Ibabelesi Ba Jehova Ibakkomene
Ibabelesi Ba Jehova Ibakkomene
“[Balikkomene] bacete mumuuya.”—MATAYO 5:3.
1. Ino lukkomano lwini-lwini ninzi, alimwi lutondezya nzi?
IBANTU ba Jehova balalubikkila maano kapati lukkomano ndobajisi. Sitembauzyo Davida wakoompolola kuti: “[Balikkomene] bantu bajisi Jehova kuba Leza wabo!” (Intembauzyo 144:15) Kukkomana nkulimvwa kabotu. Ilukkomano lwini-lwini ndotujisi lulaboola kwiinda mukuzyiba kuti tuli longezyedwe a Jehova. (Tusimpi 10:22) Lukkomano luli boobu lutondezya kuti tulijisi cilongwe cini-cini a Taateesu wakujulu alimwi aluzyibo ndotujisi lwakuti tuli mukucita kuyanda kwakwe. (Intembauzyo 112:1; 119:1, 2) Icikkomanisya ncakuti, Jesu wakandandamika twaambo tuli fwuka tutupa kukkomana. Ikulanga-langa twaambo ootu tutupa kukkomana mucibalo eeci alimwi acitobela, kuyootugwasya kuzyiba mbotuyookkomana kuti twamubelekela cakusyomeka Jehova ‘Leza uukkomene.’—1 Timoteo 1:11.
Kuzyiba Nzyotuyandika Kumuuya
2. Ino ncinzi cakali kucitika Jesu naakaamba kujatikizya kukkomana, alimwi ntwaambo nzi ntwaakatalisya kukanana?
2 Mu 31 C.E., Jesu wakapa makani aazyibidwe kapati kuzwa kaindi. Aitwa kuti Mulumbe waa Cilundu nkaambo Jesu wakaabandika naakali kumbali aacilundu, mpolwakali kulibonya kabotu Lwizi lwa Galilaya. Makani Mabotu aa Matayo aamba kuti: “Lino [Jesu] naakabona makamu makamu aabantu wakatanta acilundu. Akale buyo, basikwiiya bakwe bakaswena kulinguwe, elyo wakabbanuna mulomo wakwe, wakabaiisya kuti, [Balikkomene] bacete mumuuya, nkaambo Bwami bwakujulu mbubwabo.”—Matayo 5:1-3.
3. Ino mbuti kulicesya mbokupa kuti katukkomana?
3 Mu Mulumbe waa Cilundu, Jesu wakaamba kuti imuntu ulakkomana kapati ikuti kazizyi zintu zyayandika kumuuya. Ibanakristo balicesya balizyi kuti balabisya, aboobo balamulomba Jehova kuti abalekelele kwiinda mucinunuzyo cacipaizyo ca Kristo. (1 Johane 1:9) Ibacita boobo balaba aluumuno mumizeezo alimwi alukkomano lwini-lwini. ‘Ulikkomene muntu uulekelelwa milandu yakwe, uuvwumbililwa zibi zyakwe.’—Intembauzyo 32:1; 119:165.
4. (a) Ino muunzila nzi motukonzya kuzyiba nzyotuyandika kumuuya anzyobayandika bamwi? (b) Ino ncinzi ciyungizya lukkomano lwesu notuzyiba nzyotuyandika kumuuya?
4 Ikuzyiba nzyotuyandika kumuuya kutupa kuti katubala Bbaibbele abuzuba kutegwa tugwasyigwe kapati acakulya cakumuuya cipegwa “kuciindi ceelede” a “muzike musyomesi uucenjede” alimwi akujanika kumiswaangano ya Banakristo lyoonse. (Matayo 24: 45; Intembauzyo 1: 1, 2; 119:111; Ba-Hebrayo 10:25) Ikuyanda basimukoboma kutupa kuti tuzizyibe nzyobayandika bamwi kumuuya alimwi citupa kuti tube basungu mukukambauka amukuyiisya makani mabotu aa Bwami. (Marko 13:10; Ba-Roma 1:14-16) Kubandika kasimpe kamu Bbaibbele abamwi kutupa kukkomana. (Incito 20:20, 35) Kukkomana kulazumanana notuzinzibala kuyeeya bulangizi bubotu bwa Bwami azilongezyo ziya kuletwa a Bwami oobu. ‘Kukatanga kaniini’ ka Banakristo bananike, ibulangizi bwa Bwami caamba kuba abuumi butafwi kujulu kabali Bami mumfwulumende ya Kristo. (Luka 12:32; 1 Ba- Korinto 15:50, 54) Kuli baabo bambelele zimwi caamba kuba abuumi butamani muparadaiso anyika kabeendelezyegwa amfwulumende ya Bwami oobo.—Johane 10:16; Intembauzyo 37:11; Matayo 25:34, 46.
