Twaambo Tupati-pati Kuzwa mu Bbuku lya Joshua
Ijwi lya Jehova Lili Abuumi
Twaambo Tupati-pati Kuzwa mu Bbuku lya Joshua
KABAYAKIDE zilabba muzibanda zya Moabu mumwaka wa 1473 B.C.E., bana Israyeli beelede kuti bakakkomana kumvwa majwi aakuti: “Amwiinde koonse koonse akati kazilao, mwaambile bantu kuti, Amulibambile zyakulya, nkaambo amana buyo mazuba otatwe, muyoozubuka oyu mulonga wa-Jordano kuyoovuba nyika eyo Jehova Leza wanu njamukonya.” (Joshua 1:11) Lweendo lwabo lwamunkanda lwa myaka iili 40 lulaafwaafwi kumana.
Nokwakainda makumi amyaka yobile, musololi wabo Joshua wakaima akati kanyika ya Kanana akwaambila baalumi bapati ba Israyeli kuti: “Amubone! Ndamwaabila ezi zisi zisyeede, kuti zivubwe kumikowa yanu, kuzwa ku-Jordano, amisyobo yoonse njindanyonyoona, mane kusikila kulwizi lupati lwakububbila. Jehova Leza wanu nguuti kabatande kubusyu bwanu akubasaala kumeso aanu, kuti muvube nyika yabo, mbubonya Jehova Leza wanu mbwaakamwaambila.”—Joshua 23:4, 5.
Ibbuku eeli lya Joshua ilyakalembwa a Joshua mu 1450 B.C.E., liluula makani aansiku aakkomanisya aakacitika mumyaka eeyo ili 22. Mbotuli kumamanino kwini kwanyika mpya yakasyomezyegwa, bukkale bwesu buleelene abwabana Israyeli bakalibambilide kubweza Nyika Yakasyomezyegwa. Icabusungu, atulange-lange bbuku lya Joshua.—Ba-Hebrayo 4:12.
KUUNKA “KUMABANDA AA-JERIKO”
Joshua wapegwa mulimo mupati ncobeni Jehova namwaambila kuti: “Musa mulanda wangu wafwa. Lino buka, uzubuke oyu mulonga wa-Jordano, uwe abantu aba boonse, kuti muye kunyika ilya njinti bape bana ba-Israyeli.” (Joshua 1:2) Mulimo wa Joshua ngwakusololela tuluunzuma tunji twabantu ku Nyika Yakasyomezyegwa. Kulibambila mulimo ooyu, watuma basikutwela bobilo ku Jeriko, imunzi weelede kusaanguna kuzunda. Mumunzi oomu kukkala Rahabu sibwaamu, iwakamvwa zyamilimo mipati Jehova njacitilide bantu bakwe. Wabakwabilila alimwi akubagwasya basikutwela alimwi bamusyomezya kuti uyoofwutulwa.
Nobapiluka basikutwela, Joshua alimwi abantu balilibambilide kweenda akuzabuka mulonga wa Jordano. Nokuba kuti mulonga ulipaide, tiwabasinkila pe, Jehova wapa kuti meenda aali kumulundu kwamulonga aleke kweenda mbuli kuti alisinkilidwe, calo capa kuti mulonga nkuuli kunselelo meenda amane akaambo kakukunkila mu Lwizi Lutajisi Buumi. Nobazabuka mulonga wa Jordano, bana Israyeli bakakkala ku Giligala afwaafwi a Jeriko. Nokwainda mazuba aali one, ciindi camangolezya mubuzuba bwakkumi aane bwamwezi wa Abibi, bacita ipobwe lya Pasika kumabanda a Jeriko. (Joshua 5:10) Buzuba bwatobela, batalika kulya zyakulya zyamunyika alimwi bubambe bwakulya mana bwamana. Muciindi eeco, Joshua wapalula bana basankwa boonse bakazyalilwa mukanda.
Mibuzyo Yamu Magwalo Iingulwa:
2:4, 5—Nkaambo nzi Rahabu ncaabacengela balombwana batumwa amwami ibayandaula basikutwela? Rahabu wabakwabilila basikutwela nokuba kuti eeci cimubikka muntenda nkaambo watalika kuba alusyomo muli Jehova. Aboobo tayandi kuyubununa basikutwela kubalombwana ibayanda kunyonyoona bantu ba Leza. (Matayo 7:6; 21:23-27; Johane 7:3-10) Masimpe, Rahabu ‘walulamikwa kumilimo’ kubikkilizya amicito yakubatondezya imbi nzila batumwa ba mwami.—Jakobo 2:24-26.
