Balabaambila Makani Mabotu Basicuulutwi

“BAMULETELA makani aajatikizya zyakumuuya!” Mbwaakabaamba oobu ino-ino Bakamboni ba Jehova baswaya kubusena nkwakkala mweendelezi wabusena bukkala basicisi beni-beni ku Navalcarnero, Madrid ku Spain. Ino ncinzi cakamupa kwaamba boobu?

Bunji bwabantu bakkala kubusena oobu butegwa Rosas del Camino mbaasicuulutwi. Nokuba boobo, mbwaanga Bakamboni bakaiya Musyobo Wakutambaika buya waku Spain, balakonzya kubandika abantu bakkala kooku. Mweendelezi wakabalumbaizya Bakamboni akaambo kakulyaaba kuyiisya bantu aaba izili mu Bbaibbele. Wakabona mbobakagwasyigwa akaambo kakubayiisya makani mabotu aa Bwami bantu bakkala kubusena oobo. Ibantu bakkala kubusena oobu, ikapati basicuulutwi naa boofwu balalumba kapati akaambo kakuswaigwa a Bakamboni.

Eulogio uukkala kubusena oobu mmoofwu alimwi ngusicuulutwi, lino ulaiya Bbaibbele a Bakamboni ba Jehova. Buzuba bumwi ciiyo kacili mukucitika, mudaala umwi wakaboola kuli Kamboni akweema ciimbo bantu bakkala kubusena oobu ncobakaanza ikutondezya mbobalumbide. Mutwe waciimbo eeci cakweema ngwakuti, “Ikuba Kamboni.” Cibeela cimwi caamba kuti: “Bapona buumi buli kabotu, buumi bwakulilemeka alimwi balajana busongo bukkomanisya kuzwa kuli Jehova. Balaswaya lyoonse mumaanda nkaambo basyoma Jehova.”

Ikusyoma Jehova ooku nkukupa kuti Bakamboni banji munyika yoonse baiye musyobo wakutambaika buya wabantu basicuulutwi ibali mucisi cabo. Kwiinda munzila eeyi balabaambila basicuulutwi mulumbe wabulangizi uukulwaizya uujanika mu Bbaibbele.