulo wakali kulumba kumulimo wakali kucitwa abamakaintu bamwi, mbubwenya mbuli balangizi Banakristo sunu mbobabikkila maano kumulimo uucitwa abamakaintu basungu. Akati kabamakaintu, Paulo mbaakagama buya mazina kuli “Trufena a-Trufosa basimilimo basungu ba-Mwami,” alimwi a “Persida muyandwi, oyo iwakabeleka loko cabusungu mu-Mwami.” (Ba-Roma 16:12) Paulo wakalemba boobu kujatikizya Euodiya a Suntuke, “twakali kulwa abo munkondo ya-Makani Mabotu.” (Ba-Filipi 4:2, 3) Priskila amulumaakwe Akula abalo bakabeleka a Paulo. Priskila a Akula mane “ba[ka]lilibambilide kujaigwa” akaambo ka Paulo, calo cakamupa kuti alembe kuti: “Teensi ndime endike ndabalumba, pele imbungano zyoonse zyabamasi.”—Ba-Roma 16:3, 4; Incito 18:2.
5, 6. Ino muunzila nzi Priskila mwaakapa cikozyanyo cibotu kubacizi basunu?
5 Ino ncinzi cakapa kuti Priskila abe musungu akuba sicamba? Tulakonzya kukajana kaambo mucibalo cili mubbuku lya Incito 18:24-26, nkotubala kuti wakali kumugwasyilizya mulumi wakwe mukugwasya Apolo, imwaambi iwakali kupasaula kukanana ikutegwa aambe kasimpe kakeelede muciindi eeco. Kakunyina kudooneka, kuciindi eeco Priskila wakali sungweede kwiiya Jwi lya Leza anjiisyo zyabaapostolo. Akaambo kamakani aaya, wakasumpula bube bubotu kapati ibwakapa kuti ayandike kapati kuli Leza akumulumaakwe alimwi akuba muntu uugwasya mumbungano yakusaanguna. Mbubwenya buyo, ibacizi Banakristo banji babeleka canguzu sunu aabo ibayiya Bbaibbele cabunkutwe alimwi ibalya cakulya cakumuuya cipegwa a Jehova kwiinda “[mu]mubanzi uuzi uusyomekede” balayandika kapati.—Luka 12:42.
6 Akula a Priskila bakali kusamausya kapati. Paulo wakakkala muŋanda yabo naakali kubeleka ambabo mumulimo wabo wakusuma matente ku Korinto. (Incito 18:1-3) Banabukwetene aaba nobakalongela ku Efeso kumane boobo baya ku Roma, bakazumanana akusamausya kwa Bunakristo, mane bakazumizya ŋanda yabo kuti kakucitilwa miswaangano yambungano. (Incito 18:18, 19; 1 Ba-Korinto 16:8, 19) Awalo Numfa alimwi a Mariya banyina Johane utegwa Marko bakazumizya maandaabo kuti kakucitilwa miswaangano yambungano.—Incito 12:12; Ba-Kolose 4:15.
Ibayandika Kapati Sunu
7, 8. Ino nimpuwo iili buti yakubeleka mulimo uusetekene bamakaintu banji Banakristo sunu njobajisi, alimwi ino ncinzi ncobakonzya kusyomezyegwa?
7 Mbubwenya mbocakabede mumwaanda wamyaka wakusaanguna, bamakaintu Banakristo basyomeka sunu balijisi mulimo mupati mukuzuzikizyigwa kwamakanze aa Leza, ikapati mumulimo wakukambauka. Elo kaka ibacizi aaba balijisi mpuwo mbotu! Amulange-lange cikozyanyo ca Gwen walo wakabelekela Jehova cakusyomeka myaka iinda ku 50 kusikila mu 2002 naakafwa. Mulumaakwe wakaamba kuti: “Busungu bwa Gwen mumulimo wakukambauka bwakalizibidwe kapati mudolopo motukkala. Walo muntu woonse wakali kumubona kuti wakali kulangilwa kuyandwa a Jehova akutambula zisyomezyo zyakwe. Ikusyomeka kwakwe kuli Leza, kumbunga yakwe alimwi amumukwasyi wesu, kutaluba akukulwaizya kwaluyando ikuti naa katutyompedwe, zyakali kundigwasya kapati mebo abana besu mubuumi bwesu boonse mbotwakakkala limwi. Elo tulamuyeeya kaka!” Gwen amulumaakwe bakali kwetene kwamyaka iili 61.
