‘Amubotelwe Muli Jehova’

“Kolibotezya muli-Jehova, nkabela uyookupa moyo wako nzyuuyanda.”—INTEMBAUZYO 37:4.

1, 2. Ino nguni Sikutalisya lukkomano lwini-lwini, alimwi mbuti Mwami Davida mbwaakakatondezya kaambo aaka?

“BALI acoolwe bacete mumuuya, . . . bali acoolwe beetelezi, . . . bali acoolwe basi[luumuno].” Twaambo ootu kubikkilizya tumbi tuli cisambomwi itupandulula bantu ibali acoolwe, ncibeela cantalisyo mbotu kapati ca Mulumbe wa Jesu waa Cilundu uudumide, kweelana ambowakalembwa amulembi wa Makani Mabotu, Matayo. (Matayo 5:3-11) Majwi aa Jesu asyomezya kuti tulakonzya kulujana lukkomano.

² Ilwiimbo lwantembauzyo lwakalembwa a Mwami Davida waku Israyeli yansiku lulatondezya Sikutalisya lukkomano lwini-lwini, Jehova. Davida wakaamba kuti: “Kolibotezya muli-Jehova, nkabela uyookupa moyo wako nzyuuyanda.” (Intembauzyo 37:4) Pele ino ncinzi cikonzya kupa kuti kuziba Jehova alimwi azibeela zinji zyabube bwakwe ‘kubotezye’? Ino mbuti ikulanga-langa nzyaakacita anzyayoocita mukuzuzikizya makanze aakwe mbozimupa bulangizi bwakutambula zeezyo ‘moyo wanu nzyuuyanda’? Bwiinguzi bulajanika kwiinda mukulanga-langa twaambo toonse tuli ku Intembauzyo 37, kapango 1 kusikila ku 11.

“[M]utafwi Ibbivwe”

3, 4. Kweelana ambokulembedwe ku Intembauzyo 37:1, ino ndulayo nzi Davida ndwapa, alimwi nkaambo nzi ncotweelede kulutobela sunu?

³ Tupona “[mu]ziindi zikataazya,” alimwi ibubi bwaindilila. Twabona ikuzuzikizyigwa kwamajwi amwaapostolo Paulo aakuti: “Bantu babi abasikulibeja balainda anka kubija, banooena akweenwa.” (2 Timoteo 3:1, 13) Elo kaka ncuuba-uba kunyonganizyigwa aceeco cilibonya mbuli kuti nkuzwidilila kwabantu basizibi! Zyoonse eezyo zilakonzya kutunyonganya, akutupa kuti tuleke kubikkila maano zintu zyakumuuya. Amubone majwi aamatalikilo ku Intembauzyo 37 mbwaatucenjezya kupenzi eeli lilangilwa: “Utalipenzyi nkaambo kabasizibi, utafwi ibbivwe nkaambo kabasimilimo mibi.”

⁴ Tulamvwa abuzuba mulisikapepele zintu zitaluleme zicitwa. Basimakwebo batasyomeki balacita zintu calweeno kakunyina kusubulwa. Zigwebenga zilabapenzya bantu batajisi babavwuna. Bajayi balazumanana kakunyina kujatwa naa kusubulwa. Zikozyanyo zyoonse eezi zinyonganya bululami zilakonzya kutunyemya akutupa kulibilika. Ikuzwidilila kwabasizibi kulakonzya kutupa kutalika kubafwida ibbivwe buya. Pele sena ikunyema kwesu kulakonzya kubambulula zintu? Sena ikubafwida ibbivwe basizibi akaambo kakuzwidilila kwabo kulakonzya kucinca iziyoobacitikila? Peepe, eeco tacilangilwi! Alimwi taciyandiki buya kuti swebo ‘tulipenzye.’ Ino nkaambo nzi?