Mbobakonzya Kukkomana Ibalila
5. (a) Ino majwi aakuti “abo balila” aamba nzi? (b) Ino baumbulizyigwa buti aabo balila?
5 Majwi aali mulukkomano lutobela ndwaakaamba Jesu aboneka mbuli kuti alakazyanya. Wakati: “[Balikkomene] abo balila, nkaambo bazooumuzigwa.” (Matayo 5:4) Ino mbuti muntu mbwakonzya kulila kumwi kakkomene? Ikutegwa tucimvwisye kabotu ncaakali kwaamba Jesu, tweelede kukuzyiba kulila nkwaakali kwaamba. Sikwiiya Jakobo wakapandulula kuti ikuba basizibi kutupa kulila. Wakalemba kuti: “Amusanzye maanza aanu, anywebo nobasizibi. Amulisalazye kumyoyo, nywebo nobasimyoyo-yobile. Amoomoke akuungumana akulila. Kuseka kwanu akusanduke kulila, alwalo lukondo lwanu alusanduke kuungumana. Amukalibombye kumeso aa-Mwami [Jehova], akamusumpule.” (Jakobo 4:8-10) Aabo balimvwa bubi nobabisya balaumbulizyigwa nobaiya kuti zibi zyabo ziyoolekelelwa ikuti babikka lusyomo mucinunuzyo cacipaizyo ca Kristo akutondezya kweempwa kwini-kwini kwiinda mukucita kuyanda kwa Jehova. (Johane 3:16; 2 Ba-Korinto 7:9, 10) Bamana balakonzya kuba acilongwe ciyumu a Jehova akuba abulangizi bwakupona kukabe kutamani, kabamubelekela akumutembaula. Eeci cibaletela lukkomano lwini-lwini.—Ba-Roma 4:7, 8.
6. Ino munzila nzi bamwi mobalila, alimwi mbuti mbubaumbulizyigwa?
6 Ikaambo nkaakaamba Jesu kalabikkilizya abaabo balila akaambo kakusesemya kwabukkale budumide munyika. Jesu wakali kulyaamba mwini mubusinsimi bwa Isaya 61:1, 2 kuti: “Muuya wa-Mwami Jehova mpuuli alindime, nkaambo Jehova wandinanika kuti nkambaukile bacete makani mabotu, wandituma kuzooanga batyokede mumyoyo, . . . kuumbulizya boonse balila.” Ooyu mulimo ulabajatikizya abalo Banakristo bananike bacili anyika, balo babelekela antoomwe abeenzinyina ba “mbelele zimwi.” Boonse babelekela antoomwe mukucita mulimo wacikozyanyo wakulemba ankumo “zyabantu boonse balila akutongela nkaambo kazisesemyo zyoonse zicitwa mukati kawo [Jerusalemu sikuzanga wiiminina Bunakristo bwanyika].” (Ezekieli 9:4) Ibalila munzila eeyo balaumbulizyigwa a “Makani Mabotu aa-Bwami.” (Matayo 24:14) Balikkomene kuzyiba kuti ibweende bubyaabi bwazintu bwa Saatani buya kugusyigwa ino-ino akunjililwa busena anyika mpya ya Jehova yabululami.