8 Izyuulu zili mbozibede izyabamakaintu Banakristo, batakwetwe abakwetwe balabeleka kabali bapainiya naa bamisyinali. Balizulide azeezyo nzyobajisi nobakambauka mulumbe wa Bwami muzilawo zyamumadolopo zijisi bantu banji amuli zeezyo zilikkalilide. (Incito 1:8) Ibanji baliimya ikuba amaanda naa kuba abana ikutegwa babelekele Jehova cakumaniina. Ibamwi balabagwasilizya balumi babo ibalangizi beendeenda, kakuli zyuulu zili mbozibede zyabacizi bamwi babelekela mumaanda aa Beteli aali munyika yoonse. Kakunyina kudooneka, bamakaintu aaba ibalyaabide bali akati “[ka]zintu ziyandisi zyazisi zyoonse” zizuzya ŋanda ya Jehova bulemu.—Hagai 2:7.
9, 10. Ino mbuti bamumukwasyi bamwi mbobakatondezya kulumba kucitondezyo cibotu cabamakaintu alimwi abamatumbu Banakristo?
9 Masimpe, bamakaintu Banakristo banji balijisi mikuli yamukwasyi; pele balabikka zintu zya Bwami kumbele. (Matayo 6:33) Mucizi umwi mupainiya uutakwetwe wakalemba kuti: “Akaambo kakuloma kwabamaama kwakutazungaana mulusyomo lwabo, kubikkilizya acikozyanyo cabo cibotu, ncicakagwasya kapati kuti ndibe mupainiya waciindi coonse. Alimwi twakali kweenda limwi ziindi zinji mumulimo wabupainiya.” Mulumi umwi wakaamba boobu kujatikizya mukaintu wakwe wakajisi bana basimbi bosanwe bapati kale: “Iŋanda yesu lyoonse yakali yabulondo. Bonnie [mukaintu wangu] tanakali kuyanda zigwete-gwete pe, ikutegwa mukwasyi wesu ubikkile maano kukucita zintu zyakumuuya. Mbwaakali kwaapaula mali munzila mbotu cakapa kuti cinduubile kubeleka tulimo-limo twakujanina mali aakuligwasya kwamyaka iili 32. Eeci cakapa kuti ndijane ciindi cibotu cakulanganya mukwasyi wesu azintu zyakumuuya. Imukaintu wangu wakali kubayiisya bana mbokuyandika kubeleka canguzu. Ndilamulumbaizya kapati.” Mazubaano, mulumi amukaintu wakwe babelekela kuofesi mpati ya Bakamboni ba Jehova.
10 Mulumi umwi wakalemba boobu kujatikizya mukaintu wakwe uujisi bana bapati: “Ibube bwa Susan mbondiyanda kapati nduyando ndwajisi kuli Leza akubantu kubikkilizya akubikkila maano, lweetelelo alimwi akusyomeka. Lyoonse wali kulimvwa kuti tweelede kupa Jehova cintu ciinda kubota, injiisyo walo njatobela kali mubelesi wa Leza alimwi kali banyina bana.” Akaambo kakukulwaizyigwa amukaintu wakwe, mulumi ooyu wakakonzya kuzumina zyoolwe zinji kapati zyakumuuya mbuli bwaalu, bupainiya, sikugwasilizya mulangizi wabbazu alimwi akuba cibeela ca Hospital Liaison Committee. Elo kaka bamakaintu bali boobu balayandika kapati kubalumi babo akuli Banakristonyina, ikapati akuli Jehova!—Tusimpi 31:28, 30.
Bamakaintu Ibayandika Kapati Ibatakwe Balumi
11. (a) Ino mbuti Jehova mbwayubununa kuti ulababikkila maano bamakaintu basyomeka ikapati bamukabafwu? (b) Ino bamukabafwu Banakristo alimwi abacizi basyomeka ibatajisi balumi balakonzya kusyoma nzi?
