Amulicenjelele “Ijwi Lyabeenzu”
Amulicenjelele “Ijwi Lyabeenzu”
“Umweenzu tazimucilili, pele zilamutija, nkaambo tazilizi ijwi lyabeenzu.”—JOHANE 10:5.
1, 2. (a) Ino wacita nzi Mariya eelyo Jesu naamwiita zina, alimwi ino nkaambo nzi nkaakaambide Jesu musyule ikacitondezya eeci? (b) Ino ncinzi citugwasya kukakatila kuli Jesu?
JESU iwabusyigwa walangilila mwanakazi wiimvwi munsi lyacuumbwe citakwe cintu mmwaazikkidwe. Ulimuzyi kabotu. Ngu Mariya Magadalene. Imyaka iitandila kuli yobile musyule, wakamugusyide daimona. Kuzwa leelyo wali kumutobela Jesu abaapostolo bakwe, kalanganya nzyobayandika kumubili abuzuba. (Luka 8:1-3) Pele sunu Mariya ulalila, wazyingwa abuumba akaambo kakuti wakamubona Jesu kafwa, alimwi lino nouba mutumba wakwe wazimina! Aboobo Jesu wamubuzya kuti: “Omwanakazi, ulilanzi? Nguni ngoyandaula?” Kayeeya kuti mmubelesi wamumuunda, wayingula kuti: “Mwami, na nduwe owamugwisya kuno, ndaambila nkowamubika, nkamutole.” Mpoonya Jesu waamba kuti: “Mariya”! Ndilyonya wazyiba mbwaambaula kulinguwe lyoonse. Cakukondwa wapozomoka ategwa: “Mufundisi”! Amane wamukumbatila.—Johane 20:11-18.
2 Munzila iinjila, icibalo eeci citondezya nzyaakaambide Jesu musyule. Kalikozyanisya kumweembezi alimwi abasikumutobela kumbelele, waamba kuti mweembeli ulaziita mbelele zyakwe kwiinda mukuzibanda mazina alimwi zililizyi ijwi lyakwe. (Johane 10:3, 4, 14, 27, 28) Inzya, mbubwenya mbelele mbozimuzyi mweembezi wanzizyo, awalo Mariya wakamuzyiba Mweembezi wakwe, Kristo. Abalo basikutobela Jesu sunu balimuzyi. (Johane 10:16) Mbubwenya imatwi aambelele aaswiililisya mbwaayigwasya kukakatila kumweembezi, ibupampu bwesu bwakumuuya bulatugwasya kweenda mumikondo ya Mweembezi wesu Mubotu, Jesu Kristo.—Johane 13:15; 1 Johane 2:6; 5:20.
3. Ino mmibuzyo nzi iiboola kumizeezo akaambo kacikozyanyo ca Jesu cijatikizya caanda cambelele?
3 Nokuba boobo, kweelana acikozyanyo eeco ncoona, ikucikonzya kuzyiba majwi aabantu kugwasya mbelele kuzyiba mulongwe alimwi asinkondonyina. Eeci cilayandika akaambo kakuti tujisi basikukazya bampelenge. Ino mbaani? Ino babeleka buti? Ino mbuti mbotunga twalikwabilila? Ikutegwa tuzyibe, atulange-lange zimbi nzyaamba Jesu mucikozyanyo cakwe cacaanda cambelele.
“Oyo Uutanjilili Kucilyango Cacaanda”
4. Ikweelana acikozyanyo camweembezi, ino nguni mbelele ngozitobela, alimwi ino nguni ngozitatobeli?
4 Jesu waamba kuti: “Uunjilila ku[mu]lyango ngosikweembela mbelele. Uulindila [mu]lyango ulamujulila, embelele zilamvwa ijwi lyakwe, alimwi ulaziita mbelele zyakwe amazina aazyo, ulazitola anze. Amana kugwisya zyakwe zyoonse, ulazisolwedela, azyalo mbelele zilamucilila, nkaambo zililizi ijwi lyakwe. Umweenzu tazimucilili, pele zilamutija, nkaambo tazilizi ijwi lyabeenzu.” (Johane 10:2-5) Amubone kuti Jesu wabelesya ibbala lyakuti “ijwi” ziindi zyotatwe. Ziindi zyobile waamba ijwi lyamweembezi, pele ciindi catatu waamba “ijwi lyabeenzu.” Ino mmweenzu nzi Jesu ngwaamba aawa?