5:14, 15—Nguni “silutwe wamakamu aa-Jehova”? Silutwe waboola kuyumya-yumya Joshua kumatalikilo aakuzunda Nyika Yakasyomezyegwa weelede kuti ngu “Ijwi”—Jesu Kristo katanaba muntunsi. (Johane 1:1; Daniele 10:13) Cilakulwaizya kaka ikuzyiba kuti Jesu Kristo uulemekwa uli abantu ba Leza mazubaano nobali munkondo eeyi yakumuuya.
Ziiyo Kulindiswe:
1:7-9. Ikubala Bbaibbele lyoonse, alimwi akuzinzibala kuyeeya ncolyaamba lyoonse, akuzibelesya nzyotwiiya cilayandika kutegwa tuzwidilile kumuuya.
1:11. Joshua walomba bantu kuti babambe zyakulya aziyandika zimwi kutali kulindila Leza kuti ababambile. Kukulwaizya kwa Jesu kwakutalibilika azintu zyiyandika mubuumi, antoomwe acisyomezyo cakwe cakuti “elyo zintu ezi zyoonse mulaziyungizizigwa azyalo,” tacaambi kuti tatweelede kusoleka kuligwasya pe.—Matayo 6:25, 33.
2:4-13. Naakamana kumvwa zyamilimo ya Jehova iigambya alimwi akuyeeya kuti bukkale mwaakabede mwakali katazyide, Rahabu wakasala kugwasya bakombi ba Jehova. Ikuti kamuli mwalikwiiya Bbaibbele kwaciindi cili mbocibede alimwi mwazyiba kuti tupona “kumazuba aakumamanino,” sena tamukonzyi kusala kubelekela Leza?—2 Timoteo 3:1.
3:15. Mbwaanga makani aakaleta basikutwela bakatumwa ku Jeriko akali mabotu, Joshua wakabweza ntaamo cakufwambaana kakunyina kulindila meenda amumulonga wa Jordano kuti ayuminine. Kujatikizya makani abukombi bwakasimpe, tweelede kubelekelawo cabusicamba muciindi cakuccelwa kusikila bukkale bwalibonya kabotu.
4:4-8, 20-24. Mabwe aali 12 aabwezyegwa akati kamulonga wa Jordano ngakubayeezya bana Israyeli. Milimo ya Jehova yakufwutusya bantu bakwe mazubaano kuli basinkondonyina nciibalusyo cakuti uli ambabo.
KUZUNDA KUCIZUMANANA
Munzi wa Jeriko ‘ulijalidwe loko, taakwe muntu uzwa anze alimwi taakwe unjila mukati.’ (Joshua 6:1) Ino munzi ulazundwa buti? Jehova wamupa Joshua nzila yakucitila boobo. Mukaindi buyo kasyoonto bwaanda bwawa, eelyo munzi wanyoonyonwa. Rahabu alikke alimwi abamukwasyi wakwe mbabafwutuka.
Kuzunda kutobela nkwamunzi mupati wa Ai. Basikutwela bakaamba kuti mumunzi mwakali bantu basyoonto, aboobo takuyandiki balombwana banji kukulwana. Nokuba boobo, basikalumamba bali 3,000 batumwa kuya kulwana munzi babatija balombwana bana Ai. Kaambo nzi? Jehova tali abana Israyeli pe. Akani waluzubo lwa Juda wakabisya Jeriko naakali kulwanwa. Nobamana kululamika makani, Joshua waulwana munzi wa Ai. Mbwaakabazunda bana Israyeli kwaciindi comwe, mwami waku Ai uliyandide kulwana ambabo. Pele Joshua camubeda coolwe kulisyoma nkobajisi balombwana baku Ai, aboobo Joshua wauzunda munzi.
Gibeoni mmunzi mupati kwiinda Ai alimwi balombwana bamumo boonse mbabasinguzu. (Joshua 10:2) Nobamvwa zyakuzwidilila nkobacita bana Israyeli kumunzi wa Jeriko alimwi a Ai, balombwana baku Gibeoni bacenga Joshua kutegwa apange cizuminano caluumuno ambabo. Misyobo iibazungulukide yabona kuti ikucita boobu cibaletela ntenda. Bami baminzi ibali bosanwe bapangana cizuminano, eelyo balwana bana Gibeoni. Bana Israyeli babavwuna bana Gibeoni alimwi akubazunda basinkondonyina. Kuzunda akumwi kwabana Israyeli kabasololelwa a Joshua kulabikkilizya aminzi ili kumusanza alimwi akumbo, kubikkilizya abami bakunyika bakabambide cizuminano. Bami bakazundwa kumbo kwa Jordano bakasika ku 31.