11 Jehova ziindi zinji wali kutondezya mbwalimvwa kubuumi bwabamukabafwu. (Deuteronomo 27:19; Intembauzyo 68:5; Isaya 10:1, 2) Kunyina nacincide pe. Tazumanani buyo kuyandisya bamukabafwu pe, pele alimwi abamatumbu ibali balikke ikubikkilizya abanakazi ibakaliyandila kutakwatwa naa aabo ibatakwetwe kutali akaambo kakuliyandila, pele akaambo kakuti tabanajana musankwa Munakristo weelede. (Malaki 3:6; Jakobo 1:27) Ikuti naa muli umwi wabaabo babelekela Jehova cakusyomeka kakunyina kugwasilizyigwa amweenzinyoko wamulukwatano Munakristo, muleelede kusyoma kuti mulayandika kapati mumeso aa Leza.
12. (a) Ino mbuti bacizi bamwi Banakristo mbobatondezya kusyomeka kwabo kuli Jehova? (b) Ino bacizi besu bamwi baliyumya kukulimvwa buti?
12 Amulange-lange cikozyanyo cabacizi Banakristo batana kwatwa akaambo kakuti batobela lulayo lwa Jehova lwakukwatwa buyo “[ku]muna-Kristo.” (1 Ba-Korinto 7:39; Tusimpi 3:1) Ijwi lya Leza libasyomezya kuti: “Kulibaabo bakusyoma, [Jehova], ulasyomeka.” (2 Samuyele 22:26, BT) Pele kubunji bwabo, ikutakwatwa ncintu cikatazya kapati. Mucizi umwi wakati: “Ndakasala kukwatwa buyo ku Munakristo, pele ziindi zinji ndilalila nondilangilila beenzuma kabakwatwa kubaalumi Banakristo kakuli mebo ndicili ndelikke.” Aumwi mucizi wakaamba kuti: “Ndamubelekela Jehova kwamyaka iili 25. Ndilikanzide kuzumanana kusyomeka kulinguwe, pele ikulendelelwa ziindi zinji kulandipa kuusa.” Wakayungizya kuti: “Ibacizi ibali mbuli ndime bayandisya kukulwaizyigwa.” Ino mbuti mbotukonzya kugwasya bantu bali boobo?
13. (a) Ino ncinzi ncotwiiya kucikozyanyo cabaabo ibakali kuswaya mwana musimbi wa Jefita? (b) Ino muunzila nzi azimbi motukonzya kutondezya kuti tulababikkila maano bacizi batakwetwe mumbungano?
13 Inzila imwi ilalibonya mucikozyanyo cansiku. Imwana musimbi wa Jefita naakaliimya coolwe cakukwatwa, bantu bakaziba kuti ooku kwakali kulyaaba. Ino ncinzi cakacitwa kutegwa bamukulwaizye? “Myaka yoonse bana basimbi ba-Israyeli bakali kuya kulilila mwana musimbi wa-Jefita mu-Gileadi mazuba one aamwaka.” (Babetesi 11:30-40) Mbubwenya buyo, tuleelede kubalumbaizya kapati bacizi batakwetwe ibatobela mulawo wa Leza cakusyomeka. * Ino ninzila nzi aimbi mbotukonzya kutondezya kuti tulababikkila maano? Mumipailo yesu tuleelede kumukombelezya Jehova kuti abayumye-yumye ibacizi aaba bayandwa kutegwa bazumanane kusyomeka mumulimo wabo. Baleelede kusyomezyegwa kuti balayandwa kapati akubikkilwa maano a Jehova alimwi ambungano ya Bunakristo yoonse.—Intembauzyo 37:28.
Bazyali Bali Balikke Mbubakonzya Kuzwidilila
14, 15. (a) Nkaambo nzi bamatumbu Banakristo bali balikke ncobeelede kulomba lugwasyo kuli Jehova? (b) Ino mbuti ibazyali bali balikke mbobakonzya kucita kweelana amipailo yabo?