5. Ino nkaambo nzi ncotutamusamausyi mweenzu waambwa kuli Johane caandaano 10?
5 Jesu taambi mweenzu ngotunga twayanda kusamausya—ibbala mumwaambo wamu Bbaibbele wakusaanguna ilyaamba “kuba aluyando kubeenzu.” (Ba-Hebrayo 13:2) Mucikozyanyo ca Jesu, imweenzu tanaatambwa pe. ‘Tanjilili kumulyango wacaanda cambelele, pele utantila kumbi.’ “Mufumpi amubbi.” (Johane 10:1) Ino nguni muntu wakusaanguna waambwa mu Jwi lya Leza iwakaba mubbi alimwi mufwumpi? Ngu Saatani Diabolosi. Tulabujana bumboni mubbuku lya Matalikilo.
Ijwi lya Mweenzu Nolyakamvwugwa Ciindi Cakusaanguna
6, 7. Ino nkaambo nzi Saatani cakweelela ncanga waambwa kuti mmweenzu?
6 Ibbuku lya Matalikilo 3:1-5 lilapandulula mbolyakamvwugwa ijwi lyamweenzu anyika ciindi cakusaanguna. Icibalo ciluula kuti Saatani wakasikila mwanakazi wakusaanguna Eva kwiinda munzoka akumwaambila zintu zyalweeno. Ee, mucibalo eeci Saatani kunyina naambidwe kuti ‘mmweenzu.’ Nokuba boobo, imicito yakwe ilatondezya munzila zinji kuti wakali mbuli mweenzu uupanduludwe mucikozyanyo ca Jesu cilembedwe kuli Johane caandaano 10. Amulange-lange kukozyanya kumwi kuliko.
7 Jesu waamba kuti imweenzu ulazinjilila mbelele mucaanda munzila yabucenjezu. Mbubwenya buyo, Saatani wakasikila Eva munzila yabucenjezu kwiinda munzoka. Ikusikila Eva ooku kwabucenjezu nkwaakacita Saatani, kwakamutondezya bwini mbwabede ikuti mmufwumpi mumpelenge. Amane, imweenzu uuli mucaanda ukanza kubbida mukamwini imbelele zyakwe. Mubwini, mmubi kwiinda mubbi nkaambo imakanze aakwe aambi ‘ngakujaya akunyonyoona.’ (Johane 10:10) Mbubwenya buyo, Saatani wakali mubbi. Naakacenga Eva, wakamubba kwiinda mukumupa kucileka kusyomeka kuli Leza. Alimwi Saatani wakaletela bantunsi lufwu. Aboobo mmujayi.
8. Ino mbuti Saatani mbwaakaapilinganya majwi alimwi amakanze aa Jehova?
8 Ilweeno lwa Saatani lwakalibonya kweelana ambwaakaapilinganya majwi amakanze aa Jehova. Wakabuzya Eva kuti: “Sa ncobeni Leza wakaamba kuti, Tamweelede kulya misamu yoonse yamumuunda?” Saatani wakalicengeezya kugambwa mbuli kuti wakali kwaamba kuti: ‘Ino Leza inga wauyumya buti boobo moyo?’ Wakayungizya kuti: “Leza ulizi kuti mubuzuba obo mbubonya mbomuyooulya, meso aanu ayoojuka.” Amwaabikkile maanu majwi aakwe aakuti: “Leza ulizi.” Cili mbuli kuti Saatani wakali kwaamba kuti: ‘Ndilicizyi ncazyi Leza. Ndilaazyi makanzaakwe, mmabi.’ (Matalikilo 2:16, 17; 3:1, 5) Mukubula coolwe, Eva a Adamu kunyina nobakalifwutatila ijwi lyamweenzu ooyu. Muciindi caboobo, bakalitobela akuliletela mapenzi beni alunyungu lwabo.—Ba-Roma 5:12, 14.