Balikkomene Aabo Balibombya
7. Ino ncinzi ncolitaambi ibbala lyakuti ‘kulibombya’?
7 Jesu wakazumanana a Mulumbe wakwe waa Cilundu kati: “[Balikkomene] abo balibombya, nkaambo bazoovuba nyika.” (Matayo 5:5) Kulibombya zimwi ziindi kuyeeyelwa kuti nkukompama. Pele oobu tabusyi mbukubede pe. Ikupandulula muzeezo wini uuli mubbala lyakuti ‘kulibombya,’ umwi sikwiiya Bbaibbele wakalemba kuti: “Ibube bubotu bwamuntu [uulibombya] mbwakuti ulalyeendelezya kabotu. Ikulibombya tacaambi kuba muntu mutolo uutakonzyi kulisalila zintu, uucita zintu kweelana ambwaziyanda, uutatoli lubazu muzintu nzyobacita bamwi. Kulibombya ninguzu izyeendelezyegwa.” Jesu wakalyaamba mwini naakati: “Ndi mutete moyo, lino mulakatulukwa mumyoyo yanu.” (Matayo 11:29) Pele Jesu wakali sicamba mukukwabilila njiisyo ziluleme.—Matayo 21:12, 13; 23:13-33.
8. Ino kulibombya kuswaangenyi kapati anzi, alimwi ino nkaambo nzi bube oobu ncobuyandika notumvwana abamwi?
8 Aboobo, kulibombya kuliswaangenyi kapati akulyeendelezya kabotu. Masimpe, kulibombya alimwi akulyeendelezya wakazyibikka mumulongo omwe imwaapostolo Paulo naakali kwaamba “micelo ya-muuya.” (Ba-Galatiya 5:22, 23) Ikulibombya kulakonzya kutondezyegwa kwiinda mukugwasyigwa amuuya uusalala. Mbube bwa Bunakristo bupa kuti kube luumuno abatasyomi alimwi abaabo bali mumbungano. Paulo wakalemba kuti: “Amulisamike moyo waluzyalo, buuya, lulifwiinsyo, lubombo alimwi abusicamba. Amukazikilane myoyo yanu akulekelelana.”—Ba-Kolose 3:12, 13.
9. (a) Nkaambo nzi ikulibombya ncokutaimini buyo kubeenzuma? (b) Ino aabo balibombya ‘bazoovwuba buti nyika’?
9 Nokuba boobo, ikulibombya takwiimini buyo akumvwana abantu bamwi. Ikwiinda mukulisungula kutobela bweendelezi bwa Jehova, tutondezya kuti tulalibombya. Iwakapa citondezyo cibotu mumakani aaya wakali Jesu Kristo walo naakali anyika wakatondezya kulibombya alimwi wakatobela kuyanda kwa Bausyi. (Johane 5:19, 30) Jesu nguwakasaanguna kukona nyika nkaambo ngo Mweendelezi wanyika uubikkidwe. (Intembauzyo 2:6-8; Daniele 7:13, 14) Ulaabana cikono eeci aba 144,000 balo bali ‘mbaswaana bakwe’ bakasalwa kuzwa akati kabantu kuti ‘beendelezye ansi mbuli bami.’ (Ba-Roma 8:17; Ciyubunuzyo 5:9, 10; 14:1, 3, 4; Daniele 7:27) Kristo abasikulelanyina bayooyendelezya tuluunzuma twabaalumi abamakaintu bali mbuli mbelele. Aali baaba intembauzyo yabusinsimi iyoozuzikizyigwa: “Babombemyoyo bayoovuba nyika, bayookondwa muluumuno lunji.”—Intembauzyo 37:11; Matayo 25:33, 34, 46.
Balikkomene Aabo Bafwa Nzala Yabululami
10. Munzila nzi aabo bafwa ‘nzala alimwi anyota yabululami’ mbobakonzya kusaninwa akukkuta?
10 Ilukkomano lutobela lwakaambwa a Jesu naakali kubandika kumbali aacilundu ca Galileya ndwakuti: “[Balikkomene] abo bafwa inzala yabululami anyota yambubo, nkaambo bazookuta.” (Matayo 5:6) Ku Banakristo, Jehova wabikka zyeelelo zyabululami. Aboobo, aabo bafwa nzala anyota yabululami balacita oobo akaambo kakuyanda kusololelwa a Leza. Bantu bali boobu balikuzyi kulubizya akutalondoka kwabo, aboobo balombozya kuti Jehova abazumine. Balikkomene kapati nobayiiya Jwi lya Leza kuti, ikuti beempwa alimwi akulomba kulekelelwa kwiinda mucituuzyo cacinunuzyo ca Kristo, balakonzya kubonwa kuba balulami kuli Leza!—Incito 2:38; 10:43; 13:38, 39; Ba-Roma 5:19.