5. Ino nkaambo nzi basizibi ncobakozyanyisyigwa kubwizu?

⁵ Sintembauzyo ulaingula ategwa: “Nkaambo balafwambaana kupusama mbuli bwizu, balanyana mbuli mweemvwe wamusokwe.” (Intembauzyo 37:2) Mweemvwe ulakonzya kulibonya kabotu, pele mukaindi kasyoonto ulanyana akuyuma. Mbocibede akuli basizibi. Ikuzwidilila kwabo nkwaciindi buyo cisyoonto. Nobafwa, izintu nzyobajana munzila iitasalali tazibagwasyi pe. Kumamanino aumwi ulatambula cisubulo ceelede. Paulo wakalemba kuti: “Cakuvola cazibi ndufu.” (Ba-Roma 6:23) Basizibi abantu bataluleme boonse kumamanino bayootambula “cakuvola” cabo alimwi tabakaponi limbi. Elo kaka oobu mbukkale butagwasyi mubuumi!—Intembauzyo 37:35, 36; 49:16, 17.

6. Ino ciiyo nzi ncotukonzya kwiiya ku Intembauzyo 37:1, 2?

 ⁶ Aboobo, sena ikuzwidilila kwabasizibi kwaciindi cili mbocibede kweelede kutunyonganya? Iciiyo kutupango tobile twakusaanguna twa Intembauzyo caandaano 37 ncakuti: Mutalekeli kuzwidilila kwabo kumupa kuzwa munzila njomwakasala yakubelekela Jehova. Muciindi caboobo, amuzumanane kubikkila maano kuzilongezyo zyakumuuya alimwi ambaakani.—Tusimpi 23:17.

“Syoma Jehova Akucita Kabotu”

7. Nkaambo nzi ncotweelede kusyoma Jehova?

⁷ Sintembauzyo utukulwaizya kuti: “Syoma Jehova akucita kabotu.” (Intembauzyo 37:3a) Notupenga mumoyo akaambo kakulibilika naa kudooneka, tweelede kusyoma Jehova. Ngonguwe uukwabilila kumuuya cakumaninina. Musa wakalemba kuti: “Oyo uukede muciyubilo ca-Mupatikampatila ulakala mucenzule ca-Singuzuzyoonse.” (Intembauzyo 91:1) Notunyongene akaambo kamilandu iiyaabwiindila mubweende oobu, tweelede kusyoma Jehova. Ikuti naa twasyiyuka ango, tulakkomana ikuti mweenzuma watujatilila. Mbubwenya buyo, notusoleka kusyomeka, tuyandika lugwasyo lwa Jehova.—Isaya 50:10.

8. Mbuti kutola lubazu mumulimo wa Bunakristo mbokukonzya kutugwasya kutaciindilizya kunyongana akaambo kakuzwidilila kwabasizibi?

⁸ Inzila imwi iikonzya kugwasya kutegwa tutanyonganizyigwi akuzwidilila kwabasizibi, nkujata bubi mukuyandaula alimwi akugwasya bantu bali mbuli mbelele kuti babe aluzibo lwini-lwini lwamakanze aa Jehova. Ibukkale mobuyaa bwiindilila kubija, tweelede kubikkila maano kapati kukugwasya bantu. Imwaapostolo Paulo wakaamba kuti: “Mutalubi kucita [zibotu] akupana, nkaambo Leza ulakondwa kuzipaizyo zili bobuya.” Icintu ‘cibotu’ kapati ncotukonzya kucita nkwaambila bamwi makani aataliboteli aa Bwami bwa Leza. Bukambausi bwesu bwakubuleya masimpe “[n]cipaizyo cakulumba.”—Ba-Hebrayo 13:15, 16; Ba-Galatiya 6:10.