9. Ino nkaambo nzi ncotweelede kulangila kuti ijwi lyabeenzu linoomvwugwa sunu?
9 Saatani ubelesya nzila nzimunya ikweena bantu ba Leza sunu. (Ciyubunuzyo 12:9) ‘Ngowisi wabubeji,’ alimwi aabo bali mbuli nguwe ibasoleka kweena babelesi ba Leza mbana bakwe. (Johane 8:44) Atubikkile maanu kunzila ijwi lyabeenzu aaba molimvwugwa sunu.
Ijwi lya Beenzu Mbolimvwugwa Sunu
10. Ino ninzila nzi imwi ijwi lyabeenzu molimvwugwa sunu?
10 Imizeezo yalweeno. Imwaapostolo Paulo waamba kuti: “Mutabi nomuleya nkaambo kanjiisyo zyamisyobo misyobo.” (Ba-Hebrayo 13:9) Ino ninjiisyo zili buti? Mbwaanga zilakonzya ‘kutuleesya,’ cilasalala kuti Paulo waamba njiisyo zitukompamya kumuuya. Ino mbaani ibali mukwaamba njiisyo eezyo zyeenzu? Paulo wakaambila kakamu kabaalu Banakristo kamwi kuti: “Akati kanu nobeni bayoobuka bantu abaamba zintu zyakulengawida kuti balikwelele basikwiiya.” (Incito 20:30) Mmasimpe, sunu mbubwenya mbuli kuciindi ca Paulo, ibantu bamwi musyule ibakali basimbungano ya Banakristo lino basola kweena mbelele kwiinda mukwaamba “zintu zyakulengawida”—twaambo twakasimpe tupilinganizyidwe alimwi atwakubeja. Mbubwenya imwaapostolo Petro mbwaakalemba, babelesya “majwi aalukukubiko”—imajwi aakozyenye akasimpe pele mubwini aatagwasyi.—2 Petro 2:3.
11. Ino mbuti majwi aali kuli 2 Petro 2:1, 3 mbwaayubununa inzila alimwi amakanze aabasiluleyo?
11 Petro wazumanana kuyubununa mbozibede nzila zyabasiluleyo kwiinda mukwaamba kuti, “bayoonjizya kumbali injisyo zinyonyoona.” (2 Petro 2:1, 3) Mbubwenya mubbi mucikozyanyo ca Jesu cacaanda cambelele mbwatanjilili ‘kumulyango pele utantila kumbi,’ abalo basiluleyo balatusikila munzila zyabumpelenge. (Ba-Galatiya 2:4; Juda 4) Ino mmakanze nzi ngobajisi? Petro uyungizya kuti: “Bayoomunyanzya-nyanzya.” Mmasimpe, kufwumbwa ceeco basiluleyo ncobaamba ikulibotya-botya, imakanze meni-meni aabafwumpi ‘ngakubba, kujaya alimwi akunyonyoona.’ (Johane 10:10) Amubacenjelele beenzu aabo!
12. (a) Ino mbuti bantu mbotuyanzana limwi mbobanga batupa kumvwa jwi lyabeenzu? (b) Ino nkukozyanya nzi kuliko akati kanzila zya Saatani zyabucenjezu azyabeenzu sunu?
12 Balongwe babyaabi. Ijwi lyabeenzu lilakonzya kumvwugwa kwiinda mubantu mbotuyanzana limwi. Ibalongwe babyaabi baletela ntenda ikapati kubakubusi. (1 Ba-Korinto 15:33) Amuyeeye kuti Saatani wakagama Eva—imuniini alimwi watakajisi luzibo lunji akati kabanabubili bakusaanguna. Wakapa Eva kuti azumine kuti Jehova wakalimusinkilide kuzintu nzyaakeelede, pele mubwini walo nguwakamusinkilila. Jehova wakali kubayanda bantu mbaakalenga alimwi wakazibikkila maanu nzyobakali kuyandika. (Isaya 48:17) Ncimwi buyo asunu, ibeenzu basoleka kumupa kuti nobakubusi muyeeye kuti bazyali banu balamusinkilila kuzintu zimweelede. Ino mbuti ibeenzu bali boobo mbobanga bamunyonganya? Imusimbi Munakristo umwi uzuminizya kuti: “Kwaciindi cili mbocibede ndakakompama kulusyomo nkaambo kabeenzuma mbotwakali kwiiya limwi mukkilasi. Bakazumanana kwaamba kuti cikombelo cangu cakali kuciindizya kukasya zintu.” Pele ikasimpe nkakuti ibazyali banu balamuyanda. Aboobo, eelyo basicikolonyoko nobasoleka kumupa kuti kamutabasyomi bazyali banu, muteenwi pe bwakeenwa Eva.