14 Bamakaintu Banakristo balo ibali mbazyali bali balikke balasikilwa buyumuyumu bupati. Nokuba boobo, balakonzya kulomba lugwasyo kuli Jehova nobakomezya bana babo kweelana anjiisyo zyamu Bbaibbele. Masimpe, ikuti naa muli bazyali bali balikke, tamukonzyi kucita mulimo wabanyina alimwi awabawisi mumbazu zyoonse pe. Pele Jehova uyoomugwasya kunyamuna mikuli minji ikuti naa mwamulomba calusyomo. Mucikozyanyo: Amuyeeyele buyo ikuti naa kamujisi cibbeeke cijisi zintu nzyomwaula zyalo nzyomuyanda kuti mutole kuŋanda yanu iili kutala lyamulonga. Sena inga mwasaya buya kuzabusya zintu eezyo ikuti kakuli bwato afwaafwi? Peepe! Mbubwenya buyo, tamweelede kunyongana kapati mukuyeeya kakuli mulakonzya kulomba Jehova kuti amugwasye. Mubwini, ulamutamba kuti mumwiite. Ibbaibbele lya Chitonga lyamu 1996 ku Intembauzyo 68:19, lyaamba kuti: “Aalumbwe Leza mufutuli wesu, nguutunyamwida mikuli yesu [abuzuba].” Mbubwenya buyo, lugwalo lwa 1 Petro 5:7 lulamutamba kuti mubikke makatazyo aanu woonse mumaanza aa Jehova, “nkaambo nguumucebuka lyoonse.” Aboobo, ikuti naa mapenzi alimwi akulibilika zyamuminya, amuzitule kuli Wisi wanu wakujulu, kamucita oobo “cakutaleka.”—1 Ba-Tesalonika 5:17; Intembauzyo 18:6; 55:22.
15 Mucikozyanyo, ikuti kamuli banyina bana, kakunyina kudooneka mulalibilika mbuli bana banu mbobakonzya kuyungwa abeenzinyina kucikolo naa misunko yalusyomo njobakonzya kusikilwa. (1 Ba-Korinto 15:33) Ikulibilika ooku kuleelede. Pele aalo aaya mmakani ngomweelede kupailila. Aboobo, sena tamukonzyi kuzipailila zintu eezi antoomwe abana banu kabatanaunka kucikolo, ambweni nomwamana kulingula lugwalo lwabuzuba antoomwe? Imupailo uupegwa camoyo woonse alimwi uugaminina ulakonzya kubanjila mumoyo bana banu. Kunze lyaboobo, amulibikke muciimo cakukonzya kutambula lugwasyo kuli Jehova, icakukkazika moyo nomusola kuyiisya myoyo yabana banu izili mu Jwi lyakwe. (Deuteronomo 6:6, 7; Tusimpi 22:6) Amuyeeye kuti, “meso aa-Jehova ali kubaluleme, amatwi aakwe alijukide kukukomba kwabo.”—1 Petro 3:12; Ba-Filipi 4:6, 7.
16, 17. (a) Ino ncinzi umwi mwana musankwa ncaakaamba kujatikizya luyando banyina ndobakali kutondezya? (b) Ino mbuti banyina mbobakali kuzilanga zintu zyakumuuya mbokwakabajatikizya bana babo?
16 Amulange-lange cikozyanyo ca Olivia, ibanyina bana bali cisambomwi. Mulumi wakwe uutasyomi wakausiya mukwasyi nibakazyala keela, pele wakalibambila kubweza mukuli wakuyiisya bana bakwe nzila zya Leza. Mwana musankwa wa Olivia utegwa Darren lino uujisi myaka iili 31 alimwi uli mmwaalu Munakristo alimwi mupainiya, wakajisi buyo myaka yakuzyalwa iili 5 ciindi eeco. Kunze lyamapenzi ngaakajisi kale, Darren wakatalika kuciswa-ciswa kwalo kucimukatazya asunu. Kayeeya buumi bwakwe bwakubwana, Darren wakalemba kuti: “Ndiciyeeyede mbundakali kukkala abulo bwakucibbadela kandilindila Bamaama kuti baboole. Bakali kukkala munsi lyangu akundibalila Bbaibbele abuzuba. Kumane boobo bakali kwiimba lwiimbo lwa Bwami lwakuti ‘Twalumba Jehova.’ * Asunu ndolwiimbo lwa Bwami ndondiyandisya.”