9. Amupandulule ncakali kwaamba Davida naakaamba majwi aaya akuti ‘kukkala munyika.’

⁹ Davida wazumanana ulaamba: ‘Kkala munyika akusyomeka.’ (Intembauzyo 37:3b) Naakali kupona Davida “nyika” cakali cilawo Jehova ncaakapede kuli Israyeli, nkokuti Nyika Yakasyomezyegwa. Mubulelo bwa Solomoni munyinza wayo wakali kuzwa ku Dani nkwiili kunyika kusikila ku Beeriseba nkwiili kumusanza. Oobu mbobusena bwakali kukkala bana Israyeli. (1 Bami 4:25) Sunu, kufwumbwa nkotukkala munyika, tulangila ciindi nyika yoonse noiyakuba paradaiso munyika mpya yabululami. Kwalino, tukkede mubusena bukwabilidwe kumuuya.—Isaya 65:13, 14.

10. Ncinzi citobela ciindi ‘notusyomeka?’

¹⁰ Ino ncinzi ciyootobela ikuti ‘twasyomeka’? Kaambyo kakasololelwa amuuya katuyeezya kuti: “Muntu uusyomeka ulaba azyoolwe zinji.” (Tusimpi 28:20) Ikukakatila cakusyomeka notukambauka makani mabotu kufwumbwa kubusena nkotukkala alimwi akumuntu uuli woonse, masimpe kuletela zilongezyo kuzwa kuli Jehova. Mucikozyanyo, Frank amukaintu wakwe Rose, bakatalika mulimo wabupainiya myaka iili 40 yainda mudolopo ilili kunyika mu Scotland. Ibantu basyoonto ibakali kukayandisya kasimpe ooko bakalilongede. Kakunyina kutyompwa, banabukwetene aaba bapainiya bakatalika mulimo  wakukambauka alimwi akugwasya bantu kuba basikwiiya. Kwaciindi cino kuli mbungano iiyaambele mudolopo eelyo. Ikusyomeka kwabanabukwetene aaba masimpe kwalongezyegwa a Jehova. Frank cakulibombya ulapandulula kuti: “Icilongezyo cipati kapati ncakuti, tucili mukasimpe alimwi Jehova uciyanda kutubelesya.” Inzya, ciindi ‘notusyomeka’ tulatambula akukkomana azilongezyo zinji.

‘Amulibotezye Muli Jehova’

11, 12. (a) Mbuti mbotukonzya “k[u]libotezya muli-Jehova”? (b) Ino nimbaakani nzi njomukonzya kulibikkila kujatikizya ciiyo canu nobeni, alimwi nzilongezyo nzi nzyomulangila kujana?

¹¹ Ikutegwa tuyumye cilongwe cesu a Jehova alimwi akuzumanana kusyoma mulinguwe, tweelede “k[u]libotezya muli-Jehova.” (Intembauzyo 37:4a) Ino mbuti mbotunga twacita oobo? Muciindi cakubikkila buyo maano kubukkale bwesu, nokuba kuti inga kabuli buyumu, tulanga kuli Jehova. Inzila imwi mbotunga twacita oobu nkwiinda mukujana ciindi cakubala Jwi lyakwe. (Intembauzyo 1:1, 2) Sena mulakukkomanina kubala Bbaibbele? Mulakonzya kukkomana ikuti naa nomubala kamujisi mbaakani yakuyanda kuziba zinji kujatikizya Jehova. Nomwamana kubala cibeela amwiime akulibuzya kuti, ‘Ino cibalo eeci candiyiisya nzi kujatikizya Jehova?’ Cilakonzya kumugwasya kuba abbuku naa pepa lyakulembela twaambo nomubala Bbaibbele. Kufwumbwa ciindi nomwaima kuti muyeeyesye ncozyaamba zintu nzyomwabala, amulembe kaambo ikamuyeezya bube bumwi bwa Leza butaliboteli. Kuntembauzyo imbi, Davida wakaimba kuti: “Majwi aamulomo wangu amiyeeyo yamumoyo wangu, zyoonse zitambulike kumeso aako, O Jehova, mwaala wangu anguzu zyangu.” (Intembauzyo 19:14) Ikubikkila maano ooko ku Jwi lya Leza nkotukonzya kutondezya ‘kulatambulika’ kuli Jehova alimwi kulatukkomanisya.