13. Ino mbukkale nzi bwamaanu mbwaakatobela Davida, alimwi ino ninzila nzi yomwe mbotunga twamwiiya?
13 Ikujatikizya balongwe babyaabi, sintembauzyo Davida waamba kuti: “Nsinakede abantu babuyo, nsinakweenda abasikuupaupa ameso.” (Intembauzyo 26:4) Sena mwakabona akambi kampenda kajisi beenzu? Mbaasikuupaupa ameso mbubwenya Saatani mbwaakalisisa kuti atazyibwi kwiinda mukubelesya nzoka. Sunu ibantu batalilemeki balalisisa mbobabede amakanze aabo kwiinda mukubelesya kkompyuta yakutambikizyanya twaambo alimwi azifwanikiso. Mukubandizyanya kwakulembelana aakkompyuta eeyi, ibapati batalilemeki balakonzya kucita mbuli kuti mbakubusi ikutegwa bamoongelezye kunjila mukooze. Twamulombesya nobakubusi, amucenjele kapati kutegwa mutanyonganizyigwi kumuuya.—Intembauzyo 119:101; Tusimpi 22:3.
14. Ino mbuti zyaambwa muli sikapepele zimwi ziindi mbozimwaya ijwi lyabeenzu?
14 Kubejelezyegwa. Nokuba kuti iziluulwa zimwi kujatikizya Bakamboni ba Jehova zili kabotu, zimwi ziindi inzila zyakumwaya makani zibelesyegwa kumwaya ijwi lyabeenzu libyaabi. Mucikozyanyo, mucisi cimwi ilipooti imwi yakaamba makani aakubeja aakuti Bakamboni bakali kusumpula bweendelezi bwa Hitler lya Nkondo Yanyika Yabili. Mucisi cimbi, lipooti imwi yakabejelezya Bakamboni kuti bakali kupoloola maanda aabamwi aakukombela. Muzisi zili mbozibede kwakaluulwa makani aakubeja aakuti Bakamboni balakaka kuti bana babo basilikwe alimwi acaali bavwumba-vwumba zibi zipati zyakacitwa abakombinyina. (Matayo 10:22) Nokuba boobo, ibantu batobela kasimpe ibatuzyi kabotu balizyi kuti imakani aali boobo ngakubeja.
15. Ino nkaambo nzi ncocitagwasyi ikuzisyoma zyoonse zyaambwa muli sikapepele?
15 Ino ncinzi ncotweelede kucita ikuti twagamikwa makani aakubeja aamwaigwa ajwi lyabeenzu bali boobo? Tweelede kutobela lulayo luli ku Tusimpi 14:15 lwakuti: “Uuongelezeka ulazuminina makani oonse, pele muntu uucenjede ulayeeya kabotu kweenda kwakwe.” Tacigwasyi ikusyoma zyoonse zyaambwa muli sikapepele kuti nkasimpe. Nokuba kuti tatwaadooneki makani oonse aambwa, tulizyi kuti ‘nyika yoonse ili mubweendelezi bwamubi.’—1 Johane 5:19.
“Amusoleke Myuuya”
16. (a) Ino mbuti mbozicita mbelele mbocitondezya kululama kwamajwi aa Jesu aali kuli Johane 10:4? (b) Ino ncinzi Bbaibbele ncolitukulwaizya kucita?