17 Ikusyoma Jehova akumuyanda ncicakapa kuti Olivia azwidilile kali nabutema. (Tusimpi 3:5, 6) Iciimo cakwe cibotu cakatondezyegwa kwiinda mumbaakani zyaakabikkila bana bakwe. Darren uluula kuti: “Bamaama lyoonse bakali kutukulwaizya ikuba amakanze aakubeleka mumulimo waciindi coonse. Akaambo kaboobo, ibacizi bangu bone kubikkilizya andime tuli mumulimo waciindi coonse. Pele, bamaama kunyina nobakali kulisumpula akaambo kaceeci pe. Ndilasolekesya kwiiya bube bwabo bubotu.” Masimpe, takuli kuti bana boonse balakomena akubelekela Leza mbuli bwakacita bana ba Olivia. Pele ikuti naa banyina basolekesya kupona kweelana anjiisyo zyamu Bbaibbele, balakonzya kusinizya kuti Jehova ulabasololela akubagwasya caluyando.—Intembauzyo 32:8.
18. Ino mbuti mbotukonzya kutondezya kuti tulabikkila maano kububambe bwa Jehova bwambungano ya Bunakristo?
18 Ibunji bwalugwasyo lwa Leza lulapegwa kwiinda mumbungano ya Bunakristo, kubikkilizya abubambe bwalyoonse bwakusanina kumuuya, ibunyina bwa Bunakristo alimwi ‘azipego zyabantu’ basimide kumuuya. (Ba-Efeso 4:8) Baalu basyomeka balabeleka canguzu ikutegwa babayake boonse ibali mumbungano kumwi kababikkila maano kuzintu zyaalubazu ziyandika kuli “bamusyaala abamukabafu mumapenzi aabo.” (Jakobo 1:27) Aboobo, amuyanzane abantu ba Leza, mutalizanduli pe.—Tusimpi 18:1; Ba-Roma 14:7.
Ibube Bubotu Ibwakulibombya
19. Ino nkaambo nzi kulibombya kwamukaintu ncokutapandululi kuti tako maano, alimwi ino ncikozyanyo nzi camu Bbaibbele cijatikizya makani aaya?
19 Jehova wakamulenga mukaintu kali mugwasyi wamusankwa. (Matalikilo 2:18) Aboobo, ikulibombya kwamukaintu kumulumi wakwe tacipandululi kuti unyina maano pe. Pele nkumulemeka, ikucita kuti azibelesye zipego zinji zyajisi kweelana akuyanda kwa Leza. Ibbuku lya Tusimpi caandaano 31 lilapandulula milimo iindene-indene yakali kucitwa amukaintu mubotu mu Israyeli yansiku. Wakali kugwasya bapengede, kusyanga myuunda yamasaansa alimwi akuula nyika. Ee, “moyo wamulumaakwe ulamusyoma; takooyoobula impindu pe.”—Tupango 11, 16, 20.
20. (a) Ino mbuti mukaintu Munakristo mbweelede kuzilanga zipego zyaakapegwa a Leza? (b) Ino mbube nzi bubotu mbwaakatondezya Esita, alimwi ino mbuti Jehova mbwaakakonzya kumubelesya akaambo kabube oobu?
20 Imukaintu uulibombya alimwi uuyoowa Leza talisumpuli kusikila aciimo cakuzundana amulumaakwe pe. (Tusimpi 16:18) Tayandauli kujana zintu nzyayanda zyoonse kwiinda mukuyandaula zintu zyamunyika pe, pele ulabelesya zipego nzyaakapegwa a Leza ikapati kutegwa abelekele bamwi, nkokuti mukwasyi wakwe, Banakristonyina, basimukobonyina alimwi ikapati mukubelekela Jehova. (Ba-Galatiya 6:10; Tito 2:3-5) Amulange-lange cikozyanyo camu Bbaibbele camuka Mwami Esita. Nokuba kuti wakali kweebelwa nzoka mubwina, wakali kulibombya kapati. (Esita 2:13, 15) Naakakwatwa, wakali kumulemeka kapati mulumaakwe, Imwami Ahasuera kwiinda mukaintu wakwe mutaanzi Vasiti. (Esita 1:10-12; 2:16, 17) Alimwi Esita wakautobela muzeezo wamujwa wabawisi mupati utegwa Moodekai mumakani aakeelede, nociba ciindi kali kale mukamwami. Kunyina naakaya ansi mukulilemeka pe. Cabusicamba wakayubununa makanze aa Hamani singuzu alimwi silunya iwakali kuyanda kujaya ba Juda. Jehova wakamubelesya kapati Esita ikutegwa akwabilile bantu bakwe.—Esita 3:8–4:17; 7:1-10; 9:13.