Mibuzyo Yamu Magwalo Iingulwa:
10:13—Ino cintu cigambya boobu cakakonzyeka buti? “Sa kuli cintu niciba comwe ciyumu kuli-Jehova,” Mulengi wakujulu anyika? (Matalikilo 18:14) Ikuti wayanda, Jehova ulakonzya kukweendelezya kweenda kwanyika kutegwa izuba alimwi amwezi kaziboneka kuti ziliimvwi kumuntu uuzilanga kali anyika. Alimwi ulakonzya kwiilekela nyika amwezi kuzumanana kweenda kumwi mitungazuba kaikonzya kubala amwezi alimwi anyika ikutegwa mumuni uzumanane kuba. Kufwumbwa naa cakali buti, ‘taakwe nokwakali buzuba buli boobu’ kuzwa bantu nobakalengwa.—Joshua 10:14.
10:13—Ino bbuku lya Jasari ncinzi? Ibbuku eeli lilaambidwe alimwi ku 2 Samuele 1:18 kwalo ikwaambwa kweema kwiitwa kuti “Lwiimbo Lwabuta,” nkokuti lwiimbo lwakuusa lujatikizya Mwami Saulo waku Israyeli amwanaakwe Jonatani. Kweelede kuti ibbuku lyakajisi nyimbo alimwi akweema kujatikizya makani aansiku alimwi kuboneka kuti lyakalizibidwe kapati akati kabana Hebrayo.
Ziiyo Kulindiswe:
6:26; 9:22, 23. Ikusinganya Joshua nkwaakaamba munzi wa Jeriko nowakanyonyoonwa kwazuzikizyigwa nokwainda myaka iili 500. (1 Bami 16:34) Ikusinganya kwa Nowa nkwaakasinganya muzyukulu wakwe Kanana kwazuzikizyigwa bana Gibeoni nobaba babelesi. (Matalikilo 9:25, 26) Ijwi lya Jehova lyoonse lilazuzikizyigwa.
7:20-25. Ibamwi baamba kuti bubbi bwa Akani tiikakali kaambo kapati, ambweni kabayeeya kuti kunyina nokwakapenzya bamwi pe. Balakonzya kuti kubba tuntu tusyoonto naa kucita milandu misyoonto iikasyigwa mu Bbaibbele kabakubona munzila njimunya eeyo. Pele swebo tweelede kuba mbuli Joshua mumakanze eesu aakukaka kuyungwa kusotoka mulawo naa kucita milimo yakutalilemeka.
9:15, 26, 27. Tuleelede kubikkila maano kuzizuminano nzyotubamba akuzizuzikizya.
JOSHUA WABWEZA MULIMO MUPATI WAMAMANINO
Joshua wacembala lino. Kajisi myaka iili 90 watalika kwaabanya nyika. Ooyu mmulimo mupati citaambiki. Imusyobo wa Rubeni, Gadi alimwi acisela camusyobo wa Manase batambula kale cikono cabo kujwe lya Jordano. Imisyobo yacaala lino ilapegwa cikono kulubazu lwakumbo kwiinda mukuwaala cisolo.
Itente lyakubunganina lyayakwa ku Silo mucilawo ca Efraimu. Kalebe wapegwa munzi wa Hebroni, eelyo Joshua wabweza wa Timinati-sera. Bana Levi bapegwa minzi iili 48, kubikkilizya aminzi yamayubilo iili 6. Nobapilukila kuzyaabilo zyabo kujwe kwa Jordano, basikalumamba ba Rubeni, Gadi alimwi acisela camusyobo wa Manase bayaka cipaililo “cipati kukulanga.” (Joshua 22:10) Imisyobo iili kumbo kwa Jordano eeci yacibona kuti mbuzangi, aboobo nkondo akati kamisyobo yali kuyanda kubuka, pele yalesyegwa akaambo kakukanana kabotu.