11, 12. (a) Mbuti bananike Banakristo mbobaba balulami? (b) Mbuti nyota yabululami yabeenzinyina bananike mboimana?
11 Jesu wakaamba kuti bantu bali boobu balakonzya kukkomana nkaambo “bazookuta.” (Matayo 5:6) Ibanakristo Bananike ibaitwa kuti bakalele kabali bami a Kristo kujulu baambwa kuti ‘mbalulami.’ (Ba-Roma 5:1, 9, 16-18) Jehova ulababwezya kuti babe bana bakwe bakumuuya. Balaba basikulelanyina a Kristo, wabaita kuti babe bami alimwi abapaizi mumfwulumende yakwe ya Bwami bwakujulu.—Johane 3:3; 1 Petro 2:9.
12 Beezinyina abananike tabanaambwa kuti mbalulami mubuumi bwabo boonse. Nokuba boobo, kuli Jehova baliluleme akaambo kalusyomo lwabo mubulowa mbwaakatila Kristo. (Jakobo 2:22-25; Ciyubunuzyo 7:9, 10) Baambwa kuti baliluleme kabali beenzinyina a Jehova ibalangilwa kuyoofwutuka kuciindi ‘camapenzi mapati.’ (Ciyubunuzyo 7:14) Nyota yabo yabululami iyoomana baakuba mububambe bwanyika impya mwalo “ijulu ipya” moiya kweendelezya alimwi ‘momuyooba bululami.’—2 Petro 3:13; Intembauzyo 37:29.
Balikkomene Beetelezi
13, 14. Ino muunzila nzi motukonzya kutondezya kuti tuli basilweetelelo, alimwi ino mbulumbu nzi mbotujana?
13 Kazumanana a Mulumbe wakwe waa Cilundu, Jesu wakati: “[Balikkomene] beetelezi, nkaambo mbabonya bazooetelelwa.” (Matayo 5:7) Mumulawo, ibweetelezi ndubomba ndwatondezya mubetesi natapi cisubulo ciyandika kweelana amulawo kumuntu wacita mulandu. Pele, kweelana ambolubelesyedwe mu Bbaibbele, mabala eeni apandulula ‘lweetelelo’ ziindi zinji aamba ikutondezya lubomba naa luse lwalo lukonzya kupa kuti aabo bapengede bakatalukwe. Aboobo, ibeetelezi batondezya kuti bali aluzyalo. Cikozyanyo camu Samariya siluzyalo ncakaamba Jesu, ncitondezyo cibotu camuntu ‘wakafwida luzyalo’ muntu wakali kuyandika lugwasyo.—Luka 10:29-37.
14 Kutegwa tube alukkomano lujanwa kwiinda mukuba beetelezi, tweelede kucita milimo mibotu yalubomba kuli baabo bapengede. (Ba-Galatiya 6:10) Jesu wakabafwida luzyalo bantu mbaakabona. “Wakabafwida luzyalo, nkaambo bakabaanga nimbelele zitakwe mweembezi, nkabela wakatalika kubaiisya makani manji.” (Marko 6:34) Jesu wakazyiba kuti bantu ncobakali kuyandika kapati zintu zyakumuuya. Andiswe tulakonzya kutondezya luzyalo alimwi alweetelelo kwiinda mukubandika abamwi zintu nzyobayandika kapati—“Makani Mabotu aa-Bwami.” (Matayo 24:14) Tulakonzya kubagwasya Banakristoma ibacembede, bamukabafwu, bamusyaala alimwi ‘akubaumbulizya batyompedwe mumyoyo.’ (1 Ba-Tesalonika 5:14; Tusimpi 12:25; Jakobo 1:27) Eeci tacikatupi buyo kukkomana, pele alimwi ciyootupa kuti tukeetelelwe a Jehova.—Incito 20:35; Jakobo 2:13.