¹² Ino mbuti mbotukonzya kujana lukkomano mukwiiya alimwi akuzinzibala kuyeeya? Kwiinda mukuba ambaakani yakwiiya zinji kujatikizya Jehova alimwi anzila zyakwe. Mabbuku mbuli lya Muntu Mupati Kwiinda Iwakaponede alimwi alya Amubaa Cilongwe a Jehova * alatupa twaambo tunji ntotukonzya kulumba. Ikuti twacita boobo, Davida usyomezya bantu baluleme kuti, Jehova ‘uyoomupa moyo wanu nzyuuyanda.’ (Intembauzyo 37:4b) Lusyomo luli boobu lweelede kuti ndolwakamukulwaizya mwaapostolo Johane kulemba majwi aakuti: “Kaanzambwene nkitujisi kubusyu bwakwe nkaaka kakuti, na twakumbila kufumbwa cintu cili buti cili mbuli makanze aakwe, ulatumvwa. Nkabela na tulizi kuti ulatumvwa, coonse ncotukumbila, tulizi kuti tulijisi zikumbilo nzitwamukumbila.”—1 Johane 5:14, 15.

13. Mumyaka misyoonto buyo yainda, ino nkuyaambele kuli buti mumulimo wakukambauka makani aa Bwami ikwalibonya mumasi manji?

¹³ Mbotuli bantu basyomeka, ncotulombozya kapati nkusalazyigwa kwabweendelezi bwa Jehova. (Tusimpi 27:11) Sena tatukkomani citaambiki notumvwa zyamulimo mupati wabukambausi uuli mukubelekwa abakwesu mumasi aakali kweendelezyegwa amfwulumende zyalunya? Tulangila kuyoobona lwaanguluko lumbi kumbele lukonzya kuboola naatanasika mamanino abweende oobu. Bakamboni ba Jehova banji ibakkala mumasi aavwubide, balatola lubazu kapati mukukambaukila bana bacikolo, bazangalisi abamwi buyo ibakkede nkuko kwaciindi cili mbocibede alimwi ibajisi lwaanguluko lwakukomba. Ncotulombozya amoyo woonse ncakuti bantu aaba baakupiluka kumasi aabo, bakazumanane kumunika mumuni wabo wakasimpe nomuba moomo imulimo moulesyedwe.—Matayo 5:14-16.

“Leka Inzila Yako Mumaanza aa-Jehova”

14. Ino mbumboni nzi buliko butondezya kuti tulakonzya kusyoma muli Jehova?

¹⁴ Elo kaka cilaumbulizya kuziba kuti nzyotulibilika alimwi azeezyo nzyotukonzya kubona kuti tatukonzyi kuyumuna, zilakonzya kuyumunwa! Munzila nzi? Davida wakaamba kuti: “Leka inzila yako mumaanza aa-Jehova, komusyoma, nkabela uyoocita.” (Intembauzyo 37:5)  Mumbungano zyesu kuli bumboni bunji butondezya kuti tulakonzya kumusyoma Jehova kuti atugwasye. (Intembauzyo 55:22) Aabo ibali mumulimo waciindi coonse, babe bapainiya, balangizi beendeenda, bamisyinali, naa basikulisungula babeleka a Beteli, balakonzya kusinizya mbwabalanganya Jehova. Sena tamukonzyi kubandika abamwi mbomuzi alimwi akubabuzya mbwaabagwasya Jehova? Cakutadooneka muyoomvwa zyakuluula zinji zitondezya kuti nociba ciindi zintu nozyayuma, Jehova taalilwi kugwasya pe. Lyoonse ulaabila ziyandika mubuumi.—Intembauzyo 37:25; Matayo 6:25-34.