21. Ino mbuti mukaintu Munakristo mbwakonzya kuyandika kapati kuli Jehova?
21 Cakutadooneka, lyansiku alimwi asunu, bamakaintu banaleza batondezya kulyaaba kwabo cakumaniina kuli Jehova akubukombi bwakwe. Aboobo, bamakaintu bayoowa Leza balayandika kapati mumeso aa Jehova. Nobacizi Banakristo, amumulekele Jehova kwiinda mumuuya ikuti kayaabumubamba kabotu bucebuce ikutegwa mube “mutiba” walo “uubambilidwe kumilimo mibotu yoonse.” (2 Timoteo 2:21; Ba-Roma 12:2) Kujatikizya bakombi aaba bayandika kapati, Ijwi lya Leza lyaamba kuti: “Apegwe micelo yamaanza aakwe, amilimo yakwe imutembaule mumilyango.” (Tusimpi 31:31) Acibe boobu kuli umwi aumwi wanu.
Bupanduluzi buyungizidwe
^ munc. 13 Kujatikizya mbotukonzya kubalumbaizya, amubone Ngazi Yamulindizi yamu Chichewa ya March 15, 2002 apeeji 26-8.
^ munc. 16 Lwiimbo 26 mukabbuku kakuti Amwiimbile Jehova Intembauzyo, kakamwaigwa a Bakamboni ba Jehova.
Sena Muciyeeyede?
• Ino mbuti bamakaintu Banakristo bamwi bamumwaanda wamyaka wakusaanguna mbobakatondezya kuti balayandika kapati mumeso aa Jehova?
• Ino mbuti bacizi banji mazubaano mbobacita kutegwa bayandike kapati kuli Leza?
• Ino muunzila nzi Jehova mwabagwasya bamatumbu bali balikke abacizi batakwetwe?
• Ino mbuti mukaintu mbwakonzya kutondezya camoyo woonse kuti ulabulemeka ibubambe bwabusilutwe?
[Mibuzyo yaciiyo]
Kabbokesi kali apeeji 31]
IZIKOZYANYO ZYAKUZINZIBALA KUYEEYA
Sena mulayanda kulanga-langa zikozyanyo azimbi zyabamakaintu basyomeka ibaambwa mu Bbaibbele? Ikuti naa mboobo, amwaabale magwalo aatondezyedwe ansi aawa. Mbomuyaabuzinzibala kuyeeya bantu bali mumulongo baindene-indene, amusole kubona njiisyo nzyomukonzya kutondezya cakwiindilila mubuumi bwanu.—Ba-Roma 15:4.
◆ Sara: Matalikilo 12:1, 5; 13:18a; 21:9-12; 1 Petro 3:5, 6.
◆ Bamakaintu bana Israyeli ibaabi: Kulonga 35:5, 22, 25, 26; 36:3-7; Luka 21:1-4.
◆ Debora: Babetesi 4:1–5:31.
◆ Rute: Rute 1:4, 5, 16, 17; 2:2, 3, 11-13; 4:15.
◆ Mukaintu waku Sunemu: 2 Bami 4:8-37.
◆ Mukaintu muna Kanana: Matayo 15:22-28.
◆ Marta a Mariya: Marko 14:3-9; Luka 10:38-42; Johane 11:17-29; 12:1-8.
◆ Tabita: Incito 9:36-41.
◆ Bana basimbi ba Filipo: Incito 21:9.
◆ Febe: Ba-Roma 16:1, 2.
[Cifwanikiso icili apeeji 29]
Sena mulabalumbaizya bacizi batakwetwe ibaswiilila mulawo wa Leza cakusyomeka?
[Cifwanikiso icili apeeji 30]
Ino makani nzi aayelede kulombwa cacigaminina buya mumupailo ibana kabatanaunka kucikolo?