Basalala Mumyoyo Alimwi Basikutontozya
15. Mbuti mbotukozya kusalala mumoyo akuba basikutontozya?
15 Jesu wakandandamika kukkomana kwacisambomwi akwaciloba munzila iili boobu: “[Balikkomene] abo basalala mumyoyo, nkaambo bazoobona Leza. [Balikkomene] basikutontozya, nkaambo bazootegwa bana ba-Leza.” (Matayo 5:8, 9) Kusalala mumoyo tacaambi buyo kulilemeka kabotu pe, pele muntu weelede kusalala kumuuya akulyaaba kuli Jehova. (1 Makani 28:9; Intembauzyo 86:11) Basikutontozya balakkala kabotu a Banakristonyina. Ikuti kabakonzya balacita oobo akuli basimukobonyina. (Ba-Roma 12:17-21) ‘Balayandaula luumuno akulutobela.’—1 Petro 3:11.
16, 17. (a) Ino bananike baitilwa nzi kuti ‘mbana ba Leza,’ alimwi ino mbuti ‘mbobamubona Leza’? (b) Ino ba “mbelele zimwi” ‘bamubona buti Leza’? (c) Ino muunzila nzi alimwi ndilili mubwini “mbelele zimwi” noziyooba “bana ba-Leza”?
16 Basikutontozya basalala mumoyo basyomezyegwa kuti “bazootegwa bana ba-Leza” alimwi “bazoobona Leza.” Ibanakristo bananike balisalidwe amuuya alimwi Jehova wakabasala kuti mbana bakwe nobacili anyika. (Ba-Roma 8:14-17) Nobabusyigwa kuti babe a Kristo kujulu balabeleka kaliko Jehova alimwi balamubona.—1 Johane 3:1, 2; Ciyubunuzyo 4:9-11.
17 ‘Ibambelele zimwi’ basikutontozya balamubelekela Jehova kabeendelezyegwa a Mweembezi Mubotu, Kristo Jesu walo uuli ngo ‘Usyi wabo Uuteeli.’ (Johane 10:14, 16; Isaya 9:6) Aabo ibayoozunda mumusunko wamamanino caakwiinda cuulu camyaka ca Bulelo bwa Kristo, Jehova uyoobabweza kuti bakabe bana bakwe baanyika alimwi “babe abulubulo bulemu bwabana ba-Leza.” (Ba-Roma 8:21; Ciyubunuzyo 20:7, 9) Nobacilangila kuti eeci cikacitike, baita Jehova kuti ngu Usyi wabo mbwaanga bakalyaaba kulinguwe, akumuzyiba kuti ngo Sikubapa Buumi. (Isaya 64:8) Mbuli Jobu a Musa bansiku, balakonzya kumubona Leza ameso aalusyomo. (Jobu 42:5; Ba-Hebrayo 11:27) Kwiinda mukubelesya ‘meso aamyoyo yabo’ aluzyibo lwini-lwini lwa Leza, balazyiba bube bwa Jehova bubotu alimwi balasoleka kumwiiya Leza kwiinda mukucita kuyanda kwakwe.—Ba-Efeso 1:18; Ba-Roma 1:19, 20; 3 Johane 11.
18. Ikweelana alukkomano lwakusaanguna luli ciloba lwakandandamikwa a Jesu, mbaani bali alukkomano lwini-lwini mazubaano?
18 Twabona kuti ibacete kumuuya, ibalila, ibalibombya, ibafwa nzala yabululami anyota yambubo, ibeetelezi, ibasalala mumyoyo abasikutontozya balajana lukkomano lwini-lwini mukubelekela Jehova. Ibali boobu lyoonse balakazyigwa nekuba kupenzyegwa. Sena eeci cinyonganya lukkomano lwabo? Ooyu mubuzyo uyoolangwa-langwa mucibalo citobela.
Ikwiinduluka
• Ino ndukkomano nzi ndobaba andulo aabo bacete kumuuya?
• Ino muunzila iili buti aabo balila mobaumuzyigwa?
• Mbuti mbotutondezya kulibombya?
• Nkaambo nzi ncotweelede kuba beetelezi, basalala kumuuya alimwi abasikutontozya?
[Mibuzyo yaciiyo]
[Cifwanikiso icili apeeji 23]
“[Balikkomene] bacete mumuuya”
[Zifwanikiso izili apeeji 23]
“[Balikkomene] beetelezi”
[Cifwanikiso icili apeeji 23]
“[Balikkomene] abo bafwa inzala yabululami anyota yambubo”