15. Ino mbuti bululami bwabantu ba Leza mbobumunika?

¹⁵ Notubikka lusyomo lwesu muli Jehova cakumaninina, tuyoolibonena ikululama kwamajwi aasintembauzyo aakuti: “Uyooyubununa bululami bwako mbuli mumuni, akoololoka kwako mbuli isikati.” (Intembauzyo 37:6) Mbotuli Bakamboni ba Jehova, kanji-kanji tulatamikizyigwa twaambo. Pele Jehova ulajalula meso aababombemyoyo kutegwa abagwasye kubona kuti mulimo wesu ngotucita kubuleya ukulwaizyigwa aluyando ndotujisi kuli Jehova akuli basimukoboma. Alimwi ikulilemeka kwesu kubotu, nokuba kuti banji baamba zibyaabi, takukonzyi kusiswa pe. Jehova ulatugwasya mukukazyigwa koonse alimwi akupenzyegwa. Aboobo, ibululami bwabantu ba Leza bulamunika mbuli zuba ciindi casyikati.—1 Petro 2:12.

‘Amulitontozye Akulindila Cakuyandisya’

16, 17. Kweelana a Intembauzyo 37:7, ino eecino nceciindi cakucita nzi, alimwi nkaambo nzi?

¹⁶ Majwi aatobela aasintembauzyo ngakuti: “Ulitontozye kuli-Jehova, komulindila. Utalipenzyi nkaambo kayooyo uujene coolwe, uucita milimo mibi njaakanza.” (Intembauzyo 37:7) Aawa Davida wakankaizya mbociyandika kapati kulindiswe kulindila cakukkazika moyo kuti Jehova abweze ntaamu. Nokuba kuti mamanino aabweende oobu taanasika, eeci taceelede kutupa kutongooka pe. Sena tiitwabona kuti luse lwa Jehova akukkazika moyo nzinji kapati kwiinda mbotwakali kuyeeya kusaanguna? Sena tatukonzyi kutondezya lino kuti andiswe tulalindila cakukkazika moyo mbotuzumanana kukambauka makani mabotu mamanino naatana kusika? (Marko 13:10) Eecino nceciindi cakuleka kucita zintu cakutayeeya eezyo zikonzya kutupa kuusa akutakwabililwa kumuuya. Eecino nceciindi cakuzumanana kukazya kuyunga kwanyika ya Saatani. Alimwi eecino nciindi cakubamba  busalali bwesu mukulilemeka akutanyonganya bukkale bwesu bululeme kuli Jehova. Atuzumanane kugwisya miyeeyo mibyaabi akuleka micito iiteelede kuli baabo ibatali basankwama naa bakaintuma antela akubasankwama naa bakaintuma buya.—Ba-Kolose 3:5.

¹⁷ Davida utulaya kuti: “Leka kunyema, sowa bukali. Utalipenzyi, nkaambo kulaleta bubi buyo. Nkaambo basizibi balanyonyooka, pele balangila Jehova mbombabo bayookona nyika.” (Intembauzyo 37:8, 9) Inzya, calusyomo tulakonzya kulangila kuciindi eeco lino cili afwaafwi, Jehova aakugwisya lweeno loonse munyika alimwi abaabo ibalucita.

“Kaba Kaindi Kaniini”

18, 19. Ino nkukulwaizya kuli buti nkomujana ku Intembauzyo 37:10?

¹⁸ “Kaba kaindi kaniini sizibi takooyooba wo; unooyeeya nkwaakabede, pele takooyooba nkuko.” (Intembauzyo 37:10) Elo kaka alatukulwaizya majwi aayo mbotuyaabuswena kumamanino aabweende oobu alimwi akwalwaanguluko lubyaabi lwakuzwa kuli Jehova! Kufwumbwa mfwulumende naa bulelo bantu mbobali kuleta bwaalilwa ceetezya. Aboobo tulaafwaafwi lino kujoka kubulelo bwa Leza, Bwami bwa Jehova bweendelezyegwa a Jesu Kristo. Buyooendelezya cakumaninina zintu zyoonse munyika akugwisya boonse bakazya Bwami bwa Leza.—Daniele 2:44.

