Kusaanguna Bakali Kutandwa, Mpoonya Bakazikutambulwa

MYAKA misyoonto yainda, Santiago amukaakwe Lourdes, bakalongela kudolopo mbotu lya Huillcapata mucisi ca Peru, kuyakukambauka mulumbe wamu Bbaibbele uupa bulangizi. Pele kalitanalampa, mupaizi wacikombelo caba Katolika wakasika kuzwa ku Cuzco akubunganya bantu bamudolopo. Mupaizi wakabacenjezya kuti ikusika kwa Bakamboni ba Jehova kwakali kuyakuleta bulwazi bujaya alimwi acaanda cinji calo ciyakujaya ŋombe azisyango zyabo.

Ibanji bakabusyoma “businsimi” oobu, alimwi kwacisela camwaka taakwe mudolopo wakazumina kwiiya Bbaibbele a Santiago a Lourdes. Nkumenkume iiccilila mweendelezi wadolopo ya zina lya Miguel, yakabatandaanya ba Santiago a Lourdes mumugwagwa, kumwi kayibafwusa mabwe. Pele balo lyoonse bakali kulilemeka munzila ya Bunakristo kabajisi luumuno abantu.

Mukuya kwaciindi bamwi mudolopo bakazumina ciiyo ca Bbaibbele. Naba Miguel wakacinca. Wakatalika kwiiya a Santiago, wakaleka kunywa kapati eelyo wakaba muntu siluumuno. Muciindi Miguel, mukaakwe abana bakwe basimbi bobile bakakazumina kasimpe kamu Bbaibbele.

Sunu mudolopo eeli, mbungano ya Bakamboni ba Jehova yakomena. Miguel ulikkomene kuti bunji bwamabwe ngaakabafwusa ba Santiago a Lourdes tanaakabapwaya, alimwi ulalumba banabukwetene aaba akaambo kacikozyanyo cabo cibotu cakuba basiluumuno.

[Zifwanikiso izili apeeji 32]

Luumuno lwaba Santiago a Lourdes (atala) lwakapa kuti Miguel (kululyo kwini) acince