Joshua naakkala kwaciindi cili mbocibede mu Timinati-sera, waita bapati, basilutwe, babetesi alimwi abasimilimo ba Israyeli akubakulwaizya kuti babe basicamba alimwi akuzumanana kusyomeka kuli Jehova. Kumane boobo, Joshua wabunganya misyobo yoonse ya Israyeli ku Sekemu. Abusena oobu wainduluka milimo ya Jehova kuzwa kuciindi ca Abrahamu kuya kumbele alimwi wabakulwaizya “[kuyoowa] Jehova akumumanina milimo cakululama acakusinizya.” Ibantu bakulwaizyigwa kwiingula kuti: “Jehova Leza wesu ngututi manine milimo, ajwi lyakwe ndituti swiilile.” (Joshua 24:14, 15, 24) Nizyamana zyoonse eezi, Joshua wafwa kajisi myaka iili 110.
Mibuzyo Yamu Magwalo Iingulwa:
13:1—Sena eeci tacikazyanyi acaambidwe kuli Joshua 11:23? Peepe, nkaambo kakuti ikuzunda Nyika Yakasyomezyegwa kwakalijisi mbazu zyobilo, nkokuti: Inkondo yacisi yalo yakazunda bami banyika ya Kanana ibali 31, yalo yakamana nguzu zyabana Kanana, alimwi akwiibwezelalyo nyika kwakacitwa amisyobo kubikkilizya ankondo zyakalwana bamwi. (Joshua 17:14-18; 18:3) Nokuba kuti bana Israyeli bakakakilwa kubatandilalyo bana Kanana, ibakacaala kunyina nobakali kubapa kulibilika pe. (Joshua 16:10; 17:12) Ibbuku lya Joshua 21:44 lyaamba kuti: “Jehova wakabapa luumuno kumazuba oonse.”
24:2—Sena Tera bausyi Abrahamu bakali kukomba mituni? Kumatalikilo Tera tanaakali mukombi wa Jehova Leza pe. Kuboneka kuti wakali kukomba leza wamwezi uutegwa Sini, leza wakajisi mpuwo ku Uri. Kweelana azilengwa zyaba Juda, Tera ambweni wakali kubamba mituni. Nokuba boobo, Abrahamu naakaambilwa a Leza kuti alonge kuzwa ku Uri, wakaunka a Tera ku Harani.—Matalikilo 11:31.
Ziiyo Kulindiswe:
14:10-13. Nokuba kuti ujisi myaka iili 85, Kalebe walomba kuti acite mulimo uutalikomeneni wakutanda bantu mucilawo ca Hebroni. Ibusena oobu bukkedwe abantu bategwa ba Anaki, ibantu bapati kapati. Kwiinda mukugwasyigwa a Jehova, ooyu sikalumamba uucibwene wazwidilila, eelyo munzi wa Hebroni waba wamayubilo. (Joshua 15:13-19; 21:11-13) Cikozyanyo ca Kalebe citukulwaizya kuti tatweelede kukaka milimo iikatazya iijatikizya bweendelezi bwa Leza.
22:9-12, 21-33. Tweelede kucenjela kutegwa tutabayeeyeli mbubatayeeyi bantu.
‘Taakwe Jwi Niliba Lyomwe Ilyawida Aansi’
Naacembala, Joshua waambila baalu boonse bajisi mikuli mu Israyeli kuti: “Taakwe cintu niciba comwe icakawida ansi akati kazintu zibotu zyoonse Jehova Leza wanu nzyakaamba aandinywe. Zyoonse buyo zyakacitika.” (Joshua 23:14) Elo kaka makani aansiku aajatikizya Joshua alacisalazya eeci!
Mwaapostolo Paulo wakalemba kuti: “Makani aali boobo aakalembwa kalekale, nkukwiiya kwesu nkwaakalembelwa, kuti kubukakatilo akubukombelezyo bwamalembe tujane bulangizi bwakutontozya moyo.” (Ba-Roma 15:4) Tulakonzya kuba masimpe kuti bulangizi bwesu muzisyomezyo zya Leza tabuli bwabuyo pe. Kunyina cisyomezyo citakazwidilili; zyoonse ziyoozuzikizyigwa.
[Cifwanikiso icili apeeji 30]
Sena mulizi kaambo kakapa kuti Rahabu sibwaamu aambwe kuti mmululami?
[Cifwanikiso icili apeeji 32]
Ibubbi bwa Akani tiiwakali mulandu muniini pe, wakapa kuti kucitike zintu zibyaabi
Cifwanikiso icili apeeji 32]
“Lusyomo ndolwakadilisya munzi wa-Jeriko.”—Ba-Hebrayo 11:30