16 Pele ino mbuti mbotunga twasinizya naa muntu ngotuyanzana limwi mmulongwe antela ngusinkondoma? Jesu waamba kuti imbelele zilamutobela mweembezi “nkaambo zililizi ijwi lyakwe.” (Johane 10:4) Teensyi mbwaboneka mweembezi icikulwaizya mbelele kuti zimutobele; pele ndijwi lyakwe. Ibbuku limwi ilipandulula nyika zyaambwa mu Bbaibbele liluula kuti sikuswaya umwi wakataminina kuti imbelele zilimuzyi mweembezi wanzizyo kweelana ambwasama ikutali kwiinda mujwi lyakwe. Imweembezi wakaingula kuti ndijwi nzyolizyi. Ikutegwa acisinizye eeci, bakacincana zyakusama asikuswaya. Kasamide zisani zyamweembezi, imweenzu wakazyiita mbelele, pele kunyina nozyakamutobela. Tiizyakalizyi pe ijwi lyakwe. Pele eelyo mweembezi naakazyiita, nokuba kuti tanaakasamide mbuli mweembezi, imbelele zyakaunka kulinguwe mbwaakazyiitila buyo. Aboobo, umwi ulakonzya kulibonya mbuli kuti mmweembezi, pele kumbelele eeco tacisinizyi kuti mmweembezi ncobeni. Imbelele zilalisoleka ijwi lyasikuzyiita akulikozyanisya ajwi lyamweembezi. Ijwi lya Leza litwaambila kucita mbubwena—‘ikusoleka myuuya naa njiya Leza ncobeni.’ (1 Johane 4:1; 2 Timoteo 1:13) Ino ncinzi cinga catugwasya kucita boobo?
17. (a) Ino mbuti mbotulizyiba kabotu ijwi lya Jehova? (b) Ino ncinzi luzibo lwa Jehova ncolutugwasya kucita?
17 Ee, mbotulizyiba kabotu ijwi lya Jehova naa mulumbe, tunoolizyiba kabotu alyalo ijwi lyamweenzu. Ibbaibbele lilatondezya mbotunga twalujana luzibo oolo. Lyaamba kuti: “Matwi aako ayoomvwa ijwi kusule lyako liti, Njeeyi inzila, amweende mulinjiyo.” (Isaya 30:21) Eelyo “ijwi” lili kusule lyesu lizwa mu Jwi lya Leza. Lyoonse notubala Jwi lya Leza, tulalimvwa ijwi lya Mweembezi wesu Mupati, Jehova. (Intembauzyo 23:1) Aboobo mbotuyaambele kwiiya Bbaibbele, tulalizyiba kabotu ijwi lya Leza. Iluzibo oolo lutugwasya kulizyiba ijwi lyabeenzu cakufwambaana.—Ba-Galatiya 1:8.
18. (a) Ino kuzyiba jwi lya Jehova kubikkilizya nzi? (b) Ikweelana a Matayo 17:5, nkaambo nzi ncotweelede kulitobela ijwi lya Jesu?
18 Ino ncinzi acimbi ikuzyiba jwi lya Jehova ncokubikkilizya? Kunze lyakulimvwa buyo, kulabikkilizya akulitobela. Amucibikkile maanu alimwi icaambwa kuli Isaya 30:21. Ijwi lya Leza lyaamba kuti: “Njeeyi inzila.” Inzya, kwiinda mukwiiya Bbaibbele, tumvwa malailile aa Jehova. Mpoonya ulailila kuti: “Amweende mulinjiyo.” Jehova uyanda kuti tuzicite nzyotumvwa. Aboobo kwiinda mukucita nzyotwiiya, tutondezya kuti tiitwalimvwa buyo ijwi lya Jehova pele alimwi twaliswiilila. (Deuteronomo 28:1) Ikutobela jwi lya Jehova alimwi kwaamba kulitobela ajwi lya Jesu, mbwaanga Jehova mwini wakatwaambila kuti katucita oobo. (Matayo 17:5) Ino ncinzi Jesu Mweembezi Mubotu ncatwaambila kucita? Utuyiisya kuti tubagwasye bantu kuba basikwiiya alimwi akusyoma “muzike musyomesi uucenjede.” (Matayo 24:45; 28:18-20) Ikumvwida jwi lyakwe kuyootupa kujana buumi butamani.—Incito 3:23.