¹⁹ Munyika mpya yeendelezyegwa a Bwami bwa Leza, nokuba kuti mwayandaula, tamukajani “sizibi.” Masimpe, kuciindi eeco kufwumbwa uuyoozangila Jehova uyoogwisyigwa cakufwambaana. Kunyina uulwana bweendelezi bwakwe antela uukaka kulibombya kubulelo bwabuleza uunooliko. Basimukobonyoko boonse banoojisi muzeezo omwe buyo iwakulombozya kukkomanisya Jehova. Taluliboteli kaka lukwabililo luyoobola, nkaambo kunoonyina kubikka maloko, zibulo zyakujazya zitendele, azintu zyiyoonyonganya lusyomo alimwi alukkomano lwini-lwini!—Isaya 65:20; Mika 4:4; 2 Petro 3:13.

20, 21. (a) Ino mbaani “[i]babombemyoyo” baambidwe ku Intembauzyo 37:11, alimwi nkuukuli nkobajana “luumuno lunji”? (b) Ino nzilongezyo nzi nzyotuyoojana ikuti twamwiiya Davida Mupati?

²⁰ Mpoonya, “babombemyoyo bayoovuba nyika.” (Intembauzyo 37:11a) Pele ino mbaani “[i]babombemyoyo” aaba? Ibbala lyakasandululwa kuti “mubombe” lizwa kubbala lyaamba “uupenzyegwa, uulicesya, uudyaaminidwe.” Inzya, “[i]babombemyoyo” mbabaabo ibalicesya nibalindila Jehova kuti alulamike kutalulama koonse nkobacitilwa. Masimpe “bayookondwa muluumuno lunji.” (Intembauzyo 37:11b) Noliba lino tulajana luumuno lunji muparadaiso yakumuuya eeyo iiswaangene ambungano ya Bunakristo yakasimpe.

²¹ Nokuba kuti tatuna kulemununwa kumapenzi, tulagwasyanya alimwi akuumbulizya ibatyompedwe. Aboobo, ikuliiba kwini-kwini kulasumpulwa akati kabantu ba Jehova. Bakwesu basalidwe kubeleka kabali beembezi caluyando balatugwasya kuzintu nzyotuyandika kumuuya, alimwi zimwi ziindi nokuba kumubili buya, icitupa kuti tucikonzye kuliyumya kumapenzi aaboola akaambo kakucita bululami. (1 Ba-Tesalonika 2:7, 11; 1 Petro 5:2, 3) Elo taluliboteli kaka luumuno oolu ndotujisi! Alimwi tulijisi bulangizi bwabuumi butamani mu Paradaiso yaluumuno iili afwaafwi. Aboobo, atwiiye Davida Mupati, Kristo Jesu, ooyo wakakulwaizyigwa abusungu bwakwe kuli Jehova kubeleka kusikila kumamanino. (1 Petro 2:21) Kwiinda mukucita boobo, tuyoozumanana kukkomana, akutembaula Leza wesu Jehova, ooyo mulinguwe motubotelwa.

Bupanduluzi buyungizidwe

Sena Inga Mwaingula?

• Ino nziiyo nzi nzyomwaiya ku Intembauzyo 37:1, 2?

• Ino mbuti mbomukonzya ‘kubotelwa muli Jehova’?

• Ino mbumboni nzi buliko bwakuti tulakonzya kusyoma Jehova?

[Mibuzyo yaciiyo]

[Cifwanikiso icili apeeji 23]

‘Amusyome Jehova akucita kabotu’

[Cifwanikiso icili apeeji 25]

“Babombemyoyo bayoovuba nyika”