“Zilamutija”
19. Ino ncinzi ncotweelede kucita kujatikizya jwi lyabeenzu?
19 Aboobo ino ncinzi ncotweelede kucita kujatikizya jwi lyabeenzu? Tweelede kucita ncozicita mbelele. Jesu waamba kuti: “Umweenzu tazimucilili, pele zilamutija.” (Johane 10:5) Tweelede kucita zintu zyobile. Cakusaanguna, ‘tatumuccilili’ pe mweenzu. Inzya, tulamukaka cakusinizya mweenzu. Mu Cigiliki cakabelesyegwa kulemba Bbaibbele ikukaka kuli waawa nkukakila limwi cakutajokoloka. (Matayo 24:35; Ba-Hebrayo 13:5) Cabili, tweelede ‘kumutija’ naa kumufwutatila. Eeyi nenzila ilikke yeelede mbotweelede kucita kujatikizya bantu bajisi njiisyo ziteendelani ajwi lya Mweembezi Mubotu.
20. Ino tuyoocita buti (a) notuyaana abasiluleyo, (b) notuyaana abalongwe babyaabi, (c) notumvwa malipooti aakubeja muli sikapepele?
20 Aboobo eelyo notuyaanya bantu bajisi twaambo twabasiluleyo, tweelede kucita ncolitwaambila kucita Jwi lya Leza kuti: “Mubalange abo babusya akati kanu inkazyanyo azilebyo zitali mbuli lwiiyo ndumwakaiya. Amubafutatile.” (Ba-Roma 16:17; Tito 3:10) Mbubwenya buyo, bakubusi Banakristo ibali muntenda yakuyungwa abalongwe babyaabi beelede kutobela lulayo lwa Paulo ndwaakaambila Timoteo mwanike lwakuti: “Kotija zisusi zyabwanike.” Alimwi eelyo notubejelezyegwa muli sikapepele, tweelede kwiibaluka lulayo lwa Paulo lumbi kuli Timoteo lwakuti: “Bayoosinka matwi aabo [bantu baswiilila kujwi lyabeenzu] kumakani menimeni, bakagame kuswiilila zyamankwangwaalizya. Pele yebo kolibamba kuzintu zyoonse.” (2 Timoteo 2:22; 4:3-5) Libote, libote buti ijwi lyabeenzu, atubatije boonse ibanga banyonyoona lusyomo lwesu.—Intembauzyo 26:5; Tusimpi 7:5, 21; Ciyubunuzyo 18:2, 4.
21. Ino mbulumbu nzi mbobalangila aabo ibalikaka ijwi lyabeenzu?
21 Ikwiinda mukulikaka cakusinizya ijwi lyabeenzu, Banakristo bananikidwe amuuya batobela majwi aa Mweembezi Mubotu aali kuli Luka 12:32. Ooko Jesu ubaambila kuti: “Mutayoowi, nokatanga kaniini, nkaambo Usowanu ulakondwa kumupa bwami bwakwe.” Mbubwenya buyo, iba “mbelele zimwi” abalo balalangila calusyomo kapati ikumvwa majwi aa Jesu aakuti: “Amuboole, inywe nomuyandwa kuli-Taata, amukone bwami mbumubambilidwe kuzwa kumalengelo aanyika.” (Johane 10:16; Matayo 25:34) Elo bulakatalusya kapati kaka bulumbu mbotulangila ikuti twalikaka “ijwi lyabeenzu”!
Sena Muciyeeyede?
• Ino Saatani ubweelela buti bupanduluzi bwamweenzu waambwa mucikozyanyo ca Jesu cacaanda cambelele?
• Ino mbuti ijwi lyabeenzu mbolimvwugwa sunu?
• Ino mbuti mbotunga twalizyiba ijwi lyabeenzu?
• Ino tweelede kucita buti ajwi lyabeenzu?
[Mibuzyo yaciiyo]
[Cifwanikiso icili apeeji 32]
Ino tucita buti ajwi lyabeenzu?